Jenesis 40
40
Josep bu nimitelë wayo gali të totome
1Tokwafe eso ho Ferobë bletë nage ahujume lëglekefëtlebë ho na bubë hitu su lëtakefëtlebë ho, humëi na hi lëglelëme, bu eso ho Ferome tëbo lamototlo. Na bu welili tletëme. 2Na eso ho Fero kë tlemalë wege home wame tlome. 3Na bu kë tlemalë home Potifarbë kalabusu lowa sike mëtla, Josep këme kë tafa tëglebë. 4Na kalabusu lo bolijaya Josepme gali tlole, “Ju kë tlemalë home tafa elelëme.” Na kë tlemalë ho kalabusu lo mëta tako olë tafa mëtelo.
5Tokwafe eso ho Ferobë hi wesibi ahujume lëglekefëtlebë ho na hitu su lëtakefëtlebë ho, bu kalabusu lo mëta kë tafa mëtelobë, bu nimitelëna hwi mëtelo. Na bubë tële nimitelë esobë bwa bwa.
6Na olobalë Josep bu belë hwime tuju tëme na mehwi latlome, “Yeluna alëla memëtelo.” 7Na takune tlome, “Sobo fëyeme tutune elone?”
8Na bu metafu mëtëtatelo, “Sebo nimitelë hwi nëgelome nëgeme, kwe seme li ho nimitelë esome hana gali lolono.” Na Josep bu tlemalë home gali tlome, “Goto nimitelë wayo gali buwa lowene lëletëme. Na buwa olafa lotometëname. Te, sobobë nimitelë galibë bome të etometëna.”
9Na hitu su tëtakefëtlebë ho bubë nimitelë gali të totle. Bu gali tle, “Bo nimitelë nanelë wain taba liji hwi nololë. 10Kë taba aona tikefona. Laba okwëfo foke mele. Na tahweji kë mëta fu mele. Na liji tatakowa mowalë. Na iniwa nigliji mele. 11Kë taba liji tu, lale iji lamële. Na bo eso ho Ferobë kabo fa nëtë. Na kë taba liji tu kiki notomë. Na bo kë tu eso ho Ferome kabona nëlëlë. Bobë nimitelë gali tei.”
12Na Josep gali tle, “Nimitelë esobë melëgëbelalëletle. Aona taba tikefobë, aona olëme lëlekuju lële. 13Aona olë yawe na eso ho Ferobë wame lowene mana tli lëbetleme. Na mana eso ho Fero bu gali loglëme, ‘Ita esimo, jubë wege ita fa naegotleme.’ Na ju tokwafe eso ho Ferobë hitu ita su egëtakefëtleme, ëbame ju fene su tëtakefëtle, humëina hi lëglelime. 14Na tokwafe, ju eso ho Ferobë lo mëta tafa eglena bome maninibo eletenëme na bome aholokwana asa ti ele. Lowene egletenëme na eso ho Ferome gali eloleme, bome kë kalabusu lo mago tuhu nalëgëtanëme. 15Ëbamemu, bobë toba tabana lei mototometëna na Hibru life mago mana mëtlesuna ebë lifewa. Na bo ebë life mëta bo tafa tëgelëna, bo fëyeha hana telë. Kwe bome blawa kalabusu mëtëtana.”
16Na hi wesibi ahujume lëglekefëtlebë ho bu hitu su tëtakefëtlebë hobë nimitelë wayo gali aholokwane tle, na lowene tle, “Lalowafe.” Na Josepme gali tlole, “Bo melë nimitelë mehwi nanelë. Bo aona basketë musu bletë nage manogwa eso mëta gogwa mana nehwei. 17Matawa mago isekubë eso ho Ferobë lale nage ëfomemu mobe. Na kwe fole kë nage, ëfo mago hi mele. Bobë nimitelë gali tei yawe lële.”
18Na Josep gali tle, “Nimitelë esobë melëgëbelalële. Aona isekubë, aona olëme lëlekuju lële. 19Aona olë yawe jwa mëleme na eso ho Fero jume kalabusu lo mago tuhu lëtame na jume mou lokwati sika lëtame. Na jubë ato ti mëta tabana kesi lëtatëme. Na fole jubë afabo mana hi meletëme.”
20Aona olëbëna eso ho Fero, bubë wege home tako salë fata tëtatëme, bota bume këna fu togotlebë olëbë salë. Na bubë hitu su tëtakefëtlebë ho na hi wesibi ahujume tëglekefëtlebë ho kalabusu lo mago tutuhu mëtla. Na mëtlesuma, na eso ho Ferobë naba li mëta ola mëtla. 21Na eso ho Fero bu hitu su tëtakefëtlebë home gali tlole, “Ju ejume, na jubë wege ita fa naegotleme.” 22Kwe eso ho Ferobë hi wesibi kë ahujume tëglekefëtlebë home ti mëta tabana kesi totle na lagliwa tle. Ebë wesibi mefata këme mëtle, ëbame nimitelë eso galibëme Josep fene gali tle. 23Kwe eso ho Ferobë hitu su lëtakefëtlebë ho Josepme aholokwanamu ti tle.
Sélection en cours:
Jenesis 40: NCE
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2023 (Active), Wycliffe Bible Translators, Inc. All rights reserved.