JHN 3
3
येशुड इंगा निकदेम
1परुशी मंदी लोन्केल निकदेम फेरोड वगा मनशी उंड्या, वाड यहुदी मंदी अधिकारी उंड्या. 2वाड वगा नाड मोब्बुला येशुन तीकुड वच्ची आन्या, “रब्बी, नु परमेश्वर तीकेल वच्चीने शिक्षक उंडाव इदी माक यरका उंडाद; येनटीक की नु याय चमत्कारलु शेस्तुनाव आय यादुच मनशी, वान जताक परमेश्वर उंडीन शिवाय शेशी शकायाड.” 3येशुड वान आन्या, “निन निक खरे-खरेम शपतान, याड नंताक कोत्ताद जन्म काद आड नंताक यवारकीच परमेश्वरदी राज्य सुडा दाक फोई,” 4निकदेम वान आन्या, “मुसल्योड मनशी जन्म तिस्कुनी? वाड मना आम्मा गर्भलोंग फोईगास इंगोगो जन्म तिस्कुनी शकास्ताड येम?” 5येशुड वानकी उत्तर इच्या, “निन निक खरे-खरेम शपतान नेळाता इंगा आत्माता जन्म तिस्कुनीन शिवाय यवारकीच परमेश्वर राज्यला प्रवेश शेयादाक फोई. 6येनटीक की फयता फुट्टीनोड फय उंडाड इंगा आत्माता फुट्टीनोड आत्मा उंडाड. 7आश्चर्य चकीत काक की निन निन्नु आंटीन, निक कोत्ताद जन्म तिस्कुनाने बेक. 8घालीक यक्काड वाटास्ताद आक्काड आदी इडताद इंगा नु दानदी आवाज इंटाव, पण आदी यंदुकेल वस्ताद इंगा यंदुक फोयताद इदी निक तेल्वाद. आल्ले यवाड पण आत्माता फुट्टीनाड वानदी इल्ले उंडाद.” 9निकदेम वान आडग्या, “इ माटलु यला आय्यी शकास्ताय?” 10येशुड वानकी उत्तर इच्ची आन्या, “नु इस्राएल गुरु उंडीगास पण निक इ माटलु तेल्वाय येम? 11निन निक खरे-खरेम शपतान की, येम माक यरका उंडाद आदी मिम शपताम इंगा मिम येम सुशीनाम दानदी साक्ष इस्ताम; पण मीर मंदी माद साक्ष स्वीकार शेय्यार. 12निन पृथ्वी मिंदुडी माटलु मिक शपतीन आप्पुड मीर विश्वास फेट्टालेद; जर, निन स्वर्गलोनी माटलु मिक शपतीन तर मीर यल्ला विश्वास फेट्यार? 13स्वर्गलोंग यप्पुडुच यवाड फोई दालेद. पण मनशी कोडकु स्वर्ग लोन्केल दिगी वच्चीनाड. 14इंगा यल्ला मोशेड जंगलला कट्ट्या मिंदा पितळदी फाम फैनिक शेशीन्या आल्ले मनशी कोडकुन पण फैनिक शेयाने बेक,#गणना 21:4-9. 15दिनिचांग की, यवाड पण वान मिंदा विश्वास फेट्टी वानकी सार्वकालिक जीवन शिक्काला.
16 येनटीक की परमेश्वर दुन्याम मिंदा इंता प्रेम शेशा की, वाड मना वगा कोडकुन इचकाड्या दिनिचांग की, यवाड पण वान मिंदा विश्वास फेट्टी वानदी नाश कावाराद तर वानकी सार्वकालिक जीवन शिक्काला. 17येनटीक की परमेश्वर कोडकुन दुन्यामलोंग आंप्या आदी दुन्यामदी न्याय शेशेदेंक लेद, पण वान तीकेल दुन्यामदी तारण कावाला आंका आंप्या. 18यवाड वान मिंदा विश्वास फेटताड वानदी न्याय काक फोई, पण यवाड विश्वास शेय्याड वानदी न्याय आयनेदे उंडाद; येनटीक की, वाड परमेश्वर वगा कोडकु फेर मिंदा विश्वास फेट्टालेद. 19इंगा न्याय इदी उंडाद की, दुन्यामला यलगु वच्चीनाद; पण मंदी यलगु काना मोब्बुन पसंद शेशीर, येनटीक की वारी फनुल वाईट उंड्या; 20येनटीक की यवाड पण वाईट फनुल शेस्ताड वाड यलगुद कोफाम शेस्ताड इंगा वानी फनुल प्रगट कावाराद आंका यलगुलोंग दाड. 21पण यवाड सत्य दावा मिंदा नडस्ताड वाड यलगु तीकुड वस्ताड दिनिचांग की, वानी फनुल परमेश्वर मुंदार शेशीनेय उंडाय आय्यी कमसाला.”
बाप्तिस्मा इच्चेतोन योहान शेयता येशुनदी बाप्तिस्मा
22दिन बाद येशुड इंगा वान शिष्यल यहुदीया प्रांतलोंग वच्चीर इंगा आंदु वार जताक निलची वाड बाप्तिस्मा इच्चेदेंक आंट्या. 23इंगा योहान पण शालीमा देगार, एनोन इंदु बाप्तिस्मा इद्दु; येनटीक की आंदु नेळ शेंगेम उंड्या इंगा मंदी आंदुक वच्ची बाप्तिस्मा तिस्कुंदुर. 24इदी योहाननी जेलला येयाकाना मुंचारदी माटा उंडाद.
25आप्पुड योहान शिष्यलाद वगा यहुदी मनशी जताक शुद्धीकरण विषयला जगडाम आय्या. 26इंगा वार योहान तीकुड वच्चीगास वान आनीर, “हे रब्बी, या मनशी यार्देन आतुक नी जताक उंड्या इंगा यवान बद्दल नु साक्ष इस्ती वाड बाप्तिस्मा इस्ताड इंगा आंदार वान तीकुड फोयतुनार.” 27योहान उत्तर इच्या, “यादुच माटा मनशी आड नंताक शिक्काद याड नंताक वानकी स्वर्ग#3:27 स्वर्ग परमेश्वर तीकेल तीकेल शिक्काद. 28मीर स्वता नाद साक्ष इस्तार की निन आनीन्टीन, निन ख्रिस्त लेन, पण वान मुंदारकी आंपीनोड उंडान. 29यवानदी फेंडली कुतुर उंडाद वाडे फेंडली कोडकु उंडाड; पण फेंडली कोडकु जतागंगुड नीला फडी वानी माटलु इंटाड, वानकी फेंडली कोडकु माटलाता शेंगेम आनंद आयताद. आल्ले इदी नाद आनंद पुर्ण आयनाद. 30इदी नक्की उंडाद की, वाढ वाढायाला इंगा निन कमी कावाला.
31यवाड स्वर्ग लोन्केल वस्ताड वाड आंदार काना महान उंडाड. यवाड पृथ्वी मिंदुटोड उंडाड वाड पृथ्वीटोड उंडाड इंगा पृथ्वी मिंदुडी माटलु माटलाडताड. यवार स्वर्ग लोन्केल वस्ताड वाड आंदार काना फैना उंडाड. 32वाड येम सुशीनाड इंगा इनीनाड दान बद्दल वाड साक्ष इस्ताड, पण वानदी साक्ष यवारुच मानायार. 33यवाड वानदी साक्ष स्वीकार शेस्ताड, वाड इ माटा मिंदा शिक्का मतताड की ‘परमेश्वर खरेम उंडाड’. 34येनटीक की यवान परमेश्वर आंपीनाड वाड परमेश्वरी माटलु माटलाडताड येनटीक की परमेश्वर वानकी पवित्र आत्मा कोल्चीगास इयाड. 35परमेश्वर आब्बाड वान कोडकु मिंदा प्रेम शेस्ताड इंगा वाड आंताच वान शेतल्या इच्चीनाड. 36यवाड कोडकु मिंदा विश्वास फेटताड वानकी सार्वकालिक जीवन शिक्कीनाद; पण यवाड कोडकुद मानायाड वान कंडलाक सार्वकालिक जीवन कमसाक फोई, पण परमेश्वरदी कोफाम वान मिंदा उंटाद.”
Sélection en cours:
JHN 3: WNT
Surbrillance
Copier
Comparer
Partager
Tu souhaites voir tes moments forts enregistrés sur tous tes appareils? Inscris-toi ou connecte-toi
