Aposteljeschicht 25
25
Paulus siene Sach wada ver Festus oppjenomen. Paulus velangt ver däm Kjeisa to stonen
1Aus Festus en de Prowins nenn jekomen wia, fua hee om dree Doag von Cäsarea no Jerusalem. 2Doa kjeemen de Huagepriestasch un de Juden äare Leidasch ver am un läden am äare Kloagen äwa Paulus väa. #Apost 24,1 3See fruagen Festus iernstlich an toom Jefaulen Paulus no Jerusalem to leewren, un see plonden dan Hinjawäajes opp de Lua to ligjen, am doottomoaken. #Apost 23,15 4Oba Festus auntwuad, daut Paulus sull en Cäsarea jehoolen woaren, un daut hee doa em korten uk wada hangonen wudd. 5Hee säd: Lot von june väaschte wäm met mie metkomen un dän Maun doa vekloagen, wan hee irjentwaut orrajchtet jedonen haft.
6Aus hee ieescht bie tieen Doag bie an jewast wia, jinkj hee trigj no Cäsarea. Un aus hee dän näakjsten Dach opp sienen Rechtastool saut, leet hee Paulus hanbrinjen. 7Un aus hee ieescht doa wia, stunden de Juden von Jerusalem om am, un vekloagden am sea hoat, un kunnen daut oba nich bewiesen, 8wäarent hee sikj selfst veauntwuad un säd: Ekj hab mie nich aun daut judsche Jesaz, nich aun dän Tempel uk nich aun dän Kjeisa veschulcht.
9Oba Festus wull de Juden jieren een Jefaulen doonen un fruach Paulus auf hee wudd wellich sennen no Jerusalem to komen un doa von am äwa dise Sachen jerecht woaren. 10Paulus säd: Ekj sto hia ver dän Kjeisa sien Rechtastool, wua ekj saul jerecht woaren! Un du weetst sea goot, daut ekj de Juden nuscht orrajchtet jedonen hab. 11Oba wan ekj irjentwäm orrajcht behaundelt hab ooda mie toom Doot veschulcht hab, sie ekj reed to stoawen. Oba wan en aul däm, wuamet de Menschen mie beschuljen, nuscht doarhinja es, kaun kjeena mie an en de Henj jäwen. Un ekj woa nom Kjeisa gonen! #Apost 23,11; 28,19 12Aus Festus de Sach met däm Rot derchjerät haud, säd hee: Wust du dän Kjeisa seenen? Dan saust du nom Kjeisa gonen.
Festus moakt Agrippa bekaunt met Paulus siene Sach
13Un om een poa Doag kjeemen Kjennich Agrippa un Berenike no Cäsarea, Festus to bejreessen. 14Aus see doa ieescht lenjre Tiet jewast wieren, läd Festus dän Kjennich, Paulus siene Sach väa un säd: Felix haft doa een jewessen faustjenomnen Maun hinjaloten, #Apost 24,27 15von däm de Huagepriestasch un judsche Eltestasch mie vetalden, un doarom aunhoolen, daut ekj am rechten lot wan ekj en Jerusalem sie. 16Dan auntwuad ekj: De Reema haben daut nich fa eene Mood, een Maun hantojäwen dän omtobrinjen, ea hee siene Vekjläaja jetroffen haft, un eene Jeläajenheit jehaut haft, sikj jäajen äare Kloag to veteidjen. #Apost 22,25 17Doawäajen hab ekj kjeene Tiet vesiemt. Aus see ieescht toopjekomen wieren, sad ekj mie opp däm Rechtastool un leet dän Maun nenn brinjen. 18Aus siene Vekjläaja oppstunden, haben see kjeene Kloag jäajen am jebrocht wuamet ekj räakjend. 19See hauden bloos Froagen aun am dee äwa äare Relijion wieren, un von een Jesus dee jestorwen wia, von dän Paulus nu oba säd, daut dee läwd. #Apost 18,15 20Wiels ekj oba nich wist, woo ekj an dee Froagen beauntwuaten sull, fruach ekj am auf hee wudd wellich sennen no Jerusalem to gonen un doa äwa dise Sachen jerecht woaren. 21Oba aus Paulus doarom aunhilt, daut hee doa wull jehoolen woaren, daut de Kjeisa sien Uadeel äwa am jäwen kunn, befool ekj am to hoolen, bat ekj am nom Kjeisa schekjen kunn. 22Dan säd Agrippa to Festus: Ekj wudd dän Maun selfst emol hieren wellen. Hee säd: Morjen saust du am hieren. #Luk 23,8
Paulus woat ver Kjennich Agrippa jebrocht
23Aum näakjsten Dach, aus Agrippa un Berenike en groote Pracht oppkjeemen un met de Kommandaunten un Stautsmana toop em Rechthus nenn jinjen, wort Paulus, opp Festus sienen Befäl, uk nenn jebrocht. 24Un Festus säd: Kjennich Agrippa, un aul dee aundre Mana dee hia nu sent, jie seenen disen Maun, wäajen dän mie daut gaunze Judenvolkj en Jerusalem un uk hia beligjen deit, un schrieen, daut dis Maun nich wieet es daut hee lenja läft. #Apost 22,22 25Oba aus ekj utfunk, daut hee nuscht jedonen haud, daut dän Doot vedeent haud, un daut hee doarom aunjehoolen haud dän Kjeisa to seenen, wia ekj mie eenich am to schekjen. 26Ekj hab nuscht jeneiwet von am, mienen Harn to schriewen. Doawäajen hab ekj am häa brinjen loten, un gaunz oppoat ver die, Kjennich Agrippa, soo daut ekj dan aul nuscht schriewen bruck wan du am ieescht vehieet hast. 27Wiels mie kjemt daut nich gaunz jescheit väa een faustjenomnen hantoschekjen un nich sajen to kjennen, waut hee veschulcht haft.
હાલમાં પસંદ કરેલ:
Aposteljeschicht 25: PB
Highlight
શેર કરો
Compare
નકલ કરો
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.