Marcos 1
1
Sa Pagpanunultul Hi Juan Ha Tagpamautismu
(Marcos 1:1-8; Mateo 3:1-12; Lucas 3:1-18; Juan 1:19-28)
1Iyan haini puunaan hu Maayad ha Tultulanen mahitenged ki Cristo Jesus sa Batà hu Dios.
2Insulat hu prupita ha si Isaias sa inikagi hu Dios su anay diyà ki Jesus ha tagyanaen,
“Amin ku igpauna dì ikaw ta daw makapangandam hu ag-agiyan nu. 3Saena magkulahiay duun hu pinakabulung-bulung ha lugar ha magyanaen, ‘Andama sa ag-agiyan hu Ginuu daw tul-ida sa dalan.’”
4Aman nakauma si Juan Ha Tagpamautismu duun taena ha pinakabulung-bulung ha lugar daw tagpanunultul ha tagyanaen, “Maghinulsul kaw ta daw mapasaylu sa mga salà nuy daw magpabautismu kaw.” 5Madakel ha mga etaw sa namandiyà ta kandin ha nangapuun ta Jerusalem daw duun hu mga banuwa ha sakup ta Judea. Insugid dan sa mga salà dan aman pigbautismuwan sidan hi Juan diyà ta Wahig ta Jordan. 6Sa pinaksuy hi Juan bulbul hu kamilyu daw anis daan sa bakes din. Sa kalan-enen din talangas daw degà. 7Iyan haini tultulanen din ha tagyanaen, “Amin pa makadini ha labaw dì kanak ta bisan sa paghukad hu sapatus din kenà a gayed angayan duun. 8Diyà a ta wahig agpamautismu inyu ba sa kandin ha igbautismu iyan sa paulinan kaw kandin hu Balaan ha Ispiritu.”
Sa Pagbautismu Daw Sa Pagpanulay Ki Jesus
(Marcos 1:9-13; Mateo 3:13—4:11; Lucas 3:21-22; 4:1-13)
9Duun taena ha panahun nakauma si Jesus sa napuun diyà ta Nazareth ha sakup ta Galilea dayun binautismuwan hi Juan diyà ta Wahig ta Jordan. 10Su taggaun pa si Jesus duun ku wahig naahà din ha napuwaan sa langit daw migbulus diyà ta kandin sa Balaan ha Ispiritu ha agkailing hu salapati. 11Amin lageng ha napuun diyà ta langit ha tagyanaen, “Iyan ka gayed pinalanggà ku ha Batà ha tigkabayà-bayà ku.”
12Dayun inuwit si Jesus hu Balaan ha Ispiritu duun hu pinakabulung-bulung ha lugar 13daw pigsulayan hi Satanas seled hu kap-atan ha aldaw. Amin daan diyà mga mananap ha agpamangagat hu etaw, ba sa mga balinsuguen hu Dios iyan mig-alima kandin.
Sa Puunaan Hu Pagtudlù Hi Jesus
(Marcos 1:14-15; Mateo 4:12-17; Lucas 4:14-15)
14Su maprisu en si Juan luminikù si Jesus diyà ta prubinsya ta Galilea daw migsangyaw hu Maayad ha Tultulanen ha napuun duun hu Dios 15ha tagyanaen, “Iyan en haini panahun ha madani en sa pagharì hu Dios aman maghinulsul kaw daw tuuwi sa Maayad ha Tultulanen.”
Sa Pag-umaw Hu Haepat Ha Mamamaling
(Marcos 1:16-20; Mateo 4:18-22)
16Su taghiphipanaw si Jesus duun hu kilid taena ha Danaw ta Galilea naahà din si Simon daw sa suled din ha si Andres ha tagpamaling duun taena ha danaw ta mamamaling man sidan. 17Inikagiyan sidan hi Jesus, “Dumuma kaw kanak ta agbuhaten ku inyu ha mamamaling hu mga etaw.” 18Sagunà dan inawaan su baling dan daw duma ki Jesus.
19Su malugay-lugay naahà hi Jesus su mga migsuled daan ha iyan si Santiago daw si Juan sa mga batà hi Zebedeo ha tagpamandaya hu baling dan duun ku barutu. 20Aman inumaw sidan hi Jesus dayun inawaan dan si Amay dan ha si Zebedeo duun ku barutu duma hu mga sinuhulan dan daw duminuma sidan ki Jesus.
Sa Etaw Ha Tinaguan Hu Busaw
(Marcos 1:21-28; Lucas 4:31-37)
21Namandiyà si Jesus daw sa mga tinun-an din ta Capernaum. Su Sabadu ha iyan Aldaw hu Paghimlay sumineled si Jesus duun ku simbahan hu mga Judio daw panudlù. 22Sa mga etaw diyà nangabeleng ta sa kandin ha pagtudlù amin duun gahem dì ku mga manunudlù hu Kasuguan. 23Diyà ta simbahan amin etaw ha tinaguan hu busaw 24ha tagkulahiay ha tagyanaen, “Jesus ha taga-Nazareth, inu sa labet nu kanay? Duminini ka ba hu pagsilut kanay? Agkakilala ku ikaw ha sinugù ka hu Dios.”
25Ba binaldeng haena hi Jesus hu kagi din, “Hagteng ka daw awà ka diyan tayan.” 26Pinaagi hu gahem ku busaw nabidbid su etaw ha nakapangulahì dayun guminuwà su busaw.
27Sa alan ha mga etaw diyà nangabeleng gayed daw migpainsaay, “Bag-u ba gid haini ha katudluanan? Ta saini ha etaw amin din gahem ha bisan sa mga busaw agtuu kandin.” 28Sagunà nakalekep sa tultul mahitenged ki Jesus duun hu alan ha mga banuwa ha sakup ta Galilea.
Sa Pagbulung Hu Mga Etaw
(Marcos 1:29-34; Mateo 8:14-17; Lucas 4:38-41)
29Sagunà uminawà si Jesus diyà ta simbahan daw duminiyà ta balay hi Simon daw hi Andres duma ki Santiago daw ki Juan. 30Sa ugang ha bahi hi Simon harì en pakabangun ta agkagenaw daw tinultulan dan si Jesus taena. 31Aman inubayan din haena daw ibiti sa alima din daw ipabangun. Sagunà haena naulian aman sinugbahan din dayun say Jesus.
32Su madani en agpanukilem pinan-uwit hu mga etaw diyà ki Jesus sa alan ha agkangadaluwan daw sa pigtaguan en hu busaw. 33Sa mga etaw duun taena ha banuwa nangaamul-amul duun hu atbang taena ha balay 34dayun naulian hi Jesus sa madakel ha hurà mag-iiling man sa mga dalu dan. Pinamugaw din daan sa mga busaw ba binaldeng din sidan ha harì mag-ikagiyà ta nakakilala en sidan kandin.
Sa Pagpanudlù Hi Jesus Duun Hu Mga Simbahan
(Marcos 1:35-39; Lucas 4:42-44)
35Su madani en agkaaldaw si Jesus duminuun, pinakabulung-bulung ha lugar daw mig-ampù diyà, 36aman pinan-ahà haena hi Simon daw hu mga duma din. 37Su maahà dan en si Jesus inikagiyan dan, “Madakel sa tagpan-ahà ikaw.”
38Ba si Jesus tuminubag, “Dumuun kuy hu lain ha mga banuwa ha ubay dini ta daw makapanultul a daan diyà, ta iyan haini indini ku ta kalibutan.” 39Aman nalekep hi Jesus sa alan ha mga banuwa sakup ta Galilea, migtudlù duun hu mga simbahan hu mga Judio daw pinamugaw din daan sa mga busaw.
Sa Pagbulung Hu Sanglahen
(Marcos 1:40-45; Mateo 8:1-4; Lucas 5:12-16)
40Amin sanglahen ha luminuhud diyà ki Jesus daw huminangyù, “Ku mabayà ka ngaay bulungen a ikaw taini ha mahugaw ha dalu ku.”
41Nahid-uwan haena hi Jesus aman dinampà din su sanglahen daw ikagiyi, “Agkabayà a aman maulian ka.” 42Sagunà haena naulian.
43Dayun impahipanaw haena hi Jesus daw binalaudan din, 44“Harì ka manunultul hu bisan sin-u ba dumuun ka taena ha sinaligan hu paghalad ta daw masusi din ha naulian kad. Maghalad ka sumalà hu Kasuguan hi Moises ta daw malimpyuwan ka daw matun-an hu mga etaw ha naulian kad en.” 45Ba su makahipanaw en su etaw bà dà nasì nanunultul duun hu bisan hindu. Aman si Jesus harì en paman pakaduun hu mga banuwa ba duun dà tagtimaay hu pinakabulung-bulung ha mga lugar. Ba bisan pa taena inelegan si Jesus hu mga etaw ha nangapuun duun hu bisan hindu.
© 2015, Wycliffe Bible Translators, Inc. All rights reserved.