Icitendekelo 16
16
Haga na Ishimaeli
1Nomba Abramu takweteko mwana ku mukashi wakwe Sarai. Lelo Sarai alikwete umukashana umusha ishina lyakwe ni Haga umwina Egupto. 2Kanshi Sarai aebele Abramu ati, “Mona, Yawe alintana ubufyashi, kanshi kabiye usendame no musha wandi umukashana, nalimo kuti amfyalilako abana.” Abramu nao asuminisha ifyalandile Sarai. 3Panuma Abramu aikala imyaka ikumi limo (10) mu Kenani, elyo Sarai abuulile umusha wakwe umukashana Haga umwina Egupto, amupeela na kuli wiba Abramu pakuti abe umukashi wakwe. 4Abramu epakusendama na Haga nao aba na pabukulu. Ilyo Haga amwene ukuti ali pabukulu, ayamba ukusuula nakulu. 5Elyo Sarai aebele Abramu ati, “Iyi misuula Haga ankwatile ibe pali iwe. Nine nakupeele uyu musha wandi umukashana, lelo apo amwene ukuti ali pabukulu nansuula. Yawe engapingula pakati ka iwe na ine.” 6Abramu epakweba Sarai ati, “Umusha obe ali mu minwe yobe, umucitile conse ico ulemona ukuti nacilungama.” Kanshi Sarai epakulacusha Haga, elyo Haga nao amufulumuka.
7Malaika wakwa Yawe asangile Haga mu matololo mupepi na kamfukumfuku akabelele mu mbali ya musebo walolele ku Shuri. 8Malaika epakusosa ati, “Haga we musha wakwa Sarai, ni kwi wafuma kabili uleya kwi?” Haga amwasuka ati, “Ndefulumuka kuli mama Sarai.” 9Elyo Malaika wakwa Yawe amweba ati, “Bwelelamo kuli nokokulu, ulemupetamina.” 10Malaika alundapo ukumweba ati, “Nkasandulula nganshi aba mu lupwa lobe, takwakabe wakubapenda ku bwingi.” 11Kabili malaika wakwa Yawe amweba nokuti,
“Nomba uli pabukulu,
ukapaapa umwana umwaume.
Elyo ukamwinike ne shina lya Ishimaeli,#16:11 Ishimaeli: Ishina lya mu Cihibulu lyalola mukutila “Lesa naumfwa.”
pantu Yawe naumfwa ukulilishika kobe.
12Umwana obe akaba nga punda wa mpanga.
Ukuboko kwakwe kukalwisha umuntu onse,
nao ukuboko kwa muntu onse kukamulwisha.
Akekala umulwani kuli bamunyina bonse.”
13Elyo Haga ainika Yawe uwalandile nankwe ishina ati, “Niwe Lesa uumona ine,” pantu atile, “Nimona Lesa uumona.” 14Kanshi eico bainikila icishima icabela pakati ka Kadeshi na Beredi abati Bere Lai Roi, emukutila “Icishima ca Wabumi uumona ine.”
15 #
Gal 4:22
Kanshi Haga asukile afyalila Abramu umwana umwaume, nao Abramu ainika umwana Haga afyele ishina lya Ishimaeli. 16Abramu ali ne myaka amakumi cine konse konse na mutanda (86) ilyo Haga amufyalile Ishimaeli.
נבחרו כעת:
Icitendekelo 16: ILL15
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Bible Society of Zambia