Lukas 24
24
Isus nu Gdog Gleleg
Mt 28:1-8; Mk 16:1-8; Uan 20:1-10
1Ay sis Linggu sbalabag sirut, kafag ngay mangena nalao sas fagfolian, gbuba at nafalganan fag ngay famaebebanglu. 2Ay manlag di at faningding luib fag gang, madagingan wan. 3Ay nu nasakbo sas luib, we lagan Isus at bilug. 4Ay gina gamatangan, duak mangama at ke lanbung masulo nsure wa vtv, malindug sit akbang.
5Ay kafag ngay mangena at kaksvnan nu kalimu narungan sas daga. Ay kafag duak mangama nalong te, “Wain ro ay fagrvbvyun tagleleg sit ngay kinbul? 6Wa ste ya Isus, kanya nadog wan naleleg. O nunda wam gamatang ya at longan ayu ebi gina am sis talun Galilea te, 7‘Tiba namon ban Taw at Baguama sas tagasalanan ay nantuktuk anya sas fasulungan kayu, ay sis fatuluk menit kanya gdog yay gleleg’?”
8Ay kafag ngay mangena namatang Isus at longan. 9Ay kanya fagayu noli wan siginans fagfolian ay nafasaful fagayu at nalag sas labi sadik nasugu, ay anggan sat tiba fagayu. 10Kafag ngay mangena, Maria Magdalena, ay Uana, ay Maria, Santiagu at mina, ay tiba ya at ufud fag ngay mangena. Kanya wa fagayu at nafasaful sas Isus at ngay nasugu. 11Ay kanya fagayu wa gafanud kafag ngay mangena at nalong, aroro kata way nu yud e masuad. 12Ay dewa katanya, Pedru anlindug ay natarung sas fagfolian, ay nu ndasug, kanya narungan gfatangun ay at nalag fansifig way lang Isus fag ramit malaksi. Ay nu katanya kanya noli wan ay gamatangan te, “Wain ngaro fakatanyaun lang ku lagan?”
Duak Tagadal nasas Furuan Emaus
Mk 16:12,13
13Ginanya fag menit at duak tagadal nalao sas furuan Emaus. Erusalem at kayayuan siginans Emaus, nu e nanlao sik wabilug menit. 14Ay duama at kamatoanan sabaliwa at ngay nalag ay at ngay nadungug. 15Ay gina duama gkamatoan ay gidgintoan, Isus nanangakbang anya ay gadgaloan wa dayun. 16Ay duama dewa gfadgaloan Isus, wa toglag te, kanya wan Isus. 17Ay Isus nalong te, “Nataw ay kamatoanan kaduge am glao?”
Ay duama nafaragang yay sirut nu glao, ay mafabaluanan way. 18Ay at sadi, at ngayan Kleupas, nabalus Isus te, “O nunda kayu nya ktaw tagsibo sas Erusalem, o yo nasaful at kinfasludan ebi vtv?”
19Ay Isus nainto te, “Ay nataw nunda at kinfasludan?”
Duama nabalus Isus te, “At kinfasludan sabaliwas Isus fag taw Nasaret. Kanya sik taglong at mabalyanan sas Dius ay sa sangay taw at daga salubangan. Ay at fakamulun wan at mabalyanan ay at foyungan tagfatuyan. 20Ay tam ngay fun tagfon fanggalangun ay tam ngay tagfangguna nafon Isus sat iba, ay kanya fagayu nasugu te, ‘Fabuli anya.’ Ay kanya fagayu natuktuk anya sas fasulungan kayu. 21Ay gseg mandi mi te, kanya ban at namalangfe ngay taw Israel. Ay newa katsi tulu wak menit at kinlangfe siginan nu e gfabul anya. 22Ay sis balabag sirut em ufud tiba fag ngay mangena nalao sas fagfolian, ay andulo ami at barita sa emi te, 23we lagan ya Isus at bilug. Ay kanya fagayu gina anfoli siginans fagfolian, nalong sa emi te, ‘Nalag ami Dius at ngay tagbarita ay nalong sa emi te, Isus gleleg wan.’ 24Ay tibak mangama em ufud nalao sas fagfolian, ay kanya fagayu natuyan te, matuyan kafag ngay mangena at longan te, we kalag ya Isus at bilug.”
25Isus nalong sa kafag duama te, “Am wan at yud mamatanganan fag ngay taw! Ay at maranan nu gafanud Dius at ngay taglong at longan. 26At matuyan, masine Dius at nafili fag Fun#24:26 Dius at nafili fag Fun: sas Griegu, Kristu. Anggan t.46. nu nanginkidapan yay, ay sanya ginan nangadasug sat fagmasineun.” 27Ay Isus gfataglayun gfayamag sas duama sabaliwa at sadili siginans Muisis ay anggan Dius at ngay taglong at rirukan sabaliwa anya.
28Duama gina munakbang sat fagnangadasugan fag furuan, Isus kata nantaglayunan wama sat fanloan. 29Ay duama gfatawad yay anya te, “Ste yap tam, aroro gakayabiun wan, menit gakafalyuun wan.” Ay Isus nanangalo duama. 30Ay gina gfasfuan duama gfangon, Isus nabul tinapay ay nafauseganan Dius, ay nalungud ay nafon sas duama.
31Ay duama nu nafanoglag fia, natoglag te, kanya wan Isus. Ay ginanya yay vtv duama we lagan ya Isus. 32Ay duama gkamatoanan te, “Newa ngani mabayan tua aro nu gdungugan ta kaduge gfayamag sa anta Dius at Longan at masuad, o kin?”
33Ay duama anlindug wa vtv ay anfoli sas Erusalem. Ay nu ndasug sanya, nalag Isus at labi sadik nasugu maful, ay tiba ya at ngay ufud. 34Ay at maful nalong te, “Anud wan, tam Fun gdog yay gleleg ay ansure sas Simun.” 35Ay kafag duama nafansulitan at nalag gina si sangaba dalan, ay nu gtoglag Isus gina glungud tinapay.
Isus Ansure sat ngay Tagadal
Mt 28:17-20; Mk 16:14-18; Uan 20:19-23
36Ay gina duama kamansulit, Isus ansure sanya fag ngay taw at wabilug ay nalong te, “Siwa ayu fagmanabayanun.”
37Ay kanya fagayu anlipsik ay kalimu, aroro nu glong, at kinsure, sik labang. 38Ay Isus nalong te, “Wain ay fakalimuun? Ay wain ay fagawabiluganun yay? 39Damai ku daluap ay ku darafa. Au wa fia. Tedi angku, laman sumaful wam. Aroro sik labang we faknul ay we bini kata angku.”
40Ay nu nalong wa katanya, Isus nafalag at daluap ay at darafa sa anya fagayu. 41Ay kafag ngay taw at kaksvnan nu guseganan ay nu kadulo, ya fia gafanud at nalag. Ay Isus ginto te, “O e fakonun am?” 42Ay tagsanya at sadi nafon sa anya sik lungud albon masugban. 43Ay Isus nabul ay naon sis taw at daga salubangan.
44Ay Isus nalong te, “Katatuy ku longan ayu ebi, gina au galo yay ayu: fagayu at marirukan sabaliwa angku sis Muisis at Faugali ay sis Dius at ngay taglong at ngay rirukan, ay anggan si sangay Alubad, umfasludan wan.”
45Sanya ginan Isus nafoyung sa anya fagayu laman gtogdungug Dius at Longan. 46Ay kanya nalong sa anya fagayu te, “Sis Dius at Longan marirukan te, Dius ban at nafili fag Fun dumalan fagidapun ay umbul, ay si bans fatuluk menit gdog yay gleleg. 47Ay siginan ban at ngayan e gfoyung sas fagayu taw, taguna sas Erusalem ay anggan sas fagdaul daga at taw te, fagayu taw nu naubun tua at ngay asalanan, Dius gfalyam wan at ngay asalanan. 48Am wan tagfatuyan tuy fag ngay fakamulun. 49Dungugani, sumugu kban ku Mama at nafatuyanan sa ayu. Fanyai yap ste fag furuan, yakmay am nabul fagmabalyananun siginans banwa.”
Isus Gdog yay Nfoli sas Banwa
Mk 16:19,20; Fkm 1:9-11
50Ay Isus nataban kanya fagayu sas day furuan Betanya, ay nafalugde at take laman gfadante sa anya fagayu. 51Ay gina Isus gfadante sa anya fagayu, kanya naubun ay e naurug anya sas banwa. 52Ay sanya ginan at ngay tagadal naseg Isus, ay anfoli wan sas Erusalem, ay maksvn nu guseganan. 53Ay kanya fagayu si gugat Dius at bale ay gseg Dius.
Sélection en cours:
Lukas 24: OCCT
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
Copyright © 2021 by OMF International, Philippines