Popular Bible Verses from 1 Kōrinto 13

શેર કરો

Te kope haka tere i a ia hai haŋa parautiꞌa e ꞌite rō ꞌā i te haꞌaoromaꞌi. A ia he taŋata riva, taꞌe fiꞌiꞌi, taꞌe teꞌo-teꞌo, taꞌe manaꞌu i hau rō atu a ia ki te rua, taꞌe ꞌite i te parauꞌino; ꞌina he ꞌōhumu, ꞌina he riri ꞌe ꞌina he maꞌu i te riri mo te rua

Te kope haka tere i a ia hai haŋa e ꞌite rō ꞌā mo ꞌamo i te ꞌati, e haka moe e oho rō ꞌā i te manaꞌu ꞌi ruŋa i a Ietū, ꞌina he haka tapa i tōꞌona manaꞌu mai ruŋa i te ꞌAtua ki te hora hopeꞌa ꞌe e ꞌite rō ꞌā mo haꞌaoromaꞌi i te meꞌe taꞌe tano aŋa e te rua ki a ia.

ꞌe, takoꞌa, ꞌina he koa o ruŋa i te meꞌe taꞌe tano. E koa ena ꞌi te meꞌe tano ꞌe ꞌi te meꞌe parautiꞌa.

E toru meꞌe ꞌina e ko kore ki te hora hopeꞌa: he haka moe iŋa i te manaꞌu ꞌi ruŋa i te ꞌAtua, he ŋatu o te haŋu ꞌi ruŋa i tāꞌana meꞌe hōrea mai era, ꞌe he haŋa ki te rua. ꞌE te meꞌe hopeꞌa o te hauhaꞌa o te ŋā meꞌe nei e toru he haŋa ki te rua.

Te ŋā meꞌe ena he vānaŋa i te meꞌe haka ꞌite e te ꞌAtua, he vānaŋa i te ꞌarero taꞌe ꞌite, ꞌe he ꞌite o ruŋa i te meꞌe hōhonu o te ꞌAtua, e tano rō te mahana he ŋaro, ꞌe te meꞌe ena he haŋa e ko ŋaro ki te hora hopeꞌa.

Mo vānaŋa ōꞌoku rauhuru ꞌarero o te ao nei, ꞌe ꞌātā i te ꞌarero vānaŋa e te merahi, ꞌe ꞌina o roto i a au te haŋa mo te rua, te meꞌe nō era ꞌāꞌaku mo kī he pōŋeha nō atu e tahi pa he pahu e tiŋi-tiŋi ꞌā.

ꞌE mo vānaŋa ōꞌoku ki te nuꞌu i te meꞌe haka ꞌite mai e te ꞌAtua, ꞌe mo aŋi-aŋi ōꞌoku i te meꞌe taꞌatoꞌa, ꞌātā i te meꞌe manaꞌu e te ꞌAtua mo aŋa taꞌe haka ꞌite mai ꞌi muꞌa ꞌā, ꞌe mo riva ōꞌoku mo haka tapa i te maꞌuŋa mai tōꞌona kona ꞌi te pūai o tōꞌoku haka moe iŋa i te manaꞌu ꞌi ruŋa i a Ietū, ꞌe ꞌina o roto i a au te meꞌe he haŋa ki te rua, ꞌina ia e tahi ōꞌoku hauhaꞌa.

ꞌE mo tuhaꞌa ōꞌoku ki te nuꞌu veve i te meꞌe taꞌatoꞌa ꞌāꞌaku, ꞌe ꞌātā he vaꞌai a au i tōꞌoku hakari mo tutu ꞌi roto i te ahi, ꞌe ꞌina a au he haŋa ki te rua, ꞌina ia e tahi hauhaꞌa o rā meꞌe.

Hora era ōꞌoku e ŋā poki nō ꞌā, e vānaŋa era, e manaꞌu era ꞌe e haka topa era i te manaꞌu pa he ŋā poki ꞌana; ꞌe hora nei ko paꞌari ꞌā, ko haka rē atu ꞌā e au i rā ŋā meꞌe.