کاسِدانی کار 7
7
اِسْتیپانئے تْران
1مسترێن دینی پێشوایا چه اِسْتیپانا جُست کرت: ”بارێن، اے تُهمت راست اَنت؟“ 2اِسْتیپانا پَسّئو دات: ”او پت و براتان! دلگۆش کنێت:
اِبراهێمئے بارئوا
پُرشئوکتێن هُدا، هما وهدا مئے بُنپیرُک اِبراهێمئے دێما زاهر بوت که آ اَنگت بئین‌النهرئینا اَت و هارانا جَهمنند نبوتگ‌اَت. 3گۆن آییا گوَشتی: ’وتی سرڈگار و راج و کئوما بِلّ و هما مُلکا برئو که من ترا پێشیَ داران.‘ 4آییا کَلْدانیانی مُلک یله دات و هارانا شت. چه پتئے مَرکا و رَند، هُدایا آ چه اۆدا همے مُلکا آورت که انّون شما نِشتگێت. 5اِدا، هُدایا آییارا هچّ میراس و مِلکت ندات، یکّ بِچیلّے زمینی هم ندات، بله لَبزی کرت که آییئے نَسل و پَدرێچ اے سرڈگارئے هُدابُندَ#7:5 هُدابند، بزان واجه، واهُند، مالک، ساهِب. بیت. هُدایا اے هبر هما وهدا کرت که اِبراهێما اَنگت چُکّ نێست‌اَت. 6گۆن آییا چُش گوَشتی: ’تئیی چُکّ و اۆبادگ اَنچێن مُلکێا که آیانی وتیگ نه‌اِنت، دَرامد و بێگانگَ بنت و تان چار سد سالا، دگرانی چێردستیا گُلام و بےاِزّت کنگَ بنت.‘ 7چُش هم گوَشتی: ’هما کئوم که آیان وتی گُلام و چێردستَ کنت، من آیان سِزا دئیان. پدا چه آ مُلکا درَ کایَنت و همے جاگها منا پرستشَ کننت.‘ 8هُدایا گۆن اِبراهێما اَهد و کَرارے بست که آییئے نشانی مردێن‌چُکّانی سُنّت کنگ اِنت. پمێشکا، وهدے اِبراهێما اِساکێن چُکّ بوت، هشتمی رۆچا سُنّتی کرت. همے ڈئولا اِساکا وتی چُکّ آکوب و آکوبا وتی دوازدهێن چُکّ، که مئے کئومئے کَبیلهانی بُنپیرُک اَنت، سُنّت کرتنت.
ایسُّپئے بارئوا
9آکوبئے چُکّ، گۆن وتی براتێن ایسُّپا په هَسَدّ و کُنّت کپتنت. براتان ایسُّپ گُلامێئے ڈئولا بها کرت و مِسرا برگ بوت، بله هُدا ایسُّپئے همراه اَت و 10چه سجّهێن سکّی و سۆریان رَکّێنتی. هُدایا آ، همینچُک لاهکی و زانت و زانگ دات که مِسرئے بادشاه، پِرئونئے مِهر و اِهتباری په وت کَٹّت#7:10 کَٹَّگ، بزان نپ و سوتّ کنگ، دستا آرگ. و پِرئونا آ وتی سَرجمێن مُلک و مِلکتئے کارمَستر کرت. 11رَندا سجّهێن مِسر و کَنهانا ڈُکّالے#7:11 ڈُکّال، بزان کَهت، هُشکسالی. کپت که چه آییا مردمان مزنێن سکّی و سۆری رَست و مئے پت و پیرێنان هچّ وَرد و وراکے نبوت. 12وهدے آکوبا زانت که مِسرا دان و گندمَ رسیت، مئے پت و پیرُکی ائولی برا په ورد و وراکئے گِرگ و آرگا همۆدا راه داتنت. 13آ، دومی رَندا هم مِسرا شتنت و اے رَندا ایسُّپا وتا گۆن وتی براتان پَدّر و پَجّارۆک کرت. پِرئون هم ایسُّپئے کئوم و کُٹُمئے بارئوا سهیگ بوت. 14گڑا ایسُّپا په وتی پت آکوبا کُلئو راه دات که آ گۆن وتی سَرجمێن کَهۆل#7:14 کَهۆل، بزان هانوار، هانواده (یکّ لۆگێئے نانوار). و هاندانا که هپتاد و پنچ مردم اَتنت، بلَڈّیت و مِسرا بیئیت. 15اے ڈئولا، آکوب مِسرا شت و همۆدا آ و مئے پت و پیرُک بێران بوتنت. 16آیانی جۆن چه اۆدا آرگ و شِکێمئے شهرا، هما کبرا کَلّ کنگ بوتنت که اِبراهێما چه هامۆرئے چُکّان په چیزّے زرّا بها گپتگ‌اَت.
17وهدے گۆن اِبراهێما، هُدائے داتگێن کئولئے سَرجم بئیگئے وهد نزّیکّ بوت، مِسرا مئے مردم باز گێشتر بوتنت. 18آ وهدا، مِسرئے بادشاه دگرے بوت و ایسُّپئے بارئوا هچّی نزانت. 19آییا مئے کئوم رَد دات و رێپێنت، مئے پیرێنانی سرا باز زُلم و زۆراکی پِرّێنت و هُجّ کرتنت که وتی نُنُّکێن چُکّان، چه لۆگان ڈنّا دئور بدئینت که بمرنت.
موسّایا بگر تان سُلئیمانا
20همے وهدا، موسّا پێدا بوت. آ باز شررَنگ و ڈئولدارێن چُکّے اَت. تان سئے ماها وتی پت و ماتئے لۆگا رُست و رُدۆمی کرت. 21وهدے ڈنّا اێرِش کرت، مِسرئے بادشاه پِرئونئے جنکّا زرت و وتی جندئے چُکّئے ڈئولا رۆدێنت و مزن کرت. 22موسّایا مِسریانی سجّهێن زانت و زانتکاری در برت و په کِردار و گُپتارا توانمندێن مردے بوت.
23چِلّ سالی که بوت، اے پِگر و هئیالا کپت که گۆن وتی بنی اِسراییلی براتان گِندُک بکنت. 24وهدے دیستی چه آیان یکّێئے سرا، مِسریے زۆراکی کنگا اِنت، اِسراییلیئے دێمپانی‌ای#7:24 دێمپانی، بزان وتی رَکّێنگئے جُهد. اربی و پارسیا ”دفاع“. کرت و بێرئے گِرگا، آ مِسری‌ای جت و کُشت. 25موسّایا وتی دلا اَنچُش هئیال کرت که آییئے اِسراییلی برات بلکێن سرپد ببنت که په آیانی رَکّێنگا، هُدا آییا کار بندگا اِنت، بله اِسراییلی سرپد نبوتنت.
26اے دگه رۆچا اَناگت، آییا دو اِسراییلی وت‌مان‌وتا مِڑ و جنْگا دیست. موسّا په آیانی گیشّێنگ و تِپاک کنگا دێما کِنزت و گوَشتی: ’او مردان! شما وت‌برات اێت، چێا یکدگرا تاوانبارَ کنێت؟!‘ 27بله هما که وتی هم‌مُلکیئے سرا زۆراکی کنگا اَت، موسّایی یکّ نێمگے تێلانک دات و گوَشتی: ’ترا کئیا مئے سرا هاکم و کازی کرتگ؟ 28بارێن، هما ڈئولا که تئو زی آ مِسری کُشت، منی کُشگا هم لاکارتگِت؟‘ 29گۆن اے هبرئے اِشکنگا، موسّا چه آ مُلکا در آتک و میدیانئے سرڈگارا دَرانڈێه#7:29 دَرانڈێه، بزان جَلاوتن. بوت. همۆدا آییا دو مردێن‌چُکّ بوت.
30چِلّ سالا رَند، سینائے کۆهئے گیابانا، پرێشتگے بُن گپتگێن ڈۆلُکێئے#7:30 ڈۆلُک، بزان گیابانی کُنٹگی جرّے. آسئے شهمانی تها په موسّایا پَدّر بوت. 31چه اے ندارگئے#7:31 نِدارگ، بزان سئیل، تماشا. گِندگا، موسّا هئیران و هَبَکّه مَنت. وهدے په اِشیئے گێشتر چارگا نزّیکتر شت، هُداوندئے تئواری اے ڈئولا اِشکت: 32’من تئیی پت و پیرُک اِبراهێم، اِساک و آکوبئے هُدا آن.‘ موسّا چه تُرسا لَرزگا لگّت و آییا تَهم و جُریت نکرت آ نێمگا بچاریت. 33هُداوندا گوَشت: ’وتی سواسان در کن، اے جاگه که تئو اۆشتاتگئے، پاکێن جاگهے. 34من مِسرئے سرڈگارا وتی مردمانی سکّی و سۆری دیستگ‌اَنت، آیانی پریات و زاری اِشکتگ‌اَنت، په آیانی رَکّێنگ و آزات کنگا اێر آتکگان. بیا، نون من ترا پدا مِسرا رئوانَ دئیان.‘
35اِسراییلیان موسّا نمَنّتگ‌اَت و گوَشتگ‌اَتِش: ’ترا کئیا مئے سرا هاکم و کازی کرتگ؟‘ نون هُدایا هما موسّا بُن گپتگێن ڈۆلُکئے بُنا پرێشتگے پێش داشت. اے ڈئولا، آیانی هاکم و رَکّێنۆک کرت و مِسرا راهی دات. 36هما اَت که چه مِسرا اِسراییلیانی در آیگئے رهشۆن بوت. هماییا، مِسر و سُهرزِرئے#7:36 سُهرزِر هما جاگه اِنت که وهدے اِسراییلی چه مِسرا در آتکنت، آیانی دێما دریا اَت و پُشتا پِرئونئے لشکر پێداک اَت. هُدایا په آیانی رَکّێنگا همے جاگها دریا هُشک کرت و راه پَچ کرت (دَررئو 13:17–15:21). بازێن زانتکارے گوَشیت که مرۆچیگێن سوێز کانالئے نزّیکّا اِنت. تئیابا#7:36 تئیاب، بزان دریائے کِرّ، ساهِل. و تان چِلّ سالا گیابانان مۆجزه و اَجَبَّتێن نشانی پێشَ داشت. 37همے موسّا اَت که گۆن بنی اِسراییلیان گوَشتی: ’هُدا چه شمئے براتانی نیاما په شما، منی ڈئولێن پئیگمبرے گچێنَ کنت.‘#7:37 موسّائے واز 18:15. 38اے هما موسّا اَت که گۆن پرێشتگا هۆر، مئے پت و پیرُکانی مُچّیا گیابانا گۆن اَت. پرێشتگا سینائے کۆهئے سرا گۆن آییا تْران کرت و موسّایا همۆدا هُدائے زِند بَکشۆکێن هبر گپتنت تان آیان په ما سر بکنت.
39بله مئے پت و پیرُک، په موسّائے مَنّگا رزا نه‌اتنت. چه آییا پُشتِش کرت و نمَنِّت و دلِش په مِسرا بست. 40آیان، گۆن هارونا گوَشت: ’په ما اَنچێن هُدا بساچ که مئے رَهبریا بکننت. اے موسّا، که مارا چه مِسرا در آیگئے راهی پێش داشتگ، آییا چے بوتگ، ما نزانێن.‘ 41آیان گوَسک‌پئیمێن یکّ بُتے جۆڑ کرت و په وتی جۆڑ کرتگێن بُتئے شرپا، کُربانیگ و شادهی و شادکامی کرت. 42بله هُدایا وتی دێم چه آیان تَرّێنت و یله داتنت، بِلّ که نون ماه و رۆچ و اِستاران پرستش بکننت، هما ڈئولا که نبیانی کتابان نبشته اِنت: ’او اِسراییلیان! شما تان چِلّ سالا مان گیابانان په من هئیرات و کُربانیگ کرتگ‌اَت؟ 43نه! شما ”مُلوکئے تَمبو“#7:43 تَمبو، بزان هئیمَه، گِدان. و وتی هُدا ”ریپانئے اِستار“ بڈّا بستگ‌اَنت، هما بُت که شما په پرستشا اَڈّ کرتگ‌اَتنت. پمێشکا من شمارا چه بابِلئے سرڈگارا هما دستا، جَلاوتن و دَرانڈێهَ کنان.‘
44گیابانا ’شاهدیئے تَمبو‘#7:44 شاهدیئے تَمبو، گِدانے اَت که بنی اِسراییلیان موسّائے زمانگا گۆن هُدائے هُکما جۆڑێنتگ‌اَت و همۆدا هُدااِش پرستش کرتگ. مئے پت و پیرُکان گۆن اَت و هما پئیما اَڈّ کنگ بوتگ‌اَت که هُدایا موسّا سۆج داتگ‌اَت، بزان هما نمونهئے ڈئولا که آییا دیستگ‌اَت. 45اے هما تَمبو اَت که مئے پیرێنان چه وتی بُنپیرُکان رَستگ‌اَت و یوشائے کماشی و سرۆکیا، مئے پت و پیرُکان گۆن وت هما وهدا آورت که اے مُلکِش گپت و هُدایا آ دگه کئوم آیانی چمّانی دێما گلّێنتنت و تان داوودئے وهدا، آ تَمبو همے مُلکا اَت. 46داوودا، هُدائے وشّێن واهگ و رهمت گۆن اَت و لۆٹتی په آکوبئے هُدایا جاگه و هنکێنے اَڈّ بکنت، 47بله اے سُلئیمان اَت که په هُدایا لۆگے اَڈّی کرت. 48البت، بُرزێن اَرشئے هُدا بنی‌آدمئے اَڈّ کرتگێن لۆگان جاگهَ نکنت، اَنچُش که نبیا گوَشتگ: 49’هُداوندَ گوَشیت:
”آسمان منی تَهت اِنت و
زمین منی پادانی چێرئے پَدَگ،
شما په من چِه پئیمێن لۆگے اَڈّ کرتَ کنێت
یا که منی آرامجاه کجا بیت؟
50اے سجّهێن منی وتی دستئے اَڈّ کرتگێن نه‌اَنت؟“‘ #7:50 اِشئیا نبیئے کتاب 66:2.
اِسْتیپانئے گُڈّی هبر
51او سَرکش و مانمئیاتکێن#7:51 مانمئیاتک، بزان هما که کَسّا نمَنّیت. مردمان! شمئے دل و گۆش سُنّت کنگ نبوتگ‌اَنت.#7:51 اِدا سُنّت کنگئے مانا روهانی اِنت، بزان په آ مردمان کارمرز کنگَ بیت که هُدائے هبرانَ نزورنت. وتی پت و پیرێنانی ڈئولا، شما هم مُدام هُدائے پاکێن روهئے هِلاپا اۆشتێت. 52کجام پئیگمبر شمئے پت و پیرێنان آزار نداتگ؟ شمئے پت و پیرێنان تنتنا هما پئیگمبر هم کُشتنت که آیان آ ’پاک و نێکێنئے‘ آیگئے پێشگۆیی کرتگ‌اَت. نون شما آییئے جندئے دْرۆهۆک#7:52 درۆهۆک، بزان هما که وتی همراها رَدَ دنت و بها کنت. و هۆنیگ اێت. 53شما هما اێت که پرێشتگان په شما شَریَت آورت، بله هچبر نمَنِّت و شَریَتئے سرا کارۆ نکرت.“
اِسْتیپانئے سِنگسار کنگ
54گۆن اِسْتیپانئے هبرانی اِشکنگا، آ سکّ زهر گپتنت و په آییا دنتان گَدرۆشگا لگّتنت. 55بله اِسْتیپانا، که چه هُدائے پاکێن روها سررێچ اَت، آسمانئے نێمگا چارت، گۆن هُدائے شان و شئوکتے گِندگا، ایسّایی دیست که هُدائے راستێن نێمگا اۆشتاتگ. 56گوَشتی: ”آسمانا پَچ گِندگا آن و انسانئے چُکّ،#7:56 دانیال نبیا اے پِرنام په یکّ هَستیێا کار بستگ که آ چه آسمانا کئیت. ایسّا مَسیها اے پِرنام په وت زرتگ تان مردم بزاننت که آ چه آسمانا آتکگ و هما واده داتگێن مَسیه اِنت. هُدائے راستێن نێمگا اۆشتاتگ.“ 57آیان گۆن اے هبرانی اِشکنگا، وتی گۆش بند کرتنت و کوکّارِش کرت. رَندا، سجّهێن همشئور بوتنت و اِسْتیپانئے سرا هَمله و اُرُشِش#7:57 اُرُش، بزان هَمله. برت. 58کَشّان کنان، چه شهرا ڈنّ، در کرت و سِنگسار کنگِش بِندات کرت. هما مردمان که آییئے سرا درۆگێن شاهدی داتگ‌اَت، وتی شال و کباه#7:58 کباه، بزان جُبّه چه گوَرا در کرت و شاوول نامێن مردێئے کِرّا اێر کرتنت. 59هما وهدا که اِسْتیپانا سِنگسار کنگا اَتنت، اِسْتیپان دْوا کنانا گوَشگا اَت: ”او هُداوندێن ایسّا! په منی نَدریگێن ساهئے زورگا رزامند باتئے.“ 60رَندا، اِسْتیپان کۆنڈان کپت و په بُرزتئواری گوَشتی: ”او هُداوند! اِشان په اے گناها مئیاربار مکن.“ گۆن همے هبرانی گوَشگا، ساهی دات.
נבחרו כעת:
کاسِدانی کار 7: HPKB
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
© 2016-22 Wycliffe Bible Translators, Inc.