ACT 8
8
1Sol ne yandi asiinge re Ityene aboku.
Sol atsogise dibuundu
Wisi wene babaande wutsogise dibuundu di Serusalem time mbili. Bootsu babasiinge Nzambi, veengu ne bakime, bapanzige mu miseengi mi Sudé ne mi Samari. 2Batu babaroonda Nzambi bayende gu wutsyige Ityene ne bavure wulile mu difu dyandi. 3Gu Sol, abenenge ke wupanze dibuundu, ayendenge gu bandagu bootsu, agaangenge babasiinge Nzambi, babagele ne bagyetu ne anyingise yawu gu tsugu.
Filip agoneloonze Musamu Wumunyi gu Samari
4Batu babapanzu bayendenge bitsige byootsu nuloonze Musamu Wumunyi wu Sesu. 5Filip ayende gu divule di Samari ne aloonze mu dyaambu di Wusoolu ne Nzambi. 6Piti yotsu yibile ne sige mu musamu wu Filip ve yulungu yo ne ve labenge yo bimwiile bivangenge yandi. 7Manyunyi mamabi mavatenge mu mbili babeetsi nuyase pepe. Kere mbili bikate ne bange wutsokugu ne yawu babeeluge. 8Ne vane yinyunge gibile giginene gu divule dyene.
9Nane dibagele dimoosi dilugungu re Simu akyegulu gu divule dyene. Avagenge maambu ma bulosi ne piti yotsu yi Samari yibile ke digibe. Ataasenge re ande yinonu. 10Bootsu ne ngyebe ne yivuunde, babile ne sige mu wuyulu, nulabe mavagenge yandi. Bayambilenge re: «Mutu wuwu nde ngudi Nzambi, yikatsitsu re: “ngudi yiyinene.”» 11Babile ne sige mumbare bile ametsiinge nuvage maambu mene ma bulosi. 12Te ve vage yawu gitu mu Musamu Wumunyi wuloonze Filip mu dyaambu di Bufumu bu Nzambi ne mu dine di Sesu Wusoolu, ne babagele ne bagyetu babatusu. 13Simu yabene asiinge Nzambi, abatusu. Abilenge keke ve mbare Filip, agibeme mu bimwiile bibinene ne bimage bi labenge yandi.
14Ve yulu bakime bababile gu Serusalem re bisi Samari batsesiinge musamu wu Nzambi, basindigile yawu Pyere ne Sa. 15Ve tsoombugu yawu gu Samari, basaambile mu babasiinge Nzambi mure bakesundulu ne Dinyunyi Disuungeme. 16Avane, mbe Dinyunyi Disuungeme disamasunde mu mutu nisi wu moosi; badile ke wubatusu mu dine di Fumu Sesu. 17Ve yulu vane, Pyere ne Sa basunzile yawu makake ne Dinyunyi Disuungeme disundile yawu. 18Ve labe Simu re Dinyunyi Disuungeme digonesunde mu babasiinge Nzambi ke musunzulu makake ne bakime, aveege yawu badole 19nuyambile re: «Veeganu ne me dinyaange didine, mure batu bootsu ba makesunzilenge makake bakedile Dinyunyi Disuungeme.» 20Te Pyere ayagule yandi re: «Ne yu ne badole bagu dinyamegene, mumbare yitsetaase re bikaveegi Nzambi nzolu, yirungulu wusuumbu ne badole! 21Yisane dikabu, nisi mukwanyi gu dyaambu didi mumbare murime wagu wusaandi wuyelimine ve wusu Nzambi. 22Kagu burule mataase magu mamabi ne saambile Fumu, ga aroonde wusiingile yu kokolu mu munoongu dine ditaase. 23Magonelabe re yine nzuungi yivyogilile, ne yinde muvige dibi.» 24Kere Simu ayambile Pyere ne Sa re: «Saambilanu Fumu yenu bene mu me, mure midigu mitsetube yenu mikererugile me.» 25Ve mane yawu wuvage bumweenyi, nuloonze maambu ma Fumu, kime tsyotsu tsi beyi tsigabugu gu Serusalem. Mu nzile bayambilenge Musamu wu Munyi mu mbili miimbu ma Samari.
Filip ne munduumbe wu Ityopi
26Kime Fumu ayambile Filip re: «Teleme, yende gu nzile yikasundi gu Serusalem nguu ne gu Gaza. Nzilene yisakavyogi mbili batu.» 27Filip aleenge mweendu, mu nzilene, abeengunu ne dibagele, munduumbe wumunene mwisi Ityopi, wukyelenge manyi ma Kandase maate ma Ityopi. Dibagele dyene aburugungu gu Serusalem gubile yandi gu wusaambile Nzambi. 28Agabugenge gu mbugandi, abile matsagele gugare yiyendulu gyandi nurange mugaande wu mubigitsi Isayi. 29Dinyunyi Disuungeme diyambile Filip re: «Yende gudagise dibagele didi.» 30Filip ayende mbaangu, ayulu na rangenge mwisi Ityopi mugaande wu mubigitsi Isayi. Atombe yandi re: «Yigoneditige magonerange yu mana?» 31Dibagele ayagule re: «Maditige mo nde tsenyi ga mesadile mutu wusupule me mo?» Atsitse Filip mupeke mu yiyendulu gyandi ne mutsagele va mbarandi. 32Mireendu mirangenge yandi re mimi:
«Abile ga tabe yigonebegu ve mbure yikaboku biboodu,
nakabili mwaane tabe yibubu ve wusu wugonetsake yandi.
Asetube dibigu.
33Aleenzu ne asebile ne mutu wu kambugile yandi.
Wukeyambile mu bandalule baandi nde nyi?
Mumbare batsetabule monyu wandi mu mutambe.»#8.33 Ysayi 53.7-8, navesupulu mo gu migange mikale mi bisi Grek.
34Munduumbe atombe Filip re: «Kokolu, yambile me, mubigitsi agoneyambile nane nde mu nyi? Nde mu yabene vo nde mu mutu wumosi?» 35Ne vane, Filip ayagule, abaande ne mabigu mame magu migaande mi Reel, aloonze yandi musamu wumunyi wu Sesu. 36Ve yendenge yawu, bapule ve mbure yibile maambe. Kere vane munduumbe ayambile re: «Maambe momame; kagu yirungule wubatusu, sare nana?» [37Filip ayambile yandi re: «Ga yibile ne gitu gu murime wagu wotsu, yirungule wubatusu.» Dibagele ayagule re: «Mane gitu re Sesu Wusoolu nde Mwaane Nzambi.»#8.37 Gu mirendu mi kale ne kale gusaandi yirini gigi.] 38Kere asikige yiyendulu. Filip asunde naandi gugare maambe ne abatusu. 39Ve vate yawu gu maambe, vane ne vane, Dinyunyi di Fumu diyende ne Filip. Munduumbe asebelabe yandi, te atole nzile ne yinyunge. 40Filip atutuge kende gu Asote, kere avyoge mu mavule mavule nuloonzenge Musamu Wumunyi, kwanga ne ve pule yandi gu Sesaré.
Sélection en cours:
ACT 8: SNQ
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES