San Mateo 4
4
Eçxthẽ'j Jesusa's ĩsxii wẽeni
(Mr 1.12-13; Lk 4.1-13)
1Txajũ' Dxus Espiritu' Jesusa's pe'jna u'kh nasa u'pnimée kiwesu, kxteea' eçxthẽ'j ĩsxii wẽeni fxi'zeya'. 2Sa' kuarenta en kuarenta kus kĩhwa ũ'mée u'pçxa', Jesusa' wẽek. 3Aça' eçxthẽ'ja' Jesus tasxte utxaaçxa na'jĩnak we'we ewmée vxit wẽeçxa:
—Dxus Nçxi'k dxihçxa', naa kwettxi pan myuukaah jĩte', Jesusa' na'wẽk pas:
4—Dxus librute na'jĩ'k: Nasa' pan yakhçxáa yu' ĩtxi fxi'zemeetxna, naasáa jxuka Dxus we'weni yakh yuuçxáa ĩtxi fxi'zetxna jĩk.
5Txajũ' eçxthẽ'ja' Jesusa's pe'jna u'kh Jerusalen çxhabna, sa' kxteea' dxuus yatte ẽete kaateka'jçxa, 6na'wẽk jxkaah:
—Dxus Nçxi'k dxihçxa', ay ẽejũ mũph. Txãa pa'gatey Dxus librute na'wẽk we'we':
Dxusa' txajx angeleswe'sxtxi jxkaajana idxa's nwe'wekahn.
Aça' txãawe'sxa' kusete jxpa'gatxna,
Iidx çxida kwette kpã'yuukahmen jĩna fxi'jni' jĩte',
7Jesusa' na'wẽk pas:
—Vxite ahte Dxus librute' na'wẽk we'we':
Idxna jxpe'jsa Dxusa's jxkaahwa'j ji'phmeeg jĩna fxi'jni' jĩk.
8Txajũ' eçxthẽ'ja' ki' pe'jna u'kh vxiç walate, sa' txãajũ maa kiwesu çxhabtxiwa seena' zhiçxkwesa's kaavxya'jak. 9Sa' na'jĩk:
—Adxa's peejxũkweçxa neewe'wene'ga aça' adxa' na'sa' jxuka idxa's ũsu'nja jĩte', 10Jesus pasçxa':
—Eçxthẽ'j, adx tasxu mtxutée, txãa pa'gatey Dxus librute na'jĩ'k:
Idxna jxpe'jsa Dxusçxá's neewe'wewa'ja', sa' txãaçxá's selpiwa'ja' jĩna fxi'jni' jĩte',
11eçxthẽ'ja' Jesus tasxu txuteek, aça' Dxus angeleswe'sxa' pu'çxya' pa'jtx.
Galilea kiwesu Jesus mjĩiya' takhni
(Mr 1.14-15; Lk 4.14-15)
12Juan Bautista' kxuuphni ũsa' jĩni's Jesusa' jiyuçxa', Galilea kiwen u'kh. 13Nawa Nasaret çxhabte yu' yujumée, Kapernaum çxhabtek u'p-ya' u'j. Txãa çxhaba' Zabulón vxite' Nefxtalí kiwe txãa ja'dasuk ũsu' ĩkh pukaga. 14Txã'wẽ yũuk nawa Dxus yuwe pta'sxsa Isaias fxi'jni kxtey yuukahnçxáak txã'wẽ yũu. Txã' na'jĩnak fxi'j:
15Zabulón Nefxtalí txãawe'sx kiwesu u'psa,
Vxite' ĩkh pukasu dxi'j u'jna ũsa' txãa ja'dasu u'psa,
Vxite' Jordan yu'kuteju, sek kãani ju'guwe'sx,
Vxite' Galilea kiwesu judiu ji'jmeesawe'sx
16Txãa nasa' çxhi'dxte ũssa na'wẽ ũsçxawa,
Eena'sa's uytxi.
Sa' uuníi na'wẽçxáa yã'j ũstewa,
Eena'sa' kweethku jĩ'k.
17Txajũ' Jesusa' Dxus yuwe's pta'sxya' takhku:
—I'kwe'sxa' pkaltxi nvxihtçxa Dxus tasxte misxawedwe. Txã'wẽme', Dxus jxkaahwa'j ena' ãjxã'kh jĩ'k.
Wedx uwesáa pahzsatx Jesus pa'yani
(Mr 1.16-20; Lk 5.1-11)
18Jesusa' Galilea ĩkh pukasu u'jweççxa', e'z pxakhtxi uyku, Adres vxite nyakha's Simon Pedro jĩ'tx txãawe'sxtxi. Txãawe'sxa' wedx uwesaatx yu', txãasatx wedx ukhe's ĩkhte akhna ũsu'. 19Aça' Jesusa' na'jĩk:
—Adx yakh myuhwe, aça' Dxus jĩi nasaa pkhakhwa'jsa vxitu'nja i'kwe'sxtxi'. 20Txã'jĩçpkaçxha', wedx ukhetx nvxihtçxa txãa yakh u'jtx.
21Aça' Jesusa' txãajũ wejkuẽ u'jnaçxáa, vxite e'z pxakhtxi uyku, Zebedeo nçxi'kwe'sx Jakobo vxite' Juan txãawe'sxtxi. Txãawe'sxa' barkote ney yakhtxi u'p yu', wedx ukhe's pã'khna. Aça' Jesusa' pa'yak. 22Naapkaçxha' barko vxite' txãawe'sx neyna nvxihtna'wa Jesus yakh u'jtx.
Nasa seena' wala kuhsatx Jesus kaapiya'jni
(Lk 6.17-19)
23Jesusa' Galilea kiwe jxukak pekũh, judiuwe'sx pkhaakheni yat-su Dxus jxkaahwa'j yuwe ewsa's pta'sxna, txã'wẽy nasa kĩh weete ãça'satxwa jxuka nuykatxhik. 24Txajũ' Siria kiwesuwe'sx jxuka jiyutx Jesus txã'wẽ yũuni's. Txãa pa'gatx fxiyfxiy ãça'satxwa jxuka jxũna pa'j, aka ji'phsa vxite' eçx iiyamunisa vxite' wẽeçxpa'jsa vxite' ẽseya' ãjasameetxwa jxuka. Txã'wẽsatxku Jesusa' nuykatxhi. 25Txajũ' Jesus yakh pi'kxna u'juya' nasa wala utxaatx, Galileajuwe'sx vxite' Dekapolis kiwesuwe'sx vxite' Jerusalenuwe'sx vxite' Judea kiwesuwe'sx vxite' Jordan yu'kutejuwe'sx.
נבחרו כעת:
San Mateo 4: pbbNNT
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
© 1984, Wycliffe Bible Translators, Inc. All rights reserved.