MOATLEM 10
10
Piter ngale Kornilas
1Kasaria nâng mihnyan wathe ate mînpa Kornilas dângwah, atea, “Itali Regimen,” ngaeka Roman sipâhi heh kepten dângwah. 2Atea Joban rancheite mihnyan dângwah; ngale thinhumte tangkâ phangtang Joban nâng rangsoamte dângwah. Ate memin Jews tangchhih hehnâng nyahrãng chîchohsok wah, ngale roantang Joban nâng rangsoam lahma dângwah. 3Atema jâthe sanhêmthah wanrem sanpoatko thânkhewah, atema rangkhethung wah Joban ngintatte chaang paangpaang kalahma atenâng, “Kornilas!” ngama roolahma thânkhewah.
4Atema chei nungma ngintatte ko thongsû lahma ngatwah, “Hethôte, arepa chennia?”
Ngintatte pumma dânthâng wah, “Nang rangsoam ngale nangma mihnyan hehnâng chohsû eko demko Joban rinme eka, ngale atema nang rangsoam pa edânthangho. 5Ngale athângheh nangma Jopa nâng mihnyan chienkat lohma Simon Piter rooka thuk o. 6Atea jokah nâng songlahma ngemkhoan wah tembu hum hôante Simon humko tonga.” 7Erediko ngintatte pa ngakchhoan wah, phumma Kornilas ma ate humwah haa wanii ngale sipâhi wathe roowah, ere sipâhi pa Joban rancheite ngale atenâng chohsokte dângwah. 8Atema thinnâng phangtang thôko lahma Jopa nâng chienkatwah.
9Eredijâko, thin Jopa hahnâng hunemnem dângko, Piter rangngih mongtangko rangsoam rãng humkho nâng koatwângwah. 10Ate rêmrii lahma chenni komin phhekchhah hunwah; phumma aterãng phhekchhah khoakhêm thuko, atema thânkhewah. 11Atema rangkhethung laang lahma khewênwah, ngale chenni komin khadôngmõang sukbeliiko lolahma hahtokkhoh ko waangphe katlahma khewah. 12Ereko rongrup ngem heh dângwah, pû anyah, ngale wunwo hehmin dângwah. 13Phumma jabkhab pumma atenâng ngatwah, “Piter toanchep lohma areheh ritphe lohma phhek o!”
14Phumma Piter ma ngatwah, “Teso, areheh ngama phhekmek! Ngama niemarang junko achin heh chenthumin phhekmek.”
15Jabkhab pumma wienthe ngatwah, “Chenpa Joban ma asâ ngaeka ereko nangma achin neknga.” 16Arepa lôrem khesok diko rangkhethung nâng ngaktôan wênwah.
17Piter ma arepa chenni junko thânkhe ekanga ngama bârit poatko, Kornilas ma chienkattah mihnyan hehma Simon humpa chohlem lahma Simon hum thakho wah pankâsek thongko cheplahma dângwah. 18Thinma roolahma chhienwah, “Nang humko Simon Piter ngama mihnyan wathe tonga?”
19Ere thukomin Piter ma chenni junko thânkhetek a ngama thonghun lahma dângwah, phumma Juma atenâng ngatwah, “Tattan! Warem#10.19: Wanrem; wanwanthe nâng roanche ngama raangeka; wanthenâng Wanii ngama raangeka. mihnyan ma nang lemsû eho. 20Toanchep lohma jâkhoama kao, ngale thin demnâng lejohwãng nekdang, chenrãngma ngako ngama chienkat erâng.” 21Ephumma Piter jâkhoam kalahma mihnyan hehnâng thôkoh wah, “Nema lemeken mihnyan pa nga. Ne chenrãngma katwah a?”
22“Kepten, Kornilas ma chienkat ehi,” ngama thinma dânthâng wah. “Atea mihnyansen, ngale Joban nâng rangsoamte mihnyan, ngale chentô Jews heh ate rancheieka. Joban ngintatte ma ate humnâng nangrookat rãng thôkoh wah, ngale, erohkoba nangma atenâng chenni thôkohthin tonga ereheh atema eta chohtat a.” 23Piter ma ere mihnyan heh humkhen nâng roowên lahma erejâ rangpen pa jemthukwah.
Eredijâko thin demnâng johwângwah; ngale Jopa hahwah putedâlemte heh wahmin ate demnâng khuthe johwângwah. 24Eredijâko ate Kasaria hahnâng hokkhoamwah, eko Kornilas ma ate tang amang heh, ngale lemrusen heh demnâng roamlahma Piter bemlâwah. 25Piter humkhen nâng lupwângrãng ngatko, Kornilas chohka lahma ate dathongko khupjup kalahma atenâng rangsoam wah. 26Phumma Piter ma chepsiet lahma ngatwah. “Chep o,” “Ngamin mihnyan jôba.” 27Piter humkhen nâng lupwâng nungnungko Kornilas ma atenâng thôkoh wah, phumma humkhen nâng wãng lahma jahmõang mihnyan khôan lahma khewângwah. 28Atema thinnâng ngatwah, “Nededema senthemthem jet en, Jews heh dôrem niemarang junko Jews ledangte heh demnâng leroammin. Rohkomin Joban ma nganâng hennângjô niemarang junko achin lengamin ngama khesok ehang. 29Ngale erohwah chenthu nangma ngaroorãng chienkat phumma ledân thangma wãngerâng. Thôkohhang, chenrãngma rooka thanga?”
30Kornilas ma ngatwah, “Aretô thang sanpoatko jârem mako nga rangsoam lekma dângwah#10.30: rangsoam; wanwanthe nâng lephhek lechhah thangma rangsoam ngama raangeka. erepa nga humko sanhêmthah wanrem sanpoatko dângwah. Phumma nga mathahko khet phiakjaja keplahma mihnyan wathe chephokwah 31ngale atema ngatwah, ‘Kornilas! Joban ma nang rangsoam lâchohtattho ngale nangma mihnâng chohsok moatlem moeko pemin lâkhetho. 32Jopa nâng mihnyan chienkat lohma Simon Piter rooka thuk o. Atea jokah nâng songlahma ngemkhoan wah tembu hum hôante Simon humnâng tonga.’ 33Phumma lemlienma nangroo rãng chienkatwah, ngale nang anâng wângpa nyahrãng lâsentah. Teso ma nangnâng chenni thôkoh rãng chien eho erepa chohtatrãng nikhu areko Joban mathahko bemeki.”
Piter ma Thôkoh
34Piter ma loatjabwah: “Ngama arepa toangtang ngama athângheh jet ekang, Joban ma chentô nâng manthe hôanehi. 35Henhenma ate ranchei lahma toangtang moatlem moeka ereheh chenrãngrãng jatjô medang akomin atema kepeka. 36Atema Isrial mihnyan hehnâng ngin matchhoantah pa nemajet en, erepa Jisu Krista junma mêmo Nginkongsen phoangthô chhoanwah, atea chentôrãng Teso. 37Jon ma baptijem kep ngin phoangthô diko, Galili nâng bengthun lahma Isrial diak phangtang nâng chenni dangtah a ereheh nemajet en. 38Nema Nazarat wah Jisu pa ejet en ngale Joban ma atenâng Asâthôanju ngale chaan chenroh kohtah a erepemin jet en. Atema chentô nâng phoangchhoan lahma asenli heh moatwah, ngale chentô juchhihma loeka heh sensiet rewah, chenrãngma ngako Joban pa ate demnâng dângwah. 39Atema Isrial diaknâng ngale Jeroselem nâng chentô motah a ereheh nimitma khelihma thôeki. Ngale thinma bãngphakko sema teklahma rittekwah. 40Rohkomin Joban ma jârem diko ritwah ngakhînsiet wah, ngale ngakhinwâng dikomin chohkhe thukwah, 41erepa chentô nâng khethuk tuho, rohkomin Joban ma renchhoan heh nângba khethukwah, erepa nima khewah, ate demnâng ritwah ngakhîn dikomin aroamma jokphhek chhahtih. 42Ngale atema ninâng nginkongsen pa mihnyan hehnâng phoangthô chhoankoh en ngama chien ehi ngale Joban ma atenâng ahînte ngale aritte heh rênrãng thieneka ngama thôchhoan kohrãng chien ehi. 43Chentô mõng hehmemin ate junma jabwah, thinma ngatwah, Jisu mîn chaanko henhenma atenâng putedâlem eka erehehma map chohmin.”
Jews Ledangte hehma Asâthôanju Choh
44Piter ma nginthô thuko ate ngin jetatte heh phangtang khohnâng Asâthôanju katwah. 45Jews jat putedâlemte Jopa wah Piter demnâng johkatah hehma Jews ledangte jat hehnângmin Joban ma Asâthôanju hînhô kohpa khelahma nyahrãng bâritwah. 46Chenrãngma ngako thinma jatjat jabma jablahma Joban nâng rôlahma tatwah. Phumma Piter ma loatjabwah: 47“Are mihnyan hehmemin nima chohtih rãngrãng Asâthôanju chohwak eka. Henma thinnâng baptijem nekkepen ngama tâjek tângmin a?” 48Ephumma atema thinnâng Jisu Krista mînko baptijem kepen ngatwah. Erediko thinma atenâng jâthe jânii johtong thienhi ngama roatsep wah.
נבחרו כעת:
MOATLEM 10: NOKTBSI
הדגשה
שתפו
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Nokte Naga NT - NIEMNYAN
© The Bible Society of India, 2014.
Used by permission. All rights reserved worldwide.