Mâk 10
10
Yɛso zòʼnlo àghì aŋ ghùe è niī zo àsùghò alesɛ̀ɛ
(Mat 19:1-12; Lûk 16:18)
1Yɛso n daŋso zə̀ghàa tsùghu Kàpɛnùm, nùghù ndùw am mbùʼ è Dzùdîa, ndùw dàŋ sə kɔʼ dzùghù è Dzodàn, ghî ghə̀ n tsuŋ kpeʼe wò sùghò a vʉ̀a wə̄n; ù ŋ kàʼ ndùw sùghò ghee a lùʼù zoʼn wo aŋ ghəa ù kiī ghəə̄ŋ tsəgha.
2Ghî a Falàsîi à li ghə n ndùw bùghò alebùghò chwəlà kôʼ Yɛso, bvʉ â wə̀n à, “Lâŋ kə̀ boo nù enyəa ghùw sɛ̀ɛ ghèe wì à?”
3Yɛso m bɛ̀lɛ̀ tsùghu ghee enyəa, “Musî fə̀ â ghɛ̀ laʼa dzɛ êndūghō a?”
4 #
Lwa 24:1-4; Mat 5:31 Ghe mo enyəa, “Lâŋ kə Musî kə̀ boo nù enyəa ghùw lò nu aletɔɔ̄ tsughu kəmwàʼsò enyəa e n sɛ̌ɛ ghèe wì, ù dzùu səā kɔʼ wə̄n.”
5Yɛso ŋ kuūwn dzɛ̀ â ghee enyəa, “Musî fə̀ ghəa ghən tɔm tsughu â ghɛ̀ bòʼ ghɛ̀ ŋgee də̀là â fə̀ŋ tò. 6#Dzs 1:27; 5:2Alekuūwn nîi nughù wô aŋ ghəa mbī fə̀ kaʼ wo, ‘Zə̀ kə fə̀ bɔm tsughu wìnûu à wìzən.’ 7#Dzs 2:24 ‘Zən lǒ e ghee wìnû ki alezəghaan taʼn tsughuu tsele ghèe zə̀, ù n ndùw təmdzəəŋ kɔʼ ghèe wì, 8ghee a bə̀ghà n dòʼò tsùghù kəfəgha kə̀ mɔ̀ʼ.’ Ghe fi kôom yò dzə̂ a bə̀ghà, ghe lo ko kəfəgha kə̀ mɔ̀ʼ. 9À fi lo enyəa fəgha kəla Zə̀ kə̀ lo mo kə n tə̄mdzə̄ŋlō, e kwo ghùw lò se gbôo sɛ̀ɛ nù.”
10A m bùghò ghe nduw ebàm an ndughu, tsə̀təndə̄ghā tə wə̄n tə ŋ kòom bvʉ kpeʼe ndùw wə̀n â ghəa ghən. 11#Mat 5:32; 1Kò 7:10, 11 Ù n dzɛ̀ â ghee enyəa, “Ghùw wəla ù dzùm sə kɔʼ wī, nì tsùghu ù nùghù, e fi lo enyəa ù ŋ ghəəŋ boon nù aletsè mughùndughu ù wə̄n; 12abugho wìzən kuūwn sə kɔʼ sugho num, nì tsùghu ghùw ù nùghù, ù fi ghəəŋ boon nù aletsè nùm.”
Yɛso bùghùsô wɛghêtùghu
(Mat 19:13-15; Lûk 18:15-17)
13Ghî ghə̀ m bughòo â wɛghêtùghù gho enyəa to Yɛso mò mɔ̂ɔ tsughu ghee, ù bughūsō tsughu ghee; tsə̀təndə̄ghā tə wə̄n tə ŋ kee naaŋ ndùw ghee. 14Yɛso ŋ kòʼ ghəa ghən, nʉghà wə̀ m pfʉ wə̄n, ù n dzɛ̀ â ghee enyəa, “Zə̀ghaa màʼa nlò wɛghêtùghù gho ghe bughò kôʼ mùghò; kǎ nlǒ ghee bâʼ; nu fɔ̂e u Kəzə̀ ù lo â ŋgòʼ è àghì tò ghən. 15#Mat 18:3M̀ fɛ kùu dzàa wò nù â ghɛ̀, ghùw wəla ù dòʼŋkè nyə am fɔ̀e u Kəzə̀ tǒ wɛ̂ɛtùghu, ù kè tsə̀ghà nyə̀ kòʼ yò a te.” 16Ù n daŋso bòʼn kɔ̀ʼ wɛghêtùghù a te gho, mɔ̀ɔ tsùghuu ko chìa alo kətūw, fughu tsughu ghee â bughuun zo.
Ghùw ù kǔu ù lì bùghò kòʼ Yɛso
(Mat 19:16-30; Lûk 18:18-30)
17Ghəa Yɛso zə̀ghàan tsughuu â nùghù kò, ghùw ù lǐ n nyə̀ŋ ndùw tə̀m ndùw tuw wə anyʉ̄ a vʉ̀a wə̄n, bvʉ â wə̄n enyəa, “Wàdè ù dzùŋ, Ŋ̀ ki aleghəə̄ŋ tsughu êndūghō, Ǹ zə etsɛlɛ̀ lo a?” 18Yɛso m bvʉ â wə̄n enyəa, “Ghù mùghò tɔŋlo enyəa Ǹ lo ghùw ù dzùŋ aŋ kwò à? Ghùw ù lì yo dzə̄ ghùw ù dzùŋ, à gɔ̀ʼɔ̀ ko Kə̀zə̀. 19#Ksm 20:13; Lwa 5:17; Ksm 20:14; Lwa 5:18; Ksm 20:15; Lwa 5:19; Ksm 20:16; Lwa 5:20; Ksm 20:12; Lwa 5:16 Ghù kwò nû lwâŋ u te wo; lâŋ kəla kə dzɛ̂ enyəa, ‘Kǎ ghùw wì,’ kəla kə dzɛ̂ enyəa, ‘Kà è səa nuŋlo ghɛ̀ à nùm ù ghùw ŋkāa wi ù ghùw,’ kəla kə dzɛ̂ enyəa, ‘Kà è tsɔŋɔ,’ kəla kə dzɛ̂ enyəa, ‘Kà è boom fughu gha gho,’ kəla kə dzɛ̂ enyəa, ‘Kà è fwəlā sə a aghì ghò am fʉ̄ghā u ghee,’ kəla kə dzɛ̂ enyəa, ‘E zuuw nduw â tsùghò àsùghò â zùghù.’ ”
20Tûw vʉ n dzɛ̀ â wə̄n enyəa, “Wàdè, M̀ fɛ noo naŋa sə̀ kɔ̀ʼ wò kô lwàŋ wən wo ù dzə̀m.”
21Yɛso n lɛɛn ko wə̄n enyə, è ləgha, dzɛ̀ â wə̄n enyəa, “Ghù làʼà èghəa è mɔ̀ʼ, ndǔw fěe tsughu fʉgha wəla ghù ki u dzə̀m, ghù dzughuu fughu nduw kua u te wo â ghì à laa gho, ghù lo e kūu alo kəwālā; ghù daŋso bugho doʼō ghàʼ à ghù; ghù è lo tsə̀ndə̄ghā zaŋā.” 22A m bùghò tûw vʉ zuw tsughu ghəa zən, sʉ wə dzə dòʼò tsùghu wə̄n enyə, ù n nughùun ndùw èbàm alo esē; nu ù fi ŋge ki ufʉgha.
23Yɛso n nùghù lɛ̌ɛn kaaŋ wò tsə̀təndə̄ghā tə wə̄n, dzɛ̀ â ghee enyəa, “À tɔ̀ʼ lǒ tùghùtùghù kə eghəa â ghì à kuu gho aletsə̀ghà nyə am fɔ̀e ù Kəzə̀!”
24Dzughu zə n zūm tsə̀təndə̄ghā tə wə̄n aŋ ghəa ghe zuw tsughu shwāʼ wə̄n. Yɛso ŋ kòom dzɛ̀ tsùghù â ghee enyəa, “Ghəa e tughu, tò ghəa è tsəghāa nyəa zən am fɔ̀e ù Kəzə̀ wɛ ghaŋā gho! 25E bughunlo â kɔʼdzəm#10:25 Kɔʼdzəm: Kə̀kə̀anyòm aletsə̀ghàa nyə an sə e fəsāʼ tsə̀ghàtàʼà aŋ ghəa ghəla ghùw kǔu aletsə̀ghàa nyə am fɔ̀e ù kəwālā.”
26Tuw kə ŋ kè lɔ̀ʼso kpùw ndùw ghee enyə, ghe m bvʉ enyəa, “À kǔuwn lò ndugho alezə̄ kətuw à?”
27Yɛso n lɛɛn ko ghee enyə, nùghù dzɛ̀ tsùghù enyəa, “Â ghì ghò e yo alesə̄, à kǔuwn yo dzə̂ êzə aŋ ghùu Zə̀ kò; aŋ ghùu Zə̀ ko ghəa ghə̀n à dzə̀m lò nû alesə̄.”
28Pità n də̀ghàan tsùghù aledzɛ̀ â wən enyəa, “Kòʼô, ghàʼ fɛ lǒ a m fʉgha waʼa wo u dzə̀m zəghàa tàʼà ndùw, nùghù wò a bǎà ghù.”
29Yɛso n dzɛ̀ tsùghù enyəa, “M̀ fɛ kùu dzàa wò nù â ghɛ̀, abugho ghùw zə̀ghàa maʼà nduw ndughu è wə̄n ŋkāa waazə̂, ŋkāa tsele, ŋkāa zə̂, ŋkāa wɛ a wə̄n, ŋkāa esum, bòʼ ghəa zaŋa àsùghò aŋ ghəa e làbəlà è dzùŋ zə̀n, 30ghùw ù te lo kele tə̀ndughu, ù lo kelê waazə̂, ghê zə̀ àsùghò ghê tsele, àsùghò wɛ gho, àsùghò sum zo ndə̀m tò mughu fədzughù an tì kə̀n àsùghò an tì kəla kə lô â sə ko ù lo zəā yô tsɛlɛ̀ zò, ù è ke koʼo sugho yo tsû wò. 31#Mat 20:16; Lûk 13:30 Ndə̀m zəla è kuūwn lo â sə ko êzə̄ŋ, ghe lo fèe kə̀bam, ghəla ghe fê bam ko êzə̄ŋ, ghe lo e lo â sə ko.”
Yɛso kùeen kpèʼe sə̀ wò ghəa ghə evʉ a wə̄n
(Mat 20:17-19; Lûk 18:31-34)
32Yɛso ŋ kɔʼɔ ndùw an Yɛ̀lusalɛ̀m ghèe ghê tsə̀təndə̄ghā tə wə̄n to. Ù n ndûw â sə ko. Tsə̀təndə̄ghā tə wə̄n tə n ndûuw êzə̀ mo dzughu e zuu ghee, fə̂ŋ tə̀ n tsəəŋ sùghò ghì ghəla ghe mò bughōo a bàâ ghee. 33Ù n dzɛ̀ â ghee enyəa, “Ghɛ̀ ghɛ̀ɛ, sɛ̀ fɛ êzəŋ kɔʼɔ ndùw an Yɛ̀lusalɛ̀m, a fia ghe lo feēn fughuu tsughuu Wɛ ù Ghùw â Tuw u təfɔ̀e wò ghèe ghê dèekə̀làŋ, ghe tsəghàsò tsughu kəlâŋ enyəa ghe wi wə̄n ghe daŋso nîi fughuu ndûw wīn â Tòʼò e tə̀dzûu zò, 34ghe lo e təma wə̄n â nduw, ghe tsəən tə̀ghà mò a zəŋò wə̄n, ghe te wə̄n alo təkwùu, ghe buū wiī tsughu wə̄n; ù kè daŋso kôom nughù kɔʼɔ̄səā wò alo evʉ̄ bugho tsuʼ n tsəghà tsughu n tə̄ghā.”
Fəgha kela Dzɛ̂ms ghèe Dzɔ̀n bvʉā
(Mat 20:20-28)
35Dzɛ̂ms ghèe Dzɔ̌n, tɔ̂ɔŋ wɛ a Zɛbɛ̀dîi; ghe n tsə̀ghàsə̀ è wo, dzɛ̀ â Yɛso enyəa, “Mughùbè, ghəa è li e lo nû ghàʼ mô ləghaa enyəa ghù biaan fughu tsughu â ghàʼ bugho ghàʼ lô alebvʉ̄.”
36Ù m bvʉ â ghee enyəa, “Ghɛ̀ ləghaa enyəa M̀ fwâʼ kə̀ kwò â ghɛ̌ a?”
37Ghe dzɛ̀ â wə̄n enyəa, “Naŋa tsughu ghaʼ â bəla zo am bùghu zəghà abugho ghù kè doʼ an ndàŋ è kədə̀ŋ zəghà; ghùw waʼa u mɔ̀ʼ aŋ kwē wʉ̂a ù təma wo, u mɔ̀ʼ aŋ kwē ù kwû wò.”
38 #
Lûk 12:50
Yɛso ŋ kòom dzɛ̀ â ghee enyəa, “Ghɛ̀ bûʼ kwò yo fəgha chìa ghɛ̀ bvʉa â ghè kò. Ghɛ̀ lo nû alefala aŋghəa Ǹ lo fanlo a te, ghɛ̀ ke kpuw sugho ŋgòʼ è evʉ zəla Ǹ lo kpuūw ghè zò à?”
39Ghe m bɛ̀lɛ̀ ndùw wə̄n enyəa, “Ghàʼ lo nû.” Yɛso n dzɛ̀ â ghee enyəa, “Ghɛ̀ lo nû alefala aŋghəa Ǹ lo fanlo a te, ghɛ̀ kpuw ŋgoʼ è èvʉ zəla Ǹ lo kpuūw ghè zò.
40Aledòʼò aŋ kwe waŋā ù təma wo ŋkāa alô ù kwû wò, à kǔuwn yò dzə̂ mugho alefughu daʼa kə te ko, bəla e tə e lɛ̂ɛn ghì ghəla Zə̀ kə̀ naŋā â ghee.”
41A m bùghò tsə̀təndə̄ghā tə̀ li tì èghəm zuw ndûw ghəa yì, ghe ŋ kàʼ ndùw nʉ̀ghà ù pfʉso wo a zəŋò Dzɛ̂ms ghèe Dzɔ̌n. 42#Lûk 22:25, 26 Yɛso fi tɔŋɔ naŋa tsughu nu ghee, dzɛ̀ â ghee enyəa, “Ghɛ̀ kwo nû enyəa Toʼò zəla e nîi ghue e ghee zo enyəa ghe lo udwə̀ŋ lèghaa aletsəghaso kaaŋ lwâŋ wò â ghì a ghee gho. Ghî a ghee à ne ghəla ghe lô tuw am bùʼ ufwàʼ yia ki dwaʼa wo a zəŋò ghì ghəla ghe lɛnlo. 43#Mat 23:11; Mâk 9:35; Lûk 22:26 E ki dzə yo alelo êzə̀ am bvʉa zɛʼɛ̄, bòʼ enyəa ghùw wəla ù ləghaa aledòʼò kə̀tuw ki alelaām doʼò tsughu fəkɔ̂ɔ â ghɛ̀ a dzə̀m. 44Ghùw wəla ù ləghaa aledòʼò kə̀sə ki aledòʼò tsughu kəkɔ̂ â ghɛ̀ a dzə̀m. 45Tɔŋlo enyəa Wɛ ù Ghùw ka mo bughò dzə̀ enyəa ghî ghə̀ è fwaʼā â wə̄n, ù mò laam bugho aledòʼò fə̀kɔ̀ɔ â ghì ghò, àsùghò alefughūu ndûw tuw kə wə̄n alezuū sə tuw u è ndə̀m è àghì.”
Yɛso ghə̌əŋ Bàtimòs wəla ù mò fô doʼō enyəa ù è koʼō luʼū to
(Mat 20:29-34; Lûk 18:35-43)
46Ghe n daŋso bùghò an Yɛ̀lekò; a m bùghò Yɛso nùghùun səā nduw an Yɛ̀lekò ghèe ghê tsə̀təndə̄ghā tə wə̄n to, à saʼ kə aghì kò. Bàtìmayòs, ghùwfǒo ù lì ù fə̀ nɔɔ̄ nɔe ko, wɛ̀ ù Tìmayòs, n doʼ am bùghu e dziī. 47A m bùghò ù zuw tsughu enyəa à lò Yɛso, ghùw Nazalɛ̀t, ù ŋ kaʼ tsughu bɔ̂ŋ kə̀ buʼu ko enyəa, “Yɛso, Wɛ̀ ù Dɛvìd, sə kwuso se zo a zəŋò mùghò a!”
48Ndə̀m è àghì ŋ kēe ndùw wən enyəa ù dòʼò mɔŋ; ù kôom fə̀ghaan kuūwn màʼn sə̌a kɔʼɔ kə̀bɔ̀ŋ enyəa, “Wɛ̀ ù Dɛvìd, kwuso se zo a zəŋo mùghò!”
49Yɛso n daŋso tee è tsughu, dzɛ̀ tsùghù enyəa, “Tɔŋɔ wò nlǒ wə̄n.” Ghe n tɔŋɔ wò ghùwfǒo vʉ̀, dzɛ̀ â wə̄n enyəa, “Dzə̀la fə̀ŋ; nùghu kɔʼɔ̀, u vʉ̂a ù tɔɔ̄ŋ ghû.”
50Ù m wele màʼà ndùw ndzʉ tə wə̄n, zə̀ghà nùghù kɔ̀ʼ ènyə, bùghò kòʼ wò Yɛso.
51Yɛso n dzɛ̀ â wən enyəa, “Ghù lə̀ghàa enyəa Ǹ dzə̂ ênzə̂n â ghǔ a?” Ghùwfǒo vʉ n dzɛ̀ â wə̄n enyəa, “Mughubè, Ǹ ləghaa alekoʼō luʼū to.”
52Yɛso n dzɛ̀ â wə̄n enyəa, “Nùghù luʼū təghà tò; boo zəghà zə̀ ŋ ghù baŋlo.” Sə a wə̄n ghə n daŋso tsʉ̀ è kɔʼ, ù n nùghù ndùw ghèe Yɛso an dziī.
