Mataos 25
25
Kɨkɛna mɨndu mosehe ewʉm
1«Jwɨ̀ʼa mo Da, yé enwɨɨla nteme ó e mɨndu mosehe ewʉm. Myé a be ó si nʉa molama lé eto sohɔ mbœm mʉma é mpula kwar we. 2Maʼ motɛn, mé a be ó é gʉʼla. Mʉʉ motɛn, mɨcɨcyoo. 3Maa mé a be é gʉʼla ɛ, mé a nʉa mɔɔ molama ó, anʉɔ mulo mo tɨ. 4Maa mé a be mɨcɨcyoo e, mɛɛ, mé a nʉa molama mɔɔ ó ndwe e mulo é bɨntaʼ. 5No ó mpʉ mbœm mʉma a bɛa, alɨ bula nko nye a to bœm mʉma ɛ, mɨmɛh ze ntie mih, ntɔʼ toŋɔ é bɨdwo.
6«Yé mu teme pum nɛʼɛ, bé ze lʉʼa é bɨdwo, lé ejoʼo bɨyaŋa ó: “Kɛɛɛɛɛɛ! Mbœm mʉma, nyi pyal ɔɔ! Pyala ga kʉl ɔɔ! Toʼ, to bɔma ga e nye ɔɔ!” 7No ó mɨndu mosehe mɨnɨ mimyɛh, myé a ze jɨma, ze saa ó, bé bɨnɨ mɨsaŋ kʉ, molama mɔɔ nkʉʼ pan. 8Maa mé a be é gʉʼla ɛ, mé ntɔʼ jwɨʼla e mɨcɨcyoo ó: “Ayɨɨyaʼ! Obɨɔ ga, bɛʼɛ ga bɨh mulo mɨn, ebe, molama mɨh, mé muno ze dime!” 9Mɨcɨcyoo mɨ bʉba myɛɛ ze lɛɛ e be ó: “Tɨtoʼo! Mulo mɨh maʼ, mé abe e nkul ejala e molama ga mɨna mɨmɛh. Laa ó, bɨn dîʼe bɨh, fuo to ga yɛɛ nko bʉr o ndɨ ebɛma mulo e, bɨn toʼ, to bwam maa mɔɔ!” 10É jɔʼ mɨha, mé a be, mé dina lé eto bwam mulo e, mbœm mʉma ntɔʼ pyal, kœb maa mé a be é mpono e. Bé e boo nɔɔ ntɔʼ ni é zɔɔ eba, nyɛɛ ntɔʼ dible ebe é kpɨm. 11Agum bɛa nɛʼɛ, maa mʉʉ monɨ ntɔʼ ka bula. Mé ze lɛɛ ó: “Da ɔɔ, Da ɛɛ! Ntaʼ, ze dib bɨh ebe ʉʉ.” 12No ó nye a bɨha e me ó: “Me elɛɛ bɨn cyecye ó nɛɛ: me adweʼe bɨn.”» 13Yesʉs ze lɛɛ e be ó: «Ebe no, diʼe ga nkehe, ebe, bɨn bé agʉa dobo nkʉ ewala me óbula ze e.»
Kɨkɛna mɨmpɨʼ mɨ gol
(Lʉkas 19.12-27)
14«Jwɨ̀ʼa mo Da, yé enwɨɨla nteme ó e mʉr a be ó, nye tɨʼe cyen ɨ. Nye eto é cyen ó, nye osi jebe osyɛl o mosa be, ze dwe be mobi me ó, bé baʼla me. 15Nye ntɔʼ dwe mʉr efoʼ mɨmpɨʼ mɨ gol mɨtɛn, dwe waa mba mɨmpɨʼ mɨ gol mɨmba, waa lɛl, mpɨʼ gol ngwar. Nye a dwe be mya ó, lé edu mpʉ mʉr nyiwɛh a be e nkul ebaʼle bɨsa bye e. Nye ze tɨ cyen. 16Waa a nʉa mɨmpɨʼ mɨ gol mɨtɛn ɨ, nye ntɔʼ to e mye kam e kam, to bul mye. Nye ze bâʼle bi myʉʉ mɨmpɨʼ mɨfih mɨtɛn. 17Waa a nʉa mɨmba ɛ, nye nteme a si bi myʉʉ mɨmba. 18No ó, waa a nʉa mpɨʼ ngwar ɨ, nyɛɛ a to pu ó bɨ, ze fol mpɨʼ gol mo masa we tɨ.
19«To kœb ó, masa wɔɔ a be ó si bul bɛa gʉʼ é cyen ye yaa. É jɔʼ nye a ka bula ɛ, nye ze jebe be, ze lɛɛ e be ó, bé ntaʼ, ze lɛɛ nye mpʉ bé a sea e gol ye e. 20Waa a dweŋɔ mɨmpɨʼ mɨ gol mɨtɛn ɨ, nye ntɔʼ ze e mɨmpɨʼ myaa ndwe e myaa myʉʉ mɨtɛn. Nye e nye ó: “Da, go a timle me ó, mɨmpɨʼ mɨtɛn. No ó, myʉʉ mɨtɛn me a ka bâʼle bi ɨ, myé be!”
21«No ó, masa, nye e nye ó: “Yé é mbɨa! Go ó mpaŋ syɛl mosa ebuʼlɔ, ebe, gɨ gʉa ebaʼle sa ndɨ titia ɛ. Me ócyel go é dia ó, go baʼla byaa ndɨ é buobuo e. Ntaʼ, ze soho jwɨʼ gwar mpʉ mɛm sɔŋ go mu lé esoho e.”
22«Waa a dweŋɔ mɨmpɨʼ mɨ gol mɨmba ɛ, ze dihle nteme. Nye e nye ó: “Da, go a timle me ó, mɨmpɨʼ mɨ gol mɨmba. No ó, paʼ bee: mɨ bâʼle bi myʉʉ mɨmba e tɨ!”
23«No ó masa we a ze lɛɛ e nye ó: “É mbɨa! Go ó mpaŋ syɛl mosa ebuʼlɔ, ebe, go a si gʉa baʼle sa ndɨ titia ɛ. Me ócyel go é dia ó, go baʼla byaa ndɨ é buobuo e. Ntaʼ, ze soho jwɨʼ gwar mpʉ mɛm sɔŋ go mu lé esoho e.”
24«No ó waa a dweŋɔ mpɨʼ gol ngwar ɨ, a ze dihle nteme. Nye ntɔʼ lɛɛ e nye ó: “Da, me a be ó lé egʉa ó, go ó, é lele mbo! Go epim wʉnʉ é bʉʼ wʉnʉ go a baabè mompœʼ tɨʼ ɨ! 25No ó, me a be ó si kpɛɛ go, me ntɔʼ to fol gol yo é bɨbwah. No ó, yé be. Jàʼ yaa ndɨ yaa yo e!”
26«No ó masa we a ze lɛɛ e nye ó: “Go sa bɨbla pwɨpwɨh syɛl mosa yi! Go a be ó si gʉa ó, me pim-pim ó, é mompʉʼ mo wʉnʉ moonkan, le epɛʼ-pɛʼ mode é peme me a baabè mompœʼ tɨʼ ɨ. 27Ebe no, yé a kʉ jala ó, mpa go a be ó si komo mɔn yam é baŋ. É mpula wam, me a si ngbaa kœb mɔn yam ndwe e mɨlʉ myé a ntaa kʉ ɨ.”
28«Nye ze lɛɛ e bʉʉ osyɛl o mosa be ó: “Pɛʼɛ ga nye mpɨʼ gol nɨ. Bɨn bé à timle we mʉr mu e mɨmpɨʼ ewʉm ɨ, 29ebe, mʉr nyiwɛh ndɨ e guu paʼ bɨsa ɛ, nye óbâʼle dweŋɔ byʉʉ, nye nkʉʼ di e bye é ntuʼ-ntu-ntuʼ. To kœb ó, waa ndɨ tɨtoʼo e, nye ópɛʼɔ ma bim nye ndɨ e tɨʼ ɨ. 30No ó, syɛl mosa ndɨ anʉa nkɔb é bɨsyɛɛ ɛ, guha ga nye é l'edurʉ le ankom-nkom ndɨ kʉl ɨ, nko bʉr, bé ódɨ time le elwaare moje e!”»
Tiʼa mɨlɔb epihe
31«É jɔʼ Mwan mo Mʉr óze é moncɛnba me, bé e beengles bɨbɛh ɛ, nye ódi é dia taʼa ye, yaa ndɨ é ncyɛn-nti-ncyɛn ɨ. 32No ó, bɨkul bibyɛh, byé ófwal é mih me. Nye óbɛʼ bʉr mpʉ kobla bɨtab lé ebɛʼ bɨntœme e bɨkɨla ɛ. 33Nye ócyel bɨntœme é mbo ejʉm we; bɨkɨla byɛɛ, é mbo emyɛl we.
34«É jɔʼ yaa, njwɨɨbʉr, wé ólɛɛ e baa ndɨ nye é mbo ejʉm ó: “Ntaʼ ga, bʉr Sɔŋ wam a sʉ mocyɛʼ mo mpom me e. Ntaʼ, ze nʉa ga bɨdia é jwɨ̀ʼa nye a bɛa komlo bɨn, duho é l'etɛɛrɨ e si nwaʼ ɛ, 35ebe, me a si joʼo za, bɨn ntɔʼ dwe me mode. Me a si joʼo dweh modibe, bɨn ntɔʼ dwe me modibe. Me a be ó njyoo; bɨn bé a si bɨlan e me. 36Me a be ó fufwah. No ó, bɨn bé a si bœr me kan. Me a be ó lé esyɛb, bɨn ze bee me. Me a be ó é mbɛr mɨmbʉʼ, bɨn ze bee me.”
37«No ó ocɨcyel o bʉr, bé óbɨha e nye ó: “Da, é yáa jɔʼ bɨh bé a bee go lé ejoʼo za, bɨh dwe go mode, nkʉ lé ejoʼo dweh modibe, bɨh dwe go modibe e? 38É yáa jɔʼ bɨh bé a bee go njyoo, bɨh ntɔʼ bɨlan e go, nkʉ ntɔʼ ó fufwah, bɨh bœr go kan ɨ? 39É yáa jɔʼ bɨh bé a bee go lé esyɛb, nkʉ é mbɛr mɨmbʉʼ, bɨh ze bee go e?”
40«No ó, njwɨɨbʉr, wé óka bɨha e be ó: “Me elɛɛ bɨn cyecye ó nɛɛ: gumo bɨn bé a sa mʉr ngwar é sama obɨɔ bam baʼ no e, dam be ó, waa ndɨ agbaŋɔ é nkɔb ɨ, gumo yaa, bɨn bé a sa nteme ó me.”
41«Pie tɨ, nye ólɛɛ e baa ndɨ nye é mbo emyɛl ó: “Pʉʼa ga gumo me ndɨ ɨ, bʉr o Zyɛm a bɛa káale e. Toʼ ga é siʼe lé eduo njʉmdia e njʉmdia ɛ, siʼe Zyɛm a bɛa tira é l'efu mo Njwɨɨ moleme bé e beengles be e, 42ebe, me a si joʼo za; bɨn bé a baadwe me sa ede. Me a si joʼo dweh modibe; bɨn bé a baadwe me modibe. 43Me a be ó njyoo; bɨn bé a baabɨlan e me. Me a be ó fufwah; bɨn bé a baabœr me mɨkan. Me a be ó é mbɛr mɨmbʉʼ lé esyɛb; bɨn bé a baaze bee me.”
44«É jɔʼ yaa ó bé óbɨha e nye ó: “Da, é yáa jɔʼ bɨh bé a bee go lé ejoʼo za nkʉ dweh modibe, nkʉ bee go, go ndɨ njyoo, nkʉ fufwah, nkʉ lé esyɛb, nkʉ é mbɛr mɨmbʉʼ, bɨh l'asea e go e?”
45«No ó, njwɨɨbʉr, wé óka bɨha e be ó: “Me elɛɛ bɨn cyecye ó nɛɛ: gumo bɨn bé a baasa mʉr ngwar é sama bʉr baʼ embɨa ɛ, dam be ó, nye a be ó waa ndɨ agbaŋɔ é nkɔb ɨ, gumo yaa nteme ó bɨn bé a baasa me embɨa ɛ.”
46«Bʉr baa, bé óto é Bɨ-siʼe, to sia e ntɨʼa ndɨ njʉmdia e njʉmdia ɛ. Ocɨcyel o bʉr bɛɛ, bé óto ó, to bi tiʼ molu mo mpoʼ mɨmɛh.»
נבחרו כעת:
Mataos 25: ozmBad
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
© 2002, Wycliffe Bible Translators, Inc. All rights reserved.