SGK 11
11
Baabeli sanabolo a doe
1Kanaa minbuiinin tumaa na á goã boo diɛ ka bɔlɔ goon ne. 2Ǹ bɛ́ ǹ nə́ soo lɛ̀giala-n, ǹ nə́ diə fúlu gole kɔ́n yɛ *Baabilonii gána nɛ, ǹ nə́ giã walan. 3Ǹ nə́ pɛ kɔn nɛ kɛnɛn: «Haya, ka yoo wɔ toopaa bɔ, wɔ tã sɔnbɔraanɛ.» Toopaa lɛ na á ǹ kion dɔ ǹ kɔlɔ baa, tii gondɛnaa dɔ ná a dɔ ǹ tii baa. 4Ǹ nə́ tɔ́n pɛ kɔn nɛ doo: «Ka daa wɔ kiwi koa, wɔ sanabolo dɔ a nɛ, yǎa a mìi la doe Lawa ganaa! Ka daa wɔ n dinin tɔ bɔ, màn mɛn bɛ́ toɛ, wɔ baran sasawaa tán la bǎã tumaa nɛ, wɔ n bɔ kɔn ganaa wa.»
5Minin lɛn bɛ́ kiwi mɛn laanka sanabolo mɛn doe, Dɛnaa gisĩ á ga a ganaa. 6Bɛ kio, Dɛnaa tɔ́n pɛ: «Áh! Ǹ dinin tumaa n tɔrɔ goon, man bɔlɔ goon pii, ǹ nya ǹ dí bibinaa nə ka kɛ-n gɔrɔ. Bɛ̀ masɛ kɛ da ǹ gɔn lɛ-a, ǹ ba re ǹ zɛnaa n sii kɛ kɔ́n kiɛ wa. 7Haya! Ka daa wɔ gisĩ, wɔ ǹ bɔlɔ lɔlɔkɔn, màn mɛn bɛ́ toɛ, ǹ baran kɔn a boo giala ma doo wa.» 8Dɛnaa nə́ ǹ sasawaa kɔn walan, ǹ nə́ woo kanaa paǹ tumaa nɛ, ǹ nə́ kiwi lɛ a doe lɛ da. 9Bɛ lɛ nɛ, ǹ nə́ bɛa kiwi lɛ tɔ kɔ mà Baabeli (bɛ giala mà "Lɔlɔkɔn"), a giala, Dɛnaa na á kanaa minin tumaa bɔlɔ lɔlɔkɔn walan, á ǹ sasawaa kɔn á ǹ bɔ walan, ǹ nə́ woo kanaa paǹ tumaa nɛ.
Digolon mɛnɛn nə kɛdɛnan baa, a saa Sɛmu ganaa a wo Abramu yaa
10Sɛmu tɔrɔn sɛ́wɔ á ke: Sɛmu a yɛ lɛ̀ paabiɛ nɛ, á Arpaksaadi yɛ, bɔ̀n da ǹ mu gole lɛ a kiɛ̃ kio lɛ̀ paa. 11Arpaksaadi a yɛ kio, Sɛmu wusoo á lɛ biɛsooro (500) zɛnaa kanaa. Á nɛgiĩ kɔsɔn laanka nɛlɔn yɛ.
12Arpaksaadi a yɛ lɛ̀ pɔsɔɔwensooro ne, á Selaa yɛ. 13Selaa a yɛ kio, Arpaksaadi wusoo á lɛ̀ biɛsii ka sɔɔ (403) zɛnaa kanaa. Á nɛgiĩ kɔsɔn laanka nɛlɔn yɛ.
14Selaa a yɛ lɛ̀ pɔsɔɔ nɛ, á Ebɛɛrɛ yɛ. 15Ebɛɛrɛ a yɛ kio, Selaa wusoo á lɛ̀ biɛsii ka sɔɔ (403) zɛnaa kanaa. Á nɛgiĩ kɔsɔn laanka nɛlɔn yɛ.
16Ebɛɛrɛ a yɛ lɛ̀ pɔsɔɔwensii, á Pelɛɛgi yɛ. 17Pelɛɛgi a yɛ kio, Ebɛɛrɛ wusoo á lɛ̀ biɛsii ka pɔsɔɔ (430) zɛnaa kanaa. Á nɛgiĩ kɔsɔn laanka nɛlɔn yɛ.
18Pelɛɛgi a yɛ lɛ̀ pɔsɔɔ, á Rewu yɛ. 19Rewu a yɛ kio, Pelɛɛgi wusoo á lɛ biɛpaa ka manangɔrɔ (209) zɛnaa kanaa. Á nɛgiĩ kɔsɔn laanka nɛlɔn yɛ.
20Rewu a yɛ lɛ̀ pɔsɔɔwenpaa, á Serugu yɛ. 21Serugu a yɛ kio, Rewu wusoo á lɛ̀ biɛpaa ka sɔbaa (207) zɛnaa kanaa. Á nɛgiĩ kɔsɔn laanka nɛlɔn yɛ.
22Serugu a yɛ lɛ̀ pɔsɔɔ, á Nahɔɔrɔ yɛ. 23Nahɔɔrɔ a yɛ kio, Serugu wusoo á lɛ̀ biɛpaa (200) zɛnaa kanaa. Á nɛgiĩ kɔsɔn laanka nɛlɔn yɛ.
24Nahɔɔrɔ a yɛ lɛ̀ fuəwenmanangɔrɔ á Teraa yɛ. 25Teraa a yɛ kio, Nahɔɔrɔ wusoo á lɛ̀ paabiɛ ka fulumanangɔrɔ (119) zɛnaa kanaa. Á nɛgiĩ kɔsɔn laanka nɛlɔn yɛ.
26Teraa a yɛ lɛ̀ pɔsɔbaa, á Abramu yɛ, ka Nahɔɔrɔ nɛ ka Aaran nɛ.
27Teraa tɔrɔn sɛ́wɔ á ke: Teraa na á Abramu yɛ, ka Nahɔɔrɔ nɛ, ka Aaran nɛ. 28Aaran na á Lɔti yɛ. Aaran sɛ gã ǹ di Teraa nyɛɛnɛ, ǹ dinin gána nɛ Baabilonii, ǹ dinin kiwi Uuru. 29Abramu laanka Nahɔɔrɔ lɔn wɔ. Abramu a lɔ tɔ mà Sarayii. Nahɔɔrɔ wɔ tɔ mà Milkaa. Aaran a nɛlɔ n ka Milkaa nɛ, Iska dɔ na a nɛ lɛa. 30Nɛ goã Sarayii lon wa, a giala, a na á goã lɔ nɛ-yɛle baãnaa lɛa.
31Teraa yoo kun ka a nɛgiĩ Abramu ni, ka a nɔ̀ɔn Lɔti ni, Aaran a nɛ lɛ, ka ǹ manaa Sarayii ni, a nɛgiĩ Abramu lɛ a lɔ n ka bɛ nɛ. Ǹ nə́ soo Uuru kiwi, Baabilonii gána nɛ kunun ǹ ni, mà maǹ woe Kanaan gána nɛ. Ǹ bɛ́ ǹ nə́ dɔ Kaaran, ǹ nə́ giã walan. 32Teraa a yɛ lɛ̀ biɛpaa ka sooro ne (205), á gã Kaaran.
Sélection en cours:
SGK 11: SBPE2011
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
San Bible Protestant Edition © Bible Society of Burkina Faso, 2011.