Mataos 26
26
Bʉm ejʉŋɔ Yesʉs
(Markus 14.1-2; Lʉkas 22.1-2; Yʉanes 11.47-53)
1É jɔʼ Yesʉs a sil lwib bɨlwib bɨnɨ bibyɛh ɛ, nye ntɔʼ ze lɛɛ e l'ompʉn be ó: 2«Bɨn bé egʉa ó, ebʉʼ e Paska, lɨ ka liʼ molu moba ó, lé pyala. No ó Mwan mo Mʉr óze kɛhɔ, ó bé cyèlɨ nye é klos kʉ.»
3Ojwɨɨ be opara ndwe e l'otamabʉr o lal ze gwɨhla é bii mo njwɨɨ opara a be die Kayɨfa ɛ. 4Bé a bà bɨjwɨʼ bɨ enaʼ Yesʉs mobo é nyʉl é zi bɨkʉʉŋʉ, bé nkʉʼ jʉ nye e. 5Sa gwar, bé a be yɛɛ ó, lé elɛɛla paʼra wɔɔ ó: «Bɨna l'ayi pa mɛr ga nye é jɔʼ ebʉʼ, bʉr bé amu jaa sa bɨntʉ.»
Mʉma lé elœm Yesʉs labina é lʉ
(Markus 14.3-9; Yʉanes 12.1-8)
6Ɨ mpʉ Yesʉs a be Betani, é mbɛr mo Simɔn, mʉr a taare syɛb zam, ntɔʼ ka tiʼe e, 7nuu mʉma ntɔʼ ni. Nye a be ó e ntaʼ piʼla é l'ekoʼ e albâtre, lwɨŋla e labina yé a be é buo dia ɛ. Nye ze sʉ Yesʉs ya é lʉ é jɔʼ nye a be ndindil lé ede e.
8É jɔʼ ompʉn be, bé a bee syɛɛla yaa ɛ, bé ntɔʼ joʼo nye ebebe. Bé ó: «É wáa nyɔm nye sam dime labina yiʼ é mbi wiʼ ɨ? 9Yé kʉ jala ó, bɛma ye bɛma bɛma é tɔɔ mɔn twiha, ntɔʼ dwe baanteʼenteʼe!»
10Yesʉs ntɔʼ gʉa sa bé a lɛɛ ɛ. Nye ze dî e be ó: «Ebe yé bɨn lé entɨʼ mʉma nwaʼ ɛ? Nyi sa me syɛɛla ndɨ é bul mbɨa ɛ. 11Ebe, bɨn e baanteʼenteʼe ó ndɨ é jɔʼ yiyɛh. Bɨna bɛɛ, bé ákwoʼ di ga jɔʼ yiyɛh. 12É jɔʼ nye sʉ me labina nɨ é nyʉl ɨ, nye sa no ó, é l'efu e dɨla yam. 13Me elɛɛ bɨn cyecye ó nɛɛ: fum yiyɛh é si nwaʼ nyiwɛh bé ólɛɛ Mbɨambɨa Lɔɔ wiʼ ɨ, syɛɛla mʉma nwaʼ sa ɛ, yé ótaŋlɔ nteme. Bʉr, bé ótoŋlo nye tɨ.»
14No ó nuu mpʉn é l'Esama le ompʉn ewʉm e l'oba mo Yesʉs a be die Yʉdas Iskariot ɨ, a ze to bee ojwɨɨ be opara. 15Nye e be ó: «Bɨn bé ódwe me yé, ó me kɛha bɨn Yesʉs?»
Bé ntɔʼ kɛʼ nye mɨsaŋ mɨ mɔn mowʉm molɛl. 16É dobo laa ó nye a taare lé esaa mpaŋ jɔʼ ekɛha Yesʉs ɨ.
Nkomlo mode mo Paska
(Markus 14.12-17; Lʉkas 22.7-14)
17Yé a be ó, yé mu moho efoʼ é l'ebʉʼ e Bɨbler ndɨ ebubɔ, agbaŋɔ levure ɨ. Ompʉn mo Yesʉs, bé ze dihle kunokuno e nye, ze dîŋɔ ó: «Go egwɨm ó bɨh toʼ komlo go mode mo Paska go óde e, nko?»
18Nye ze bɨha e be ó: «Toʼ ga é nkana nuu mʉr ye. Bɨn bé à lɛɛ e nye ó: “Yeʼle lɛɛ ó, jɔʼ ye, yé mu ó kunokuno le epyal. No ó, bé e l'ompʉn be, bé óze de mode mo Paska ó, go ye.”» 19Ompʉn be ntɔʼ sa mpʉ Yesʉs a lɛɛ be e, ntɔʼ komlɔ mode mo Paska.
20É bii kʉʼ nɛʼɛ, Yesʉs bé e l'Esama le ompʉn ewʉm e l'oba, ze diŋɔ si é teble. 21É jɔʼ bé a be lé ede e, Yesʉs ntɔʼ lɛɛ e be ó: «Me elɛɛ bɨn cyecye ó nɛɛ: mʉr ngwar é l'esama lɨn ókɛha me.»
22Bé ntɔʼ liʼ é gœʼra-gœʼra e mocyɛʼ mo nyʉl ebe ekan enɨ. Mʉr nyiwɛh é l'esama lɔɔ ze dɨ dî e nye mʉr ngwar ngwar ó: «Da, yé abe me, yé abe no?»
23Nye ntɔʼ bɨha e be ó: «Yé ó mʉr bɨh e nɔɔ lwanbe puhba mbo é nka mode ngwar ɨ. Nyɛɛ ó ngo kɛha me. 24Yé ó no: Mwan mo Mʉr ódwè é mpʉ yé ndɨ tila é Kalara Zyɛm, tiibe e nye e. Sa gwar, a vwaʼ e mʉr ókɛha Mwan mo Mʉr ɨ! Yé a ngbaa mbɨa mʉr waa ó, mpa nye a baabyɛl!»
25Yʉdas a be ó, nye ókɛha nye. No ó nye a ze lɛɛ e nye ó: «Yeʼle, yé abe me, yé abe no?» Nye ntɔʼ bɨha e nye ó: «Kʉ be mpʉ go lɛɛ nɨ!»
Mode Da Yesʉs lé edwe ompʉn be e
(Markus 14.22-25; Lʉkas 22.15-20; 1 Korɛnt 11.23-26)
26É mpʉ bé a be, bé mu lé ede e, Yesʉs ntɔʼ nʉa bler yaa, dwe Zyɛm ekiba, pɛ̂ʼ ye bɨpeh, dwe ompʉn be bya. Nye ó: «Nʉŋa ga. Bɨn deʼ. Nyʉl wam ó nwa.»
27Pie tɨ, nye ntɔʼ nʉa bele monwoʼ mo rezɛŋ, dwe Zyɛm ekiba é lɔb monwoʼ maa, ntɔʼ dwe be ya. Nye ó: «Nyʉlɨ ga, bɨn bɨbɛh, 28ebe, motié mam ó ma, motié mu lé eswɨɨ é l'efu ó, Zyɛm deʼ mpʉn e bʉr é buobuo, ó nye pɛʼɛ be bɨbaa bɨ ebebe byɔɔ. 29Me elɛɛ bɨn ó nɛɛ, me aŋa ka bâʼle nyʉl monwoʼ ma, taare é banana, to pyal é jɔʼ bɨna bé óbâʼle nyʉl ga maa modwan é jwɨ̀ʼa mo Sɔŋ wam ɨ.»
30Bé ntɔʼ ze jɛɛ jɛɛ moseʼla, ze mʉa ɨ gumo yaa, toŋɔ é l'Ecwɨʼ le olivye. 31Yesʉs ze lɛɛ e be ó: «Bɨsyɛɛla byam, byé ókol bɨn bɨbɛh ebɔʼ bɨn bé óbɨm é mɨleme, laa lé ódumo bɨn ɨ, ebe, yé ó tila é Kalara Zyɛm ó: “Me ójʉ kobla bɨntœme, bɨntœme bye ntɔʼ myɛma diʼ e diʼ.”» 32Yesʉs ze ko tɨʼ ó: «Sa gwar, é jɔʼ me ópàh ɛ, me ósamle, to bono bɨn ɨ Galɨle.»
33Pyɛr, nye e nye ó: «Dam be ó, bʉr bɨbɛh, bé óbɨm ebɔʼ laa é mɨleme, ntɔʼ duma, mɛm, me ákwoʼ bɨm le.»
34No ó Yesʉs a lɛɛ e nye ó: «Me elɛɛ go cyecye ó nɛɛ: gwɔɔ, é pum wi, zʉm kuo l'apa kwaʼle, go ókɛla bɨjɔʼ bɨlɛl ó, go agʉa me.»
35Pyɛr ntɔʼ lɛɛ e nye ó: «Yé dam pyal me ó, bɨna e go dwèʼ sama, me aŋa nyamle kɛla ó, me agʉa go.» Bʉʉ ompʉn bɨbɛh nteme, bé a si lwib no.
Yesʉs lé ejwɨʼla e Sɔŋ we ɨ Getsemane
(Markus 14.32-42; Lʉkas 22.40-46)
36Pie tɨ, Yesʉs ze to e l'ompʉn be gumo bé lé ejebe ó, Getsemane#26.36 No, yé ó Gumo eman mpumo bɨlɨ bɨ olivye. e. Nye e be ó: «Diʼe ga wâʼ si, cye yiyɛh me dina gʉʼ lé esa mɨnjwɨʼla ɛ.»
37No ó nye a ze jebe Pyɛr ndwe e bwan mo Zebede oba, bé e boo nɔɔ ntɔʼ to. Nyʉl mo Yesʉs ntɔʼ bil myoo. Nye ze taare lé esyɛl ba e nye mʉr tɨ. 38Nye ó: «Nyʉl mu ó lé ekʉ ze cyɛʼ me. Leme wam, wé ó mpʉ sa lɛɛ ó, me ópuro é l'empime. Diʼe ga wâ. Bɨna diʼe ga nkehe.» 39Nye ze to ba dolo, ntɔʼ bɨʼ mpom we si, ze sa mɨnjwɨʼla. Nye e nye ó: «Da, ǃyé óbana nɛʼɛ, bele mɨtuu yiʼ dwɛha e me. Sa gwar, yé l'ayi be mpʉ me lé egwɨm ɨ, njɨ mpʉ go lé egwɨm ɨ.»
40Nye ntɔʼ mʉa si, to nko ompʉn be, bé a be e, to kœb be é bɨdwo. Nye e Pyɛr ó: «Zê yé abana ba bɨn lé edi nkehe tɔɔ ewala egwar e me ɛ? 41Diʼe ga nkehe. Jwɨʼla ga e Zyɛm. Bé amu jaa boblo bɨn, bɨn duma. Sisim mo mʉr, wé e gwɨma esa mɨmpaŋ bɨsyɛɛla; mɨsʉn myɛɛ, akoʼo.»
42Nye ntɔʼ bâʼle to é jɔʼ mba, to jwɨʼla e Zyɛm. Nye e nye ó: «Da, ǃyé óbe, abana ó, bele mɨtuu yiʼ toʼ me jaabe, me l'ade ye nɛʼɛ, yé saʼ mpʉ gwɨma yo ndɨ ɨ!»
43Nye bâʼle bula, ze bâʼle kœb be é bɨdwo, ebe, mih, mé a be ó si bul ntie be.
44É jɔʼ yaa ó nye a liʼe be, ze bâʼle to jwɨʼla é jɔʼ lɛl, lɛɛ-lɛɛ njɨ mokan mompwar. 45No ó nye a ka to nko ompʉn, bé a be e. Nye e be ó: «Zê bɨn bé ókʉ ka di ó njɨ é bɨdwo ndwe le egbala é jɔʼ yiyɛh ɛ? Mbe ga: ewala enɨ, lé mu ó kunokuno le epyal! Mwan mo Mʉr, nyi kɛhɔ boo osyɛl o mɨsyem! 46Mʉŋa ga si; ncʉʼ ga! Mbe ga: mʉr kɛha me e, ó ma ze nɨ!»
Yesʉs, nyi mɛrɔ
(Markus 14.43-50; Lʉkas 22.47-53; Yʉanes 18.2-11)
47Yesʉs dina lé elwib no nɛʼɛ, Yʉdas bé e mpampaʼ bʉr é bwaʼbwaʼ ze pyalɔ é kpɨm. (Yʉdas a be ó mʉr ngwar é l'Esama le ompʉn ewʉm e l'oba mo Yesʉs.) Bʉr o b'a ze e, bé a ze ó, baʼ e mɨfòŋ, bʉʉ e mɨmbɨŋ. Ojwɨɨ be opara ndwe e l'otamabʉr o lal ó b'a lomo be. 48Yʉdas, mʉr a kɛha Yesʉs ɨ, a be ó si bɛa tɨe bʉr baa ó: «Bɨn bé ódweʼe nye ó, é mbi wi: mʉr bɨn bé óbee me lé edu emuʼ le e, nye ó ndɨ Yesʉs! Nye ó bɨn lé ejala le enaʼ nye mobo é nyʉl e.» 49Jɨh tɨʼ Yʉdas a kʉ pyal, dihle nteme kunokuno e Yesʉs, nye ntɔʼ lɛɛ ó: «Moswɨhlɨ, yeʼle!» Nye ntɔʼ du nye emuʼ é mpyɔʼ. 50No ó, Yesʉs a bɨha e nye ó: «Fo wam, saʼ syɛɛla go ze ó, go saʼ ɛ.»
Bʉr baa ntɔʼ dihle nko Yesʉs a be e, naʼɔ nye mobo é nyʉl. 51Nuu mʉr a be, bé e Yesʉs sama ɛ, nye ze gœm fòŋ we é pɔb, syɛh syɛl mosa mo njwɨɨ opara egwal é bem. 52Yesʉs ntɔʼ lɛɛ e nye ó: «Fwama fòŋ go é pɔb, ebe, baa bɨbɛh lé elwimla e mɨfòŋ ɨ, bé ódwè ó, é mɨfòŋ. 53Zê go abuʼla ó, ǃme si jwɨʼla e Sɔŋ wam wâʼ banana nɛʼɛ, nye lomlo me beengles otɔɔyin ewʉm e l'oba ɛ? 54To kœb ó, nkʉ me be ó be, sa no nɛʼɛ, wáa mbi lɔɔ Kalara Zyɛm, wé óka dira, lé elɛɛ ó, me ejala le emɛrɔ ɛ.»
55É jɔʼ gwar yaa ó Yesʉs a ze lɛɛ e ntuntuma bʉr yaa ó: «Bɨn bé si jeʼe esa, lé eze e mɨfòŋ e mɨmbɨŋ é mobo é jɔʼ bɨn lé eze naʼ me mobo é nyʉl ɨ. Yé ó mpʉ bé lé emɛr-mɛr bɨzilngan ɨ. Me a be-be ó, dobo lɨlɛh ndindil é jahla bii mo Zyɛm tʉŋlʉ, lé eyeʼle bʉr. Bɨn bé a baanaʼ me mobo é nyʉl. 56No ó, syɛɛla yiʼ yiyɛh, yé a syɛɛlɨ no ó, lé edira lɔɔ ogwiha o mɨlɔb bé a tile é Kalara Zyɛm ɨ.» Pie tɨ, ompʉn be bɨbɛh ntɔʼ liʼe nye, ze kpɛɔ.
Yesʉs é mih mo Bʉm Nɨnɨ oYʉden
(Markus 14.53-65; Lʉkas 22.54-55, 63-71; Yʉanes 18.12-24)
57Bʉr o b'a naʼ Yesʉs mobo é nyʉl ɨ, bé ze to e nye é bii mo Kayɨfa, a be njwɨɨ opara ɛ. Bʉʉ oyeʼle o motie ndwe e l'otamabʉr o lal ntɔʼ gwɨhla gumo yaa. 58Pyɛr a be ó, lé edu nye ká ká pihe, ze é ze ze, ntɔʼ ni é bii mo njwɨɨ opara, ntɔʼ di si é l'empàh e mompah me, kunokuno e bɨpulʉm bɨ oYʉden lé esaa egʉa efuʼla e lɔb waa.
59Ojwɨɨ be opara bé e bʉr o Bʉm Nɨnɨ bɨbɛh, bé a be ó lé esaa bʉr o b'a be e nkul ebuʼo Yesʉs mɨlɔb ɨ, bé nkʉʼ jʉ nye. 60Dam be no, bʉr o b'a be e nkul ebuʼo nye mɨlɔb mɨmpwar ɨ, bé a baanyin. Buobuo bʉr, bé a be yɛɛ ó lé ebuʼɔ nye mɨlɔb mɨmbi mɨmbi. Pie tɨ, bʉʉ oba, bé a ka ze buʼo nye lɔb ó, é mbi wi, lé elɛɛ ó: 61«Nye a lɛɛ ó, nye ógbɛɛ Odia mo Zyɛm, ntɔʼ fumo fih njɨ é molu molɛl!» 62No ó njwɨɨ opara a ze mʉa si, dî e nye ó: «Zê go abɨha ba sɔʼɔ ɛ? Wáa mbi pura bʉr baʼ lé epur go wi?» 63Yesʉs a kʉ ka di ó njɨ é titil. No ó njwɨɨ opara a ze lɛɛ e nye ó: «Me egwii go mofoo é die mo Zyɛm ndɨ kublakubla ɛ, ó go lɛŋɨ bɨh nkʉ go ó Lœma mulo mo Zyɛm le Mwan mo Zyɛm.» 64Yesʉs ntɔʼ bɨha e nye ó: «Yé ó mpʉ go lɛɛ nɨ. Me elɛɛ bɨn, pie jɔʼ yi, bɨn bé óbee Mwan mo Mʉr, “ndindil é nko paʼ mbo ejʉm mo Zyɛm Nkul nyiwɛh#26.64 Dwɛʼa Mataos 22.44.”. Bɨn bé óbee nye lé eze é nkur tʉŋlʉ.»
65Njwɨɨ opara ntɔʼ kpaa empime, ze nya kan we. Nye ó: «Nyi pyeh Zyɛm! Bɨna bé aka bâʼle saa ga bʉr ka nwahle nye! Bananaʼ bɨn bɨ joʼo mpʉ nye lé ekʉ pyeh Zyɛm ɨ. 66Bɨn bɛɛ pahle lɔb wiʼ nyá ɛ?» No ó bʉr, bé a lɛɛ ó: «Nye ekʉ jala le ejʉŋɔ ɔɔ!»
67No ó bʉʉ bʉr é sama yɔɔ bé a ze syɛɛ nye mocyeele é mih le etu nye bɨkura. Bʉʉ, bé a dɨ jaa nye ó mompɛh é kaa-kɨ-kaa. 68Bé e nye ó: «Lœma mulo mo Zyɛm, yé be ó, go ó ngwiha mɨlɔb nɛʼɛ, tubla mʉr ŋmɛh go e, die.»
Pyɛr lé ekɛla ó, nye agʉa Yesʉs
(Markus 14.66-72; Lʉkas 22.56-62; Yʉanes 18.17, 25-27)
69Pyɛr dina ndindil é bii mo njwɨɨ opara nɛʼɛ, nuu syɛl mosa mʉma mo njwɨɨ opara ze pyal gumo nye a be e, ze lɛɛ ó: «Go! Go nteme, go ó mʉr nduo mo Yesʉs, mʉr Galɨle!» 70Pyɛr ntɔʼ kɛla é mih mo bʉr bɨbɛh. Nye ó: «Me apa kʉ gʉa sa go lé egwɨm lɛɛ ɛ.»
71Mpʉ nye a be, nye mu lé eto nko ebe bii mo para waa ɛ, lʉʉ esehe efih, lé ntɔʼ bee nye, ze lɛɛ e baa bé e boo nɔɔ, bé a be ó: «Mʉr nwa, nye ó mʉr nduo mo Yesʉs, mʉr Nazarɛt!» 72Nye nteme ntɔʼ bâʼle kɛla, le ede mɨnkɛla ó: «Me agʉa mʉr nɨ!»
73Abɛa nɛʼɛ, bʉr o b'a cyɛb tɨʼ ɨ, ntɔʼ zeŋɔ boo Pyɛr, ntɔʼ lɛɔ ó: «Yé cyecye ó, go ó mʉr sama yɔɔ, ebe, ecel lo, lé egwih mbi mʉr go.» 74No ó Pyɛr a ze bâʼle de mɨnkɛla. Nye e be ó: «Zyɛm ntɨʼɨ me, yé be ó me elɛɛ ó mpʉl wa! Me agʉa ba mʉr nɨ!» Cye e cye yaa, zʉm kuo ze kwaʼle. 75Pyɛr ze toŋlo sa Yesʉs a lɛɛ e nye ó: «Zʉm kuo l'apa kwaʼle, go ókɛla bɨjɔʼ bɨlɛl ó, go agʉa me.» Nye ntɔʼ pyal kʉl, ntɔʼ tʉl e l'edwe.
נבחרו כעת:
Mataos 26: ozmBad
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
© 2002, Wycliffe Bible Translators, Inc. All rights reserved.