KANTHOUNA 1
1
Tlaipang Waiyounei: Dunpuei Hutsarap
1 #
Jn 1.1. Tlaipang waiyoutirnung Dunpune lamkrini Thangmun heirou Shimlei sheemthutkhou. 2Kheen heinungri tlaipangpalri koukhi shakrungkhi naimakni louklei, heitoubi kmehni yui'nlaak doura mkhubphopbine louklei. Heirou Dunpuei Lhawaini yui'nlaak doura kanchekchakhou.
3Heirouri Dunpune shun, “Kwaar allaksu,” heirouri kwaar yuk'alkur. 4Heirouri Dunpune kwaar heiri lhangaime touri muwurla; heitoubi Dunpune kwaar heiri kmeh'rouwei khaithutpikur. 5Heirou Dunpune kwaar heiya Tlaini, heirou kmehya Ane Masa toubi min thulkur. Heisitoubi rawai khatle ningshun khat heiwani lamkri tlainikhat hoikur.
6Heirouri Dunpune shun, “Nungthou'le Samadru heiri lailaini hoilakasu; heitoubi yui nlaakle yui'nlaak heikhi lailaini khailakasu.” 7Heisitoubi Dunpune nungthouya sheemkur, heirou nungthou daakrei klei yui nlaakle nungthourei yuile lailaini khaithutbi heisibil hoiyerkur. 8Heirou Dunpune nungthouya Thangwan toubi min thulkur. Heisitoubi rawaile ningshun touri masale nunghang khat hoiyerwurbi khnini'tlung tlaini hoikur.
9Heithangrou Dunpune shun, “Nungthou daakrei klei yui namma heiri bi khatra kallonglakasu, heirou thlei taarnakhi laini hoilakasu,” heirouri kyun heinakrimni hoikur. 10Heirouri Dunpune taarnabi heiya Thleidou toubi min thulkur; heirouri Dunpune heiya thinarouri lhangaiyurame toubi muwurla. 11Heirouri Dunpune shun, “Thleidoura louhtrung-ramtrungkhi katpuklakasu, heitoubi limlimei heengpar-ramparkhi heirou heikhei heengtrung-rotrungkhi heirou trunwai trungkhi limlim katpuklakasu,” heirouri kyun heinakrimni hunghoikur. 12Heisitoubi tlaipangpal heiri heengna-ronani mar'emyerkur, heengpar-rampar limlim, heenghei-rohei limlimei heengtrung-rotrungni bilthimkur; heirouri Dunpuei mit'thrilnara lhangaiyurame toubi muwurla. 13Heirouri rawai khatle ningshun khat hoiyurbi, khyumni tlung tlaini hoikur.
14Heirou Dunpune shun, “Thangwanrei wanshangra kwaar yuk'allaksu, heitoubi masa-nunghang khainei hutlha khoini, Kinni, tangla, heirou kum'chaankhi yuktamlakasu. 15Heirou nungthourei kwaar heini yuk'albine tlaipangra yukwaarlaksu,” heirouri shunkur heinakrimni hoiyura. 16Heirouri Dunpune kwaar tang khintam sheempikur, alduiyei kwaar Kinni heiri nunghangnang pu khoini warnungei, heirou wardupbei kwaar heini masanang warnungei, heile kalhonni Ane sorwa rapkhi sheemkur. 17Heitoubi heirapya Dunpune Thangwanyei wanshangra bi chani khoupibi tlaipangra yukwaaryerkur. 18Heirou nunghangnang pu khoini warnungei, heirou masanangkhi pu khoini warnungei, heirou kmehrei kwaar khaithutnanungei toubine hoiyerwurla; heirouri Dunpune heirapya thibi lhangaiyurame toubi muwurla. 19Heisitoubi rawai khatle ningshun khat heiri phalini tlung tlaini hoikur.
Phanganirou Yoolim-Waalim Sheemkur
20Heirouri Dunpune shun, “Yuirillani heiyei lhawaipal chiwi rapne thimlakasu, heirou nungthourani yoo-waa rapne traichabi thimlakasu.” 21Heisitoubi Dunpune samadru rillei thangatang heirou thangalim deideikhi sheempibi leiyerkur; heitoubi waa limkhi mshing tlungni sheempikur, heirapri Dunpune thinarou lhangaiyurame toubi muwurla. 22Heirou Dunpune yaya phor pibi kyun, “Lungpun hoiniyasu, heitoubi mshingkhi chungduilakasu; heirou samadru thimni karyoulakasu, heirou yoo-waa rapne thleidou thimlakasu.” 23Heirou rawai khatle ningshun khat hoiyurbi phangani tlung tlaini hoikur.
Thruknirou Yaalim-Yoolim Sheemkur
24Heirouri Dunpune shun, “Tlaipangdou arou yaalim-yoolim namma tlungni leilakasu,” heirou ui-waa limlim, frul limlim heirou ramyaa limkhi tlungni leilakasu; heisitoubi shunkur hilthungni namma hungthukkur. 25Heisitoubi Dunpune ramyaa limlim sheempikur, heirou cheemrei kyuk ui-waakhi limlim sheempikur, heirou ukni tulcha frul limlimkhi sheempikur; heirou sheemthutkur namma heiri Dunpuei mit'thrilnara lhangaiyurame toubi muwurla.
Tlaipang Thimiya Sheemkur
26 #
Kan 5.1; Mt 19.4; Mk 10.6; Col 3.10; Jas 3.9. Heirou Dunpune shun, “Kane kaiyei shakrungya loubine, kaiyei runglhahak kmalni tlaipang thimi sheemthutdase, heitoubi yani yuirei klei chiwi rapya heirou nungthourei traicha ramwaa, heirou ui-waa, ramyaa heirou ukni tulcha chiwi rapbei doura heirou tlaipangpallei doura pu khoini paallakasu.” 27Heisitoubi Dunpune Aiyei runglhaya loubine tlaipang thimi sheemthutkur, heirou Aiyei runglhara Ane yaya, napawa heirou napuiya sheempikur. 28Heitoubi Dunpune yaya phor pibine kyun, “Lungpunbi yu-cha pungduilaksu; heitoubi tlaipangpal karyouni paalbine, samadruei thanga'lim, nungthourei traicha ramwaa rapbei dourakhi, heirou thleidou karyouni ringbi klei chiwirap nammaei dourakhi pu khoini paallakasu.” 29Heirouri Dunpune shun, “Thilak, tlaipang thleidourei pukbi klei heengtrung-rotrungrap, heenghei-roheirap, anna-louna namma heiri nanungei silnawurla; heirou heirapya naiyei murchaknungei hoiyerwurla. 30Heitoubi tlaipangpalra ringbi klei ramyaa kantangnungei, ukni tulcha chiwi lim kantangnungei heirou nungthourei traichabi klei yoolim-waalim kantangnungkhi yaiyei shainung heengna-rona, heirou chanungei heenghei-rohei limlimkhi Keine piwurla,” heirou shunthutkur heinakrimni hoiyura. 31Heisitoubi Dunpune sheemthutpikur Aiyei hutsarap namyerwa heiri Ane thinarouri beimakni lhangaiyura touri muwurla. Heisitoubi rawai khatle ningshun khat heiri thrukni tlung tlaini hoikur.
נבחרו כעת:
KANTHOUNA 1: MARIBSI
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.