San Mateo 5
5
Jesús oñemoñe'ẽ peteĩ cerro ári guive
1Ohechávo Jesús pe genteta, ojupi cérrope ha oguapy. Upéramo hemimbo'e kuéra oñembyaty ijerekuévo, 2ha Jesús oñepyrũ ombo'e ichupe kuéra, kóicha:
Umi ovy'a va'erãva
3--Ovy'a vaerã umi ohechakuaáva iporiahuha ijespíritupe, imba'e kuéra rehe pe yvága pegua reino.
4‘Ovy'a vaerã umi imba'embyasýva, Tupã Ñandejára voi ombopy'aguapy vaerã rehe ichupe kuéra.
5‘Ovy'a vaerã umi ijejapo'ỹva, imba'e kuéra vaerã rehe ko yvy.
6‘Ovy'a vaerã umi ipy'a ñembyahýiva ha ijyuhéiva teko marangatu rehe, ha'e kuéra hyvatã vaerã rehe.
7‘Ovy'a vaerã umi py'aporiahuverekóva, ojeporiahuvereko vaerã rehe ichupe kuéra.
8‘Ovy'a vaerã umi icorazõ potĩva, ha'e kuéra ohecha vaerã rehe Tupã Ñandejárape.
9‘Ovy'a vaerã umi oporomoingo porãva, oñembohéra vaerã rehe ichupe kuéra Tupã Ñandejára ra'y.
10‘Ovy'a vaerã umi ohasa asýva, ojeperseguíva pe hekopetegua rehehápe, imba'e kuéra rehe pe yvága pegua reino.
11‘Pevy'a vaerã pejeja'o ha pejepersegui ha oje'e rei ramo pende rehe opa mba'e vai che rehehápe. 12Pevy'áke ha pende rorýke, oñeme'ẽ va'erãha rehe peẽme premio tuicháva yvágape; upéicha avei ojepersegui va'ekue umi ñemoñe'ẽhára pene mboyve guare.
Jukýicha ha tesape háicha yvy ári
13‘Peẽko jukýicha ko yvy ári. Pe juky oñembo'ay ramo ¿pa mba'épe oñemohe'ẽ jevýne? Naiporãvéima mba'everã; oñemombo ha oñepyrũ haguã hese mante.
14‘Peẽko tesapeha ko yvy ári. Peteĩ ciudad oĩva cerro ári ndaikatúi oñemi. 15Noñemyendýi lámpara oñemoĩ haguã mba'yru guýpe, oñemoĩ yvate uvei, ohesape haguã umi ogayguápe. 16Upéicha avei tapehesape peẽ yvypóra renondépe, ohecha haguã pe pene rembiapo porãngue, ha tomomba'eguasu pende Rúpe oĩva yvágape.
Jesús oporombo'e Moisés ley rehe
17‘Aníke peimo'ã che aju hague amboyke haguã pe Moisés ley terã umi ñemoñe'ẽhára ombo'e va'ekue; che ndajúi amboykévo, ajapopa haguã hekópente uvei. 18Añete ha'e peẽme, ohasa mboyve pe yvága ha pe yvy, ndojepe'a mo'ãiha mba'evete, peteĩ punto terã peteĩ letra sa'imi jepe pe léygui, oikopa peve hekópe. 19Upéva rehe upe omboykéva pe Ñandejára rembiapoukapy michĩvéva jepe ha oporombo'éva upéicha ojejapo haguã, ojerereko vaerã michĩvéva ramo pe yvága pegua réinope. Upe ojapóva ha oporombo'éva hekópe upéicha ojejapo haguã katu ojerereko vaerã tuicháva ramo pe yvága pegua réinope. 20Che ha'e peẽme na imarangatuvéi ramo pe pende reko umi fariseo ha escriba kuéra rekógui, peẽ ndaikatu mo'ãiha peike pe yvága pegua réinope.
Pochy rehegua
21‘Peẽ peikuaa pe oje'e va'ekue umi yma guarépe: “Ani reporojuka; pe oporojukáva ojejuzga vaerã.” 22Che katu ha'e peẽme, oimeraẽva ipochy vaíva jepe hapicha ndive ojejuzga vaerã. Oime ramo he'íva ñe'ẽ vai hapichápe ojejuzga vaerã concilio renondépe, ha he'i ramo ichupe, “Nde výro” oĩma ho'a haguãicha Aña retã ratápe.
23‘Upéva rehe reru ramo ne remime'ẽmby altárpe ha upépe ne mandu'a ramo nde rapicha ipy'a vaiha nendive, 24eheja pe ne remime'ẽmbýpe altar renondépe, ha tereho nde rapicha rendápe eiko porã jevy raẽ hendive. Upéi katu eju jevy pe altárpe ha eme'ẽ pe ne remime'ẽmby.
25‘Oime ramo ne moguahẽséva juzgádope, eñeha'ã eiko porã jevy hendive tape rehe ani haguã ne me'ẽ juez pópe, ha pe juez ne me'ẽ policíape ha reñemondo cárcelpe. 26Añetehápe ha'e ndéve, neresẽi chéne haguã upégui repagapa peve pe redebéva.
Mendare mongy'a
27‘Peẽ peikuaa va'ekue pe oje'e va'ekue umi yma guarépe: “Ani remongy'a mendare.” 28Che katu ha'e peẽme, oimeraẽva oma'ẽva kuña rehe ha oguerekoséva ichupe, upéva oikóma hendive ipy'apýpe.
29‘Nde resa akatúa ne mbopecáta ramo enohẽ ha emombo mombyry, iporãve oñehundi ramo peteĩ nde rete rehegua ha ani rejeity Aña retãme nde rete reheve oĩ háicha. 30Ha nde po akatúa ramo pe ne mbopecátava katu eikytĩ ha emombo mombyry, iporãve oñehundi ramo peteĩ nde rete rehegua ha ani rejeity Aña retãme nde rete reheve oĩ háicha.
Mendare jueja
31‘Oje'e va'ekue avei: “Oimeraẽva opoíva hembirekógui, ome'ẽ vaerã ichupe mendare jepoi rehegua kuatia.” 32Che katu ha'e peẽme, peteĩ kuimba'e opoi ramo hembirekógui, omuakaratĩ'ỹ rehe ichupe, ombyaiuka ichupe pe imendare, ha pe omendáva pe ipoi pyre rehe, upéva avei ombyai imenda.
Juramento rehegua
33‘Peikuaa avei pe oje'e va'ekue yma guare kuérape: “Ani nderejapoiche pe ere va'ekue Ñandejára renondépe juramento reheve.” 34Che katu ha'e peẽme, ani haguã pejura mba'evéicharamo, ani pejura yvága rehe, upéva Ñandejára trono renda, 35terã yvy rehe, upéva ipy renda, terã Jerusalén rehe, upéva mburuvicha guasu ciudad. 36Ani avei rejura ne akã rehe, ndaikatúigui remomorotĩ terã remohu peteĩ ne akã rague jepe. 37Peje uvei “hẽe”, terã “ahániri”; pemoĩvéva upévape ivaíma.
Venganza rehegua
38‘Peikuaa pe oje'e va'ekue: “Tesa, tesa rekovia, ha tãi, tãi rekovia.” 39Che katu ha'e peẽme: Ani peñemoĩ pe ojapo vaíva rehe; pe ne nupãvape nde rova yke akatúape, emoĩ nde rova yke ambue avei. 40Oime ramo nde rerahaséva juez renondépe oipe'aségui nde hegui ne camisa, eheja togueraha avei nde saco. 41Oime ramo oguerahaukaséva ndéve mba'e pohýi una legua, eraha ichupe dos leguas. 42Pe ojeruréva ndévepe eme'ẽ, ha ani reme'ẽ nde atukupe pe oiporuséva nde heguípe.
Mborayhu enemigo kuéra peguarã
43‘Peikuaa avei pe oje'e va'ekue: “Rehayhu vaerã pe nde rayhúvape ha na nde a'éi vaerã pe nde rayhu'ỹva rehe.” 44Che katu ha'e peẽme: Pehayhu umi ndaija'éivape pende rehe, ha peñembo'e umi pende perseguíva rehe, 45peiko haguã pende Ru yvágape oĩva ra'y ramo: ha'e niko omosẽ ikuarahy iñañáva ha imarangatúva peguarã, ha omongy imarangatúva ha imarangatu'ỹva peguarã. 46Peẽ pehayhu ramo umi pende rayhúvapente, ¿piko mba'e oñembuekoviáta peẽme upéva rehe? ¿Ndojapói piko upéicha avei umi impuesto cobraha kuéra? 47Ha pemomaitei ramo umi pende rehegua kuérapente, ¿piko mba'e oime iporãvéva pejapóva? Umi Tupã Ñandejárape oikuaa'ỹva jepe niko ojapo upéicha. 48Peẽ pende py'aporãiteve vaerã, pe pende Ru yvága pegua ipy'aporã háicha avei.
נבחרו כעת:
San Mateo 5: BNP76
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Guaraní New Testament, Buenas Nuevas para el Paraguay © Paraguayan Bible Society, 1970.