Yôhan 18
18
Nau nđêh nji, nau khĭt jêh ri nau Brah Yêsu dâk rêh tay
(18:1 – 21:25)
Nau bu nhŭp Brah Yêsu
(Mathiơ 26:47-56; Markôs 14:43-50; Luka 22:47-53)
1Jêh nau mbơh sơm, Brah Yêsu hăn ndrel ma phung oh mon ta đah ri dak n'hor Kêdrôn; ta nây geh du n'gar, Păng lăp ta nây ndrel ma phung oh mon Păng. 2Y-Yuđas, nơm rlăng ma Păng, gĭt đŏng ntŭk nây, yorlah Brah Yêsu ndrel ma phung oh mon vay hăn tâm mâp ta nây. 3Pôri, Y-Yuđas njŭn leo du mpôl tahan ndrel ma phung kơl kan phung kôranh ƀư brah toyh jêh ri phung Pharisi hăn ta ntŭk nây, djôt leo ŭnh kađen, ŭnh chai jêh ri ndơ tâm lơh. 4Brah Yêsu gĭt lor jêh lĕ rngôch nau mra tât ma Păng, Păng hăn tât jêh ri ôp: “Mbu khân may joi?” 5Khân păng plơ̆ lah: “Yêsu, bunuyh Nasaret.” Brah Yêsu lah ma: “Gâp aơ!” Yuđas, nơm rlăng ma Păng gŭ ndrel ma khân păng ta nây lĕ. 6Nôk Brah Yêsu lah: “Gâp ƀơh aơ” khân păng rŭch nkơi jêh ri cha lôt ta neh. 7Brah Yêsu ôp đŏng: “Mbu khân may joi?” Khân păng plơ̆ lah: “Yêsu, bunuyh Nasaret.” 8Brah Yêsu lah: “Gâp hŏ lah jêh ma khân may, Gâp ƀơh aơ. Pôri, lah khân may joi nhŭp Gâp, ăn phung bunuyh aơ du sĭt.” 9Nau nây tât di ngăn nau Păng hŏ lah jêh: “Kon mâu ƀư roh du huê ôh tâm phung bunuyh Mbơ̆ ăn jêh ma Kon.” 10Y-Simôn Pêtrôs geh du n'gâr đao, păng tăk đao, dong du huê oh mon kôranh ƀư brah toyh lơn, sreh tăch tôr pa ma bunuyh aơ. Oh mon nây amoh păng Y-Malkus. 11Ƀiălah Brah Yêsu lah ma Y-Pêtrôs: “Ntrŭp lơi đao may tâm ndrop! Gâp mâu mra nhêt hĕ ngan Mbơ̆ hŏ ăn Gâp nhêt?”#Mat 26:39; Mark 14:36; Luk 22:42.
Brah Yêsu tanăp Y-Anas. – Y-Pêtrôs dun Brah Yêsu
(Mathiơ 26:59-75; Markôs 14:55-72; Luka 22:55-71)
12Nôk nây, phung tahan nđâp ma kôranh chiă uănh jêh ri phung kôranh phung Yuđa nhŭp Brah Yêsu jêh ri chăp lơi. 13Lor lơn, khân păng njŭn leo Brah Yêsu văch ta Y-Anas, yor păng jêng po Y-Kaipe, jêng kôranh ƀư brah toyh lơn tâm năm nây. 14Y-Kaipe nơm jêng tâm nchră ma phung Yuđa pô aơ: “Ueh lơn ma du huê bunuyh khĭt ntrok an ma lĕ phung ƀon lan.”#Yôh 11:49-50.
15Y-Simôn Pêtrôs jêh ri du huê oh mon êng hăn tĭng Brah Yêsu. Oh mon nây gĭt bên đah kôranh ƀư brah toyh lơn, păng lăp ndrel ma Brah Yêsu tâm ndring ngih kôranh ƀư brah toyh lơn. 16Ƀiălah Y-Pêtrôs hôm gŭ padih, dăch mpông sâng. Yor ri, oh mon ri, păng gĭt bên kôranh ƀư brah toyh lơn, hăn luh lah đah bu ur gak mpông, jêh leo Y-Pêtrôs lăp. 17Bu ur gak mpông nây lah ma Y-Pêtrôs: “May ƀơh jêng du huê tâm phung oh mon bunuyh nây di lĕ?” Y-Pêtrôs plơ̆ lah: “Mâu di gâp ôh.” 18Yorlah bri ji kăt, phung oh mon jêh ri phung kôranh sênh ŭnh ma si ônh rnga, jêh ri gŭ njâr ŭnh. Y-Pêtrôs gŭ njâr ŭnh ndrel ma khân păng ta nây.
19Kôranh ƀư brah toyh lơn ôp Brah Yêsu ma phung oh mon jêh ri ma nau Păng nti lah. 20Brah Yêsu plơ̆ lah: “Gâp hŏ ngơi rah vah jêh ma lĕ rngôch ntil mpôl bunuyh. Gâp vay nti tâm ngih rƀŭn jêh ri tâm ngih brah, ntŭk lĕ rngôch phung Yuđa gŭ rgum, Gâp mâu mâp ngơi du ntil nau ndâp ôh. 21Mâm ƀư may ôp Gâp? Ăn may ôp phung hŏ tăng mâm nau Gâp ngơi, gay ma gĭt Gâp hŏ lah moh nau ma khân păng. Phung nây gĭt lĕ nau Gâp ngơi jêh.” 22Jêh Brah Yêsu lah nau nây, du huê tâm phung kôranh gŭ ta nây tap ta măt Brah Yêsu ma ti jêh ri lah: “Mâm may nănh plơ̆ lah ma kôranh ƀư brah toyh lơn?” 23Brah Yêsu plơ̆ lah: “Lah Gâp ngơi tih, lah hom nau tih nây; ƀiălah lah Gâp ngơi di, mâm ƀư may tap Gâp?” 24Y-Anas đah bu têk leo Brah Yêsu dôl bu hôm chăp, tât ta Y-Kaipe kôranh ƀư brah toyh lơn.
25Y-Simôn Pêtrôs hôm gŭ njâr ŭnh, khân păng ôp ma păng: “Mâu di hĕ may jêng du huê tâm phung oh mon păng?” Y-Pêtrôs dun jêh ri plơ̆ lah: “Mâu di gâp.” 26Du huê tâm phung oh mon kôranh ƀư brah toyh lơn, bunuyh nây jêng mpôl băl đah nơm Y-Pêtrôs sreh tăch tôr, lah: “Mâu di hĕ gâp hŏ saơ may gŭ ndrel ma Păng tâm n'gar?” 27Y-Pêtrôs ăt dun du tơ̆ đŏng, iăr ndrau ro.
Brah Yêsu tanăp Pilat
(Mathiơ 27:1,2,11-14; Markôs 15:1-5; Luka 23:1-5)
28Pôri, khân păng têk leo Brah Yêsu bơh ngih Y-Kaipe tât ta ngih kôranh phat dôih. Nôk nây jêng ơm ôi. Khân păng nơm mâu lăp ôh tâm ngih kôranh phat dôih, gay bah ƀơ̆ ƀơch, jêh ri dơi sa rƀŭn Nau Găn. 29Yor nây, Pilat hăn luh, tât ma khân păng jêh ri lah: “Moh nau tih khân may phong bunuyh aơ?” 30Khân păng plơ̆ lah: “Lah păng mâu di jêng bunuyh mhĭk hên mâu njŭn leo ôh păng ma kôranh.” 31Pilat lah ma khân păng: “Khân may djôt jêh ri phat dôih Păng tĭng nau vay khân may nơm.” Phung Yuđa ơh: “Hên mâu dơi vay nkhĭt bu ôh.” 32Nau aơ tât di ngăn tĭng nau Brah Yêsu hŏ lah jêh, mâm nau Păng mra khĭt.#Yôh 3:14; 12:32. 33Pilat lăp đŏng tâm ngih kôranh phat dôih, kuăl Brah Yêsu jêh ri ôp: “Di lĕ may jêng hađăch phung Yuđa?” 34Brah Yêsu plơ̆ lah: “May nơm lah nau nây, mâu lah geh bunuyh êng lah nau Gâp ma may?” 35Pilat plơ̆ lah: “Gâp hĕ jêng bunuyh Yuđa? Phung mpôl băl may jêh ri phung kôranh ƀư brah toyh jao jêh may ma gâp. Pôri moh nau may mâp ƀư jêh?” 36Brah Yêsu plơ̆ lah: “Ƀon bri hađăch Gâp mâu geh ta neh ntu aơ ôh. Lah ƀon bri hađăch Gâp ta neh ntu aơ, phung bunuyh tĭng Gâp tâm lơh an, mâu ăn bu jao ôh Gâp tâm ti phung Yuđa. Ƀiălah ƀon bri hađăch Gâp mâu di tâm neh ntu aơ ôh.” 37Pilat lah đŏng: “Pôri may ƀơh jêng hađăch?” Brah Yêsu plơ̆ lah: “Ngăn may nơm lah Gâp jêng hađăch. Aơ jêng mâm nau bu deh ma Gâp, mâm nau Gâp văch ta neh ntu aơ: Nây jêng gay ma mbơh nkoch nau ngăn. Mbu nơm jêng bunuyh gŭ tâm nau ngăn, nơm nây iăt nau Gâp ngơi.” 38Pilat ôp: “Mâm jêng nau ngăn?”
Jêh Pilat lah kơt nây, păng hăn tâm mâp ma phung Yuđa jêh ri lah: “Gâp mâu saơ ôh bunuyh aơ geh nau tih. 39Ƀiălah tĭng nau vay khân may, tât rƀŭn Nau Găn gâp vay mƀơk ma khân may du huê bunuyh bu krŭng. Pôri, khân may ŭch lĕ gâp mƀơk hađăch phung Yuđa ma khân may?” 40Khân păng nter ma bâr huy: “Lơi mƀơk ma păng, mƀơk hom ma Y-Barabas!” Y-Barabas jêng du huê bunuyh ntŭng.
Sélection en cours:
Yôhan 18: CMO2023
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2023 United Bible Societies. All rights reserved.
