Madius 18
18
1AN naopan iyehki eris apan ehele Iesu a ilpu atimi atahaijeg yin, um ika, Inyi esjilid a di an nelcau an nohatag? 2Is ahlaig vai inhalav is ethi a Iesu, um ati yin an nuhup ura, 3um ika, Et inivaijec ineig ek asaig ehelemia ainyak mika, El eka eti ahidai caua aijaua, um idivaig ilpu halav, aki ti apan aijaua an nelcau an nohatag: 4aien et upoupo inliinmopon aien um idivaig inhalav ineigki, inyi esjilid aien an nelcau an nohatag: 5aien et leh tah inhalav aien, et idivaig inhalav ineigki, va nidak, et leh nyak aien: 6el et ago nedo oop vai ilpu halav iji eigki tah era asgeig irak ara, el et upene vai yin el er athai inhat irara flaur an nauinwan, um atise yin an namilvai ubou acen.
7A’a, auwe va nobohtan ineigki va nedo oop iran! et ehka intivaig nedo oop atimi; ja a’a, auwe va natimi ineigki et ago nedo oop aien! 8El et itai epihtau imi euc nikmam ka neduom, anum acaldei aiek, um ethaig: etpu upene vai euc napanvaig an nuarin umoh, um alkalka um ighin; jam has nethaig pan euc vaig an cop inyi ti lep opos, el et eteuc ero nikmam im neduom. 9El et itai epihtau imi euc nesganimtam, anum atipagki aiek, um ethaig: etpu upene vai euc napanvaig an nuarin umoh, um ethi ache nesganimtam; jam has nethaig pan euc vaig an cop an pece has, el et eteuc ero nesganimtam. 10Akumu jim amcel vaig tah natimi upoupo iji eigki aijaua; ek asaig ehelemia ainyak mika, Era almoi nesganimtai Etmak an nohatag a ilpu agelo ura irai iji adiat an nohatag. 11Is ham a Inhal o natimi mika yi imyiatamaig ra er auahas ra. 12Eka ikha aijaua? el et eteuc siip et wun huntret o un tah, jam melga et ethi ira ra, et ude nainte im nain aien, um apan irai lola edoon, um ahilek ineig et melga. 13Et inivaijec ineig ek asaig ehelemia ainyak mika, El et ecetai aien, et esjilid nimyiacitak o un va siip iyehki, ja et tup eklim upene inliinmopon aien va siip is nainte im nain eris eti melga. 14Et idim ucco et eti merit a Etmamia an nohatag, mika uhpu auahas tah ira atimi upoupo iji eigki.
15Im lep ineig, el et ago nedo has vai euc a etoam, apan aiek, um tas ehelen va nedo has o un echim aijaurau ache: el et atahaijeg intas unyum aien, na mun leh etoam aiek. 16Ja el et eti atahaijeg intas unyum aien, namu leh natimi inyi ethi aiek ka inyi ero, eru ahced euc arau, mika yi ipjin intas asega an nuhup o atimi et ero ka et eseij. 17El et eti atahaijeg aien, anum asuptecnaig ehele nakalasia aiek: el et imyipalea nakalasia aien, inyi idivaig natimi aupat vai euc aien, im natimi auatatimi. 18Et inivaijec ineig ek asaig ehelemia ainyak mika, Nitai ineig akupu arore an nobohtan aijaua, uhpu lep arore an nohatag: nitai ineig akupu aihiyi an nobohtan aijaua, uhpu lep aihiyi an nohatag. 19Im lep ineig, ek asaig ehelemia ainyak mika, El et tup ethi ache inliinmopoi natimi inyi ero iramia an nobohtan vaig tah nitai erupu ugni arau, etpu alupai rau a Etmak an nohatag. 20El et asjapicnaig natimi et ero ka et eseij an tah anuarin va nidak, ekpu idim amen ehele ehtaij ainyak.
21Is apan ehelen a Pitrus, um ika, Ak Natimarid, inyi ago nedo has vai nyak a etoak um ehcehed, ja ekpu eti aru ainyak? inyi yetpan irai seven, ka o’o? 22Is ika ehelen a Iesu, Ek eti ika ehelum ainyak, Inyi yetpan irai seven ache: ja, Inyi yetpan irai ehcesevente a seven.
23Nelcau an nohatag et idivaig natimarid is ethi, is ika aien yi ahilek nedo o ilpu aheca o un. 24Is wat atupun aien um ahilek nedo ura, eris imyiapan ehelen tah is ethi is eti aru tollar is ten milyun o un aien: 25is ti tah nitai ineig o un yi aru iran, is tas a natimi alupas o un, um ika yi ahtai yin, im ehgan, im ilpu hal o un, im niji itai asega o un, va uhpu leh neruvaig imi yin: 26is atpuse a naheca iyehki um ugni yin, um ika, Ak natimi alupas, etmu eropse inliinmopom aiek vai nyak, ekpu aru ehni ainyak. 27Is aiheuc vai naheca iyehki a natimi alupas o un, um atceijai yin, um eti aktaktai neruvaig imi yin. 28Ja is apan a naheca iyehki um ecet etoan naheca is ethi, is eti aru tollar is fiftiin o un aien; is arop iran aien um asjirai nauinwan, um ika, Namu aru neruvaig unyum imi nyak aiek. 29Is atpuse u neduon a etoan naheca, um ugni yin, um ika, Etmu eropse inliinmopom aiek vai nyak, ekpu aru ehni ainyak. 30Ja is ipjin aien: is apan aien um ati yin anliin neom ipjin, um uhum pan naopan iyehki inyi leh neruvaig aien. 31Eris wat almoi nedo ineigki a ilpu etoan aheca, eris imyitaig yin ara, um apan, um asuptecnaig ehele natimi alupas ura nedo asega ineigki. 32Is ahlaig vai yin a natimi alupas o un, um ika ehelen, Ak naheca auatatimi, kis eti aktaktai ainyak neruvaig imi nyak, vai intas ugni unyum: 33na auri aiek par eti aiheuc vai etoam naheca um idivai nyak, ek mun aiheuc vai euc ainyak? 34Is edemda vai yin a natimi alupas o un, um ati yin ehele ilpu atimi aredei yin, um uhum pan naopan iyehki etpu aru ehni aien. 35Etpu ucco nedo o Etmak an nohatag vai caua, el et eti eropse inliinmopomia aijaua va nedo has o ilpu etoamia vai caua.
Sélection en cours:
Madius 18: ATY1863
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
historic text maintained by the British and Foreign Bible Society