Popular Bible Verses from रोमि 14

શેર કરો

हाइपालिपानु परमेस्वरको सासनता चालि कालाउ आम्लि महत्व पुर्न माको, कालाउ महत्व पुर्न काथा चाहि धार्मिकता, सान्ति कालाउ आनान्द हि जाइ पबित्तरो आत्मा पिखे। जाइ इदोइ खाल्होइ येसु ख्रिस्टको सेवा पाखे वा दोफा परमेस्वर खुसि हिखे कालाउ द्‍याङगेलाइ वाको बारेता बाखिनखे।

हाइपालिपानु जेसापा केलाइ बान्चिलि गोइनु प्रभुको भाअ्सिङ बान्च्याङ, कालाउ सिनु प्रभुकोङ भाअ्सिङ सियाङ। चाहे केलाइ बान्च्याङ, चाहे केलाइ स्याङ, केलाइ प्रभुकोङ दोङ।

ओदोङ भाअ्सिङ केलाइ ओदोङ कामगेलाइ पाइने जाइहोइ चाहि सान्ति चुमाखे, कालाउ एमिसो-भेनेङहेङ खाङधुरिता बल्लियाका बानाइखे।

ओदोङ भाअ्सिङ केलाइ एमिसो-भेनेङहेङ एला उसो न्याय मापाइने। कालाउ इसिका काथा मापासु जेदोङहोइ नाङको खान्धुराइ ओनेगेलाइ परमेस्वरता खाङधुरि पालि लाअ्ताको माकुनु पापता पारिका काथा मापाइने।

धर्मसास्तरता लेखेका हि, “प्रभु दोअ्खे, जेसाङ का बान्चिका हिघा, गोताङ तिरु काङको आगाता थोलि गोयावा, कालाउ गोताङ परमेस्वरको बाखिनाइ पावा।” एन्सा पानु केलाइ झाराङ परमेस्वरहेङ ताइको कामको लेखा पिलि गोयाङ।

खाङधुरिता हुइका हिका द्‍याङगेलाइहेङ सुइकार पासु, कालाउ वा हाइ पालि गोइका या मापालि गोइका काथागेलाइता काथा पोसुलि माको।

नाअ् हासुको बुङ सेवकहेङ न्याय पालि माएल, हाइपालिपानु ग्रिहि दोङ वा ठिक पाका हि या मान्थु दोअ्तेङ फाइसाला पावा। प्रभु दोङ हुइका सेवकहेङ ठिक काम पालि साघाइयावा, हाइपालिपानु प्रभु दोफा वासेहेङ साघाइलि सरबुङ हि।