Mateo 17
17
Sa Pagkahalin Hi Jesus
(Mateo 17:1-13; Marcos 9:2-13; Lucas 9:28-36)
1Su maiwas en sa haenem ha aldaw dinuma hi Jesus si Pedro, si Santiago daw sa suled hi Santiago ha si Juan duun hu matangkaw ha bubungan ha iyan dà sidan. 2Duun hu atubangan dan tigkan nahalin si Jesus. Sa weleng din tagpangaluanlag iling hu aldaw daw sa pinaksuy din ben kaputì en gayed. 3Tigkan daan nakahiwal diyà ta kandan si Moises daw si Elias ha nakiglalang ki Jesus.
4Dayun minikagi si Pedro diyà ki Jesus, “Ginuu, maayad ta dini kay. Ku mabayà ka buhatan ku iman inyu hu tatulu ha lawig ta daw matukid kaw ki Moises daw ki Elias.”
5Su tag-ikagi pa si Pedro amin tagpangaluanlag ha gabun ha nakabungkus kandan, daw amin lageng ha napuun duun ku gabun ha tagyanaen, “Iyan en haini pinalanggà ku ha Batà ha tigkabayà-bayà ku. Magpaliliman kaw kandin.”
6Su mapaliman haena ku mga tinun-an nangahaldekan gayed sidan aman nangakaeb-eb sidan. 7Ba inubayan sidan hi Jesus daw pan-ibiti sidan dayun ikagiyi, “Bangun kaw daw harì kaw agkangahaldek.” 8Su humangad sidan iyan dan dà naahà si Jesus.
9Su tagtubang en sidan diyà ta alug binalaudan sidan hi Jesus, “Harì nuy itultul haena sa naahà nuy hangtud ha mabanhaw a sa Batà hu Etaw.”
10Nanginginsà sa mga tinun-an diyà ta kandin, “Imbà sa mga manunudlù hu Kasuguan tag-ikagi ha kinahanglan ha si Elias makauna gayed dini dì hu Misiyas?”
11Si Jesus tuminubag, “Laus gayed ha mauna dini si Elias daw mapamandayan din sa alan. 12Ba ikagiyen ku inyu ha nakadini en si Elias ba hurà kakilala hu mga etaw aman bà dan dà pinasipalahi sumalà hu agkabayaan dan. Iling taena ipaantus a daan kandan siak sa Batà hu Etaw.” 13Dayun human nasabut hu mga tinun-an din ha iyan din tagsubayen si Juan Ha Tagpamautismu.
Sa Pagbugaw Hu Mabalaw Ha Busaw
(Mateo 17:14-21; Marcos 9:14-29; Lucas 9:37-43)
14Su makauma si Jesus daw su tatulu ha tinun-an din duun hu mga etaw amin daan etaw ha luminuhud duun hu atubangan din 15ha minikagi, “Ginuu, kahid-uwi sa batà ku ha maama ta agkabidbid daw tag-antus gayed. Kapila en makaagbul duun hu hapuy daw duun hu wahig. 16Inuwit kud en duun hu mga tinun-an nu ba hurà dan gayed kaulii.”
17Minikagi si Jesus, “Sinyu ha mga etaw sa harì agtuu daw suminuway duun hu pagkamatareng, nalugay en sa pagduma-dumahà taw. Inu pa diay kalugay sa pag-angat ku ha tumuu kaw kanak? Uwita dini hayana sa batà.” 18Binaldeng hi Jesus su busaw ha tuminagù taena ha batà aman sagunà guminuwà su busaw dayun naulian su batà.
19Duminiyà ki Jesus sa mga tinun-an din ha iyan dà sidan daw ininsaan dan, “Imbà day hurà kabugaw su busaw ha tuminagù ku batà?”
20Tuminubag si Jesus, “Hurà nuy haena kabugaw ta kulang gayed sa pagtuu nuy. Laus gayed sa ag-ikagiyen ku inyu ha ku sa pagtuu nuy iling dà kaatiyù hu lisu hu mustasa mahimu en ha suguen nuy hayana sa bubungan ha humalin diyà ta alug na makahalin gayed. Hurà gayed harì nuy mahimu. 21Ba saena ha klasi hu busaw mabugaw pinaagi dà gayed hu harì agkaelangan ha pag-ampù.”
Sa Ikaduwa Ha Pag-ikagi Hi Jesus Mahitenged Hu Kamatayen Din
(Mateo 17:22-23; Marcos 9:30-32; Lucas 9:44-45)
22-23Su panahun ha naamul si Jesus daw sa mga tinun-an din diyà ta Galilea inikagiyan sidan hi Jesus, “Siak sa Batà hu Etaw laus ad en itugyan duun hu aghimatay kanak ba duun hu ikatulu ha aldaw mabanhaw a dà.” Tumenged taena nangaguul sa mga tinun-an hi Jesus.
Sa Buhis Hu Timplu
24Su makauma en si Jesus daw sa mga tinun-an din diyà ta Capernaum ininsaan si Pedro hu mga manunukut hu buhis ta Timplu, “Tagbayad ba sa Manunudlù nuy hu buhis taena ha Timplu?”
25Tuminubag si Pedro, “Hee”.
Su makaseled en si Pedro diyà ta balay sagunà ininsaan hi Jesus, “Simon, inu sa kahenhenaa nu taini? Sin-u ba sa tagbayad hu buhis duun hu mga harì dini ta kalibutan? Iyan ba sa mga sakup din daw ku iyan ba sa mga langyaw?”
26Tuminubag si Pedro, “Iyan sa mga langyaw.”
Si Jesus minikagi, “Ku iyan hayan harì ngaay magbayad hu buhis sa mga sakup hu harì. 27Ba para ha harì ki mapaukan taena ha mga manunukut hu buhis pamanuwit ka diyà tayà ha danaw. Sa una ha sumambat ikaw timuen nu sa salapì diyà ta bàbà din ta tumanan en haena ha ibayad ta hu buhis ta Timplu.”
© 2015, Wycliffe Bible Translators, Inc. All rights reserved.