Reema 9
9
Gott un sien utjewäldet Volkj
1Ekj saj junt de Woarheit en Christus un de Heilja Jeist jeft mien Jewessen daut Zeichnis, daut ekj nich lieej, 2un daut ekj soo om junt besorcht sie, daut mie daut Hoat Dach un Nacht wee deit. 3Ekj hab mie jewenscht om miene israelitische Breeda äat haulwen, selfst von Christus vebaunt to sennen. #2Mo 32,32 4See sent Israeliten, dee Gott sikj wäld siene Kjinja to sennen. Gott muak met an een Bunt un leet an siene Harlichkjeit seenen. Hee jeef an daut Jesaz un dän Gottesdeenst. #1Mo 17,7; 2Mo 4,22; 20,1-17; 40,34; 5Mo 7,6 5An jehieeden de Vodasch, dee Gott daut Vespräakjen jeef, daut von an, nom Fleesch no, de Christus wudd jebuaren woaren, dee doa äwa aules es. Mucht Gott eewich jeloft sennen. Amen. #9,5 Eenje oole Schreften sajen nom Fleesch no wia de Christus. Mucht Gott, dee äwa aules es, eewich jeloft sennen. Amen. #Mat 1,1-16; Luk 3,23-34; Reema 1,3
De Utwol moakt Gott
6Daut es oba nich, daut Gott sien Wuat nich jehoolen haft. Daut sent nich aules Israeliten, dee von Israel häastaumen, #4Mo 23,19; Reema 2,28 7un dee jehieeden uk nich aula to Gott sien Volkj, dee von Abraham aufstaumden. “Dee waut Gott sikj wäld, sullen derch Isaak jetalt woaren”. #1Mo 21,12 8Daut meent, Menschen dee opp däm jeweeneljen Wajch vom Fleesch jebuaren woaren, sent noch nich Gott siene Kjinja. Bloos dee, dee sikj doaraun hilden, waut Gott vesproaken haud, woaren aus Abraham siene Nokomen jetalt. #Gal 4,23 9Wiels dit es waut Gott vesproaken haud, “Soo om dise Tiet woa ekj wada komen, un dan woat Sara een Sän haben.” #1Mo 18,10
10Oba nich bloos dit. Rebecka druach twee Junges von dän eenen Maun, onsen Voda Isaak. 11Un ea dee jebuaren worden, un nich goodet noch schlajchtet jedonen hauden, daut Gott met siene Wol wieda derchkjeem, daut et nich von Woakjen aufhenjt, oba von beroopen sennen, 12wort Rebecka jesajcht: “De elsta Sän saul dän jinjsten deenen”, #1Mo 25,23 13soo aus jeschräwen steit: “Jakob wia ekj goot, oba Esau wia ekj nich goot jesonnen.” #Mal 1,2-3
Gott vedeelt sien Metleet no sienem gootdenkjen
14Waut sell wie dan sajen? Gott deit doch nuscht ojjerajchtet, ooda jo? Soont jeft daut niemols! 15Hee sajcht to Moses: “Ekj woa däm bejnodjen, däm ekj bejnodjen well; un ekj woa Metleet haben met däm ekj Metleet haben well.” #2Mo 33,19 16Daut henjt nich von een Mensch sienen Wellen auf, ooda woo sea hee sikj aunstrenjt, oba von Gott siene Jnod. #Efs 2,8 17De Schreft sajcht toom ägiptischen Kjennich: “Ekj hab jrod die vondoag komen loten, om miene Krauft derch die to bewiesen, daut mien Nomen doaderch en de gaunze Welt bekaunt woaren sull.” #2Mo 9,16 18Daut sajcht, daut Gott Jnod bewiesen deit, wäm hee well, un vehoaden deit, wäm hee well. #2Mo 4,21; 1Pet 2,8
Gott sien Oaja uk siene Jnod
19Nu sajchst du: Wuarom beschulcht Gott de Menschen dan? Wäa kaun jäajen sien Wellen gonen? 20Daut es jrod aundasch. Mensch, wäa best du, daut du Gott jäajenaun rätst? Kaun een Topp to sienen Strikja sajen: Wuarom hast du mie soo aus dit jemoakt? 21Ooda haft een Toppstrikja nich daut rajcht, von sienen Leem een Jefäs to Ieren un daut aundre toom jeweeneljen Jebruck to moaken? #Jer 18,4-6 22Waut es dan, wan Gott siene Macht un sienen Oaja aun dee Jefässa bewiesen deit, dee doa reed sent, vedaumt to woaren, dee hee soo lang unja siene groote Jedult jedroacht haft? #Spr 16,4; Reema 2,4 23Daut deed hee uk om to wiesen woo rikjlich hee siene Harlichkjeit aun dee Jefässa bewees, dee en de Jnod stunden, dee hee verhäa fa siene Harlichkjeit reedjemoakt haud. #Reema 8,29; Efs 1,3-12 24Un daut sent wie, dee hee doatoo beroopen haft, nich bloos von de Juden, oba uk von de Velkja. 25Soo aus hee en Hosea sajcht:
“Ekj woa dee, dee nich mien Volkj wieren, mien Volkj nanen,
un woa dee goot sennen, dee kjeena verhäa waut räakjend.” #Hos 2,1.25
26“Un daut saul soo komen:
Doa wua daut jesajcht wort: ‘Jie sent nich mien Volkj’,
doa sell jie dän läwendjen Gott siene Kjinja jenant woaren.”
27Un Jesaja säd von Israel:
“Un wan de Israeliten soo väl sennen wudden aus daut Saunt aum Mäa,
seelich sent mau dee, dee doa äwabliewen woaren; #Jes 10,22-23; Reema 11,5
28wiels waut de Har jesajcht haft, woat hee opp de Ieed, boolt derchfieren.”
29Un jrod soo aus Jesaja jesajcht haft:
“Wan de Har, dee aules rejieet, ons nich wäm haud äwabliewen loten to Sot,
dan wia daut met ons soo romjekomen aus met Sodom un Gomorra.” #Jes 1,9
Israel un daut Evangelium
30Waut sell wie dan sajen? Dit well wie sajen: Daut de Velkja, dee no kjeene Jerajchtichkjeit sochten, haben de Jerajchtichkjeit jefungen, eene Jerajchtichkjeit dee derch däm Gloowen kjemt. #Reema 10,20 31Oba Israel, dee derch däm Jesaz no Jerajchtichkjeit sträwd, haft dee nich jefungen. #Reema 10,2-3 32Wuarom nich? Wiels see dee nich derch däm Gloowen sochten, oba soo aus wan dee derch Woakjen to vedeenen wia. See staden sikj aun däm Steen, jäajen däm see randen, #Mat 21,42.44; 1Pet 2,8 33soo aus jeschräwen steit:
“Kjikjt emol, ekj laj en Zion eenen Steen äwa dän see sikj oajren,
un wäa aun am jleeft woat nich toschaund woaren.” #Jes 8,14; 28,16
હાલમાં પસંદ કરેલ:
Reema 9: PB
Highlight
શેર કરો
Compare
નકલ કરો
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.