ZAWHÂNA 8
8
Chanô sihryhpa ngiahthaina
1Zisu cha Ôli Tlâh lâ khy ta. 2Mydi kari ta Achhyna o lâ pangai heih ta. Chyhsa zydua ano lâ a vy ei ta, a tyuh ta, âmo cha pachu ta. 3Ryhpa pachutuhpazy nata Phârisaihzy ta chanô pakha â phei hai nota ama patupa a vaw chhi ei ta, a liah liata paduasa ei ta. 4Zisu hnohta, “Pachutuhpa, he chanô he â phei hai nota, â phei hai no tlai ta patupa châ ta. 5#Ttn 20.10; Ryhpa 22.22-24Ryhpa châbu liata, he hawhpa chyhsa he cha alô ta vawhsao awpa ta, Mawsi ta bie miah a pie. Nâ zaw, kheihta na pachâ?” tah ei ta. 6Cha bie cha ano pasia nawpa ta reih ei ta, ano leih nawpa ama hmô thei nawpa ta ama reipa a châ. Zisu cha a bôh ta, a kudy ta alei liata roh ta. 7Ama hiahri chanei ngâ thlâh hapa vâta, Zisu cha kaw ua ta, ama hnohta, “Nama hry liata moleina a hnei leipa ta, he chanô he alô ta vawh tua chai mawh sy,” tah ta. 8A bôh heih ta, a kudy ta alei liata roh heih ta. 9A bie reipa cha ama thei nahta, machâ chaipa tawhta pua pathao ei ta, pakha pakha ta pua lymâ ei ta, Zisu cha ama puasai khai haw. Chanô cha Zisu hmiakô liata a duah thlâh ha ta. 10Zisu cha a kaw duah ta, chanô dei leipa ta cha ahy hmah hmô khao leipa ta, chanô hnohta, “Chanô, khataih lâ ama vaw khai haw? Thailei châ pachâsapa ahy hmah y veih ei ma?” tah ta. 11Chanô ta, “Abeipa, thailei nâ pachâsapa ahy hmah y veih ei,” tah ta. Zisu ta, “Kei chhao ta thailei cha pachâsa va na. Sie la, tahmâ tawhta la molei khao khah y,” tah ta.
Zisu khizaw khaihpa
12 #
Mat 5.14; Zhn 9.5 Zisu ta ama hnohta bie reih heih ta, “Kei he khizaw khaihpa ei châ. Ahy rai nâ zipa cha zohna liata charei leipa aw ta, hrona khaihpa tlao a hnei aw,” tah ta. 13#Zhn 5.31Phârisaihzy ta a hnohta, “Nâmasasyh ta nâ pahnokhei thlâh hapa he. Na bie pahnopa he a do vei,” tah ei ta. 14Zisu ta âmo cha a chhy ta, “Keimasasyh ta ei pahnokheipa chhao ta, ei bie pahnopa cha a do ta, ei vaw puana nata ei sie nawpa ei pahno. Nâmo deikua ta cha, ei vaw puana pahno leipa ei chi ta, ei sie nawpa chhao pahno hra veih ei chi. 15Nâmo ta cha sapa yzie ta pachia tyh ei chi ta, kei deikua la, ahy hmah pachia va na. 16Ei pachiapa chhao ta, ei pachiana cha â do. Kei dei ta a pachiapa châ leipa na ta, nâ tuahtuhpa ei Paw nata hmaohkha ta eima pachiapa a châ. 17#Ryhpa 19.15Nama ryhpa liata chhao, chyhsa pano ta pahnokheipa cha biedopa ta pachâpa a châ. 18Keimasasyh ta a pahnokhei na ta, nâ tuahtuhpa ei Paw chhao ta eina pahnokhei,” tah ta. 19Âmo ta a hnohta, “Na Paw cha khataih liata a y?” tah ei ta. Zisu ta, “Kei na pahno leipa ei chi ta, ei Paw chhao pahno veih ei chi. Nâ pahnopa châ u la, ei Paw chhao nama pahno aw,” tah ta. 20Cha biezy cha Achhyna o liata a pachu nota, thyuna sona su liata reih ta. Châhrasala a daihti a tlô mâh leipa vâta, ahy hmahta Zisu cha patu veih ei.
21Chatawhcha ama hnohta, “Sie aw na ta, eina tlua aw ei chi. Nama moleina liata nama thi aw. Nâmo la ei sie nawpa lâ vaw sie thei aw veih ei chi,” tah heih ta. 22Zuzy ta, “‘Ei sie nawpa lâ vaw sie thei aw veih ei chi,’ a tahpa he, anosasyh ta a thie awpa ma â chhuah tly?” tah ei ta. 23Zisu ta ama hnohta, “Nâmo cha ry lâ tawhta a puapa châ ei chi ta, kei deikua cha, chô lâ tawhta a puapa ei châ. Nâmo cha khizaw tawhta a puapa châ ei chi ta, kei deikua cha, he khizaw tawhta a puapa châ va na. 24Chavâta nama moleina liata nama thi aw, ei cha tahpa ei a châ. Kei he Mesia ei châ tahpa nama zo leipa khiahta la, nama moleina liata nama thi aw,” tah ta. 25Âmo ta a hnohta, “Ahy ma na châ?” tah ei ta. Zisu ta ama hnohta, “Âthaona tawhta ei cha chho tyhpa ei kha na ei châ. 26Nâmo kyh liata hmo hluhpi rei awpa nata pachia awpa ei hnei. Khâpa rai châ sala, nâ tuahtuhpa cha adopa châ ta, ano tawhta bie ei theipazy khizaw liata ei phuah tyh,” tah ta. 27Paw thâtih ama hnohta a reih tahpa pahno veih ei. 28Zisu ta ama hnohta, “Chyhsa Sawchapawpa he nama chaluah tita, ano cha ei châ tahpa pahno aw ei chi ta, keima biehneina ta khâpa hmah tao leipa na ta, Paw ta eina pachupa hawhta a reih tyhpa ei châzie nama pahno aw. 29Nâ tuahtuhpa cha ei hnohta a y. Ano a palysapa hmozy ei tao lymâpa vâta, na siesai beih vei,” tah ta. 30Cha biezy a rei hai nota, chyhsa hluhpi ta Zisu cha a ngiapâ ha ei ta.
Biehmeiseihpa ta khotalaina
31Chatawhcha Zisu ta ngiapâtuhpa Zuzy hnohta, “Ei bie liata nama y thlâh ha khiahta cha, ei pachupa dopazy nama châ aw. 32Biehmeiseihpa pahno aw ei chi ta, biehmeiseihpa ta kho ta a cha palaisa aw ei,” tah ta. 33#Mat 3.9; Lka 3.8Âmo ta a hnohta, “Abarahâ pathlazy châ pi ta, ahy sei ta hmah y beih ma pi. Kheihtazieta, ‘Khotalaipa nama châ aw,’ a tahpa ma na châ?” tah ei ta. 34Zisu ta ama hnohta, “Hmeiseihta ta, hmeiseihta ta ei cha chho ei, ahy rai hmo moleipa a taopa maih cha moleina sei a châ. 35Sei cha chhâzaw ta o liata y thlâh ha vei. Sawchapawpa deikua cha o liata chhâzaw ta a y thlâh ha tyh. 36Chavâta Sawchapawpa ta khota a cha palaisa khiah ei ta cha, khotalaipa nama châ hmeiseih aw. 37Abarahâ pathlazy nama châpa ei pahno. Châhrasala ei bie ta nâmo liata yna a hnei leipa vâta, thie einâ chhuah ei chi. 38Kei ta ei Paw liata hmo ei hmôpa reih tyh na ta, nâmo chhao nama paw tawhta nama theipa nama tao tyh hra,” tah ta.
Nama paw ahripa
39Âmo ta a hnohta, “Keimo paw cha Abarahâ a châ,” tah ei ta. Zisu ta ama hnohta, “Abarahâ sawzy nama châ khiahta cha, Abarahâ taopazy nama tao hra awpa a châ. 40Châhrasala tahmâ kei, Khazohpa tawhta ei theipa biehmeiseihpa châ chhotuhpa he, thie nâ chhuah tlôh ei chi! Abarahâ kha cha hawhta tao beih vei. 41Nama paw taopa hawhpa nama tao hra hih,” tah ta. Âmo ta a chhy ei ta, “Riasaw châ ma pi. Paw pakha hnei pi ta, cha cha Khazohpa a châ,” tah ei ta. 42Zisu ta ama hnohta, “Khazohpa cha nama Paw a châ khiahta cha, kei he Khazohpa tawhta a puapa nata ano tawhta a vypa ei châpa vâta, kyh eina pachâ aw ei chi. Keima rei ta a vypa châ va na, ano ta eina tuapa tlao a châ. 43Khazia ei biereipa nama pahno thai vei? Ei bie reipa nama pahnie leipa vâta a châ. 44Nâmo cha nama paw ahripa tawhta a puapa châ ei chi ta, nama khopa cha, nama paw khopa taopa a châ. Ano cha âthaona tawhta lianycheihpa châ ta, ano liata biehmeiseihpa rai a y leipa vâta, biehmeiseihpa liata a duah vei. Haipa bie a rei nahta, ano châna dopa a palâsa tyh. Ano cha haihthaipa nata haipa bie zydua paw a châ. 45Biehmeiseihpa ei reipa vâta na zo veih ei chi. 46Nama hry liata ahy ma moleina vâta thailei nâ pachâsa thei aw ei chi? Biehmeiseihpa reih na ta, khazia eina zo veih ei chi? 47Khazohpa chyhsa cha Khazohpa bie a nathlie. Nâmo deikua cha, Khazohpa chyhsa nama châ leipa vâta, Khazohpa bie nathlie veih ei chi,” tah ta.
Abarahâ y hlâta Zisu a y haw
48Zuzy ta a chhy ei ta, a hnohta, “Samâri chyhsa châ chi ta, ahripa azopa na châ eima cha tahpa kha pado kaw ma pi ma?” tah ei ta. 49Zisu ta, “Ahripa azopa châ va na, ei Paw ei palyupalihpa tlao a châ. Nâmo deikua ta ei moh nama pachhie. 50Keima rônahna a tluapa châ va na. Ei rônahna a tluapa Pakha y ta, ano cha pachiatuhpa a châ. 51Hmeiseihta ta, hmeiseihta ta ei cha chho ei, chyhsa ta ei bie a zyh khiahta cha, thina hmia hmô beih aw vei,” tah ta. 52Zuzy ta a hnohta, “Ahripa na châ tahpa tahmâ eima pahno haw. Abarahâ thi ta, hrohsopazy chhao thi ei ta, nâ deikua cha, ‘Chyhsa ta ei bie a zyh khiahta cha, thina padi beih aw vei,’ tah tlôh chi ta. 53Miah pathlatuhpa Abarahâ hlâta na rônah via ma? Ano cha a thi ha mâh tâh! Hrohsopazy chhao ama thi haw! Ahy ta ma nâ reih?” tah ei ta. 54Zisu ta a chhy ta, “Keimasasyh ta a palyupalih aw sah la, ei palyupalihna cha khâpa hmah châ vei. ‘Ano cha eima Khazohpa a châ,’ nama tahpa ei Paw ta eina palyupalihpa a châ. 55Châhrasala nâmo la ano pahno veih ei chi. Kei deikua ta cha ei pahno. Khazohpa pahno va na ei tah khiahta cha, nâmo hawhta a haihpa ei châ aw. Khazohpa cha pahno na ta, a bie ei zyh lymâ. 56Nâmo châ pathlatuhpa Abarahâ kha, keima noh hmô awpa hnabeiseihpa ta, a thapha ngaita tyh. Ei noh cha hmô tlai ta, â ly ngaita,” tah ta. 57Zuzy ta a hnohta, “Nâ, kô sypangawh chhao a tloh mâh leipa chi ta, Abarahâ na hmô ha ma?” tah ei ta. 58Zisu ta âmo cha a chhy ta, “Hmeiseihta ta, hmeiseihta ta ei cha chho ei, Abarahâ y hlâta ei y haw,” tah ta. 59Alô a huah ei ta, Zisu cha vaw a chhuah ei ta, châhrasala Zisu cha a nyu ta, Achhyna o tawhta pua ha ta.
Sélection en cours:
ZAWHÂNA 8: MARVBSI
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
The Bible Society of India
© 2023, Used by permission. All rights reserved.
