1. Korinta 4
4
Paulus es Christus sien Apostel
1Lot aule Menschen ons doafäa hoolen, daut wie Christus siene Deena sent un Vewaulta äwa Gott siene Jeheemnisen. #Tit 1,7 2Von de Vewaulta woat oba ver aulem velangt, daut see tru sent. #Luk 12,42 3Ekj moak mie oba nich väl doarut, wan ekj von junt ooda sest een Menschenjerecht beuadeelt woa. Ekj recht mie uk nich selfst. 4Ekj weet von nuscht jäajen mie, oba daut sajcht nich, daut ekj onen Fäla sie. De Har es dee, dee mie rechten deit. 5Doawäajen doot nich rechten ver de Tiet. Wacht bat de Har komen woat, dee daut woat aunt Licht brinjen, waut em diestren vestoaken es, un uk verendach brinjen, waut em Hoat jedocht woat. Un dan woat jiedra von Gott jeloft woaren doano, aus am daut traft. #1Kor 3,8
Waut Paulus lieden mott, saul de Jemeent toom nodenkjen brinjen
6Breeda, waut ekj säd, hab ekj fa junt äwa mie un Apollos jesajcht. Jie sellen aun onsem Biespel lieren, daut kjeena wieda gonen saul aus jeschräwen steit. Kjeena saul sikj met däm eenen jäajen dän aundren oppblosen. #Reema 12,3 7Wäa jeft die daut rajcht, die waut entobillen? Un waut hast du, daut die nich es jejäft worden? Un wan du daut jekjräajen hast, wuarom puchst du die dan, aus wan du die daut selfst vedeent hast? 8Jie sent aul saut jeworden? Jie sent aul rikj jeworden? Jie kjennen aul rejieren onen ons? Un ekj wensch, jie kunnen aul rejieren, daut wie met junt toop rejieren kunnen! #Opb 3,17.21 9Mie kjemt soo väa, aus wan Gott ons Apostel hinjenaun jestalt haft, aus Mana, dee toom Doot veuadeelt sent. Wiels wie sent toom Spikjtoakel jeworden fa de Welt un fa de Enjel un fa de Menschen. #Reema 8,36; Heb 10,33 10Wie sent to Noaren jeworden, wiels wie ons to Christus hoolen, jie oba sent weise Christen. Wie sent schwak, oba jie sent stoakj. Jie tieekjnen ut, un wie woaren veacht. #1Kor 3,18 11Bat opp dise Stund go wie noch hungrich un darschtich, wie haben knaup Kjleeda auntotrakjen, wie woaren jeschloagen un haben nich eene Städ wua wie bliewen kjennen. #2Kor 11,23-27 12Wie schaufen un wie oabeiden met onse ieejne Henj. Wan schlajcht von ons jerät woat, dan säajnen wie de Menschen. Wan wie vefolcht woaren, droag wie daut. #Mat 5,44; Apost 18,3; Reema 12,14; 1Kor 9,15 13Wan wie vespott woaren, bliew wie frintlich. Wie sent en dise Welt aus een Drakjschum von de Menschheit jeworden, eenem jiedren sien Mell, un daut bat vondoag.
Paulus aus Voda un Väabilt fa de Jemeent
14Ekj schriew dit nich, junt to beschämen, oba om junt aus miene leewe Kjinja opptobuen. 15Un wan jie uk 10.000 Lierasch hauden, dee junt en Christus Aunleidunk jeewen, jie haben oba nich väl Vodasch. Aus ekj junt daut Evangelium brocht, hab ekj metjeholpen, daut jie to Christus Jesus jehieren, un sie soo jun Voda jeworden. #1Kor 9,2; Gal 4,19 16Doawäajen moak ekj junt Moot, mie aus Väabilt to haben. #1Kor 11,1 17Daut es wuarom ekj junt Timotäus jeschekjt hab. Hee es mien leewa un trua Sän em Harn. Dee woat junt denkjen halpen, waut miene Aunwiesungen en Christus sent, un woo ekj en aule Jemeenten lieren doo. #Apost 16,1-3
18Eenje von junt billen sikj en, daut ekj nich hankomen woa. 19Oba, wan de Har daut soo well, woa ekj boolt doa sennen. Dan woa ekj utfinjen, waut bie de stolte äare Wieed doarhinja es, auf dee Krauft haben. 20Gott sien Rikj besteit nich en Wieed, oba en Krauft. #1Kor 2,4 21Waut wensch jie? Saul ekj met eenem Stock no junt komen, ooda leeftolich un met Leew un eenen saunftmootjen Jeist? #2Kor 10,2
હાલમાં પસંદ કરેલ:
1. Korinta 4: PB
Highlight
શેર કરો
Compare
નકલ કરો
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.