Mataos 24
24
Mpah Zyɛm muno ze gbɔa
(Markus 13.1-4; Lʉkas 21.5-7)
1É jɔʼ Yesʉs a be, nye mu lé eduho é jahla bii mo Zyɛm ɨ, ompʉn be ntɔʼ dihle nko nye a be e, le elɛʼlɔ nye mpʉ fumo a be e. 2No ó Yesʉs a ze lɛɛ e be ó: «Zê bɨn bɨ gʉa bee bɨsa biʼ bibyɛh ɛ? Me elɛɛ bɨn cyecye ó nɛɛ: pɨpɨm gwar, yé aŋa ka liʼ cɨcyel wâ, nkʉ ekoʼ egwar kɛla é lʉʉ kʉ. Mɨmɛh, mé ósil lé enkɛŋɔ si.»
Bɨsa ndɨ ecemle esie e mbi jɔʼ yiʼ ɨ
(Markus 13.5-13; Lʉkas 21.8-19)
3Yesʉs, nye osi di si é l'Ecwɨʼ le olivye nɛʼɛ, ompʉn be ze dî nye tia, bé mu bé ome ó: «Lɛŋɨ bɨh jɔʼ bɨsa bɨnɨ, byé ósyɛɛlɨ ɨ. Lɛŋɨ bɨh nteme dweʼle yé ólɛʼle ó, go mu ó kunokuno le ebula, le nteme, esie e mbi jɔʼ yi, lé mu ó é nere-nere e.» 4No ó Yesʉs a lɛɛ e be ó: «Diʼe ga ncye! Bé amu jaa gomlo bɨn é bebebebe zi, 5ebe, buobuo bʉr, bé óze e die lam, lé elɛɛ-lɛɛ ó: “Mɛm ó di Lœma mulo mo Zyɛm!” Bé ógomlo bʉr é buobuo é bebebebe zi. 6Bɨn bé ójoʼo mɨlɔɔ é lɔb mɔm bé mu lé elwimla ɛ, ndwe é lɔb mɔm bé lé edɨ kaʼ ɛ. No ó, mʉr ayi twɨra, ebe, yé ókʉ be bɨna ga é nere-nere ó, bɨsɨa byaa taara syɛɛlɨ. Dam be no, ntʉʼ bɨsɨa byaa, byé ócemle esie e mbi jɔʼ yi. 7Yiʼ kul bʉr, yé ólwimla e yʉʉ; nwaʼ njwɨɨ lwimla e nuu. Za ónyaŋla bɨgumo bɨgumo. Si óncyeŋa. 8Bɨsa biʼ bibyɛh, byé ótaare syɛɛlɨ. Tina, yé óbe ó etɛɛrɨ e mokpaa, nwɨɨla e mokpaa mo min.
9«É jɔʼ yaa ó bé ókɛha bɨn é mobo mo bʉr ofih, baa bé ótíile bɨn ɨ. Bé ójʉ bɨn bʉʉ bʉr. Bʉr o ndɨ abe oYʉden ɨ, bé ónwim bɨn é lɔb wam. 10No ó bɨsyɛɛla byam, byé ókol bʉr é buobuo ebɔʼ bé óbɨm é mɨleme, laa lé ódumo be e. Bʉr, bé ókɛha bʉr o sama yɔɔ. Bé ónwimla paʼra wɔɔ. 11Mɨmpʉmpʉl mɨ ogwiha o mɨlɔb, myé ópyal é buobuo le egomlo bʉr é buobuo é bebebebe zi. 12Ebebe, lé óbul laŋle. Buobuo bʉr, bé óbir ó, kpɛl yé a di-di paʼra wɔɔ ɛ, yé tala. 13No ó waa ódihbe, to pyal é l'esie e, nyiha ó ngo bi tiʼ molu mo mpoʼ mɨmɛh. 14Ebe no, Mbɨambɨa Lɔɔ lé etiibe e jwɨ̀ʼa mo Da ɛ, wé ólɛɔ gumo yiyɛh é si nwa, lé esa ó, bʉr o ndɨ abe oYʉden ɨ, bé joʼa bʉr lé eboʼlo lɔɔ waa. Pie tɨʼ ó esie e mbi jɔʼ yi, lé óka bɔma ɛ.»
Mɨtuu e mɨndɛl mɨnɨnɨ
(Markus 13.14-23; Lʉkas 21.20-24)
15Yesʉs ze lɛɛ e be ó: «Ebe no, é jɔʼ bɨn bé óbee Ambuhlo-modɛɛ lé eteʼbe bʉr é mih é gumo ndɨ e l'ekɛn ɨ. Tina, yé ó Ambuhlo-modɛɛ, nye ó waa ngwiha mɨlɔb Danyɛl a tile é lʉ we e. Mʉr lé eláa mɨlɔb mɨnɨ ɨ, nye gʉa joʼo mye! 16É jɔʼ nye óteʼbe bʉr é mih no e, bʉr o lal Yʉda, bé ejala le ekpɛɛ, toŋɔ é mocwɨʼ! 17Mʉr óbe é mie kʉ ɨ, nye l'aka nyamle fulo, ó nye toʼ, to kaale bɨsa bɨ mbɛr. 18Waa óbe peme e, nye l'aka nyamle bula pihe, ó nye toʼ, to nʉa len kʉr we. 19A vwaʼ e baanya-mobum le baabyɛɛ é molu maa! 20Jwɨʼla ga e Zyɛm ó, kpɛɛ win, wé l'ayi be yɛɛ é jɔʼ kolo, nkʉ é moho saba, 21ebe, é molu maa, mɨtuu e mɨndɛl, myé óbul buo. Taare é jɔʼ Zyɛm a cye kʉ e si ɨ, ze pyal é banana, bʉr, bé apa sia e mɨtuu é mbi waa. Guu tuu fih, wé aŋa ka bâʼle laa miha. 22Yé be ó, Da atuŋlo molu maa nɛʼɛ, lɛɛ ó, mʉr ákwoʼ tiʼe. Sa gwar, nye ótuŋlo me ó, é l'efu e bʉr o nye a pɛh ɛ. 23ǃƗ mʉr si lɛɛ e bɨn ó: “Mbe ga: Lœma mulo mo Zyɛm ó ndɨ wâʼ nwa!” nkʉ ntɔʼ ó: “Nye ó kaʼ” nɛʼɛ, abuʼla ga mʉr waa, 24ebe, mɨmpʉmpʉl mɨlœma mɨ mulo mo Zyɛm, myé e mɨmpʉmpʉl mɨ ogwiha o mɨlɔb, myé óbuo. Bé ósa bɨbwaʼbwaʼ bɨdweʼle bɨ nkul wɔɔ ndwe e bɨsa bɨ jehe lé esaa egomlo mɨpɛha mɨ bʉr mye é bebebebe zi, ǃbé ókoʼo wa. 25Mbe ga: mɨ bal bɨn é lɔb bɨsyɛɛla byaa, byé l'apa syɛɛ ó nɨ.»
Mpʉ Mwan mo Mʉr óbula ze e
(Markus 13.24-31; Lʉkas 17.23-24, 37; 21.25-31)
26«Ebe no, ǃɨ mʉr si lɛɛ e bɨn ó: “Mbe ga: Lœma mulo mo Zyɛm ó ndɨ kaʼ é feha si nwa!” nɛʼɛ, mʉr ato ga gʉ! ǃƗ mʉr si lɛɛ ó: “Mbe ga: nye ó kaʼ é tiʼe yiʼ!” nɛʼɛ, mʉr abuʼla ga nye, 27ebe, mpʉ ndweh mpie lé edweh é jobo nko dobo lé emʉa ɛ, yé ntɔʼ nyin é nko lé lé eja ɛ, no nteme ó Mwan mo Mʉr óbe é dobo nye óbula ze e. 28Gumo muu tir ndɨ ɨ, tɨʼ ó mɨngbaŋ lé efwal ndwe le elie e.
29«Pie molu maa, ǃɨ mɨtuu e mɨndɛl mɨnɨ, myé óbe si laa nɛʼɛ: “dobo, lé ódime; alomo aka pan. Baatwitwɛn, bé óduma, duho é jobo kʉ. Bɨsa bɨ nkul bɨnɨnɨ ndɨ é jobo kʉ ɨ, byé ólwɨʼlɨ.”#24.29 Dwɛʼa Ezayi 13.10 ndwe e 34.4. 30É jɔʼ yaa, dweʼle yé ólɛʼle ó, zea mo Mwan mo Mʉr mu ó lé ekunbo e, yé ónyin é jobo kʉ. Bʉr o moveh mo si nwaʼ bɨbɛh, bé ótaare lé ebwɨhla. Bé óbee Mwan mo Mʉr lé eze é nkur tʉŋlʉ, lwɨŋla e nkul ndwe e buobuo moncɛnba. 31É jɔʼ yaa, nye ólomo beengles be e sebe ndɨ é laŋle bwaʼ twii ɨ, bé ntɔʼ to é modumo mo si mɨmɛh monâ. Bé ósyɛŋ baa nye a bɛa pɛh ɛ, taare é wiʼ odumo o jobo kʉ, to kumo é guu.»
Sikʉlʉ lɨ figye lé edwe e
(Markus 13.28-32; Lʉkas 21.29-33)
32«Jwɨʼɨ ga sikʉlʉ lɨ figye yé mʉr tɨʼ lé edwe bɨn ɨ. Jɨh tɨʼ lɨ, yi dwanba, bɨka mu lé etaare lé epah, bɨn bé edweʼe ó, nkono, yé mu ó kunokuno le epyal. 33Jwɨʼ gwar e gwar yaa nteme ó, é jɔʼ bɨn bé óbee bɨsyɛɛla bibyɛh byaa lé esyɛɛlɨ ɨ, gʉŋa ga ó, jɔʼ Mwan mo Mʉr óbâʼle pyal ɨ, yé óbe ó, yé mu kunokuno le epyal. Nye óbe ó, nye mu ó é l'ebe. 34Me elɛɛ bɨn cyecye ó nɛɛ: mya bʉr wiʼ l'apa sie, bɨsyɛɛla bɨnɨ bibyɛh, byé ósyɛɛlɨ. 35Kʉ e si, byé ólaa; mɨlɔb myam myɛɛ, myé ódi njʉmdia e njʉmdia.»
Zé óbe lé ebono nye é l'esie e mbi jɔʼ yi?
(Markus 13.32, 35; Lʉkas 12.39-40; 17.26-27, 34-35)
36«Sa gwar, mʉr, nye agʉa moho nkʉ ewala laa, dam be beengles é jobo kʉ, dam be Mwan mo Zyɛm. Njɨ Zyɛm Sɔŋ nye ome ó lé egʉa. 37Mpʉ bɨsɔʼɔ byé a syɛɛlɨ é jɔʼ mo Noe e, jwɨʼ gwar e gwar yaa nteme ó ngo syɛɛ é dobo Mwan mo Mʉr óbula ze e. 38Byé enwɨɨla ó, é mbi wi: é jɔʼ mpɨɨ nɨnɨ a baapa ni ɨ, bʉr o jɔʼ yaa, bé a dɨ sa ó, de mode, le enyʉl monwoʼ. Bé a dɨ sa nteme ó, baʼ lé eba bʉba; bʉʉ lé ecenɔ mɨsile myɔɔ é moba, to pyal é dobo Noe a ni é byɛl tʉŋlʉ ɨ. 39Bé a baabuʼla ó, sɔʼɔ, yé ó e nkul esyɛɛlɨ no, to pyal é jɔʼ mpɨɨ nɨnɨ a bana sil bɨbɛh ɛ. Yé óbe nteme ó, jwɨʼ gwar e gwar yaa é dobo Mwan mo Mʉr óbula ze e. 40É jɔʼ yaa, é bʉrʉm oba bé óbe é peme e, nwaʼ ónʉŋɔ; nuu liʼ. 41É bʉba oba bé óbe lé esie mode é l'ekoʼ egwar ɨ, nwaʼ ónʉŋɔ; nuu liʼ. 42Ebe no, diʼe ga nkehe, ebe, bɨn bé agʉa dobo Tî win óbula ze e. 43Bɨn bé egʉa ó, nkʉ mʉr mbɛr a be ó be, gʉa ewala e pum ndiblʉ, wé a be ó, wé ópyal nɛʼɛ, mpa nye a di ó nkehe. Nye a ngbaa be ó, abir ó, wé kɛʼɛ nye mbɛr, díbe. 44Ebe no, diʼe ga é doʼlo. Mwan mo Mʉr amu pyal bɨn motwɨra, é l'ewala bɨn bé óbe, abuʼla nye e.»
Osyɛl o mosa oba
(Lʉkas 12.42-46)
45«Wáa mʉr é bɨn ndɨ syɛl mosa ebuʼlɔ, waa ndɨ cɨcyoo e? Nye ó waa masa we ócyel é mbɛr we ó, nye diʼe lʉ osyɛl o mosa be e? Nye ó ngo kab bʉr o nduo ye mode mɔɔ é bɨjɔʼ lé ejala ɛ. 46ǃƗ tî we óbe si to, ze bula, ze bee nye lé esea syɛɛ yaa nɛʼɛ, mocyɛʼ mo mpom, mé ósʉŋɔ é mbi syɛl mosa waa! 47Me elɛɛ bɨn cyecye ó nɛɛ: nye ódwe nye nkul mojwɨ̀ʼa é bɨsa bɨ mbɛr bibyɛh. 48Wáa mʉr é l'esama lɨn lé ebula nwɨɨla e bɨbla syɛl mosa ɛ? Mbi syɛl mosa waa, nye ejwɨʼ é leme we tʉŋlʉ ó: “Tî wam, nye ó mpʉ sa lɛɛ ó, nye aŋa lɨ bula.” 49Nye eka taare lé eŋmɛh bʉr o nduo ye, le egubo de mode le ebɛble monwoʼ mɔɔ, bé e mɨfufwɔʼ monwoʼ. 50Njwɨɨ bɨbla syɛl mosa waa ópyal ó, dobo nye óbe, abuʼla ó, nye e nkul epyal ɨ, é l'ewala nye óbe, agʉa ɛ. 51Nye ókab syɛl mosa waa bɨntɨʼa ó, byaa ndɨ é nyan nyan ɨ, jwɨʼ gwar e gwar e baanya-bɨkʉʉŋʉ, le ecen bɨbɛh é gumo bé ódɨ time le elwaare moje e.»
נבחרו כעת:
Mataos 24: ozmBad
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
© 2002, Wycliffe Bible Translators, Inc. All rights reserved.