ZAWHÂNA 6
6
Sâh pangawh rih a pabie
(Mat 14.13-21; Mka 6.30-44; Lka 9.10-17)
1Cha hnôhlâ ta Zisu cha Kâlili Tipo haosâ lâ sie ta, cha tipo cha Taibiria Tipo#6.1 Kâlili Tipo, Kâlili Tilaipi, Taibiria Tipo, Taibiria Tilaipi, Kenesare Tipo, Kinere Tipo zy he tipo miakhapa, moh nanopazy a hneipa a châ. He tipo he Izarei maw lâta y ta, Km 21 seih ta, Km 13 kawh ta, Ft 141 rachhôh a thupa tipo a châ. tahpa a châ hra. 2Tlâhleipazy chô liata hmonoâhpa a taopazy ama hmôpa vâta, zawpi hluhpi ta ano cha zi ei ta. 3Zisu cha tlâh lâ kiah ta, cha liata a pachupazy hnohta a tyuh ta. 4Zuzy Zawpakhô kyhchhi cha a hnia ha ta. 5Mohmia pasaih ta, zawpi hluhpi ano lâ ama vaw pangaipa hmô ta, Phili hnohta, “He sahlaozy nie awpa viahchhâ khataih liata eima chalei aw?” tah ta. 6Cha bie cha Phili pasia nawpa ta a reipa a châ, a tao awpa cha pahno thlâh ha ta. 7Phili ta a chhy ta, “Chyhsa to ta a chyhta sai ama to awpa châta chhao, tâkâ dinâri za no mâ viahchhâ ta a daih aw vei,” tah ta. 8A pachupazy hry liata pakha, Saimaw Pity unawhpa Adaru ta a hnohta, 9“Bâli viahchhâ tlâ pangawh nata ngasa miano a hneipa chapaw hawti pakha he liata y ta, châhrasala he zie zydua hry liata, chazy cha khâpa didâh châ aw vei,” tah ta. 10Zisu ta, “Zawpizy cha patyusa teh u,” tah ta. Cha liata sibiepa su kawhpa y ta. Chyhsazy cha a tyuh ei ta, ama zydua ta sâh pangawh rachhôh ama châ. 11Zisu ta viahchhâ cha la ta, alyna bie a rei khai nahta, a tyuhpa sahlaozy cha rai ta. Ngasazy chhao ama khona zie ta rai ta. 12Ama rihbiena taih ama nie khai tawhta, a pachupazy hnohta, “Khâpa hmah lei lei awpa ta, nie laibâhpa azôhpazy a huah khai ha teh u,” tah ta. 13Nie laibâhpazy cha a huah ei ta, bâli viahchhâ tlâ pangawh a niepazy nie laibâhpa zôhpazy cha, hrâbyh byh hrawh hleino tlai a huah ei ta. 14Zawpizy ta hmonoâhpa a taopa ama hmô nahta, “He chyhsa he khizaw lâ a vy awpa Hrohsopa a châ tlai hih!” tah ei ta.
15Ano cha a chhi raruah ta, abei pachâsa awpa ta a vy amâ chhuah tahpa Zisu ta a pahno nahta, ano dei ta tlâh lâ kiah ha ta.
Ti chô liata Zisu a sie
(Mat 14.22-27; Mka 6.45-52)
16Zâlâ a vaw châ nahta, a pachupazy tipo lâ zu ei ta. 17Balyh kiah ei ta, haosâ lâta Kâpynia khih pangaipa ta tipo liata sie ei ta. Vaw zoh ha ta, Zisu cha âmo lâ vaw tlô mâh leipa ta. 18Thlihpi ru ngaitapa a pathlipa vâta tipo cha thata a chatlao ta. 19Me thôh me palih rachhôh balyh ama hia tawhta, Zisu cha tipo chô liata phei ta vaw siepa ta, balyh lâ â vy haipa hmô ei ta, chi ngaita ei ta. 20Zisu ta ama hnohta, “Keima na ei châ, chi khah u,” tah ta. 21A ly kawpa ta balyh liata pakiasa ei ta, balyh chhao cha ama pangaipa râh thlai tlô pâ ha ta.
Zawpi ta Zisu ama tlua
22A mylâ ta tipo hesâ lâta zawpi a nguapazy ta haosâ liata balyh miakha deita a ypa kei hmô ei ta. Zisu cha a pachupazy hnohta balyh lâ a ngia leipa ta, a pachupazy cha âmo dei ta ama sie tahpa pahno ei ta. 23Abeipa ta alyna bie a rei khai nahta viahchhâ ama niena su kiapâh liana kha Taibiria balyh hropazy vaw tlô ei ta. 24Zawpi ta Zisu nata a pachupazy balyh liata ama y leipa ama hmô nahta, âmo chhao balyhzy liata kiah ei ta, Zisu tlua awpa ta Kâpynia lâ sie ha hra ei ta.
Zisu hrona viahchhâ
25Tipo haosâ liata ama kei hmô nahta, a hnohta, “Râbai, khatita helâ nâ vy?” tah ei ta. 26Zisu ta âmo cha a chhy ta, “Hmeiseihta ta, hmeiseihta ta ei cha chho ei, hmonoâhpazy nama hmôpa vâta nâ tluapa châ leipa ei chi ta, viahchhâ nie ei chi ta, nama py biepa vâta nâ tluapa tlao nama châ. 27Pati a leilô theipa châta hria leipa u la, chhâzaw hrona taihta a y awpa pati, Chyhsa Sawchapawpa ta a cha pie awpa ei châta tlao hria teh u. Paw Khazohpa ta ano cha chahnao pa-i ha tlôh ta,” tah ta. 28Âmo ta a hnohta, “Khazohpa raizy a hriapa eima châ thei nawpa ta, khâpa eima tao aw?” tah ei ta. 29Zisu ta âmo cha a chhy ta, “Khazohpa raihria cha he he a châ, a tuapa he a ngiapâ teh u,” tah ta. 30Âmo ta a hnohta, “Hmô sih la eima cha zo thei nawpa ta, khâpa ngiana ma na tao aw? Khâpa hmo ma na tao aw? 31#Pua 16.4,15; Hla 78.24‘Ama nie awpa viahchhâ vârâh tawhta a pie ei’ tahpa ropa hawhta, mânâ kha miah pathlatuhpazy ta râhchawhpa liata ama nie tyh,” tah ei ta. 32Zisu ta ama hnohta, “Hmeiseihta ta, hmeiseihta ta ei cha chho ei, vârâh tawhta viahchhâ kha Mawsi ta a cha piepa ei châ vei, ei Paw ta avâ tawhta viahchhâ hmeiseihpa a cha piepa ei a châ. 33Khazohpa viahchhâ cha vârâh tawhta a zupa, khizaw lâta hrona a pietuhpa a châ,” tah ta. 34Âmo ta a hnohta, “Abeipa, cha viahchhâ cha khâ miah pie mah y,” tah ei ta.
35Zisu ta ama hnohta, “Kei he hrona viahchhâ ei châ. Ahy rai kei lâ a vypa cha a nodi leipa aw ta, ahy rai nâ ngiapâpa cha a dâh phi beih aw vei. 36Châhrasala ei cha chho ha ei, na hmô ei chi ta, chatanachôta nâ ngiapâ veih ei chi. 37Paw ta eina piepa maih kei lâ amâ vy khai aw. Ahy rai kei lâ a vypa maih cha dytha cheita aw va na. 38Keima khopa tao awpa ta vârâh tawhta a zupa châ leipa na ta, nâ tuahtuhpa khopa tao awpa ta a zupa tlao ei châ. 39He he nâ tuahtuhpa khopa cha a châ, ano ta eina piepa zydua ahy hmah pahlei leipa aw na ta, noh chhâna noh liata ei pathyu aw ei. 40He he ei Paw khopa cha a châ, ahy rai Sawchapawpa hmô ta a ngiapâpa maih cha chhâzaw hrona hnei aw ei ta, noh chhâna noh liata ei pathyu aw ei,” tah ta.
41 “Kei he vârâh tawhta viahchhâ a zâ chôpa cha ei châ,” a tahpa vâta Zuzy ta a chô liata paphôh ei ta. 42“He he Zawsi sawchapawpa Zisu kha châ vei mâ? A nô nata a paw eima pahnopa kha châ vei ma? Tahmâ kheihtazieta ma, ‘Vârâh tawhta a zâ chôpa ei châ,’ a tah tly?” tah ei ta. 43Zisu ta âmo cha a chhy ta, “Nâmo nata nâmo liata paphôh ngâ khah u. 44Nâ tuahtuhpa Paw ta a sy vei khiahta la, ahy hmah kei lâ a vy thei aw veih ei. Kei lâ a vypa cha noh chhâna noh liata ei pathyu aw. 45#Isai 54.13Hrohsopazy châbu liata, ‘Khazohpa pachupa ta ama y khai aw,’ tahpa ropa a châ. Paw bie thei ta, a chupa maih cha kei lâ amâ vy tyh. 46Khazohpa tawhta a zâ chôpa dei leipa ta cha, ahy hmah Paw hmô beih veih ei. Ano cha Paw a hmôpa a châ. 47Hmeiseihta ta, hmeiseihta ta ei cha chho ei, ahy rai a ngiapâpa cha chhâzaw hrona a hnei haw. 48Kei he hrona viahchhâ ei châ. 49Châ pathlatuhpazy kha râhchawhpa liata mânâ ama nie tyh, châhrasala ama thi pyly. 50He he vârâh tawhta viahchhâ a zâ chôpa cha a châ, chyhsa ta nie sala a thi lei nawpa ta. 51Kei he vârâh tawhta viahchhâ hrohpa a zâ chôpa ei châ. Ahy rai he viahchhâ he a nie khiahta cha, chhâzaw ta a hroh thlâh ha aw. Khizaw hro nawpa ta ei pie awpa viahchhâ cha ei sapa he a châ,” tah ta.
52Cha biezy vâta Zuzy cha âmo nata âmo a eichhia ei ta, “He chyhsa heta kheihta ma a sapa cha nie awpa ta miah a pie thei aw?” tah ei ta. 53Zisu ta ama hnohta, “Hmeiseihta ta, hmeiseihta ta ei cha chho ei, Chyhsa Sawchapawpa sapa niepa ta a thisaih nama doh leipa khiahta cha, nâmo liata hrona hnei veih ei chi. 54Ahy rai ei sapa nie ta, ei thisaih a dohpa cha chhâzaw hrona a hnei haw, noh chhâna noh liata ano cha ei pathyu aw. 55Ei sapa he pati hmeiseihpa châ ta, ei thisaih he do awpa hmeiseihpa châ tlôh ta. 56Ahy rai ei sapa nie ta, ei thisaih a dohpa cha, keima liata a y thlâh ha tyh, kei chhao ano liata ei y thlâh ha tyh. 57A hroh thlâhpa Paw ta na tuah ta, Paw zawhzi ta a hrohpa ei châpa hawhta, ahy rai nâ niepa cha, keima zawhzi ta ano chhao a hroh aw. 58He he vârâh tawhta viahchhâ za chôpa a châ. Pathlatuhpazy ta nie ei ta, ama thi pylypa viahchhâ hawhpa kha châ vei. He viahchhâ a niepa cha chhâzaw ta a hroh aw,” tah ta. 59Cha biezy cha, Zisu ta Kâpynia liata a pachu nota, pakhyna o liata a reipa biezy a châ.
Tlyzaw hrona biezy
60A pachupa hluhpizy ta cha bie cha ama thei nahta, “He he bie ru ngaitapa a châ, ahy ma a nathlie thei aw?” tah ei ta. 61Cha bie kyh liata a pachupazy ama paphôh ngâpa a pahno nahta, Zisu ta ama hnohta, “He kyh liata palôh châ leipa ta nama y ma? 62Chyhsa Sawchapawpa he a y tuana lâ a kiapa a hmôpa châ u la, kheihta nama tah aw? 63Hrona pietuhpa cha Thlahpa a châ, sapa cha phahnaina hnei vei. Nama hnohta bie ei reipazy he Thlahpa châ ta, hrona chhao a châ. 64Châhrasala nama hry liata thokha a zo leipa nama y,” tah ta. Ahyzy ma a zo veih ei, ahy ma a patusa aw, tahpazy cha Zisu ta athaona tawhta a vaw pahno chhielie hapa a châ. 65Chavâta ama hnohta, “Cha vâna tlai chata nama hnohta, Paw ta a bao leipa ta cha, ahy hmah kei lâ a vy thei aw veih ei, ei tahpa kha a châ,” tah ta.
66Cha rakha tawhta cha, a zituhpa hluhpi ta kuasai ei ta, a hnohta sie khao leipa ei ta. 67Zisu ta pahrawh hleinozy hnohta, “Nâmo chhao na siesai awpa nama khoh hra ma?” tah ta. 68#Mat 16.16; Mka 8.29; Lka 9.20Saimaw Pity ta a chhy ta, “Abeipa, ahy lâ ma eima sie aw, nâ cha chhâzaw hrona bie a hneipa châ chi ta, 69keimo chhao ta châ ngiapâ pi ta, Khazohpa Mopathaihpa na châ tahpa eima pahno haw,” tah ta. 70Zisu ta ama hnohta, “Nâmo pahrawh hleinozy chi he, keima ta ei châ tlyhpa châ veih ei chi ma? Châhrasala nama hry liata pakha cha ahripa a châ,” tah ta. 71Saimaw Iskari sawchapawpa Zudâh, pahrawh hleinozy hry liata a hlao hrapa ta, ano a patusa nawpa kyh a reipa a châ.
Sélection en cours:
ZAWHÂNA 6: MARVBSI
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
The Bible Society of India
© 2023, Used by permission. All rights reserved.
