Cwaan Mii 'owe keshinihsitohtaman Cwaan Ominwaacimowin
Mii 'owe keshinihsitohtaman Cwaan Ominwaacimowin
Cwaan hsa ishipii'ike omasina'ikanink ewiintamaaketc Ciisahsoon ehtinowinitc Kishemanitoon otIhkitowinini, ininiink kaye ekii'ishiayaanitc mekwaa o'omaa ahkiink kiipimaatisinitc. Tipaacimo kaye Kishemanitoon ekii'onaapamikonitc cipimaaci'iwenitc, e'oKosihsimikonitc itahsh kaye. Awiyan tahsh iko ketepweyenimaanitc cipimaaci'imintc.
Mii hsa Ciisahs eshimaaciitashintenikin kaakii'ishi maamahkaacihciketc ci'onci kihkentaakositc e'aawitc Opimaaci'iwe. Miitahsh weweni kaa'ishikakanoonaatc awiya' ekii'waawiintamawaatc aaniin enwaatenikin ini omaamahkaacihcikewinan. Niipiwa' itahsh awiya' okiihtepweyenimikoo' ekiihpiminisha'okotc. Shaakooc itahsh kiihpaahtiinowa' pemaatisinitc kaakiihtepwehtansinik, tako tahsh kaakii'aanawenimikotc.
Miitahsh i'imaa kihcioshipii'ikanink 13–17 eshioshipii'ikaatenik aaniin Ciisahs kaa'ishi kakanoonaatc okihkino'amawaakana' ishkwaac kiini wawiiciiwaatc. Okii'antawenimaa' cikihkentaminitc ewii'nihsintc, i'i tahsh ewii'ishinakanaatc. Miihsh kaakii'inaatc ewiihpiicinisha'amawaatc Ahcaahkwan kewiici'ikonitc. Owiintamawaa' ninkotink miinawaa kiishikaninik ewiihpinaasihkawaatc, mii 'i cionci mashkawentaminitc. Miitahsh i'i kaakii'anami'ehtawaatc.
Weti tahsh ishkwaac ani ishitipaacimaa a'a Ciisahs kiikaahcitinintc, kiitipaahkonintc, kii akosaka'ikaniwitc itahsh kaye. Miitahsh kaakiih kiiwepimaatisitc, ekiiwaapamikotc okihkino'amaawaakana'.
Mii hsa kaa'onci ishipii'ikaatek o'o masina'ikan, awiya piko tepweyenimaatc Ciisahsoon cipimaaci'ikoowisitc.
Peshikwayek ishimaamahkaatentaakwan o'o Minwaacimowin, Ciisahs ekii'aawehcikaaketc nipi, pahkweshikanan, waahseyaa, maanahcaanihsha', shoominaahtik, kotak itahsh pahkaan kekoonan ekii'aapacihtootc keoncinihsitohcikaatenikin kaa‑ahcaahkwentaakwaninikin.
Cwaan iitok peshik Ciisahs okihkino'amaawaakanan kiihtinowi. Aahpici pehsho okii'wiiciiwaan Ciisahsoon. Kii'ishipii'ike hsa ko kaakii'ishiwaapamaatc, kaakii'ishinoontawaatc kaye e'ihkitonitc.
Entahsopepahkaanipii'ikaatek o'o masina'ikan
Eshimaaciiyaatotek o'o masina'ikan 1.1-18
Ehtashinsotc Cwaan Osiika'antaake, Ciisahs kaye nihtam kaakii'antomaatc okihkino'amawaakana' 1.19-51
Ciisahs kaakii'ishipapaawiici'aatc awiya' 2.1—12.50
Ishkwaac e'anikakiishikaninik Ciisahs kiipimaatisitc weti Ceroosalamink 13.1—19.42
Kiikiwepimaatisitc, kiinaakosiihtawaatc okihkino'amawaakana' 20.1-31
Miinawaa Ciisahs kiinaakosiihtawaatc Piitaroon, kotak kaye pemaatisininitc 21.1-25
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Ojibwe Shorter Bible (Roman Script) © 2008 Canadian Bible Society