Genesis 8
8
Omalla wa echigumula
1Vano Mulluku aamuupuwella Nowa ni enama ddittheddene ddamuhakani ni eziweto nnddo ddaari ni olliye muchombonimmo. Aalamula ephevo wi yoope va ellapo yavatthi, enthawi yeeyo maaddi yahaamba owelleella. 2Aneetuutu amaaddi manchichi ookhalla vatthi va ellapo ni maaddi ooddullu yaawalliwa. Sika murimu aamwara, 3nave maaddi yahaamba okittha vang'ono vang'ono. Eviralle mallapo 150, maaddaayo yaakittha wunchichi, 4nave va nllapo na 17 na mweeri waneetthanu ni miilli, echombweeyo yahiimella vaddullu va miyaango dda Ararati. 5Maaddaayo yaavirellella okittha nave va nllapo nawaamba na mweeri wa khumi, etthoka dda miyaango ddahaamba wooneya.
6Viviralle mallapo 40 Nowa aahulla niwindo nno anipangilleeye va echombo 7amukhumiha nakhuku. Nakhukooyo aamoonovava muddullu otiyerella wi maaddi ewelleelle va ellapo yavatthi. 8Vano Nowa aakhumiha ekhunda wi yoone maaddi yaarimi ewelleelle. 9Koma vawi maaddi yaari ehinawelleelle va ellapo yavatthi ettheene, ekhundeeyo yaahokollowa vawi kheyaphwannye voomorellavo. Nowa aakhumihella otte muwonwaaye nave ayivollochiha ekhundeeyo muchombonimmo. 10Atiyerelle mallapo matthanu ni meelli mamodda, aayikhumihattho ekhundeelle. 11Misikuwa yaahokollowa nave Nowa ahoona wi owanoni wiwa yaapana nikukhu nikitthi na muteekho wa olivi. Sika Nowa aadduwella wi maaddi ahaamba owelleella va ellapo yavatthi. 12Vatulli viwa Nowa aatiyerellattho mallapo matthanu ni meelli mamodda, aayikhumihattho ekhundeelle koma ekhundeeyo kheyaahokollowille.
13Nowa ari ni miyakha 601, va nllapo nawaamba na mweeri wawaamba, maaddi yaawelleella va ellapo yavatthi. Nowa aakhunuulla yookhuneella ya echombweeyo atthurumella otte, ahoona wi vatthi vahaamba owelleella. 14Va nllapo na 27 na mweeri waneepiilli, ellapo yavatthi ettheene yaari ewelleelle tondoro.
Nowa anakhuma muchomboni
15Mulluku aamulleella Nowa wi 16“Weyaano ni mwaariyo, anaawo ni awariwa, khumani muchomboni. 17Khumiha ddookumi ddittheddene, erive enama, erive epallame ni erive yawaapadda wi ddittotthollane nave ddiddalle va ellapo yavatthi ettheene.” 18Sika vano Nowa aakhumamo muchombonimmo, olliye ni mwaariye owaakattho anaaye ni awariwa. 19Enama ddittheddene, ddawaapadda ddittheddene, epallame ddittheddene ni ddimodda ddittheddene ddaweeta vatthimva ddaakhuma muchombonimmo millokomilloko moollikana ni mitundu ddiwa.
Nowa anavelleella mukutho
20Enthawi yeeyo Nowa ahaamakella nikuwa Apwiya. Aakusavo orive mutundu wa enama ni epallame ddaweellihiwa nave aaddiipha, addivelleella mukutho wooshellelliha vanikuwanimvo. 21Apwiya yiiwalliiwa nthuko nawaaddivella yaallota wi, “Ngiwa kitembelelattho ellapo kaambiiwa koodduwella wi m'murimani mwa muthu tti moonanara ovenyera enamwanaaye. Ngiwa koonongattho erive ello yookumi wonanko mmo keerenlleemi. 22Enthawi ettheene ellapo enaakhallellekiiwa, vineerokhalla enthawi yawaalla ni enthawi yoohata. Vineerokhalla enthawi yooriirya ni enthawi yooviha, enthawi yeellimwe ni enthawi yeeyitta navettho vineerokhalla otthaana ni mahiiyu wa enthawi yoohimalla.”
Sélection en cours:
Genesis 8: MW2019
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
The Bible in Elhomwe © The Bible Society of Malawi, 2019.