JUAN 2
2
Jesús Kaná kasamyentuchow
1Kima junaqtanam kasamyentuta rurayarqan Kaná Galileyachow; i tseychowmi keykarqan Jesuspa maman. 2Tsey kasamyentuman inbitádu kayarqan Jesús i disípulunkunapis. 3Binu pishiptinnam, Jesuspa maman nerqan: —Manam bínunkuna kantsu.
4Jesusmi nerqan: —¿Imanankitaq noqawan, warmi? Manaran óra chámunraqtsu.
5Mamannam nerqan sirwikoqkunata: —Rurayey llapan niyáshonqeykita.
6Tseychowmi keykarqan joqta tinajakuna rumipita yakupaq, judyukunapa paqakuyánan kostumbrinkunamannow, kada tinajaman tinkorqan ishkey ó kima kuntu yaku. 7Jesusnam nerqan: —Key tinajakunaman yakuta winayey.
I winayarqan juntanqanyaq. 8Tseynam nerqan: —Kanan jorquyey, i apayey mandakoqman.
I apayarqan. 9Mandakoq llamirerqan yakupita rurashqa bínuta, pey musyarqantsu meypita kashqanta, kamachikukunaqa musyayarqanmi yaku jorqayashqanta, qayarqan qowata, 10i nerqan: —Llapan nuna puntataqa sirwikun allikaq bínutam, i upyashqa kayaptinnam, mas simpli kaqtaqa; qamqa churarátserqonki alli kaq binuta kananyaq.
11Key qallanan señalkunata Jesús rurarqan Kaná Galileyachow, i rikátsikorqan gloryanta; i disípulukunkunanam kreyiyarqan peyman. 12Tseypitanam uráyamorqan Kapernaunman, pey, maman, wawqinkuna i disípulunkuna; i tseychow wallka junaq kayarqan.
Jesús templuta limpyan
13Judyukunupa paskwan serkanam karqan; i Jesús witsarqan Jerusalenman, 14tarerqan templuchow torukuna rantikoqkunata, úshakunata i palumakunata, i trokapakoqkuna tseychow teykayaqta. 15Látiguta rurarirnam, llapanta qarqurerqan templupita, i úshakunatapis i torukunatapis; i ramakacharkorqan trokapakoqkunapa qelleyninkunata, i mesakunatapis tikrarerqan; 16i nerqan paluma rantikoqkunata: —¡Keykunata jorquyey keypita, i ama rurayeytsu Teytápa wayínta merkadu wayitanow!
17Tseynam disípulunkuna yarpáriyarqan qellqashqa kanqanta: Wayikipaq sélakiymi usharaman.
18Judyukunanam yaskirnin niyarqan: —¿Ima señaltataq rikátsiyamanki, keykunata rurarnin?
19Jesusnam yaskirnin nerqan: —Key templuta ushakáratsiyey, kima junaqchowmi sharkatsishaq.
20Judyukunanam niyarqan: —Chusku chunka joqta watachowmi rurakashqa karqan key templu, ¿qam kima junaqchow sharkatsimunki?
21Peyqa parlarqan kwerpun templupaqmi. 22Keynowpam, wanushqakunapita kawariramuptin, disípulunkuna yarpáyarqan key nishqanta; kreyiyarqan Eskritúrata i Jesús palabra nishqanta.
23Jerusalen paskwa fyestachow keykaptin, atskaq kreyiyarqan jutinman, señalkuna rurashqanta rikarnin. 24Jesusqa manam markákorqantsu peykunapeq, llapankunata reqirnin, 25manam wanarqantsu pipis nunapaq willanantaraq, peyqa musyarqanmi nunachow kanqanta.
Quechua Ancash New Testament © Peruvian Bible Society, 1992.