Mateo 14
14
Sa Pagpatay Hi Juan Ha Tagpamautismu
(Mateo 14:1-12; Marcos 6:14-29)
1Duun taena ha panahun napaliman hi Harì Herodes sa mga tultulanen mahitenged ki Jesus, 2aman inikagiyan din sa mga sinaligan din, “Iyan haena si Juan Ha Tagpamautismu ha nabanhaw aman agkahimu din sa mga belenganen.”
3Si Herodes iyan migsugù ha dakepen, bakusen, daw prisuhen si Juan. Binuhat din haena tumenged ta inasawa hi Herodes si Herodias ha asawa daan hu suled din ha si Felipe 4ba inikagiyan hi Juan si Herodes, “Nasupak nu gayed sa Kasuguan tumenged ta inasawa nu sa asawa hu suled nu.” 5Aghimatayan ngaay hi Herodes si Juan ba agkahaldek daan hu mga Judio ta tinuuwan dan si Juan ha prupita gayed.
6Su aldaw ha agsaulugen hi Herodes sa kabataa kandin suminayaw sa laga-laga hi Herodias duun hu atubangan taena ha nangaamul-amul diyà. Tumenged ta tungkay gayed nabayà-baya hi Herodes 7impanumpà din ha iila din sa bisan inu ha panayuen taena ha suminayaw. 8Tinudluan hi Herodias su laga din aman uminikagi haena, “Iila nu iman kanak sa ulu hi Juan Ha Tagpamautismu ha iugsak duun hu lampay.” 9Tungkay gayed ngaay naguul su harì ba tumenged hu panumpà din duun hu atubangan taena ha inimbita din insugù din ha buhaten haena sa pinanayù ku laga-laga. 10Aman pinungulan si Juan diyà ta prisuhan 11daw iugsak sa ulu din duun hu lampay, dayun indawag duun ku laga aman inuwit din haena diyà ki Inay din. 12Sa lawa hi Juan tinimù hu mga sumusunud din diyà ta prisuwan daw ilebeng. Dayun duminiyà sidan ki Jesus daw itultul haena.
Sa Pagpakaen Ku Lalima Ha Libu Ha Mga Etaw
(Mateo 14:13-21; Marcos 6:30-44; Lucas 9:10-17; Juan 6:1-13)
13Su mapaliman hi Jesus sa tultul mahitenged hu kamatayen hi Juan luminulan haena duun hu barutu ha iyan dà sidan hu mga tinun-an din daw duun hu pinakabulung-bulung ha lugar. Ba su mapaliman hu mga etaw ha tagtimà duun taena ha mga banuwa namanlupug sidan ki Jesus ba diyà sidan uminagi ta gaun. 14Su kumawas en si Jesus duun ku barutu naahà din sa madakel tungkay ha mga etaw aman nahid-uwan din gayed sidan dayun naulian din sa agkangadaluwan.
15Su panday en agkahapun inikagiyan si Jesus hu mga tinun-an din, “Agkahapun en daw pinakabulung-bulung haini ha lugar. Sugua nud en sa mga etaw ha mamanduun sidan hu mga banuwa ta daw makapalit sidan hu agkan-en dan.”
16Ba si Jesus tuminubag, “Kenà en kinahanglan ha maman-ulì sidan. Iyan kaw en mag-ila kandan hu pagkaen.”
17Minikagi sidan, “Amin dini pagkaen ba lalima dà ha buuk ha supas daw daruwa dà daan ha buuk ha sedà.”
18Inikagiyan sidan hi Jesus, “Uwita dini ta kanak.” 19Dayun impapinuu din su mga etaw ta saena sagbeten ha bugtà. Tinimù din su lalima ha supas daw su daruwa ha sedà dayun huminangad diyà ta langit daw ampui haena. Su makapenga en mag-ampù pinangebing din su supas daw sugua su mga tinun-an din ha ipakaen haena hu mga etaw. 20Su mangabuhì en sidan pinangamul hu mga tinun-an su nasamà duun, saena sampulù pa daw daruwa ha ambung. 21Lalima ha libu sa kadakelen hu mga maama ha nangakakaen daw amin pa mga bahi daw mga batà.
Sa Paghipanaw Hi Jesus Duun Hu Danaw
(Mateo 14:22-33; Marcos 6:45-52; Juan 6:16-21)
22Impalulan hi Jesus sa mga tinun-an din duun hu barutu ta daw makauna en sidan diyà ta layun ku danaw. Dayun impaulì din su mga etaw. 23Su maipus en sidan si Jesus duminuun hu buntud daw mig-ampù ha sabubuwa dà. Su agpanukilem en didiyà pa si Jesus. 24Ba su barutu ha taglulanan hu mga tinun-an din diyà en ta taliwarà taena ha danaw daw saena tagkakiling-kiling en tumenged hu adagi ha baled ta natalagbù dan sa kalamag.
25Su madani en agkaaldaw si Jesus luminupug kandan ha taghipanaw letaw duun taena ha wahig ta ag-amul diyà ta kandan. 26Su maahà hu mga tinun-an haena sa bayà-bayà en taghipanaw letaw ta wahig, tungkay gayed sidan nangahaldek, aman nakapangulahì sidan, “Kalag en hayana.”
27Ba inikagiyan sidan hi Jesus, “Pandayai nuy sa gahinawa nuy daw harì kaw agkangahaldek ta iyan a haini.”
28Dayun minikagi si Pedro, “Ginuu, ku laus ha iyan ka hayan ipadiyan a daan.”
29Tuminubag si Jesus, “Dumini kad en.”
Aman uminawà si Pedro duun taena ha barutu daw hipanaw diyà ta wahig payanaen ki Jesus. 30Ba su magedam din sa maseleg ha kalamag nahaldek haena. Aman agkalened en ngaay ba nakapangulahì, “Ginuu, buligi a.”
31Sagunà haena inibitan hi Jesus daw ikagiyi, “Imbà ka man tagduwa-duwa? Harì ka ba diay agsalig kanak?”
32Su lumulan en sidan duun ku barutu uminendà daan sa kalamag. 33Dayun sa mga tinun-an din duun ku barutu suminimba ki Jesus hu kagi dan, “Batà ka gayed hu Dios.”
Sa Pagbulung Hu Mga Etaw Diyà Ta Genesaret
(Mateo 14:34-36; Marcos 6:53-56)
34Su makalayun en si Jesus daw sa mga tinun-an din diyà ta Genesaret 35nakilala si Jesus hu mga etaw diyà, aman pinaelegan dan sa mga agkangadaluwan duun hu ubayà dan ha mga banuwa. Pinan-uwit haena diyà ki Jesus 36daw pinagayukan dan si Jesus ha su agkangadaluwan makaibit ngaay duun hu sagayadan hu pinaksuy din. Sa alan ha nakaibit duun nangaulian gayed.
© 2015, Wycliffe Bible Translators, Inc. All rights reserved.