ZAWHÂNA 1
1
Bie sapa lâta â vaw lie
1Âthaona liata Bie y ta, Bie cha Khazohpa hnohta y ta, Bie cha Khazohpa a châ. 2Ano cha âthaona tawhta Khazohpa hnohta a ypa a châ. 3Ato zydua ano hmâpa ta taopa châ ta, hmotaopa zydua ano a hlao leipa ta khâpa hmah taopa y vei. 4Bie liata hrona y ta, cha hrona cha chyhsazy khaihna a châ. 5Khaihna cha zohna liata vaw khaih ta, zohna ta khaihna cha pahnie vei.
6 #
Mat 3.1; Mka 1.4; Lka 3.1,2 Khazohpa tuapa chyhsa pakha y ta, a moh cha Zawhâna a châ. 7Ano cha pahnokheituhpa châ awpa ta a vy ta, ano vâta chyhsa zydua amâ ngiapâ thei nawpa ta, khaihna a pahnokheituhpa châ awpa ta â vy. 8Ano cha khaihna châ leipa ta, khaihna pahnokheituhpa châ awpa ta a vypa a châ.
9Khaihna hmeiseihpa, chyhsa to a pakhaihpa cha khizaw lâ a zu ta. 10Ano cha khizaw liata y ta, khizaw he ano hmâpa ta taopa châ ta, châhrasala khizaw ta ano cha pahno vei. 11Ano chyhsazy lâ a zu ta, châhrasala a chyhsazy ta a ly veih ei. 12Châhrasala ano a pyhpa nata ano a ngiapâpa zydua cha, Khazohpa sawzy châ theina biehneina a pie ei. 13Cha chyhsazy cha thisaih ta sapa châ leipa ei ta, sapa khozie ta sapa châ hra leipa ei ta, chyhsapa khozie ta sapa châ veih ei. Khazohpa ta a sapazy ama châ.
14Bie cha chyhsapa lâta a vaw lie ta, eima hry liata a pahrâ. A rônahna, a Paw Sawchapaw matlupa rônahna tlai cha hmô pi ta, ngiachhiena nata hmeiseihna ta a biepa a châ. 15Zawhâna cha ano a pahnokheituhpa châ ta, ano kyh liata, “‘Ei hnôhlâ ta a vypa cha, kei ei y hlâta a y hapa châ ta, keima hlâta rônah viapa a châ’, tahpa ta a thâtih ei reipa kha, he chyhsa he a châ,” tah ta. 16Ano pakina tawhta ngiachhiena to chyu pi ta, cha cha ngiachhiena chôta ngiachhie pachhuahna a châ. 17Ryhpa cha Mawsi hmâpa ta piepa châ ta, ngiachhiena nata hmeiseihna deikua cha, Krista zawhzi ta a vaw ypa a châ. 18Ahy hmahta Khazohpa hmô beih veih ei. Sawchapaw matlupa, Paw kalachhôh liata a ypa ta ano cha a palâhâh.
Pahnokheituhpa Bâtituhpa Zawhâna
(Mat 3.1-12; Mka 1.1-8; Lka 3.1-17)
19Zuzy ta Zerusale tawhta theihthaipazy nata Livai sahlaozy tuah ei ta, Zawhâna hnohta, “Ahy na châ?” tahpa ta ama pahiahrisa nota, Zawhâna ta hetana heta reih ta. 20A phih leipa ta, a phuah ta, “Mesia châ va na,” tah ta. 21#Mal 4.5; Ryhpa 18.15,18Âmo ta, “Cha khiahta la, ‘Ahy na châ? Elaizâh na châ ma?’ tah ei ta. Ano ta ‘Châ va na,’ tah ta. ‘Hrohsopa na châ ma?’ tah ei ta. Ano ta, ‘Châ va na,’” tah ta. 22Âmo ta a hnohta, “Cha khiahta la, ahy ma na châ? Miah tuahtuhpazy eimâ chhy awpa byuh tlôh ta, miah chho teh. Na thâtih rei awpa na hnei ma?” tah ei ta. 23#Isai 40.3Zawhâna ta, “Kei cha ‘Abeipa lâthlôh paraih teh u!’ tahpa ta râhchawhpa liata awhtuhpa ao, hrohsopa Isai ta a reipa kha ei châ,” tah ta.
24Ama chyhsa tuapazy kha Phârisaihzy ta ama tuapazy châ ei ta. 25Âmo ta a hnohta, “Mesia tlyma, Elaizâh tlyma, hrohsopa tlyma na châ tlôh leipa khiahta cha, khazia chyhsazy bâti na pachâsa ei?” tah ei ta. 26Zawhâna ta âmo cha a chhy ta, “Kei ta la ti ta cha bâti ei na ta, châhrasala nama hry liata nama pahno leipa chyhsa pakha a duah ta, 27ano cha ei hnôhlâ ta a vypa châ ta, kei la a pheiky ri a pathlâ tlâh chhao châ va na,” tah ta. 28Cha hmozy cha Zawdâh haosâ Bethâni khih liata Zawhâna ta bâti a pachâsa haina su liata a vaw tlôpa a châ.
Khazoh Mietakutaw
29A mylâ ta Zawhâna cha Zisu ta a vaw pangai haipa hmô ta, “Moh teh u, Khazoh Mietakutaw, khizaw moleina a siekheituhpa huh! 30Hao chyhsa hao, ‘Ei hnôhlâ ta a vypa cha, keima y hlâta a y hapa châ ta, keima hlâta rônah viapa a châ’, tahpa ta a thâtih ei reipa kha a châ. 31Ano cha ahy ma a châ tahpa kei chhao ta pahno va na. Châhrasala ano cha Izarei ta a pahno thei nawpa ta a vy na ta, ti ta bâti ei cha pachâsa ei,” tah ta. 32Chatawhcha Zawhâna ta Zisu thâtih a pahnokheizie hetana heta phuah ta: “Thlahpa cha vachhuh hawhta avâ tawhta za chôpa hmô na ta, a chô liata a choh ta. 33Ano cha ahy ma a châ tahpa pahno va na. Châhrasala ti ta bâti pachâsa awpa ta nâ tuahtuhpa ta ei hnohta, ‘Thlahpa za chô ta, a chô liata â chohpa na hmôpa cha, ano tlai cha Thlahpa Pathaihpa ta bâti a pachâsa awpa cha a châ,’ tahpa ta na chho ta. 34Cha cha hmô na ta, ano cha Khazohpa Sawchapawpa a châ tahpa a pahnotuhpa ei châ,” tah ta.
Pachupa hmiatuapazy
35A mylâ ta Zawhâna cha a pachupa pano chhaota a duah ta, 36Zisu â hlaihlâ ngâpa hmô ta, “Moh teh u, Khazoh Mietakutaw huh!” tah ta. 37A pachupa pano ta a bie reipa ama thei nahta, Zisu cha zi ha ei ta. 38Zisu cha a kei heih ta, ano ama vaw pazipa a hmô nahta, ama hnohta, “Khâpa nama tlua?” tah ta. Âmo ta, “Râbai, khataih liata na y?” tah ei ta. Râbai cha pachutuhpa tahna a châ. 39Zisu ta ama hnohta, “A vy u la, nama hmô aw,” tah ta. Chatanachata vawh ei ta, a yna cha hmô ei ta, zâlâ dawh palih rachhôh a châ hapa vâta, cha noh cha a hnohta y ei ta. 40Zawhâna bie reipa a theipa vâta, Zisu zituhpa pano hry liata pakha cha Saimaw Pity unawhpa Adaru a châ. 41Adaru cha a hmiatua chai ta a unawhpa Saimaw kei tlua ta, a hmô nahta, a hnohta, “Mesia eima hmô haw,” tah ta. Mesia cha Krista tahna a châ. 42Adaru ta Saimaw cha Zisu lâ a chhi ta, Zisu ta ano cha vaw moh ta, “Zawhâna sawchapawpa Saimaw na châ, Kephâ ama cha tah ha bâ aw,” tah ta. Kephâ cha Pity#1.42 “Pity” tahpa cha “Lôpanô” tahna a châ. tahna a châ.
Phili nata Nâthaniah awna
43A mylâ ta Zisu cha Kâlili râh lâ sie a chhuah ta. Phili hmô ta, a hnohta, “Na zi teh,” tah ta. 44Phili cha Besaidâ khihpa châ ta, cha cha Adaru nata Pity yna khih a châ. 45Phili ta Nâthaniah a hmô nahta, a hnohta, “Ryhpa châbu liata Mawsi ta a thâtih a ropa nata hrohsopazy ta ama ropa kha eima hmô haw. Ano cha Zawsi sawchapawpa Nâzari Zisu a châ,” tah ta. 46Nâthaniah ta a hnohta, “Nâzari khih tawhta hmo phapa a pua thei aw ma?” tah ta. Phili ta a hnohta, “A vy la, vaw moh teh,” tah ta. 47Zisu ta Nâthaniah ano lâ â vy haipa a hmô nahta, a thâtih reih ta, “Moh teh u, Izarei saw hmeiseihpa, haidihaiduana rai a hnei leipa chyhsa huh!” tah ta. 48Nâthaniah ta a hnohta, “Kheihta eina pahno chi?” tah ta. Zisu ta a hnohta, “Phili ta a cha aw hlâta, theiku kô ry liata na y nona kha ei cha hmô haw,” tah ta. 49Nâthaniah ta a chhy ta, “Râbai, Khazohpa Sawchapawpa na châ! Izarei Beipa na châ!” tah ta. 50Zisu ta a hnohta, “‘Theiku kô ry liata ei cha hmô’ ei cha tahpa vâta nâ ngiapâpa na châ ma? Chazy hlâta hmo rônah viapa na hmô aw,” tah ta. 51#Âtn 28.12Chatawhcha a hnohta, “Hmeiseihta ta ei cha chho ei, avâ a pahypa hmô aw ei chi ta, Chyhsa Sawchapawpa chô liata Khazohpa vâlyuhchâpazy ama za chôpa nata ama kiapa nama hmô aw,” tah ta.
Sélection en cours:
ZAWHÂNA 1: MARVBSI
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
The Bible Society of India
© 2023, Used by permission. All rights reserved.
