Mateo 2
2
Ri achiꞌaꞌ nimalej teq kinojibꞌal xbꞌekitzꞌetaꞌ ri akꞌual Jesús
1Atoq xalex yan ri Jesús pa tinamit Belén chin ri rochꞌulew Judea, chupan teq ri qꞌij atoq ri Herodes okuneq rey chiriꞌ pa Judea xebꞌeqaqa pa tinamit Jerusalén jujun teq achiꞌaꞌ nimalej kinojibꞌal ri epataneq apeꞌ ndel pe ri qꞌij. 2Rejeꞌ kereꞌ xkikꞌutulaꞌ razón: ¿Apeꞌ kꞌo wi ri ki-Rey#Lc. 1:31-33 ri israelitas ri xalex? Porque roj kelaꞌ apeꞌ ndel pe ri qꞌij qatzꞌeton pe chikaj ri chꞌumil#Nm. 24:17 ri ndiqꞌalajrisan chi xalex, y roj pataneq chin nduqayaꞌ ruqꞌij.
3Atoq xrakꞌaxaj ri rey Herodes ri ndikibꞌilaꞌ ri achiꞌaꞌ riꞌ, itzel xunaꞌ chare, y konojel ri aj Jerusalén xkixibꞌij kiꞌ rikꞌin ri xtubꞌen ri Herodes. 4Ri rey Herodes xerumal konojel ri sacerdotes israelitas más kꞌo ruchuqꞌaꞌ kitzij, y chuqaꞌ ri tijonelaꞌ chin ri ley xyoꞌox chare ri Moisés, y xukꞌutuj razón chake apeꞌ ndalex wi ri Jun ri nditaq pe roma ri Dios chukolik ri rutinamit. 5Rejeꞌ xkibꞌij chare: Ndalex pa tinamit Belén#Jn. 7:42 chin ri rochꞌulew Judea, porque keriꞌ tzꞌibꞌan kan roma ri ru-profeta ri Dios:
6Rat tinamit Belén, ri ratkꞌo pa rochꞌulew chin ri Judá,
Maske rat wíta ok
Chikikajal ri chꞌaqa chik tinamit chin ri Judá, kin nimalej aqꞌij,
Porque chikikajal ri awinaq ndalex jun Ukꞌuey Bꞌey,#Mi. 5:2
Ri ndiyuqꞌun richin ri nutinamit Israel.
Keriꞌ tzꞌibꞌan kan.
7Atoq ruyon kꞌo ri rey Herodes, xeroyoj chilaqꞌel ri achiꞌaꞌ nimalej teq kinojibꞌal, chin xretamaj utz-utz ri qꞌij atoq ri chꞌumil xukꞌut riꞌ chikiwech. 8Kꞌateriꞌ xeruteq pa tinamit Belén y xubꞌij e chake: Kixbꞌiyin, tiwetamaj ri janipeꞌ ngixtiker ndiwetamaj pa ruwiꞌ ri akꞌual, y atoq xtiwil, tuꞌibꞌij chuwa, chin keriꞌ riyin ngibꞌa chuqaꞌ chin neyaꞌ ruqꞌij.
9Atoq ri achiꞌaꞌ riꞌ xkakꞌaxaj yan ri xubꞌij ri rey, xkitzꞌen chik bꞌey, y kꞌateꞌ ruwech xkitzꞌet chi bꞌaneq chik chikiwech ri chꞌumil kitzꞌeton pe apeꞌ ndel pe ri qꞌij, y xbꞌepeꞌeꞌ chikaj pa ruwiꞌ ri lugar apeꞌ kꞌo ri akꞌual. 10Atoq xkitzꞌet chi xbꞌepeꞌeꞌ ri chꞌumil, santienta xkikot ri kánima. 11Y atoq xebꞌeqaqa apeꞌ kꞌo ri akꞌual, xeꞌok apu pa achoch, y xkitzꞌet ri chꞌuti akꞌual rikꞌin ri María ri ruteꞌ. Xexukeꞌ qa y xkiqasaj kijolon pa ulew chin xkiyaꞌ ruqꞌij ri akꞌual. Xekijeq ri yakbꞌel apeꞌ ekikꞌuan apu kibꞌeyomal, y xkisipaj kan qꞌanapueq, pon y mirra chare. 12Y atoq xbꞌanatej yan reꞌ, xqꞌalajrisex pa achikꞌ chake chi ma ketzolij apeꞌ kꞌo ri Herodes, y romariꞌ xkitzꞌen e jun chik bꞌey, xetzolij pa kirochꞌulew.
Ri José, ri María y ri Jesús ngeꞌanimej y ngebꞌa pa rochꞌulew Egipto
13Atoq xebꞌa yan ri achiꞌaꞌ nimalej kinojibꞌal, jun ru-ángel ri Ajaw xuqꞌalajrisaj riꞌ pa rachikꞌ ri José, y kereꞌ xubꞌij chare: Kayakatej, takꞌuaj ri chꞌuti akꞌual y ri ruteꞌ y kixanimej. Kixbꞌiyin pa rochꞌulew Egipto, y kixkꞌojeꞌ chiriꞌ hasta kꞌa xtinbꞌij na chawa, porque ri rey Herodes yaméra nduteq rukanoxik ri akꞌual chin ndukamisaj.
14Ja atoq riꞌ ri José xyakatej paqiꞌ, y keriꞌ chaqꞌaꞌ, xerukꞌuaj ri chꞌuti akꞌual y ri teꞌej, y xebꞌa pa rochꞌulew Egipto. 15Y chiriꞌ xekꞌojeꞌ, kꞌa xken na ri Herodes. Kꞌajariꞌ xeꞌel pe pa Egipto, chin keriꞌ xbꞌanatej ri ruqꞌalajrisan ri Ajaw ojer kan chuwech ri profeta ri xubꞌij: Pa rochꞌulew Egipto xinwoyoj pe ri Nukꞌajol.#Ex. 4:22, 23; Os. 11:1 Keriꞌ tzꞌibꞌan kan.
Ri Herodes xubꞌen mandar chi kekamisex ri chꞌuteq akꞌolaꞌ
16Atoq ri Herodes xuyaꞌ cuenta chare chi xchꞌakatix kan koma ri achiꞌaꞌ nimalej kinojibꞌal, santienta royowal xyakatej. Romariꞌ, xubꞌen mandar chi kekamisex konojel ri chꞌuteq kꞌajolaꞌ nditzꞌukutej e kikꞌin ri kꞌaja ok xeꞌalex hasta ri kꞌo chik kaꞌiꞌ kijunaꞌ pa tinamit Belén, y ri pa chꞌaqa chik tinamit ri ekꞌo chunaqaj. Keriꞌ xubꞌen mandar ri Herodes, porque xretamaj kan pa kichiꞌ ri achiꞌaꞌ nimalej teq kinojibꞌal ri janipeꞌ tiempo kitzꞌeton pe ri chꞌumil. 17Y keriꞌ xbꞌanatej ri ruqꞌalajrisan kan ri profeta Jeremías ojer, atoq kereꞌ xubꞌij:
18Xakꞌaxex pa tinamit Ramá jun nimalej sikꞌinik,
Oqꞌej y nimalej bꞌis.
Ja ri Raquel ngeroqꞌej ri chꞌuteq ral,
Y ma ndirajoꞌ ta ndibꞌochiꞌix ránima.
Porque ma ekꞌes chi ta ri chꞌuteq ral.#Jer. 31:15
Ri José, ri María y ri Jesús ngebꞌekꞌojeꞌ pa tinamit Nazaret
19Atoq xken yan ri Herodes, jun ángel chin ri Ajaw xuqꞌalajrisaj riꞌ pa rachikꞌ ri José chiriꞌ pa rochꞌulew Egipto. 20Y xubꞌij chare: Kayakatej, takꞌuaj ri akꞌual y ri ruteꞌ y katzolij pa rochꞌulew Israel, roma xeken yan ri xekanon rukamik ri chꞌuti alaꞌ.
21Y keriꞌ kꞌa, xyakatej ri José, xerukꞌuaj ri akꞌual y ri teꞌej, y xetzolij pa rochꞌulew Israel. 22Pero atoq ri José xrakꞌaxaj chi pa rukꞌexel ri Herodes, ja ri rukꞌajol rubꞌiniꞌan Arquelao ndibꞌanun reinar pa kiwiꞌ ri aj rochꞌulew Judea, ri José xuxibꞌij riꞌ chin ndibꞌa chiriꞌ, y pa jun achikꞌ xbꞌix chare roma ri Dios chi tibꞌa pa rochꞌulew Galilea. 23Y atoq xebꞌeqaqa chiriꞌ, xebꞌekꞌojeꞌ pa jun tinamit rubꞌiniꞌan Nazaret, chin keriꞌ xbꞌanatej ri bꞌiꞌin kan koma ri ru-profetas ri Dios, atoq xkibꞌij: Ri akꞌual ndibꞌix aj Nazaret#Mr. 1:24 chare.
© 2015, Wycliffe Bible Translators, Inc. All rights reserved.