Lûk 3

Tsʉ̂ e Dzɔ̌n Fùghùu mùghù ŋ Kə̀zə̀

(Mat 3:1-12; Mâk 1:18; Dzn 1:19-28)

1Nûm kəla kə fə̀ ghəə̄ŋ tsughu Taebɛlùs â nùu tò eghə̄m à ghè tò tə tɛ̀ an ndàŋ tò də̀ŋ kə udwə̀ŋ am mbùʼ è Lumà, mo Pɔntyos Paelɛ̀t lǒ gɔvə̀nò ù Dzùdîa, Hɛlɔ̀d ŋ kuuwn lǒ bàʼtum mbùʼ è Galèlîi, wàatsele tɔɔŋ Felêp ŋ kuuwn lò bàʼtum am mbùʼ zə̀ Etolìa àsùghò Tə̀làkonetìs. Lìsanìa lo bàʼtum naʼ e Abìlêen, 2Anàs ghèe Kaefàs n fɔ̀e tə̀ ne. An tì kə te ko, Zə̀ kə̀ m bùghò ŋ kə̀a wò Dzɔ̌n, wɛ ù Sàkàlîa, â ghəa gho a fughu aŋ ŋgwən. 3Ù m bwìi ŋgəa tsughu nàʼà mə̀n n dzə̀m n dzə̀m n lò aŋ ŋgùŋù tə dzùghù e Dzodàn, nàʼn ndùw enyəa ghî à nî mùghù ŋ Kə̀zə̀ ghe tiī kuwnlo am bòo tə ghee, to Zə̀ kə̀ lo ghuūw maʼà bòo tə ghee, 4#Èzy 40:3-5 aŋghəa ghe tɔm naŋā am mwàʼsò kə ghùwshʉ̀gha, Èzayà enyəa,

“Ghùw ù lì bùʼu kwəla wò kə̀bɔ̀ŋ aŋ ŋgwən enyəa,

‘Fəghaan naŋa nlǒ dzì è Mughu ù te,

nə̀ghàsò nlǒ dzǐi ŋ wə̄n mò.

5Waa tə ki alegə̀mà èghue tə dzə̀m.

Kaʼà tə̀ tughoon to, àsùghò tə̀ ne to, tə ki aleseēn tsughu.

Ŋguɛlɛ u tədzǐi u nəghàsò èghue.

Dziī tə bɔʼɔ̀bɔ̀ʼ tə kuŋē sughò èghue. 6Ghî ghə̀là à dzə̀m lo e koʼō nduw ghəa Zə̀ kə̀ bəghaā səā wô ghî ghò a te am bòo tə ghee.’ ”

7 # Mat 12:34; 23:33 Aŋghəa ghî à təŋò sə wo alebùghò enyəa Dzɔ̌n fughu ghee â mùghù ŋ Kə̀zə̀ mò, ù n dzɛ̀ â ghee enyəa, “Ghɛ̀ fwi wə̄n, à ghɛ̀ bɔŋ tsʉ̀ ndùghò enyəa ghɛ̀ nɔti ndzəgha kəla kə bughòo lo a? 8#Dzn 8:33E ghəəŋ nduw nlò ghəa ghəla a lo aledèe tsughu enyəa ghɛ̀ ŋ ghəa ghɛʼɛ à biigh a ti màʼà, kà nlò kaʼ tsùghù dzə̀ ghɛ̀ è kəaa kaŋlo enyəa, ‘Abə̀làhâm lǒ tsele waʼa.’ Ǹ dzâa wô â ghɛ̀ enyəa, to Zə̀ kə̀ nîi kɔʼ tia ghən kə fənsò fughuu kɔʼ awɛ a te â Abə̀làhâm. 9#Mat 7:19 Ndzàm bù lò nû êzə̄ŋ ghe shia naŋa an chi e fəkàʼ, è ləmlo enyəa mo kâʼ fə̀ yo alemʉ twam ù dzûŋ wò, a m gbò kpàa màʼà kàʼ fə te fo.”

10Ghî yi m bvʉ â wə̄n enyəa, “A lo to a e ghəŋlo ênzə̂n êzə̄ŋ à?”

11Ù m bɛ̀lɛ̀ ndùw ghee enyəa, “Abugho ghùw wəla ù ki ndzʉ to tə bə̀ghà ù dzùghù tsughu ghèe ghùw wəla ù ki yo, wəlà ù ki fʉghàzəa wo, ù bɔɔ̄m ghəə̄ŋ sughò alo kətə̀ŋ.”

12 # Lûk 7:29 Ghê dzə̀akə̀mwàʼsò ghəla ghe mò bughò sugho alebùghò nî mùghù ŋ Kə̀zə̀, ghe m bvʉ â wə̄n enyəa, “Wàdè, ghàʼ lo aleghəŋlo ênzə̂n?”

13Ù n dzɛ̀ â ghee enyəa, “Kà nlò è niī tsəghasō fəgha kəla lâŋ kə̀ bvʉā.”

14Sùghugòʼ tə̀ m bvʉ̀ ndùw sùghò â wə̄n enyəa, “Yia a bughò ghaʼ, ghàʼ è ghəŋlo ênzə̂n?” Ù n daŋso dzɛ̀ â ghee enyəa, “Kà è bɛlɛbəghaa fʉgha u aghì wò, kà è laŋā kwūu ghî ghò, ghɛ̀ ni tsughu sugho enyəa fəghà fəla ghe tsəā ghɛ a te fə kpe nû.”

15Aŋghəa ghî ghən màʼa fə̀ lo mo ghe ləəm tsə̀ghà ghùw ù lì, tuw kə m kpuuw ghee a dzə̀m kùu ndùw Dzɔ̌n enyəa zêekwò à è lo wə̄n Bəghambī. 16Dzɔ̌n m bɛ̀lɛ̀ ndùw ghee a dzə̀m enyəa, “Ŋ̀ ghɛ fughuu â mùghù ŋ Kèzə̀ mò; ghùw wəla ù ghaʼ tsəghà mugho, ù bùghòo nù, Ŋ̀ kâ bùʼ tsò kɔ̀ʼ ŋgàlà alezè gbaʼ u təgùw u wə̄n; ù lô ghɛ̀ kuuwn sùuw tsùghu an Zuʼ tə̀ Zɔlɔ to à wə̀n mò a te. 17Ù lò ko â kwònɛ̀lɛ è wə̄n aŋ ghu alefoōn nughù kɔʼ təŋgòʼ an chìndughu, ù fwə̀là naŋā ndûw an tɔ̀e a kə̀twɛ, ù daŋso kuuwn kâaŋ kpâa ndûw ghùw u te wo aŋ wə̀n wəla u nyəə̄m tsəghà yo.”

18Dzɔ̌n n zoʼnlo aghì an ndə̀mà tə tədzǐi aŋghəa ù mò naʼn Làbə̀là è Dzùŋ a te, ù m buʼu sùghò ghee aghu ko enyəa ghe kuūwn kɔʼ mughù e ghee. 19#Mat 14:3, 4; Mâk 6:17, 18 À n lo êzə̀ mò Dzɔ̌n maā Hɛlɔ̀d wəla ù fə̀ lo də̀ŋ kò bûʼ shwən enyəa ù tsʉ̀ʉn nì kɔ̌ʼ Hɛ̀lodìa wì ù wàazə̀ ù wə̄n. Mò ù maā wə̄n shwən sùghò aŋ ghəa a wə̄n à biigh à li gho. 20Hɛlɔ̀d m fəghaan kùeen kpeʼe tsughu aŋ ghəa a wə̄n à biigh a te gho enyəa, ù bùghò nì dzə̀n ndùw Dzɔ̌n an ndùghùtsāʼ.

Ghe fughu Yɛso â mùghù ŋ Kə̀zə̀ mò

(Mat 3:13-17; Mâk 1:9-11)

21A m bùghò Dzɔ̌n fughu mɛʼɛ̀ tsughu ghî ghò â mùghù ŋ Kə̀zə̀ mo, ù n daŋso fùghù tsùghù sùghò Yɛso â mùghù ŋ Kə̀zə̀ mò. Aŋghəa Yɛsò so gɔ̂ŋlo, wala kə n tsʉ̀ è tsughu. 22#Dzs 22:2; Sms 2:7; Èzy 42:1; Mat 3:17; Mâk 1:11; Lûk 9:35 Zuʼ tə̀ Zɔlɔ tə n sə̀ tsùghù wò aŋ ghùe wə embùŋu, tsughu maa tsughu an tuw kə Yɛso, ghe n zuw dzə̀ è ghùw è sə tsughu wô alo Kəwālā, dzàa tsùghù enyəa, “Ghù lǒ wɛ ù fə̀ŋ waŋā, ghù ghə̌əŋ nù yìa Ŋ̀ ŋgeē duʼnlo.”

Ghê tselètselè Yɛso

(Mat 1:1-17)

23Yɛso fə̌ fwàʼ kə wə̄n kə kaʼ tsughu alefwàʼ mò ù lǒ ghə̀m n tənùu n təgha, ghe ŋ kwo wə̄n tǒ wɛ ù Dzùghùsî, Dzùghùsî n lo wɛ ù Èle. 24Èle ŋ kuuwn lǒ wɛ ù Matàt, Matàt n lo wɛ ù Lɛvì, Lɛvì n lo wɛ ù Melki, Melki n lo wɛ ù Dzanàe, Dzanàe n lo wɛ ù Dzùghùsî, 25Dzùghùsî n lo wɛ ù Màtatìas, Màtatìas n lo wɛ ù Ɛmòs, Ɛmòs n lo wɛ ù Nahùm, Nahùm n lo wɛ ù Ɛslì, Ɛslì n lo wɛ ù Nagàe, 26Nagàe ŋ kuuwn lǒ wɛ ù Mâat tɔɔŋ wɛ ù Màtatìas, wɛ ù Sɛmɛ̀n, Sɛmɛ̀n n lo wɛ ù Dzosɛ̀k, Dzosɛ̀k n lo wɛ ù Dzodà, 27Dzodà n lo wɛ ù Dzǔanàn, Dzǔanàn n lo wɛ ù Lɛsà, Lɛsà n lo wɛ ù Zɛ̀lubàbɛ̂l, Zɛ̀lubàbɛ̂l n lo wɛ ù Shɛltyɛl, Shɛltyɛl n lo wɛ ù Nɛlì. 28Nɛlì n lo wɛ ù Mɛlki, Mɛlki n lo wɛ ù Adì, Adì wɛ ù Kosàm, tɔɔŋ wɛ ù Ɛlmàdàm wən ù fə̀ lo wɛ ù Ɛ̂ɛl, tɔɔŋ 29wɛ ù Dzoshùa, Dzoshùa n lo wɛ ù Ɛlěɛzà, Ɛlěɛzà n lo wɛ ù Dzolìm, Dzolìm wɛ ù Matàt, Matàt n lo wɛ ù Lɛvì, 30Lɛvì n lo wɛ ù Simìon, Simìon wəla Dzudà fə̀ dzə, Dzudà ŋ kuuwn lǒ wɛ ù Dzùghùsî wəla tsele fə̀ lo Dzonàm tɔɔŋ wɛ ù Èlǐakìm, 31Èlǐakìm wɛ ù Mìlìa, Mìlìa wɛ ù Mɛnà, Mɛnà wɛ ù Màtatàt, Màtatàt wɛ ù Natàn, Natàn wɛ ù Dɛvìd, 32Dɛvìd wɛ ù Dzɛssɛ̀, Dzɛssɛ̀ wɛ ù Obɛ̀d, Obɛ̀d wɛ ù Bôaz, Bôaz wɛ ù Salà, Salà wɛ ù Nashɔ̀n, 33Nashɔ̀n wɛ ù Aminadàb, Aminadàb wɛ ù Admìn, Admìn wɛ ù Anì, Anì wɛ ù Hɛzlɔ̀n, Hɛzlɔ̀n wɛ ù Pɛ̀lɛ̂z, Pɛ̀lɛ̂z wɛ ù Dzudà. 34Dzudà n lo wɛ ù Yàkɔ̂b, tɔɔŋ wɛ ù Aezìk wəla ù fə̀ lo wɛ ù Abə̀làhâm. Abə̀làhâm n lo wɛ ù Tɛlàʼ wɛ ù Nahòl, 35Nahòl wɛ ù Sɛlùk tɔɔŋ wɛ ù Lûu, Lûu n lo wɛ ù Pɛ̀lɛ̂k tɔɔŋ wɛ ù Ɛbà wəla tsele fə̀ lô Shɛlàʼ, 36Shɛlàʼ wɛ ù Kɛnàn, Kɛnàn wɛ ù Afazàd, Afazàd wɛ ù Shɛ̂m, Shɛ̂m wɛ ù Nôa, Nôa wɛ ù Lamɛ̀k, 37Lamɛ̀k wɛ ù Mɛ̀tùwsɛlàʼ, Mɛ̀tùwsɛlàʼ wɛ ù Ɛnɔ̀k, Ɛnɔ̀k wɛ ù Dzàlɛ̂d, Dzàlɛ̂d wɛ ù Màhàlalɛ̀l, Màhàlalɛ̀l n lo wɛ ù Kɛnàn, 38Kɛnàn n lo wɛ ù Enòs wəla tsele fə̀ lô Sɛ̂t, Sɛ̂t wəla Adàm fə̀ dzə. Adàm n lo wɛ ù Kə̀zə̀.

נבחרו כעת:

Lûk 3: agq

הדגשה

שתף

העתק

רוצים לשמור את ההדגשות שלכם בכל המכשירים שלכם? הירשמו או היכנסו

2020

מידע נוסף אודות To kə Kəzə̀ kə̀ Fughu ko