Jẹnẹsisi 4
4
Isi Nke Ẹnọ
Keni Lẹ Ebẹlụ
1O mẹgụ, Adam lẹ nwunyẹ ẹ wụ Ivu nọ ranhịn, Ivu nọ tụrụ imẹ, mụ okẹnnyẹ, kpọ a “Keni,” sị, “Osolobuẹ e yegụọnị m ẹka mụ okẹnnyẹ.” 2Omẹgụ, ọ nọ mụzị okẹnnyẹ, Ebẹlụ nwẹnẹ Keni. Ebẹlụ e dumẹ atụnrụn, Keni a rụnma ugbo.
Kẹ Keni Dọn Gbu Ebẹlụ
3Omẹgụ, Keni nọ gha ihiẹn-ugbo ẹ wẹhẹni Osolobuẹ oyiye. 4Ebẹlụ nkẹ nọ gha imẹ ụmụ ibuzọ igunrun atụnrụn a mụ họrịsọnmẹ ndị kachanrịn e tutu, yezikwọ Osolobuẹ. Ya Osolobuẹ nọ nabanhan Ebẹlụ lẹ ihiẹn o ye. 5Kanị, ọ nabanhannị Keni lẹ ihiẹn o ye. Ya okẹn olulu nọ bumẹ Keni, ọ nọ rọnmẹ ihun. 6Ya kẹ Osolobuẹ nọ sị Keni, “Kị ize rị e zen'i? K'i rọnmẹni ihun? 7I mẹ ihiẹn rị mma, anabanhankọ m'ị? Kanị, omẹni y'e gini ẹka rị mma sọn ihiẹnni, lẹhụ, njọ warị ọnụmụzọ; ọ rị a chọ ị. Mẹrikwọ a!”
8Keni nọ sị Ebẹlụ nwẹnẹ ẹ, “Nị ẹnyi jẹn ọfịa.” E ru wẹ ọfịa, ya Keni nọ maye Ebẹlụ nwẹnẹ ẹ, gbu ẹ.
Ọnụ Osolobuẹ Bụ Keni
9O mẹgụ, Osolobuẹ nọ sị Keni, “Elebe kẹ Ebẹlụ nwẹnẹ i rị?” Ọ nọ sị, “Amarịn m! Mmẹ e chedẹ nwẹnẹ m nche ra?” 10Ya kẹ Osolobuẹ nọ sị a, “Kị wụ ihiẹnni i mẹ? Lee ẹ, ẹdeke nwẹnẹ i rị a gha alị a kwanghọsị m! 11Gha kikẹnni jẹnmẹ, y'e họnringụọ onyẹ wẹ bụ ọnụ: akpakalị a jụgụọ ị: alị, hụn shịapụ ọnụ narịn ẹdeke nwẹnẹ i hụn i gbu. 12Ị rụnzị ugbo, alị emẹkọn'ị ihiẹn ọwụlẹ. Ọsọ-ọsọ kẹ y'a gha a gba nọkẹ onyẹ wẹ rị a chụ; ị k'a rị a wahunmẹ elu-ụwa ile.”
13Ya kẹ Keni nọ sị Osolobuẹ, “Afụnfụn i ye m karị m ẹka, isi m e chekọ a! 14Y'e gigụọ m nwan họnrin onyẹ akpakalị jụ; y'a chụpụgụọzị m ebe ị rị; m k'a gha nwan a gba ọsọ-ọsọ nọkẹ onyẹ wẹ chụkọ; m k'a rị a wahunmẹ elu-ụwa. Onyẹ kunrun m tan, o gbupụ m!” 15Kanị, Osolobuẹ nọ sị a, “O mẹkọ ẹrịra. Onyẹ gbu Keni, e mẹgwarị m'a ya mmagi-mmagi ụzọ ẹsa!!” Ya kẹ Osolobuẹ nọ ye Keni ahịma, amamgbe ịhịan e kunrun Keni gbu ẹ. 16Ya Keni nọ gha ihun Osolobuẹ pụ d'e biri alị Nọdụ#4.16 “Nọdụ” wụ “Ọwahunmẹ”. hụn rị azụụn ọwụwa-ẹnyanwụn alị Idẹni.
Ẹbozo Keni
17O mẹgụ, Keni lẹ nwunyẹ ẹ nọ ranhịn, nwunyẹ ẹ nọ tụrụ imẹ, mụ Ẹnọkụ; Keni rị e pumẹ obodo ogẹn hụ, ọ nọ kpọ obodo ahụn “Ẹnọkụ,” hụn wụ ẹfan nwa a. 18Ẹnọkụ nọ mụ Iradị; Iradị wụ nẹdi Mẹhujẹlụ; Mẹhujẹlụ wụ nẹdi Mẹtushaẹlụ. Mẹtushaẹlụ wụ nẹdi Lamẹki.
19Lamẹki lụ inyẹnmẹ ẹbụọ: ẹfan nke ibuzọ wụ Ada, ẹfan hụn ẹbọ wụ Zila. 20Ada mụ Jabalụ. Jabalụ wụ onyẹ ibuzọ bisọnmẹ ụlọ w'a kpụkpọrị, a kpa anụ. 21Ẹfan nwẹnẹ ẹ wụ Jubalụ. Jubalụ wụ onyẹ ibuzọ kpọma ụbọ, gbumẹ ẹkpịrị. 22Zila mụ Tubalụ-Keni. Tubalụ-Keni wụ onyẹ bu ụzọ kpụma ụzụn, kpụma ụdị ihiẹn ile wẹ gi igwe-bronzu lẹ igwe-mmaka a kpụ. Tubalụ-Keni nwọn nwẹnẹ okpoho w'a kpọ Naama.
23Lamẹki sị inyẹnmẹ ẹ ẹbụọ,
“Ada lẹ Zila,
gọn nị m ntịn!
Inyẹnmẹ Lamẹki,
gọn ni m ntịn ihiẹn m jẹnkọ d'e ku:
E gbuọlẹ m okẹnnyẹ ohu
makẹni ọ rụ m ẹhụ;
m gbu okorọbịa ahụn
makẹni ọ fịan m ihiẹn.
24Omẹni ụzọ ẹsa
kẹ wẹ jẹnkọ d'e mẹgwarị onyẹ gbu Keni,
ya wụ nị onyẹ gbu Lamẹki
e mẹgwarị w'a ụzọ ẹsa mgbe mmanaị!”
Sẹtị
25Adam lẹ nwunyẹ ẹ a ranhịnzị, ọ nọ mụzị okẹnnyẹ, kpọ a “Sẹtị,” sị, “Makẹni Osolobuẹ e yeọlẹ m okẹnnyẹ ọzọ, gi nọkin ẹnya Ebẹlụ hụn Keni gbu.” 26Sẹtị nkẹ mụzịkwọ okẹnnyẹ, kpọ a “Ẹnọshị”.
Ogẹn hụ kẹ ịhịan gi kpọkumẹ ẹfan Osolobuẹ.
Sélection en cours:
Jẹnẹsisi 4: ikkBI
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2018, Mission for Language Translation/Ika Bible Translation Committee.
© 2018, Wycliffe Bible Translators, Inc.