Reema 1
1
Paulus em Deenst von de goode Norecht
1Dis Breef schrift Paulus, Christus Jesus sien Deena, dee oppoat von Gott beroopen wort een Apostel to sennen, daut Evangelium to prädjen, #Apost 9,15; 13,2; Gal 1,15 2daut Gott verhäa en de heilje Schreft derch siene Profeeten vesproaken haud. #Luk 1,70; Reema 16,25-26; Tit 1,2 3Dit Evangelium wia von sienem Sän, dee nom Fleesch no von David staumd. #2Sam 7,12; Mat 22,42; Reema 9,5 4Un doaderch, daut hee vom Doot oppstonen deed, haft hee daut derch dän Heiljen Jeist en Krauft bewäsen, daut hee Gott sien Sän un ons Har Jesus Christus es. #Mat 28,18; Apost 13,33 5Derch dän hab wie Jnod un daut Apostel Aumt jekjräajen, wuaderch wie en sienen Nomen aule Velkja lieren sellen, daut see jehuarsom woaren un toom Gloowen komen. #Apost 26,16-18; Reema 15,18; Gal 2,7.9 6Un jie sent uk mank dee, dee doa beroopen sent, Jesus Christus auntojehieren.
7Dis Breef es fa aul junt en Room, dee Gott goot es, un dee doa beroopen sent, heilje to sennen. Mucht jie de Jnod un dän Fräd von Gott onsem Voda un von däm Harn Jesus Christus haben! #4Mo 6,24-26; 1Kor 1,2; 2Kor 1,1-2; Efs 1,1
Paulus sien velangen no Room to komen
8Ieeschtens dank ekj Gott derch Jesus Christus fa junt aula, wiels en de gaunze Welt von junem Gloowen jerät woat. #Reema 16,19 9Gott, dän ekj en mienem Jeist doarenn deen, daut ekj daut Evangelium von sienen Sän prädjen doo, weet, woo ekj emma en miene Jebäda aun junt denkj. #Efs 1,16 10Ekj bäd doarom, daut ekj derch Gott sienen Wellen, nu tolatst noch een Wajch finjen mucht, no junt to komen. #Apost 19,21; Reema 15,23.32 11Ekj hab een velangen, junt to seenen, un junt waut jeistliche Gowen mettodeelen, daut jie kjennen staunthauft woaren. #Reema 15,29 12Doamet well ekj sajen, daut ekj met junt toop mucht mootja woaren, wan ekj mank junt sie, beides, ekj derch junen Gloowen un jie derch mienen. #2Pet 1,1
13Un dit sell jie weeten Breeda, daut ekj aul foaken jeplont hab no junt to komen, daut ekj bie junt uk Frucht schaufen kunn, soo aus bie de aundre Velkja. Doa es bat nu oba noch emma waut mank jekomen. 14Ekj sie een Schildna aun Griechen uk aun Nichgriechen, aun jelieede uk ojjelieede. 15Doawäajen sie ekj von mie ut uk drinjent, uk junt en Room daut Evangelium to prädjen.
De Goode Norecht brinjt Radunk fa aulem
16Ekj schäm mie nich met daut Evangelium von Christus. Daut es Gott siene Krauft, aul dee seelich to moaken, dee doaraun jleewen, ieeschtens de Juden, dan oba uk de Griechen. #Psa 119,46; 1Kor 1,18.24; 2Tim 1,8 17Daut wiest ons, woo Gott ons derch dän Gloowen jerajcht moakt, un woo de Gloowen emma toonemt, soo aus jeschräwen steit: “De jerajchta woat derch sienen Gloowen läwen.” #Hab 2,4; Reema 3,21-22; Gal 3,11
De Menschen haben Gottes Strof vedeent
18Daut es äwaraul to seenen woo Gott sien Oaja vom Himmel rauf kjemt äwa de Gottloosichkjeit un Ojjerajchtichkjeit von de Menschen, dee en Ojjerajchtichkjeit de Woarheit unjadrekjen. 19Waut eena von Gott weeten kaun, weeten see, wiels Gott haft an daut weeten loten. #Apost 14,15-17; 17,24-28 20Von don aus Gott de Welt jemoakt haft, es siene eewje Krauft un Gottheit, dee verhäa nich to seenen wia, verendach jekomen un to vestonen, derch daut waut hee jeschaufen haft, soo daut see kjeene Entschuldjunk haben. #Psa 19,2; Heb 11,3 21Un wan see Gott uk kjanden, see jeewen am nich de Iea aus Gott, un haben am nich jedankt. See jeewen sikj en äa denkjen met vekjieede Jedanken auf, soo daut daut diestre en äa onvestendjet Hoat, äwahaunt neem. #Efs 4,18 22See jeewen väa, weis to sennen, oba muaken sikj selfst to Noaren. #1Kor 1,20 23See vetuschten dän onvejenkjlichen Gott siene Harlichkjeit fa Bilda von Aufjetta, soone aus von Menschenjestault, Väajel, un de veabeensche un krupende Tieren. #2Mo 20,4; 5Mo 4,15-19; Psa 106,19-20; Jer 2,11 24Doawäajen haft Gott an hanjejäft en de Orreinichkjeit, wuano see em Hoaten jelesten deeden, soo daut see met äaren ieejnen Kjarpa unjarenaunda Schaund driewen, #Apost 14,16 25wiels see Gott siene Woarheit fa Läajes vetuscht haben. See doonen daut, waut jemoakt es, leewa aunbäden un deenen, aus dän, dee daut jemoakt haft, dee en Eewichkjeit jeloft es. Amen.
26Doawäajen jeef Gott an en äare schentelje Lost han. Äare Frulied haben dän natieedeljen Omgank met Mana vetuscht fa daut waut nich natieedlich es, un haben Omgank met enaunda. 27Un jrod soo haben uk de Maunslied dän natieedeljen Omgank met Frulied veloten un haben en äare Hett unjarenaunda Maun met Maun Schaund jedräwen, un haben aun sikj selfst de Strof fa äaren Errsenn jekjräajen. #3Mo 18,22; 20,13; 1Kor 6,9
28Un jrod soo aus see Gott oppjeewen un nich mea aunerkjanen wullen, soo jeef Gott an uk han en äa jemeenet denkjen, Dinja to doonen, dee nich jescheit sent. 29Dee sent aula ojjerajcht, schlajcht, onjehuarsom un jiezich, voll Aufgonst un Mort, Strieden un Aunschmäaren un Jemeenheit, Pludren un Läajes. 30See bieten hinjarigjsch, kjennen Gott nich lieden, sent frajch, prauzich un puchen sikj. See finjen emma mea schlajchtet ut, un jehorchen äare Elren nich. 31See haben kjeen Vestentnis un sent nich to truen. See sent aundre Menschen nich goot, sent nich wellens to vejäwen, un haben kjeen Metleet. 32Un wan see uk weeten, daut Gott daut Doodesuadeel äwa dee bestemt haft, dee soowaut doonen, doonen see daut nich mau selfst, oba unjastetten aundre, dee daut uk doonen.
હાલમાં પસંદ કરેલ:
Reema 1: PB
Highlight
શેર કરો
Compare
નકલ કરો
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.