LIRAANGA 19
19
Vindu Vitamanu Viakholekha Sodomu
1Lwi tsinjelosi tsivili tsienetso tsiali nitsiakhatukha mu litaala lia Sodomu khulukolovo khwenokho, Loti yali niyikhale mu shilivwa shi litaala. Lwa yatsilola vwangu, yasinjila natsia khutsiakanila. Yatsinamila 2navoola, “Munyi vami vanje, ndi hanu khumurumishila. Numuyaanza hambi mu inzu yanje. Munyala khusava na matsi vilenje vienyu, khandi mukone mu inzu yanje khutukha lwa vushia mu mavwevwe. Munyala khuvukha kushili mu mavwevwe mutsililile nu luchendo lwenyu.”
Navutswa vamuvoolela, “Shikaliitsa khuva kario tawe! Khutsitsanga khukona mu litaala yili.”
3Navutswa Loti yatsililila khuvasaya, khandi lukhumalilikha nivinjila naye munzu mwemwe. Loti yavoolela varumishi veve valombe mikati, khandi valombele vacheni shiukhulia shilahi shiene shia valia. Lwa shiali nishiakhalombwa, valia.
4Lwa vacheni venavo vali nivashili khutsia khukona tsindolo, vayayi vavukha shia havundu hosi mu litaala lia Sodomu -- vandu vavukha nende vasakhulu -- vavotokhana khu inzu yeneyo. 5Valaanga Loti, nivamureeva, “Ni hena ha vandu vitsi khukhuchendelela munzu mwomwo vutukhu vunu vali? Valere ilwanyi khuvalole!” Vandu vasatsa vi litaala lia Sodomu venyanga khukona navo.
6Loti yasimukha natsia khuvakanila khandi niyikala muliango munyuma mwemwe, 7navoola, “Valina vaanje, mukhakholi kenako tawe. Mukhakholi vindu vitamanu vienevo tawe. 8Loli, ndi na vaana vi shikhana vaanje vavili vashili vachima. Leshi mulerele ilwanyi, muvakhole shindu shiosi, shia mwenyanga khuvakhola. Navutswa muvuli khukholakhu vandu yava shindu shiosi; ni vacheni vaanje, khandi khutukha inzi valindi vulahi vwene.”
9Navutswa vandu venavo vavoolela Loti, “Rula imbeli weru, yivi mundu mucheni! Uli mundu shina khukhuvoolela shia khunyala khukhola? Rula imbeli weru, inoho khulakhusalilitsa vululu muno khuvira vacheni vovo.” Valukura Loti khandi nivisuunda himbi khupomola muliango. 10Navutswa vandu vasatsa vavili, vali nivali munzu mwenomo, vakhwesa Loti khumwinjilitsa munzu, nivikala muliango. 11Valomba vandu vali nivali ilwanyi khuvekhula tsimoni, khuvula khumanya wa muliango kuli.
Loti Yarula mu Litaala lia Sodomu
12Vandu vavili venavo vavoolela Loti, “Ulikhu nu mundu wosi hanu -- vave vaana vi shiyayi, vi shikhana, vakuuka vovo vayayi, inoho viikho vovo vandi vamenyanga mu litaala yili -- varulitse havundu hanu 13shichila khutsitsanga khutivitsa havundu hanu. Mwami Nyasaye umali khuhulila vindu vitamanu via vandu yava vakholanga khandi ukhurumi khwitsa khutivitsa litaala lia Sodomu.”
14Khulwa yako, Loti yasimukha natsia khulola vakuuka veve venyanga khuhila vaana vi shikhana veve, navavoolela, “Kholi vwangu muruli havundu hanu; Mwami Nyasaye atsitsanga khutivitsa havundu hanu.” Navutswa vasuuvila Loti akholanga muvaayo.
15Lwa vwali nu vwakhashia mu mavwevwe, tsinjelosi tsiasaya Loti, nitsivoola, “Khola vwangu! Vukula mukhali wowo nende vaana vovo vi shikhana vavili vamumenyanga navo hanu, mwihonoloshe khwiirwa, lwa litaala liliitsa khuva niliakhativitswa.” 16Navutswa Loti shiyakhola vwangu tawe. Nalwo lwa vandu venavo vamukumila halala nu mukhali wewe nende vaana vi shikhana veve; Mwami Nyasaye yamulolela tsimbavasi, namurulitsa mu litaala lienelo. 17Injelosi indala khu tsinjelosi tsienetso, yavoola, “Yilukha uhone! Ukhishevukha inyuma inoho khusinjila mu luhoongo tawe. Yilukha utsi mu vikulu, uvuli khwiirwa.”
18Navutswa Loti yavavoolela, “Mwami, nuyaanza ukhakhulomba khukhole ndio tawe. 19Ukholele shikholwa shilahi khandi umali khuhonyinya vulamu vwanje. Navutswa vikulu vili ihale wene muno; vutiinyu vulangwila, nakhutsa khali nishili khutukhayo. 20Ulolanga litaala litititi yelo? Lili himbi muno. Lekha njende nziyo -- unyala khulola ni havundu hatititi vutswa -- khandi nihonolokha.” 21Mwami Nyasaye yamuvoolela, “Nu vulahi, mbuchilile. Shinzitsanga khutivitsa litaala lienelo tawe. 22Khola vwangu! Yilukha! Shinyala khukhola shindu shiosi, nushili khutukhayo tawe.”
Litaala lienelo lialaangwangwa Zohari, shichila Loti yakulikhaho havundu hatititi.
Mataala ka Sodomu nende Gomora Kativitswa
23Liuva liali nilirulanga khuluveka luli ivukwi mu mavwevwe, lwa Loti yatukha mu litaala lia Zohari. 24Mwami Nyasaye yaruma salufa yakhanga khuli mulilu khu mataala ka Sodomu nende Gomora 25nakativitsa halala nu luhoongo lwosi, vandu voosi vamenyamu halala ni viraakwa viosi viamelamu. 26Navutswa mukhali wa Loti yishevukha inyuma, nakwa kuchina kukali kwi ichumbi.
27Aburahamu yasimukha vwangu kushili mu mavwevwe, natsia havundu ha yasinjilanga imbeli wu Mwami Nyasaye. 28Yaheenza hasi khulola mataala ka Sodomu nende Gomora; khandi mu luhoongo lwosi nalola mwooshi nu kutuumanga khurula mulilova, khuli mwooshi kurulanga mu lijiko likali liu mulilu. 29Lwa Nyasaye yativitsa mataala kali nikali mu luhoongo mwa Loti yamenyanga, yitsushitsa Aburahamu khandi nalomba Loti, khwilushila havundu wanyala khwihonolokha vuchila khwiirwa.
Khuli Lwivulu lwa Vamoabu nende Vaamoni Lwaraanga
30Loti nende vaana vi shikhana veve vavili, varula mu litaala lia Zohari nivatsia khumenya mu vikulu, shichila Loti yali waria khumenya mu litaala lia Zohari. Ye nende vaana veve vi shikhana vamenyanga muluhangaywa. 31Litukhu lindi, mwana wewe mukhulundu wi shikhana yavoolela mwana wi shikhana mushie, “Tata weru asakhulanga, khandi musatsa avulakhuho hanu wa khunyala khukona naye, khuli mwiima ku mu shivala kuli. 32Lekha khulombe tata weru ang'wi idivai atande, khu khukona naye khandi khwivula vaana khuye.” 33Vaana vi shikhana venavo vaha tata wavo idivai ang'wi vutukhu vunu; mwana mukhulundu wi shikhana yinjila munzu, nakona na tata wewe. Tata wewe yakorwa isaa yayinjilamu, nakonamu inoho lwa yavukha.
34Litukhu lialondakhu, mwana mukhulundu wi shikhana yavoolela mwana wi shikhana wavo mushie, “Lola, ngoni na tata wanje mukolovo vutukhu; chenda khumulombe khandi ang'wi idivai vutukhu vunu; khu khali yivi winjilimu ukone naye, khu shia mulala khu khutsi alivula mwana khu tata weru.” 35Vaha tata wavo idivai ang'wi mu vutukhu vwenovo natanda, khandi mwana wi shikhana mushie niyinjila munzu, khandi nakona na tata wewe. Tata wewe yakorwa shia kholekhanga, khali lwa yakona inoho lwa yavukha. 36Vaana vi shikhana vavili va Loti yavo, varumishila injila yiyi nivaheelitsa vaana khu tata wavo. 37Mwana mukhulundu wi shikhana yivula mwana wi shiyayi, namukulikha lira Moabu. Neye tata wa Vamoabu nunundi. 38Mwana wi shikhana mushie yivula khandi mwana wi shiyayi, namukulikha Beni-ami; livoolanga tata wu lwivulu lwa Vaamoni.
Sélection en cours:
LIRAANGA 19: LLLCATHOLIC
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© The Bible Society of Kenya, 2013