Mateo 22
22
Sa Pananglitan Mahitenged Hu Kaamulan
(Mateo 22:1-14; Lucas 14:15-24)
1Si Jesus duminayun minikagi duun hu mga etaw pinaagi hu mga pananglitan ha tagyanaen, 2“Sa tagharian hu Dios agkailing hu harì ha nangandam hu kaamulan ta sa batà din agpangasawa. 3Pinaelegan din sa mga inimbita ha dumiyà en sidan ba namalibad haena.
4“Dayun pinaisaban din dà sidan pinaelegan hu lain ha mga suluguen, kagi din, ‘Ikagiyi su mga inimbita ha nalapà en su mga baka daw su impalambù ha mga nati daw inlamisa en sa pagkaen. Ipaagpas en sidan ipadini.’
5“Ba saena ha pinan-elegan hurà en magsima ba bà dà duminayun hu kandan ha mga buluhaten, sa sabuwa duminuun ku uma din daw sa sabuwa duminuun hu patigayun din. 6Sa duma kandan bà dan dà pinan-ibiti su mga suluguen ku harì daw pagagayhai dayun panhimatayi. 7Su matun-an haena ku harì tungkay gayed napauk, aman pinaelegan din hu mga sundalu haena sa nangimatay ku mga suluguen din daw mahimatayan daan sidan dayun pigbigsulan dan daan haena sa banuwa.
8“Inikagiyan din sa duma ha mga suluguen din, ‘Napengahan en sa lamisa ba saena ha pinan-imbita ku kenà angayan ha dumini. 9Aman pamanduun kaw hu mga dalan daw pan-imbitaha sa bisan sin-u ha maahà nuy.’ 10Dayun namanhipanaw su mga suluguen daw pan-imbita hu bisan sin-u ha naahà dan sa maayad daw sa madaet, aman napanday gayed napunù su balay ku harì.
11“Ba su makaseled su harì ta ag-ahaen din sa mga etaw naahà din su maama ha hurà magpinaksuy para hu kaamulan. 12Inikagiyan din haena, ‘Imbà ka makaseled dini ha sa bisti nu kenà man para hu kaamulan?’ Saena ha etaw hurà gayed makatubag.
13“Dayun inikagiyan ku harì sa mga sinaligan din, ‘Bakusa haini daw ilambeg duun hu kasukileman diyà ta guwà ha duun makag-ulahuay hu kalugul daw magkangget sa mga ngipen din hu kasakitan.’
14“Madakel sa inimbita hu Dios ba atiyuay dà sa pinilì.”
Sa Pagbayad Hu Buhis Diyà Ki Harì Cesar
(Mateo 22:15-22; Marcos 12:13-17; Lucas 20:20-26)
15Naman-awà su mga Parisiyu daw miglalang-lalang ku in-inuwen dan ta daw amin maikagi hi Jesus ha ikasumbung dan. 16Aman sinugù dan diyà ki Jesus sa mga sakup dan daw sa mga sakup hi Herodes. Dayun saena sidan uminikagi diyà ki Jesus, “Manunudlù, natun-an day ha matareng ka gayed daw iyan nu dà tigtudlù sa kamatuuran mahitenged hu Dios. Harì ka agkauwit hu mga henà-henà hu mga etaw ta hurà nu kandan igpalabi. 17Aman ikagiyi kay ikaw ku igtugut ba hu Kasuguan taw ha magbayad kuy hu buhis diyà ki Cesar.”
18Ba natun-an hi Jesus ha madaet sa tuyù dan aman inikagiyan din sidan, “Sinyu sa bà dà tagpasibù-sibù, imbà a inyu tagsulay-sulaya? 19Ipaahà kanak sa salapì ha igbayad nuy hu buhis.” Inuwit dan su salapì 20dayun ininsaan sidan hi Jesus, “Sin-u ha weleng daw ngaran sa nakaugsak duun taini ha salapì?”
21Tuminubag sidan, “Iyan si Cesar sa Harì ta Roma.”
Dayun inikagiyan sidan hi Jesus, “Ku kandin diay haini kinahanglan ha iila nuy diyà ki Cesar sa buhis daw iila nuy daan duun hu Dios sa kandin.”
22Su mapaliman dan haena tungkay sidan nangabeleng dayun inawaan sidan hi Jesus.
Sa Katudluanan Mahitenged Hu Pagkabanhaw
(Mateo 22:23-33; Marcos 12:18-27; Lucas 20:27-40)
23Duun taena ha aldaw amin mga Saduceo ha duminiyà ki Jesus. Saini ha mga etawa harì agtuu ha mabanhaw sa etaw, 24aman inikagiyan dan si Jesus, “Manunudlù, sa Kasuguan hi Moises tagyanaen, ‘Ku matay sa maama ba hurà pa sidan pamatà ki igbahi din kinahanglan ha sa suled taena ha maama asawahen din su bahi ha nabalu ta daw ku magbatà sidan kaliwat pa haena ku suled din ha minatay.’ 25Su anay amin dini pitu ha migsusuled ha pulus maama. Sa kamagulangan kandan nangasawa ba hurà pa sidan pamatà na minatay en. Aman inasawa ku manghud din su bahi ha nabalu 26ba saena ha maama hurà en daan sidan pamatà na minatay en daan hangtud ha su migsusuled alan nakaasawa ku bahi ba alan daan minatay. 27Dayun minatay daan su bahi. 28Ku mabanhaw asem sa namamatay sin-u man sa laus ha igmaama ku bahi sa pulus man nakaasawa kandin su pitu ha migsusuled?”
29Ba inikagiyan sidan hi Jesus, “Maal en sa tag-ikagiyen nuy tumenged ta hurà nuy katun-i sa insulat ha lalang hu Dios daw sa pagkagamhanan din. 30Asem ku mabanhaw en sa mga namamatay agkailing sidan hu mga balinsuguen hu Dios diyà ta langit ha harì en agpangasawa. 31Mahitenged hu pagkabanhaw taena ha mga minatay hurà nuy ba diay kabasa sa lalang hu Dios ha tagyanaen, 32‘Iyan a Dios ha tagsimbahen hi Abraham daw hi Isaac daw hi Jacob.’ Kenà haena Dios hu mga minatay ba Dios hu mga bubuhay.”
33Su mapaliman haena hu mga etaw nangabeleng gayed sidan hu katudluanan din.
Sa Tungkay Labaw Ha Sugù
(Mateo 22:34-40; Marcos 12:28-34; Lucas 10:25-28)
34Su matun-an hu mga Parisiyu ha hurà en makatubag ki Jesus sa mga Saduceo sagunà sidan mig-amul-amul. 35Amin kandan sabuwa ha manunudlù hu Kasuguan ha nanginginsà daan ki Jesus hu pagsulay kandin ha tagyanaen, 36“Manunudlù, inu man sa labaw gayed duun hu alan ha Kasuguan?”
37Tuminubag si Jesus, “‘Palanggaa nuy gayed sa Dios ha Magbabayà nuy’ 38ta iyan haena tungkay labaw daw nauna ha sugù duun hu Kasuguan. 39Sa ikaduwa ha labaw ha sugù iyan sa, ‘Palanggaa sa mga duma nuy iling hu pagpalanggà nuy hu kaugalingen nuy.’ 40Sa Kasuguan daw sa lalang hu Dios pinaagi hu mga prupita matuman en ku buhaten nuy haini sa daruwa ha sugù.”
Sa Misiyas Ha Kaliwat Hi David
(Mateo 22:41-46; Marcos 12:35-37; Lucas 20:41-44)
41Su tag-amul-amul sa mga Parisiyu ininsaan sidan hi Jesus, 42“Inu sa kahenhenaa nuy hu Misiyas? Sin-u man haena ha kaliwat?”
Tuminubag sidan, “Saena kaliwat hi David.”
43Inikagiyan sidan hi Jesus, “Ku iyan hayana imbà man makaikagi si David su ulinan hu Balaan ha Ispiritu ha Ginuu din sa Misiyas? Ta tagyanaen,
44‘Inikagiyan hu Dios sa Ginuu ku, “Dini ka pinuu ta kawanan ku hangtud ha madaeg ku sa mga kuntra nu.”’
45Ku inikagi hi David ha Ginuu din su Misiyas, imbà kabuhat din dà paman haena ha kaliwat?”
46Hurà en gayed agpakatubag ki Jesus daw sugud taena ha aldaw hurà en uminamel hu pagpanginginsà kandin.
© 2015, Wycliffe Bible Translators, Inc. All rights reserved.