Mataos 23
23
Yesʉs lé ebâm e l'oyeʼle o motie bé e l'oFarizyɛŋ
(Markus 12.37-40; Lʉkas 11.39-52; 20.45-47)
1No ó Yesʉs a ze lwib e ntuntuma bʉr bé e l'ompʉn be ó: 2«É jɔʼ oyeʼle o motie bé e l'oFarizyɛŋ, bé mu lé edwe sikʉlʉ ɨ, bé edi é Dia mo Moyiz, yé abe no? 3Ebe no, saʼ ga mpʉ bé lé elɛɛ bɨn ɨ. Duʼo ga sikʉlʉ yɔɔ yaa. Sa gwar, abaŋa ga yɛɛ bɨsyɛɛla byɔɔ, ebe, bé elɛɛ ó lɛŋɨ, asa. 4Bé ekaʼ mɨmbeʼ modile, gbaŋɔ bʉr mya é mobɛʼ é ziʼrɨ. Sa gwar, bé bʉr o tɨ, bé agwɨm nkɛɛ mye, dam be e dine gwar. 5Bé esa bɨsyɛɛla byɔɔ bibyɛh ó, bʉr beŋɨ be. Ebe no ó bé lé ebœʼ pɔb motie mo Zyɛm yɔɔ#23.5 Pɔb motie mo Zyɛm, yé a be ó ma wolo bé a tiile-tiile é mpom ɨ. Nye a be ó e mɨkol ndwe e mɨtila mɨ Ka Sàa tɨ. ɛ, le ejyɛɛle mozeʼle lé ezyɛmla si é mɨkan myɔɔ ɛ. 6Bé nteme, bé ekpɛl-kpɛl ó, njɨ mɨmpaŋ bɨdia bɨ dolo, gumo bé lé ede dina ɛ, le bɨdia bɨ efoʼ é mompah mɨnjwɨʼla. 7Bé ekpɛl nteme ó, bʉr taara soho be, le edwiibɨ be é mobɨm bɨnkana, lé ejebe-jebe be ó, “Yeʼle”. 8Mʉr ngwar é l'esama lɨn l'anyamle bir ba ó, bé jeba nye “Yeʼle”, ebe, yeʼle win, nye ó ngwar! Bɨn bɨbɛh, bé ó obɨɔ e l'obɨɔ. 9Ajebe ga nteme nuu mʉr ndɨ é si nwaʼ ó, “Sɔŋ wam”, ebe, sɔŋ win, nye ó ngwar, njɨ waa ndɨ é jobo kʉ ɨ! 10Abir ga ó, bé jeba bɨn “oyeʼle”, ebe, yeʼle win, nye ó njɨ ngwar: Lœma mulo mo Zyɛm! 11Mʉr lé elaa bʉʉ é mpwaʼ nkʉŋ ɨ, nye ejala le ebe bɨn syɛl mosa. 12Mʉr lé enkɛɛ nyʉl ɨ, nye ófilɔ si; waa lé efil nyʉl si ɨ, nye óbɨnɔ kʉ.
13«A vwaʼ e bɨn, oyeʼle o motie e l'oFarizyɛŋ! Bɨn baanya-bɨkʉʉŋʉ ba, bɨn bé ela bʉr zi lé eto gumo jwɨ̀ʼa mo Da ndɨ ɨ. Bɨn bʉr o tɨ, bɨn bé ajyɛl é zi waa. Bɨn bé adwe nteme bʉr o lé esaa ecwɨɨ tɨʼ ɨ, zi. [14A vwaʼ e bɨn, oyeʼle o motie e l'oFarizyɛŋ! Bɨn baanya-bɨkʉʉŋʉ, bɨn bé esà mɨkuho, nʉa bɨsa bibyɛh myé ndɨ eliʼ e tɨʼ ɨ. Bɨn bé ejwɨʼla-jwɨʼla nteme e Zyɛm ó, bul mokan, lé esa lɛʼla. Ebe no ó bɨn bé óbul dweŋɔ mobe le ekabɔ bɨntɨʼa.]
15«A vwaʼ e bɨn, oyeʼle o motie e l'oFarizyɛŋ! Bɨn baanya-bɨkʉʉŋʉ, bɨn bé entaa maŋ, ntaa é si nwaʼ nyiwɛh, bɨn nkʉʼ niŋle dam be mʉr ngwar é buʼo yin. To kœb ó, é jɔʼ mʉr waa mu si ni é nkɔm win ɨ, bɨn bɨ liŋ nye mʉr lé ejala e Bɨ-siʼe e, laa bɨn bʉr o tɨʼ zɔʼ ba.
16«A vwaʼ e bɨn, ontim lé eliʼle bʉʉ bʉr ɨ! Bɨn bé elɛɛ ó: ǃɨ mʉr si de mɨnkɛla lé egba die le “Mpah Zyɛm!” é mɨnkɛla nɛʼɛ, mɨnkɛla myaa, myé abe e lɔb. ǃNye si ka de mɨnkɛla, gba die e gol Odia mo Zyɛm é mɨnkɛla nɛʼɛ, mɨnkɛla myaa, myé ó myaa nye lé ekʉ jala le eloŋlo e. 17Bɨn bɨgʉ, ndɨ nteme ontim bi! Yé yɛɛ lé epa kʉ laa yʉʉ é modile? Zê gol ɛ? Zê Mpah Zyɛm lé esa ó, gol yaa, yé diʼe sa ndɨ ti ɨ? 18Bɨn bé elɛɛ nteme ó: “ǃƗ mʉr si de mɨnkɛla, lé egba die e taa mɨndwɛa é mɨnkɛla nɛʼɛ, mɨnkɛla myaa, myé abe e lɔb. ǃNye si ka gba die e motwina ndɨ kɛla tɨʼ kʉ é mɨnkɛla ma nɛʼɛ, mɨnkɛla myaa, myé ó myaa nye lé ekʉ jala le eloŋlo e.” 19Bɨn ontim ba, yé nyá ɛ? Yé yɛɛ lé epa kʉ laa yʉʉ é modile? Zê motwina ɛ? Zê taa mɨndwɛa, yaa ndɨ esa ó, motwina maa, mé diʼe sa ndɨ ti ɨ? 20Ebe no, mʉr nyiwɛh lé egba die e “taa mɨndwɛa” é mɨnkɛla ɛ, nye egba nteme ó, die e bɨsa bibyɛh ndɨ kɛla tɨʼ kʉ ɨ, é mɨnkɛla myaa. 21Mʉr nyiwɛh lé egba die le “Mpah Zyɛm” é mɨnkɛla ɛ, nye egba nteme ó, die mo “Zyɛm”, mʉr ndɨ tɨʼ tʉŋlʉ ɨ, é mɨnkɛla myaa. 22Mʉr nyiwɛh lé egba die e “jobo kʉ” é mɨnkɛla ɛ, nye egba nteme ó, die e “dia taʼa” ndɨ gʉʼ ɨ, é mɨnkɛla, bé e Zyɛm, mʉr lé edi tɨʼ ɨ.
23«A vwaʼ e bɨn, oyeʼle o motie e l'oFarizyɛŋ! Bɨn baanya-bɨkʉʉŋʉ ba, ebe, bɨn dam bi bɨsa ndɨ é twaʼbe e, mpʉ bɨka monumo, bɨka bɨ dʉm ndwe e l'atuŋɔ-mbɛh, bɨn bé ebana dwe Zyɛm nkɔb ewʉm tɨ. To kœb ó, bɨn bé adu motie ndɨ é bul dile e. Mé ó: etiʼe bʉr mɨlɔb é l'ocɨcyel, elɛʼle ncwɨncwɨa, le edira monkɛʼ. Yé a kʉ jala ó, bɨn duʼo motie monɨ, ajɨha nteme lé edwe nkɔb ewʉm é bwa o bɨsa bin byaa. 24Ontim lé eliʼle bʉʉ ontim ba, bɨn bé ebɛn monwoʼ lé epɛʼ ontwii ó, bɨn bé amu jaa mine be. Sa gwar, bɨn bé emɛʼle mine bɨkamtʉl bɨntinɨ!
25«A vwaʼ e bɨn, oyeʼle o motie e l'oFarizyɛŋ! Bɨn baanya-bɨkʉʉŋʉ ba, é jɔʼ bɨn lé ejɨ pub bɨfua e l'okob ɨ, bɨn bé efuʼro bye njɨ é nko paʼ kʉl. To kœb ó, bɨfua byaa, byé ó lwɨŋla e bɨsa ndɨ é bebe e. Bɨn bé é bul kpɛl dɛn bɨsa bɨ bʉr. Bɨn bé abe e nkul emɛr mɨleme. 26Ontim be oFarizyɛŋ, taara fuʼro ga paʼ tʉŋlʉ. É jɔʼ yaa ó paʼ kʉl, wé óka fwiʼrɨ ɨ.
27«A vwaʼ e bɨn, oyeʼle o motie e l'oFarizyɛŋ! Bɨn baanya-bɨkʉʉŋʉ ba, bɨn bé enwɨɨla ó e mofoo ndɨ kɔna, mɨndwiba e l'epɛm ɨ. Mé enyin é mbɨa mbɨa ó, é nko paʼ kʉl. To kœb ó, mé ó e bɨdwehe bɨ bʉr, sa lé lœʼ be é mih mo Zyɛm ɨ! 28Bɨn bʉr o tɨ, é mih mo bʉr, bɨn bé enyin ó, mpʉ ocɨcyel o bʉr. To kœb ó, bɨkʉʉŋʉ ndwe e l'ebebe, byé ó bɨn lwɨŋla é mɨleme.
29«A vwaʼ e bɨn, oyeʼle o motie e l'oFarizyɛŋ! Bɨn baanya-bɨkʉʉŋʉ ba, bɨn bé enyin kʉl ó, bɨn bé edwaabe ogwiha o mɨlɔb omya bé e l'ocɨcyel o bʉr, ebe, bɨn bé ekɔn be mofoo, le egba ojaa tɨ. 30Bɨn bé elɛɛ nteme ó: “Nkʉ yé a be ó be, be bɨh é dia bɨmpam bih nɛʼɛ, mpa bɨh bé a baatœb ejwɨɨ le ogwiha o mɨlɔb laa.” 31Mpʉ bɨn lé ekɔn mofoo mɔɔ no e, bɨn bé eboʼlo tɨʼ é l'ocyecye ó, bɨn bé ó kʉ bana be bwan o bʉr o b'a jʉ ogwiha o mɨlɔb ɨ! 32Yé be no nɛʼɛ, toʼ ga be dolo lé efwahle bɨsyɛɛla bɨ ebebe bɨmpam bin, byé a bɛa taare lé esa ɛ!
33«Bɨn, kul onyʉa! Bɨn, kampaŋa bɨgurokɔɔ yi! Zê bɨn bé e nkul esyɛhle tiʼa mɨlɔb wé ócen bʉr é Bɨ-siʼe e? 34Ebe no ó, mbe ga! Me ólomlo bɨn ogwiha o mɨlɔb bé e mɨpɨpɨʼ mɨ bʉr ndwe e l'oyeʼle o motie e. Baʼ bʉr, bɨn bé ójʉ jʉʼo. Bʉʉ, bɨn bé ócyèl é bɨklos kʉ. Bʉʉ nteme, bɨn bé ófuura be mɨmbihe é mompah mɨnjwɨʼla mɨn. Bɨn bé ótíile be, le edwih be é yiʼ nkana, le eto pɛʼ be é yʉʉ. 35Bɨn bé óto le esa no, sa é sa sa, to pyal é jɔʼ motié mɨmɛh mo bʉr o b'a jʉŋɔ, akunbo e mpɨŋ ɨ, mé óswɨɨ é mɨlʉ min, taare é l'efie mo Abɛl, akunbo e mpɨŋ ɨ, to pyal é laa mo Zakari, mwan mo Barakiyah#23.35 Dwɛʼa 2 Mɨnjwɨɨbʉr 24.21., waa bɨn bé a jʉ paʼra Mpah Zyɛm e taa mɨndwɛa ɛ. 36Me elɛɛ bɨn cyecye ó nɛɛ: mobebe mɨmɛh maa, mé ópyal bʉr o mya wi!»
Yesʉs lé etooro bʉr o Yerʉsalɛm
(Lʉkas 13.34-35)
37«Yerʉsalɛm, Yerʉsalɛm, gwɔɔ mʉr lé ebɛa jʉ ogwiha o mɨlɔb ndwe le elumo baa Zyɛm lé elomlo go e, mokoʼ e! Zɔʼ ntɨɛ me a be lé egwɨm syɛŋ bwan bo, mpʉ abyɛɛ-kuo lé esyɛŋ bwan be é mompaba me si ɨ, bɨn bɛɛ kʉ bene-bene bena. 38Dwɛʼa ga: mbɛr win, wé óliʼ fo, 39ebe, me elɛɛ bɨn ó nɛɛ: bɨn bé aŋa ka bee me, to pyal é jɔʼ bɨn bé ólɛɛ ó: “Nyaʼ-nɔn, nye ó odumo! Mocyɛʼ mo mpom, mé swɨŋɨ é waa lé eze e die mo Da ɛ!”»
נבחרו כעת:
Mataos 23: ozmBad
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
© 2002, Wycliffe Bible Translators, Inc. All rights reserved.