LIRAANGA 34
34
Khuli Dina Yononyinywa
1Litukhu lindi, Dina, mwana wi shikhana wa Yakobo yali niyivula khu Leya, yasimukha natsia khuchendelela valala khu vakhali vi shivala shia Kanaani. 2Lwa Shekemu mwana wa Hamori warulanga mu vandu vuluhia lwa Vaahitse, wimililanga lusomo lwenolo yamulola, yamukwakhu ni tsingulu khandi nakona naye. 3Mwoyo kwekwe kwayaanzitswa na Dina, mwana wi shikhana wa Yakobo. Yayaanza mwana wi shikhana mwenoyo, khandi nalomoloma khuye nu mwoyo mulahi. 4Khulwa yako, Shekemu yavoolela tata wewe Hamori, “Selelela mwana wi shikhana uyu ave mukhali wanje.”
5Lwa Yakobo yavoolelwa ndi mwana wi shikhana wewe Dina umali khwononyinywa, vaana veve vi shiyayi vali nivayitsanga makondi mu mulimi. Yakobo yatsililila khuhonjela khutukha lwa vakalukha ingo. 6Hamori, wali nali tata wa Shekemu yasimukha natsia khulomoloma na Yakobo, 7isaa ya vaana vi shiyayi va Yakobo vali nivachelelanga khurula mu milimi. Lwa vaana va Yakobo, vahulila makhuva kenako, vahuka nivava nu vurima vululu, khulondokhana khu ka Shekemu yali nakholi, khandi khuli lwa yali nanyechi Vaisraeli lwa yakona nu mwana wi shikhana wa Yakobo. 8Navutswa Hamori yavoolela Yakobo, “Mwana wanje Shekemu wayaanzitswa muno nu mwana wi shikhana wowo; nuyaanza muhuchilile ave mukhali wewe. 9Lekha khukhole lilakano liu khuhilana. Lekha vaana vi shikhana venyu vahilwi na vaana veru, na veru vahilwi na venyu. 10Mulamenya nende khutsi mu shivala shieru; munyala khumenya havundu ha mulolanga ni halahi. Muli vavoholole khukhola vukhala, khandi khuva ni miandu chienyu vene.”
11Khulwa yako, Shekemu yavoolela tata wa Dina nende vaana vavo vi shiyayi, “Numuyaanza, mukhonye; niitsa khumuha shia shindu shiosi shiamundeva. 12Mboleli ni vihanwa shina via mwenyanga, khandi muviritsi vukhwi khuli mwenyanga. Niitsa khumuha shia shindu shiosi shiamundeva, niiva muliitsa khumbuchilila khuhila Dina ave mukhali wanje.”
13Vaana va Yakobo vavoolela Shekemu na tata wewe munjila yu khumukaatila, shichila Shekemu yali wayononyinya mwana wi shikhana wavo Dina. 14Vaana va Yakobo vavoolela Shekemu nende tata wewe Hamori, “Shiukhunyala khuhuchilila mwana wi shikhana weru khuhilwa nu mundu musoleli tawe. Kanyala khukhulerela tsisoni. 15Khunyala khuhuchilila vutswa, niiva mulalonda ka khwenyanga kakholwi; mulava khuli khutsi, ma vaana vi shiyayi venyu voosi vashevwi. 16Nalwo lwa khuliitsa khumuha vaana vi shikhana veru, na munyi mukhuhe venyu. Nalwo lwa khuliitsa khumenya mu munyi, khandi khuve shindu shilala. 17Navutswa niiva mulambakhana khukhuhulishitsa, khandi mwambakhane khushevwa, nalwo lwa khuvukula mwana wi shikhana weru khuruli hanu.”
18Makhuva ka valomoloma kayaanzitsa Hamori nende mwana wewe Shekemu. 19Shekemu shiyacheleva khurweshitsa khuli yenyanga tawe; shichila yali wayaanzitswa nu mwana wi shikhana wa Yakobo. Mumatukhu kenako, neye wali niyaheelwa luyali mu vandu voosi vi inzu ya tata wewe.
20Khulwa yako, Hamori nende mwana wewe Shekemu vasimukha nivatsia ha shilivwa shi litaala likali, khulomoloma na vandu varulanga mu litaala liavo. 21Vavavoolela, “Vandu yava valolekhanga khu khutsi khuva ni vandu vi milembe; leshi vamenye mu shivala shieru, khandi vakholelemu vukhala; shichila shivala shieru ni shikali muno. Leshi khuvaveshele vaana veru vi shikhana, navo vakhuveshele vaana vi shikhana vavo. 22Navutswa vandu venavo valahuchilila khumenye navo, nikava khulasheva vaana vi shiyayi veru voosi khuva shilala navo, khuli vo vashevwa. 23Toto, tsing'ombe tsiavo tsiosi nende vindu viavo viosi shivitsitsanga khuva vieru? Khu, leshi khuhuchilile vamenye khutsi.” 24Vandu vi litaala lienelo voosi vahuchilila makhuva ka Hamori nende Shekemu vali nivavooli, ma vaana vi shiyayi voosi nivashevwa.
25Khulitukhu lia kavaka, nivashihulilanga vululu nivamali khushevwa, vaana vavili va Yakobo, nivali Simioni nende Levi, vambotso va Dina, vavukula vivavi viavo. Vinjila mu litaala likali lienelo muvwivisi, niviira shia mundu musatsa wosi. 26Viira Hamori nende mwana wewe Shekemu, nivarulitsa Dina mu inzu ya Shekemu; nivarulaho. 27Vaana va Yakovo vaseenela hasi mivili chia vandu viirwa; nivayaaya shia shindu shiosi mu litaala liu mwana wi shikhana wavo yononyilwamu. 28Vavukula makondi kavo, tsing'ombe tsiavo, tsipunda tsiavo, khandi shia shindu shiosi shianyolekhanga mu litaala lienelo nende mu milimi. 29Vavukula miandu chiavo chiosi, vakumila ni tsingulu vakhali vavo voosi nende vaana, nivayaaya shia shindu shiosi mu tsinzu tsiavo.
30Yakobo yavoolela Simioni nende Levi, “Munderele matiinyu; nunundi Vakanaani, Vapeerizi khandi vandu voosi mu shivala yishi, vatsitsanga khundolela vurima. Isavu ya vandu vaanje nindititi. Niiva valiitsa khuhaambana khungwana, inzi nende vandu vi inzu yanje khuliitsa khwiirwa.”
31Navutswa vamuvoolela, “Ulolanga khuva nu vulahi mwana wi shikhana weru khukholelwa khuli mukhali mulaaya?”
Sélection en cours:
LIRAANGA 34: LLLCATHOLIC
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© The Bible Society of Kenya, 2013