LIRAANGA 38
38
Makhuva khu Yuda nende Tamara
1Mumatukhu kenako, Yuda yalekha vamwavo veve, natsia khumenya himbi nu mundu walaangwangwa Hira, warulanga mu vandu vuluhia lwa Adulamu. 2Yuda yalolayo mwana wi shikhana wundi wu Mukanaani walaangwangwa Shuha. Yuda yamuhila nava mukhali wewe. 3Yaheelitsa niyivula khuye mwana wi shiyayi, wa yakulikha lira Eru. 4Yaheelitsa khandi niyivula mwana wi shiyayi wundi; wa yakulikha lira Onani. 5Khali ndio, yivula mwana wi shiyayi wundi, wa yakulikha lira Shela. Kezibu, naho havundu wu mukhali wewe yivulila mwana wi shiyayi mwenoyo.
6Yuda yaveshela mwana wewe mukhulundu Eru, mukhali walaangwangwa Tamara. 7Navutswa Eru, mwana mukhulundu wa Yuda, yali nu mwiima mutamanu imbeli wu Mwami Nyasaye, ma Mwami Nyasaye namwiira. 8Nalwo lwa Yuda yavoolela Onani, “Tsia wakane ukone nu mukhutsakhali wali wa amwavo wowo wakhutsa; khandi urweshitsi muhinzilu kwa amwavo wowo yali wakhola, wivuli muye vaana va amwavo wowo yali wivula.” 9Navutswa Onani yali wamanya ndi vaana venavo shivakhavele veve tawe. Khulwa yako, isaa yosi ya yakona nu mukhutsakhali wali wa amwavo wewe, yachelitsanga khwinyala hasi imu yu khwivula, khu avuli khwivula vaana valiitsa khuva va amwavo wewe. 10Shikholwa shia Onani yakhola shishiali shilahi imbeli wu Mwami Nyasaye tawe. Mwami Nyasaye yamanya namwiira khandi. 11Nalwo lwa Yuda yavoolela Tamara, wali mukhali wu mwana wewe, “Khola nutsililila khwikhala hango ha tata wowo khuli mukhatsakhali, khutukha lwa mwana wanje Shela aliitsa khuhindila;” - shichila khali ye yali waria ndi Shela anyala khukhutsa, khuli vamwavo veve. Khulwa yako, Tamara yakalukha ingo wavo.
12Matukhu mati nikakhavira, mwana wi shikhana wa Shuha, wali mukhali wa Yuda yakhutsa. Lwa Yuda yali namali khumwikhula, ye nu mulina wewe Hira warulanga mu vandu vuluhia lwa Adulamu vasimukha nivatsia mu litaala lia Timina, khutsia khulola vandu vakhalaakanga vwoya khu makondi keke. 13Lwa Tamara yavoolela ndi kukhu wewe musakhulu atsitsanga mu litaala lia Timina khukhaalaka makondi keke vwoya; 14Tamara yafwalula tsinguvu tsia vakhutsakhali vifwalanga, niyivoha shitambaya mumoni mwemwe. Yikhala mu shilivwa shi litaala lia Anahimu, lili khu muhaanda kutsitsanga Timina. Tamara yali wamanya Shela yali wahindila nikhali yali nashili khuchihulilwa khumuhila khuva mukhali wewe.
15Lwa Yuda yamulola, yakanakana nu mukhali wu kholanga vulaaya, shichila yali wivohi shitambaya mumoni mwemwe. 16Yuda yisuunda himbi khuye khundulu khu muhaanda; navoola, “Hamba khukona nivi,” shichila shiyali namanyi ni kukhu wewe mwana wi shikhana tawe.
Mukhali mwenoyo yamureeva, “Ni shina shiutsitsanga khundunga nindakana mmbili halala nivi?”
17Yuda yamuvoolela, “Nakhurumila shimeme khurula mu makondi kaanje.”
Mukhali mwenoyo yavoolela Yuda, “Nu vulahi muno, mbe shindu shianyala khukumila mu makhono khutukha lwa ulindumila shimeme shienesho.”
18Yuda yavoolela mukhali mwenoyo, “Ni shina shiakhuha shiukumila mu makhono koko?”
Mukhali mwenoyo yachipa Yuda, “Muhuuli kwokwo kwa matongolo nende indovoshi.” Yuda yavukula vindu vienevo namuha; nakona naye. Mukhali mwenoyo yavelekha mwana khuye. 19Nalwo lwa Tamara yasimukha narulaho. Yavoholola mumoni shitambaya shieshie, niyifwala khandi tsinguvu tsia vakhutsakhali vifwalanga.
20Lwa Yuda yaruma mulina wewe walaangwangwa Hira warulanga mu vandu vuluhia lwa Adulamu khuhila khu mukhali mwenoyo shimeme shi likondi; nu khuvukula shindu shiu mukhali mwenoyo yali niyakumila mu makhono keke; shiyamunyola tawe. 21Hira yareeva vandu valala vi litaala, “Ni hena ha mukhali wu kholanga vulaaya wikhalanga hanu mu litaala lia Anahimu khundulu khu muhaanda ali?” Navutswa vamuvoolela, “Mukhali wu kholanga vulaaya ashili khulolekhakhu hanu.”
22Hira yakalukha khu Yuda namuvoolela, “Shimunyoli tawe. Khali ndio, vandu vamenyayo vavooli vashili khulolakhuyo mukhali wu kholanga vulaaya.”
23Yuda yachipa, “Lekha atsililile khuvikha vindu vienevo khuli ni miandu chiechie. Nikakhavele kario, khunyala khusekhwa. Mwene shiulolanga ndi khurumi ni shimeme shi likondi yishi; navutswa shiumunyoli tawe.”
24Mieli chivaka nichiakhavira, Yuda yavoolelwa, “Tamara, kukhu wowo wi shikhana ukholi vulaaya; khali ndio, waheelitsa shichila vulaaya vwa akholanga.”
Yuda yavoola, “Mulere ilwanyi, asambwi nu mulilu.”
25Lwa vali nivaleranga Tamara ilwanyi, Tamara yarumana likhuva khu kukhu wewe musakhulu, navoola, “Mundu mwene vindu viandi navio yivi neye wachila nimbelitsa. Koli khu vindu yivi mulole muhuuli, matongolo nende indovoshi ni via viina.”
26Yuda yavimanyishitsa; navoola, “Tamara nu wi likhola liu vulunji khumbira, shichila nambakhana khumuvekha khu mwana wanje wi shiyayi Shela.” Yuda yambakhana khukona naye khandi.
27Lwa matukhu keke ku khwivula kali nikakhatukha, kalolekha atsitsanga khwivula makhwane. 28Lwa Tamara yali nahulilanga isalila yu khwivula, mulala khuvo yanyi ila vulunji mukhono kwekwe. Mundu wa mwivulitsanga yakumila mukhono kwenoko, nakuvoha nu luvusi lumuuchi, navoola, “Uyu neye wu khuraanga khwivulwa.” 29Navutswa mutsisaa tsienetso, yakalushitsa mukhono kwekwe, amwavo wewe niyivulwa. Khulwa yako, mundu wa mwivulitsanga yavoola “Nindi wakhivulwa.” Yakulikha mwana mwenoyo lira Perezi, nu khuli khuvoola Muluhebrania “Khwivulwa.” 30Amwavo wewe yivulwa nu luvusi lumuuchi khu mukhono kwekwe, nakulikhwa lira Zera, nu khuli khuvoola Muluhebrania “Vumuuchi muno.”
Sélection en cours:
LIRAANGA 38: LLLCATHOLIC
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© The Bible Society of Kenya, 2013