मत्ती 17
17
ईसुन सीकु बदली जाय ने चु मुसा ने एलीया साते वात करे
(मरकुस 9:2-13; लुका 9:28-36)
1छव दाहड़ा हय गुया ने अळतेन ईसु पतरस ने याकुप ने तेरा भायस युहन्ना काजे पुठ्ये ली लेदु, ने तीनुक अगु एक मटला बयड़ा पर ली गुयु। 2तींद्रे अगळ ईसुन सीकु बदली गुयु, ने तेरो मुंहडो दाहड़ान तसों चमकणे बाजी गुयो, ने तेरा पुथल्या वीजाळान तसा चमकणे बाजी गुया। 3ने तीनु चेला काजे मुसु ने एलीयु ईसु साते वात करतेला देखाव पड़्या।
4तेरेसी पतरस ईसु काजे कह्यु, “ए मालीक, आपणो जां रहणु वारु छे! कदी तारी मरजी हय ती मे जां तीन खपड़ी बणाय दम; एक तारे वाटे, ने एक मुसा वाटे, ने एक एलीया वाटे।”
5चु ज कवणेत बाजी रवलु ने एक वीजाळो आदळो तीनुक ढाक लेदो, ने तीना आदळा मां सी ज सामळ्या, “जु मारु लाटेक्लु पुर्यु छे, हेरेसी मे बेसकु खुस छे: हेरीत वात सामळीन मानु!”
6चेला असा सामळीन मुंहडान भुरसे पड़्या, ने बेसका बीही गुया। 7तत्यार ईसु धड़े आवीन तीनुक कह्यु, “उठु, बीहु#17:7 डरो मां।” 8तत्यार चे उचा भाळ्या, ती चां ईसु अतरुत देखाव पड़्यु।
9जत्यार ईसु तीने बयड़े सी उतरने बाजी रवलु ती तीनु चेलाक हुकुम आपीन असु कह्यु, “जत्यार लग माणसेन पुर्यु मर्या-सर्याम सी जीवतु नी हवे, तत्यार लग ज काय बी तुहुं देखला छे च कुय काजे घुण कह्वु।”
10मरनेन वात काटणे करीन चेला ईसुक असा पुछ्या, “ती यहुदी नीयमेन मास्तर्या काहा कह्वे की एलीयान पेहेल आवणु टाकलो छे?” 11ईसु तीनुक जपाप आप्यु, “हव, असो लिखलो छे की एलीयु छाचलीन आवसे, ने आखो काय सुदारसे। 12बाकुन मे तुंद्रे सी कह्वो, की एलीयु आय गुयु, ने माणसे तीना काजे नी उळख्या; बाकुन जसों चाह्या असोत तेरे साते कर्या। हीनी रीत सी माणसेन पुर्यु बी हींद्रे हात सी दुख हाकलसे।”
13तत्यार चेला ज समजी गुया की ईसु आपणु काजे युहन्ना बपतीस्मा आपणे वाळान बारामां कवणे बाजी रयु।
ईसु भुतड़ान आत्मा सी भरायला पुर्या काजे वारु करे
(मरकुस 9:14-29; लुका 9:37-43)
14ने जत्यार ईसु ने तीन चेला बयड़े सी उतरीन माणसेन टुळु वाट देख रवलु ती, ती एक माणुस ईसु धड़े आयो, ने मांडा टेकीन कह्यु, 15“ए मालीक, मारा पुर्यु पर दया कर! काहाकी तीना काजे मीरगीन मांदवाड़ छे, ने चु बेसकु एला करे; ने पछुत-पछु आकठा मां ने पाणी मां पड़ जाय। 16मे हीना काजे तारा चेला धड़े लावलु, बाकुन चे वारु कर नी सक्या।”
17तीनाक असु कवतेला सामळीन ईसु चां भेळा हय रवला आखा माणसेक कह्यु, “ए भुरसु नी करने वाळा, मे कत्यार लग तुंद्रे साते रवीस? कत्यार लग तुहुंक सेण करतु रवीस? हीना पुर्या काजे मारे धड़े लावु।” 18तत्यार ईसु तीना भुतड़ान आत्मा काजे लड़्यु, ने ची तीना पुर्या मां सी नीकळी गुय; ने चो पुर्यो तत्यारुत वारु हय गुयो।
19अळतेन ईसु एखलुत हतलु तत्यार हेरा चेला आवीन तीनाक पुछ्या, “हामु हीना भुतड़ा काजे काहा नी नीकाळ सक्या?” 20ईसु तीनुक कह्यु, “तुंद्रा भुरसु नी हवणेन वजे सी, काहाकी मे तुंद्रे सी छाचलीन कह्वो, कदी तुंद्रु भुरसु रायन दाणान बराबर बी रवसे, ती हीना बयड़ा सी कवसु, जां सी सरकीन वां जाती रव, जां सी सरकीन छेटु हय जासे; ने काय बी वात तुंद्रे वाटे नी हवे असी नी रवे। 21बाकुन जी भुतड़ान जातीन दुवा#17:21 प्रार्थना ने उपास पाखुर नी नीकळे।”
ईसु दीसरी कावा हेरा बारामां दुखेन ने मर्या-सर्याम सी जीवतु हवणेन बारामां कवे
(मरकुस 9:30-32; लुका 9:43-45)
22जत्यार चे भेळा हय्न गलील जीला मां आया, ती ईसु हींद्रे सी कह्यु, “माणसेन पुर्यु माणसेन हात मां धराय जासे। 23ने माणसे तीनाक मार नाखसे, ने चु तीन दाहड़ा मां मर्या-सर्याम सी जीवतु हय जासे।”
ज सामळीन चेला काजे बेसको दुख लाग्यो।
ईसु ने पतरस मंदीरेन फाळु आपे
24तत्यार चे कफरनहुम सहर मां गुया ती मंदीरेन फाळु मांगणे वाळा पतरस धड़े आवीन पुछ्या, “तुंद्रु मास्तर मंदीरेन फाळु नी आप्तु काय?” 25पतरस कह्यु, “हव, आपे।”
जत्यार चु घर मां आयु, ती ईसु पतरस काजे पुछणे सी पेहलुत ईसु तीना काजे पुछ्यु, “ए सीमोन तु काय वीच्यार रयु? हीनी कळीन राजा फाळु काहना माणसे सी लेय आपसान पुर्या सी की दीसरा माणसे सी फाळु लेय?” 26पतरस ईसु काजे कह्यु, “दीसरा माणसे सी।” ईसु पतरस काजे कह्यु, “ती पुर्या काजे फाळु नी आपणु पड़े। 27बाकुन तेबी आपणु हीनु माणसे काजे नराज नी करता, तु दरीया धड़े जाय्न गळी नाख, ने जी माछी पेहेल नीकळे, हीनीक लीन; तेरो मुंहडो उघाड़ने सी तुसे काजे एक सीक्कु जड़से, तीना सीक्का काजे लीन मारे ने तारे वाटेन करीन आप देजी।”
Sélection en cours:
मत्ती 17: NTBSP23
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
The New Testament in Bhilali Language ©The Word for the World International and Bhilali Bhasha Samiti, Warvani, (M.P.) 2023.