LUK 12
12
Kerokon Kehünyu Genyu Petsülo Mvulo Keshvu
(Mt 10:26-27)
1Lo tsükatsü temi yie yie le gü kequen kelo ka temi chonri kela genyu khinyunyu kedü sola. Tsontsin a-le keritsin thyüo senthyükelonyu ju ka, “Hagun Farisinyu kebu gü genyu petsülo, tsüdan tsüle kerokon kehünyu le. 2Ai thame pe me tesha loho letseo nyenhen kenjü nme-e ndi, lo meno shamvu letseo kebu kenjü ndi le. 3Tsügenyu hagun le kezün ki zokeshü tsü meno keben ki tsü shati; lo hagun le kanyuki tha zo pe me nyetin nyu keshü tsü, tsüle kasoki chwiryü ti.
Nshvu Kezü Gü
(Mt 10:28-31)
4“Lo ale hagun apvünyu juka zoshü ti, hagun min dushvulae tsünyeki thame thyüsinlo keho gü tsü nshvu nya nye. 5Ai hagun le segü nshvu mvulo shvuyo le, ale tsü zope hagun hishü ti le. Hagun boshvu kela siki-e hagun shwen pe Gehena nyu shüla lo kegwa kekvu le kebin gü, tsügü nshvulo nye. Ketsin ale hagun ka zoshü ti, A-nshvulo!
6“Rinyu pvün pe pisa kenyhun hei hümvu ole? Tson yatse ai Sunggigü mhundyü ka we tsühontse kethyü nme-e nmhinla hümvu. 7Tsüntimvule hagun pehü aphu swülo laso. Nshvu nya chi; hagun le rinyu kechon nyeki a-min tsen kvu!
Temi Mhundyü Nyu Khrista Zankezo Lo Keni Kela
(Mt 10:32-33; 12:32; 10:19-20)
8“Ale hagun ka zoshü ti, temi lihigüe temi kehyu ka azan pe zo yatselo Temi Nyugü ko Sunggigü lokethyünyu mhundyü ka a-zan pe zoti. 9Ai temi lihigüe temi mhundyü ka azan pe zomvu yatselo, Sunggigü lokethyü nyu mhundyü ka tsünyu zan pe zo loho.
10“Lo temi lihigüe Temi Nyugü shwinyü kemvu genyu jo gwakemvu zo-e jü pe tsüti; ai temi lihigüe Kenshün Kapu nkhin lo jü pe tsünyu tsü loho.
11“Lo mele hagun ten zen-o sinagog ka nyu lo kedanyu lo me sogon kehünyu mhundyü nyu gun kelo ka hagun le dihontse tha zo tiyo, nmvue nyu zo tiyo? tson kethyü rüchün pe hagun nyun kenjün thyü nya chi. 12Kechamvule Kenshün Kapu gü le a-npvü tsügwünkho ka tsü hagun no zoshü kezü gü pe hagun tsüshü nrün genyu.”
Tha Rüchün Kemvugü Rüla Jokejvü
13Tsüselo temi dan nyu temi nme le a-ka zo-o, “Senkethyü gü, nle atsa no ayi kenya gü tsü kenjün lola lotse zoshülo.”
14Ai a-le temi tsügü ka tsü, “Temi segü le athyü pe ano jokekera gü nmvue tha kenkenjün gü thyü shüla?” 15Tson-o a-le anyugun ka, “Hagun petsülo nye, lo tha ketepen aphu ka hagun kekhenilo nye. Kechamvule temi keyhun hile a-kenya kechon le kebin genyue binlo hü kemvu genyu.”
16Tsüselo a-le jokejvü nme anyugun kazo, “Kenyanyu nme le a-low nyu a-tho le kechonki nshalo. 17Tsüselo a-le a-npvü a-nthon-o, ‘Ashye hi pvü ryüo tha nme kae keshü bin ndila so; ale nyu tsethyü tise yo?’ 18Tson tseo a-le,‘Higü hithyü tiso, a süsen tsürholo njüo thyü pe keda thyülo ti; tson-o ashye lo ahon aphu pe tsünyu shülo ti.’ 19Tson-o ale a kapu gü ka, ‘A kapu, nle binthon salo kegwa tha aphu kequen lo laso; thame thyü kenjünthyü nyao bwen-o tyü lo tsü tseo ketegvü binlo.’ 20Tson bin laryü, Sunggigü le a-ka, ‘Hire, tha rüchün hü kemvu gü, ntsoje nge n kapu zenlo la tiso; tson yatselo a-le tha kequen kenjü tsü le segü hon thyü tila?’ ”
21Lo Jisu le jo kenkhin zo-o,“Temi lihigüe Sunggigü kipon tha kenya rüchün mvuo a-npvü a-hon nti kequen kehünyu le tsühontse ti.”
Sunggigü Ketenyen
(Mt 6:25-34)
22Tson-o a-le senthyükelo nyu ka, “Tsügenyu ale hagun ka zoshü ti, hagun le ntso ntsenyü keyhun ka rüla genyu nmvue hagun min genyu phinya rüla dan rüchün pe hagun nyun kenjünthyü nya chi. 23Kechamvule hagun keyhun hile hagun ketyüketsü nyeki gwakvu, lo hagun min-e hagun phinya nyeki gwakvu kethyü genyu. 24Hagun le tegü dan rüla rüchün shü chi; anyugun le ntsin sen tsügü shü hü mvu; lo gvüe hümvu, lo tsüdan le thakhin nmvue süsen-e ndi; ai Sunggigü le tsüdan gin-e thyüshü kehü le. Hagun le tegü tsüdan nyeki gwakvu! 25Ai hagun segü le tsügenyu a-nyun kenjünthyüo, a-keyhun jon tsu me-e thyü pe thonlo gwa tila? 26Lo hagun le tha keshanyu tsühontse kethyüe thyü loho yatselo, nyu thyüo tha kecha rüla rüchün pe hagun nyun kenjün thyü hü nla? 27Tegvütyü kepun rüla rüchün shü shwilo. Tsüle yhunso keryü ka thame thyü hümvu, nmvue kedokezün thyühü mvu; ai ale hagun ka zoshü ti, Solomon a-ronye gwasa kethyü gü tsüe tsüdan hontse a-nthyü lomvu. 28Ai low nyu nthu yhun bin-o senduki khipe mah phun nyu shüla nrün gü tsüe, Sunggigü le tsünyu ronye-e thyüshü hü yatselo. Hire, hagun ketenyen kerho dan, a-le tsüdan nyeki hagun ronye nthyü ngwakvu shü mvu ti ole?
29“Tsügenyu hagun le nyu tyütsü tiyo tsekethyü tsü fü bin nya, nmvue hagun nyun nkhi bin nya. 30Kazü hinnyu keyhun nyu le tha hidan hi aphu fü bin kehü genyu. Ai hagun no tsü hyulo mvulo keshvu le hagun Pvügü le sha kü bin nyo. 31Tsügü mvule hagun le A-keda kethyü fülo teri chi; tsonlo yatselo tha tsüdan-e khipe hagun tsüsin shüti.”
Tsangge Kenya
(Mt 6:19-21)
32“Temi dan kerho gü, hagun le nshvu khe-e shü nya chi; kechamvule hagun Pvü gü le a-keda khipe hagun tsü titse kethyü tsüle a-kendo kelasi genyu. 33Hagun kenya tsü jwenlo njüo pe me shwi njünla; tson-o hagun le gwamvula hü kemvu tsangge hagun kenya kequenlo chi. Tsüki we kerühunyue gü tilo hümvu, nmvue tsemü nyun-e tyü kemhüla hümvu. 34Kechamvule hagun kenya le kebin bin ki hagun nyun-e tsüki bin kehü genyu.
Khwenkebin Gogü
35“Hagun le hagun senphin pvü binlo, lo hagun mah kenben-e no ben binlo; 36lo hagun le mele anyugun npugü le sunkethyü keho nyu ryü lotse khwen bin kehü hontse a-le ryüo kakhin kekhoshü yatselo, whütse gü kakhin shye pe a-tsü keshünyu hontse binlo. 37A-npugü le keryü ka a-khwen bin-o hyukelonyu tsünyu nyeki a-phou kengvü ndi so. Ale hagun ka zo tsentsü shüti, a-le a-npvü a-senphin pvülo-o tsüdan no bin-o hoti, lo a-le ryüo tha rape anyugun tsüti. 38Lo rikhun kelu kenyhun gü ka metse, nmvue kenshen gü ka anyugun le tsühontse bin-o hyulo yatselo tsünyu phou kengvü tsin. 39Ai hagun rüchünlo, kerühunyu le nyu gwünkho ka ryü tiyo tsekethyü ka npugü le tsü sha bin yatselo meno a-hon rhenla loho. 40Tsügenyu hagun ko ndo binlo; kechamvule hagun le hagun dun thyü kebin ka Temi Nyugü le ryü la nrün genyu.”
Go Keseri Nmvue Serikemvu Gü
(Mt 24:45-51)
41Tsüselo Pitor le zo, “A Npugü, nle jokejvü kezo higü hile agun genyu nti le, temi aphu genyu sin-o zoshü la?”
42Tsontsin Npugü le, “Segü le joketsin kezo go lo a-dokegwa nyu thyü bin-o a-npunyu no a-khipe a-ka nyu keda thyüo a-gwünkho ka tha khipe anyugun tsülo tila? 43A-Npugü keryü ka tsühontse thyü bin-o hyulo nrün go tsügü le a-phou kengvü tsin. 44Ale hagun ka zo tsentsü shüti, a-le temi tsünyu no a-hon aphu so keda thyü ti. 45Ai go, a-npvü a-nyunki, ‘A npugü le ryü ntsü ti,’ tson-o go kecha peche-e tenue vü, lo kenzeü nyu zen-o tyütsü nzeü tinla yatselo; 46go tsügü npugü le a-le rüchün mvu kebin nyü lo a-le shamvu kebin tegi kevüja nme ka ryüo a-duthü durü lao pe tenyen kemvunyu dan nyu shü lati.
47“Tson-o a-npugü kendo sha bin-e thyü hü kemvu go gü we vü chon ti; ai shamvuo meno a-vü kehü gü we vü rho ti. 48Tsüntimvule khipe tsü chon keshünyu ka hyu chonlo mvuloshvu; lo lihigüe mele tha pe ntsü chon shülo, tsünyu ka mele hi chonti.
Kepvükhola Nrün
(Mt 10:34-36)
49“Ale mah khipe kazü hinyu shü titse nryü; lo ntsoka nnyü chwiryü kela we akenyü kvuti. 50Ai ale baptism nme pe baptaiz thyülo mvuloshvu bin nyo; lo tsü thyü penlo kemvuthen anyun nkhi rilo laso. 51Hagun ale kengükegwa pe kazü nyu shü titse ryü letse kethyü rüchün bin le? Ale hagun ka zoshü ti; tson mvu, ai me pvükhoshü nrün genyu le. 52Kechamvule ntsoka gerho nyu ka nme nyu mipvün le bin-e kepvükhola ti; mishen le mihvu shwinyü mvu, nmvue mihvu le mishen shwinyü mvu lati. 53A-pvü le a-nyu shwinyü mvu lo a-nyuko a-pvü shwinyümvu, a-jvü le a-nyugi shwinyü mvu, lo a-nyugi ko a-jvü shwinyü mvu, a-nyugi le a-mogi shwinyümvu, lo a-mogi le a-nyugi shwinyümvu; tson-o tsüdan npvüe kepvükho lati.”
Gwünkho Sha Kekhokelo
(Mt 16:2-3)
54Jisu le temi dan ka zo sin-o, “Yhüko keche kipon khelukesü le ryülo, hagun le tsangkenbu terhi thyü ryüti tse hünyo; lo tson hü ketsin. 55Lo hagun le tesinzin kipon tsangnbu keryü hyu yatselo, Tsang nyen sa tiso, tson kethyü zo hü, lo tson hü ketsin. 56Hire, Kerokon kehü dan, hagun le tsang lo kazü mhun kegwa keshvu we sha kekholo hünyo; ai hagun le ntso ntsenyü rüla hi we le shalo hümvu kethyü hile nyuthyüo hon la?
Nzen Kenyon Kebingü Zen-o Jopenla
(Mt 5:25-26)
57“ Lo nyuthyüo hagun le hagun npvü hagun nyuki kenjü gü shalo hümvu la? 58Tson-o nzen kenyon kebin gü le nzen-o jokera kehü gü ki gun kejü ka a-zen-o tsonne nyu kehü ka n yhenthyüo kenjü thyü whütsela; tson mvu yatselo nsü zen-o jokera kehü gü ki gunla ti; lo jokera kehü gü le nkhi pe polis ben nyu shü lati, lo polis le nten pe doka nyu shü lati. 59Ale nka zoshü tile, nle gü pisa nme-e thobulo kemvuthen thame thyüo tsünyu chwiryü keloi kemvu.”
נבחרו כעת:
LUK 12: REGSBSI
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.