Icitendekelo 43
43
Bamwana Yakobo basenda Benjamini pakubwelelamo ku Egupto
1Nomba icipowe calibipile nganshi mu calo ca Kenani. 2Kanshi ilyo bapwile ukulya iŋanu baile shita ku Egupto, shibo Yakobo abebele ati, “Kabiyeni nakabili, muye tushitilako utwakulya na tumbi.” 3Lelo Yuda amweba ati, “Ulya muntu alitukonkomeshe ati, ‘Tatwakamonane na imwe nga tamwishile na munyinenwe.’ 4Kanshi nga cakuti mwaleka munyinefwe aye na ifwe, lyena tuleya kukumushitilako icakulya. 5Lelo nga tamulekele ukuti aye na ifwe, awe ninshi na ifwe tatwaye. Pantu ulya muntu atwebele ati, ‘Tatwakese monana na imwe, kano mwaisa na munyinenwe.’” 6Israeli epakubepusha ati, “Nga cinshi mwambikila mu bucushi pakweba uyo muntu ukuti mwalikwata munyinenwe na umbi?” 7Bamwasuka abati, “Ala uyo muntu, mwinefye wabikilepo ukutwipusha pali ifwe bene na pa lupwa lwesu. Atwipwishe ati, ‘Bushe shinwe epo acili? Bushe mwalikwatapo na munyinenwe na umbi?’ Kanshi ifwe twayaswikefye ifyo atwipwishe. Bushe nga kuti twaishiba shani ukuti aletweba ati, ‘Mukalete munyinenwe kuno?’” 8Elyo Yuda aeba Israeli wishi ati, “Lekeni kanshi nine nsende umwaice, kabili twalaimafye nombaline, pakuti imwe na ifwe na bana besu tube abomi, twifwa ku cipowe. 9Ine ne mwine nkasakamana ukusunga ubumi bwakwe. Muli nokubika umulandu wa pali Benjamini pali ine. Nga nshimubweseshe kuli imwe, no kumuteka apa pa cinso cenu, ninshi nkaba no mulandu kuli imwe inshiku shonse isha bumi bwandi. 10Atukanashingashinga nga twaliyako no kubwelako imiku ibili.”
11Elyo shibo Israeli abeba ati, “Kanshi nga nifyo cili nokuba, ninshi mucite ifi. Mubuule ifintu ifyawamisha ifyo twakwata muli cino calo kuno, mubike mu mifuko yenu. Elyo mukafitwale ngo bupe kuli uyo muntu. Mukasende utumafuta twakupangilako umuti, utubuci, ifinyamuti#43:11 ifinyamuti: Ku ncende shimbi batila “ubutomfu.” ifyanunka ubusaka, amafuta yalesha ifitumbi ukubola muri, ne nseke sha kamuti ka pisitakio na ka alumondi. 12Musende indalama ishakushitamo, elyo ne shakubweseshamo pali shilya babikile mu mifuko yenu, limbi balufyenyefye. 13Sendeni na munyinenwe muleya nombaline ukuli uyo muntu. 14Lesa Umwine wa maka yonse#43:14 Lesa Umwine wa maka yonse: Mu Cihibulu mwaba ukutila, “El Shaddai.” enganasha uyo muntu ku mutima akamukwatile uluse, akaleke mukabwele na ulya munyinenwe umbi elyo na Benjamini. Kwena nga efyo ndi nokufwilwa, kacikabe ifyo fine.”
15Kanshi bamwana Yakobo balisendele ifyabupe, indalama shakushitamo ne shakubweseshamo, kabili basendele na Benjamini wine. Baima balaya ku Egupto, baya ituula na kuli Yosefu. 16Cilya Yosefu amona ukuti Benjamini ali nabo, aeba kasunga wa ŋanda yakwe ati, “Senda aba bantu kumwandi. Wipayepo inama imo wipike. Aba bantu tulelya nabo akasuba.” 17Awe umubomfi acita ngefyo Yosefu amwebele, atwala na bantu ku ŋanda kwa Yosefu. 18Kanshi abo bantu epakwikatwa no mwenso ico babatwala ku ŋanda kwa Yosefu. Bena balatontonkanya abati, “Ico batuletela kuno, mulandu wa ndalama shilya babikile mu mifuko yesu pa bulendo bwakubalilapo. Alefwaya ukuti atucimfye, atwikate, atucite abasha bakwe, elyo abuule na bapunda besu.” 19Kanshi epakuya kuli kasunga wa ŋanda yakwa Yosefu, balanda nao ilyo bacili pa mwinshi wa ŋanda. 20Bamweba abati, “Twapapata mukwai, ifwe twalishile kuno kale kukushita ifyakulya. 21Lelo apo twasendeme, ilyo twakakwile imifuko yesu, cila muntu asangile indalama shakwe shonse apo shapelele mu mufuko wakwe pa mulu wa ŋanu. Kanshi natushibwesha, tuli nasho. 22Kabili natwisa na shimbi ishakushitamo icakulya. Tatwaishiba uwabikile indalama shesu mu mifuko yesu.” 23Umubomfi wakwa Yosefu ati, “Tekeni imitima, mwitiina. Lesa wenu, Lesa wakwa shinwe, ewamupeele isho ndalama mu mifuko yenu. Ine nalipokele indalama mwampeele.” Elyo aya fumya Simeoni amuleta kuli bamunyina.
24Kasunga wa ŋanda abuulile abo bantu no kubengisha mu ŋanda yakwa Yosefu. Abapeela amenshi yakusamba amakasa, elyo apeela bapunda babo icakulya. 25Bamunyina bapekanya ubupe bwabo ubwakwisa peela Yosefu nga aisa ilyo akasuba kaba pakati ka mutwe. Pantu balyumfwile ukuti bali nokulya kulya kwine. 26Cilya Yosefu aisa mumwakwe, bamunyina bamupeela ifyabupe ifyo baishile nafyo mu ŋanda, elyo bamukontamina no kumukontamina. 27Yosefu abepusha nga bali umutende, elyo atila, “Nga shinwe umukote mwanjebeleko, bushe ali umutende? Bushe ali umumi?” 28Nabo bamwasuka abati, “Ee, shifwe umubomfi wenu acili umumi kabili ali umutende.” Awe bamukontamina nganshi pakulanga umucinshi.
29Ilyo alebalolesha, amona Benjamini munyina uo afyelwe nao inda imo. Abepusha ati, “Bushe uyu e munyinenwe kasuli, ulya mwanjebeleko?” Elyo aeba Benjamini ati, “Lesa akupaale mwana wandi.” 30Ico amona munyina, Yosefu aumfwa icikonko, bwangu bwangu afumapo aya alefwaya incende ukwakulilila. Awe aya ku muputule wakwe eko alalilila. 31Panuma yakusamba pa menso, afuma ashipikisha, asosa nokuti, “Leteni icakulya.” 32Yosefu bamutwalila ifyakulya eka, na bamunyina nabo beka, na bena Egupto abalelya nankwe nabo babatwalila icakulya beka, pantu abena Egupto tabafwaya nelyo panono kulya pamo na Bahibulu,#43:32 Abena Egupto tabafwaya nelyo panono kulya pamo na Bahibulu: Pantu ku bena Egupto Abahibulu ne mishobo imbi, bantu abakowela ico balya ifyakulya ifyakowela ukulingana ne pepo lyabo. cintu ico bapata. 33Bamunyina babateka pantanshi yakwa Yosefu. Baikala ukukonka umo bafyalilwe, ukufuma kwibeli ukufika na kuli kasuli. Elyo bamunyina baloleshanya, bapapa pakumona ifyo baikala. 34Icakulya balabapeela ukufuma kwitebulo lyakwa Yosefu. Ifyakulya bapeele Benjamini fyali ifingi imiku isano ukucila umuntu onse umbi. Kanshi balya no kunwa, basansamuka pamo na Yosefu.
נבחרו כעת:
Icitendekelo 43: ILL15
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Bible Society of Zambia