Mâk 9
9
Ghùw wəla ù bàa yo sɛ̀, ù tǎʼ sɛ̀
1Yɛso ŋ kə̀a ndùuŋ ndùw â ghee enyəa, “Ǹ dzâa wô â ghɛ̀ enyəa ghî à lo nû fɛ êzə̄ŋ mo vʉ e kê ghee â mbàŋ sɔ̂ŋ fùghù yo mo ghe kâ kòʼ tsùghù dzə̀ ghəa Fɔ̂e ù Kəzə̀ ù bughōo a te à daʼa ko.”
Yɛso kùwnlo èkoʼ
(Mat 17:1-13; Lûk 9:28-36)
2 #
2Pi 1:17, 18 Tsuʼ mə̀ n tsə̀ghà tsùghu tǔu, Yɛso n nì kɔ̀ʼ Pità, nì kɔ̀ʼ Dzɛ̂ms àsùghò Dzɔ̌n, kɔʼ saŋe dòʼò ndùw ghèe ghee an də̀ghàa kə ukwàʼ kə̀ li ko, ghee ko. Ù n nùghù kǔuwn kɔʼ ekôʼ fughu an sə kə ghee, 3ndzʉ tə wə̄n tə n nùghù fə̀m dòʼò tsùghù ènyə, nyəghaan ndùw an tùʼ è nyəghaan zo, mò ghùw tsò yò fɛ am mbī ù lò alesùw tə̀ndzʉ tə e lɔʼso zɔlɔ êzə̀. 4Elaedzà n nùghù gbə̀n sə kɔʼ fughu an sə kə ghee ghèe Musî, ghe ŋ kə̂aa àghəa ghèe ghêe Yɛso. 5Pità fi nughù dzɛ̀ nù â Yɛso enyəa, “Wàdè, e dzɔ̂ɔ nù aŋ ghəa ghàʼ nyɔ̂ʼ lò fɛ; to ghàʼ mô tsuŋū kɔʼ m pfʉ̌a n təgha, fə mɔ̀ʼ â ghù, fə mɔ̀ʼ â Musî, àsùghò fə mɔ̀ʼ â Èlaedzà.” 6Ù fə̀ ghəa ghən dzɛ tsughu, ù màʼa fə̀ biso kwo yo ghəa zəla ù lò alekə̀a, tɔŋlo enyəa ghe mǒ fughu lo ko alo etsə̄ŋ.
7 #
Mat 3:17; Mâk 1:11; Lûk 3:22 Mbàʼ è lǐ n daŋso nùghù bvʉ̀ ŋgwùu tsùghu ghee, dzə̀ è ghùw ù lì n sə̀ wò fughu am mbàʼ enyəa, “Wən lǒ wɛ waŋā ù tsùʼu; e zuuw nduw nlò â wə̄n!” 8Ghe n nùghù tsàaŋ lɛ̌ɛn kaaŋ wò tə̀luʼū, ghùw ù lì ŋ kôom yǒ ghèe ghee, ǎ ŋ kôom lò ko ghèe ghêe Yɛso.
9Ghəa ghe tsughuu wo ebàm an ukwàʼ, Yɛso m fughu tsughu ghee â làŋ kò enyəa ghe lô dzâa fəgha kəla ghe koʼ â ghùw, à gɔ̀ʼɔ̀ ko abugho Wɛ ù Ghùw kè kɔʼsə kɔʼ alo evʉ̄. 10Ghe n nàn nàŋa tsughu kô ghəa a te gho aŋ ghùe e ghee, kuuwn kəŋo ko kə̀tuw a te enyəa alekɔʼɔ̄sə̄ alo evʉ̄ sô yia moʼnlò èndūghō. 11#Mal 4:5; Mat 11:14 Ghe fi nughù bvʉ̀ ndùw nù â wə̄n enyəa, “À kǔuwn lǒ kwò ghê dèekə̀làŋ sò kə̂a enyəa Èlaedzà kì àlebùghò dzə̂ â sə ko a?” 12Ù m bɛ̀lɛ̀ tsùghù enyəa, “Elaedzà kùm bùghòo ko nǔ esə̄ alebùghò kôom bəghāa tiso wô àghəa à dzə̀m. Ghe laʼa kuuwn tɔm êndùghò kùu ndùw Wɛ̀ ù Ghùw, ghəa ù lo zuūw tsughuu ŋgōʼ, ghe ghəə̄ŋ tsughu ù dòʼò tsughu chɔʼchɔʼ u ghueetsə̄ wo a? 13Ǹ so ŋ kuūwn dzâa wô a ghɛ̀ enyəa Elaedzà maā bughò ghe n tsôo ghə̌əŋ ndùw ko a zəŋò wə̄n aŋ ghəa ghe tsə̂m tsughu, ghəa mwàʼsò kə̀ deē kùu ndùw wən.”
Yɛso shùaa sə̌ zʉ̀ ù biigh wo a zəŋò wɛ ù lì
(Mat 17:14-21; Lûk 9:37-43a)
14Ghe m bùghò kòʼ wò tsə̀təndə̄ghā tə̀ li tì mo saʼ kə ghì kə̀ ŋ ghee dzə̂əŋ ŋgə̀a kɔ̀ʼ, mò ghèe ghê dèekə̀làŋ yia baāŋ fom to. 15Ghəa saʼ kə aghì chì kə̀ dzə̀m daŋso nughù kôʼ ndûw Yɛso ènyə, dzughu zə n zum ghee, ghe n nùghù tə̀ŋò nyəŋ kəŋo ndùw alendùw tɔɔ̄ŋ zuw wə̄n. 16Ù m bvʉ â ghee enyəa, “Ghɛ̀ bâaŋ fom tə kwò tò fɛ a?”
17Ghùw ù lì m bɛ̀lɛ̀ sə kɔʼ wə̄n fughu an saʼ kə aghì chi ko enyəa, “Wàdè, M̀ mô nì wò wɛ̀ waŋā ù nùu a vʉ̀a ghù mò ù ki zʉ̀ ù biigh ù li wo, u ghəŋlo vʉ̀a ù kə̀a yô ghəa gho; 18abugho u nî kɔʼ wə̄n, wə n tə̄m tughu wə̄n a ghuu; tsə̀f zə̀ n səa wò wə̄n alo edzughu, ù n tsôo pfʉ̌a ko àsɔŋ; ù n tàn dòʼò è kɔʼ, yìa Ǹ dzɛ̂ enyəa tsə̀təndə̄ghā təghà tə̀ shʉ̂aa səā tsughu, ghe yia ghâ ke.”
19Ù m bɛ̀lɛ̀ tsùghu ghee enyəa, “Ghɛ̀, ghê làʼà tə̀ fə̀ŋ a nɛ ghən aŋ ghəa e Kəzə̀, Ŋ̀ kôom bùʼ kì ko ntsuʼ n sǒʼ sɛ̌ a? Bùghò â wən fɛ.” 20Ghe n daŋso nì fùghù ndùw wɛ̀ ù te â Yɛso. A m bùghò zʉ̀ u te u kôʼ kɔʼ Yɛso, wə n nùghù kwù kɔ̀n tsùghu wɛ vʉ̀, ù m bvʉ̀ bə̌əŋ kɔʼ enyə a ghūeetsə̄, tsə̀f zə̀ n səa wò wən alo edzughu. 21Yɛso m bvʉ â tsele enyəa, “Ghəa a te a mò a zəŋo wən kaʼ zən?”
Ù n dzɛ̀ enyəa, “Ghəa a te a mò kaʼ mò nǎam too nù. 22Kə bugho kə m bòʼò màʼà nyə̀ ndùw wən alo etsə̄ àsùghò alo mmùghu an nə̀gha è li zo, aletsoō wi wə̄n; abugho ghù kpaʼ lo aleghə̂əŋ ghə̀a è li zo, ghù ŋ kwuso tsughu ese a zəŋò ghàʼ, yòsò kɔ̀ʼ ghaʼ.”
23Yɛso m bvʉ â wə̄n enyəa, “À lǒ kwò ghù sə̀ bvʉ enyəa bugho M̀ kpaʼ lô a! To a ghə̂əŋ ghəa ghə̀n à dzə̀m â ghùw wəla ù boō fughu tsughu dzə̄.”
24Tselè ù wɛ̂ɛtùghu vʉ n daŋso nùghù dì sə̀ wò enyəa, “Mùghò m boo fughu, yòso kɔʼ mugho abugho Ǹ taʼkè buʼù tɔʼɔ̀ boō mɛʼɛ̀ ko nù!”
25A m bùghò Yɛso kòʼ tsughu enyəa ghî à nyəŋo zùuŋ wò nù, ù n zùghù tsùghu zʉ̀ ù biigh vʉ̀ enyəa, “Ghǔ zʉ̀ wəla ghù kùʼsò ghî ghò, ghəəŋ sùghò enyəa ghe doʼò ùmùʼ, Ǹ so Ǹ dzâa wô â ghù enyəa, zəghaa tsughu wə̄n, e kwo ghù ke kôom nyəa koʼò sughò a zəŋò wə̄n!”
26Zʉ̀ u te wə ŋ kwù kɔ̀n tsùghu wɛ vʉ̀, ghəa ù dì sə wô ènyə, wə n lɔʼso zàʼ wə̄n enyə a ghūu, daŋso sə̀ nùghù è wo. Wɛ vʉ n nùghù dòʼò tsùghu tò ù kpùw nû, ghî à mo enyəa, “Ù m kpuw.”
27Yɛso kūun kwu tsughu ko wə̄n aŋ kwē, nì nùghù kɔ̌ʼ wə̄n, ù n nùghù těe è kɔʼ.
28A m bùghò Yɛso ndùw nyə nduw an ndughu, tsə̀təndə̄ghā tə wə̄n tə n (nyɛʼɛ) tsɔŋɔ bvʉa fughu â wən enyəa, “À kǔuwn lǒ kwò ghàʼ mô yô aledzùusə zə̀ kə te ko a?”
29Ù n dzɛ̀ â ghee enyəa, “À mìaa ko è gɔ̀ŋlò alesəso ŋgòʼ zən.”
Yɛso kə̀a kpèʼê ghəa ghə evʉ̄ a wə̄n
(Mat 17:22-23; Lûk 9:43b-45)
30Ghê Yɛso n zə̀ghàa tsùghu fughu, tsə̀ghà nyə̀ ndùw dzì aŋ Galèlîi; ù n ləghaa yo enyəa ghùw kele; 31tɔŋlo enyəa ù mò zoʼn nduw tsə̀təndə̄ghā tə wə̄n enyəa, “Ghe lo fèen fùghuu nyəa tsughuu Wɛ̀ ù Ghùw aŋ ghu kə aghì, ghe lo nîi wiī tsughu, tsuʼ n tsəghàa tsughu n təgha aŋ ghəa ghe wi tsughu wən, ù kòom kɔʼɔ̄səā wô alo evʉ̄.”
32Ghe m buʼù zǔuwkɛ̄lɛ̄ yo fəgha kə̀là ù kə̌a â ghè kò, tsəŋo ghaʼa sùghò alebvʉā zuw â wə̄n.
Etsʉ̂ kùu ndùw ghùw wəla ù tsə̀ghàsə wàazə̀
(Mat 18:15; Lûk 9:46-48)
33Ghê Yɛso n daŋso bùghò sə̀ wò aŋ Kàpɛnùm; a m bùghò ù lǒ an ndughu, ù m bvʉ tsughu â ghee enyəa, “Ghɛ̀ mô dzughu gho an dziī pfʉa wò aŋ kwò à?”
34 #
Lûk 22:24
Ghe n zuuw ko mɔŋ, tɔŋlo enyəa ghe mò sughu utuw aŋ ghùe e ghee an dziī enyəa à tsə̀ghàsə ndughoo wàazə̀ a. 35#Mat 20:26, 27; 23:11; Mâk 10:43, 44; Lûk 22:26 Ù n tsùghù gàʼ dòʼò è tsughu, tɔŋɔ tsughu ghee yì èghə̄m à ghè ghò a bə̀ghà, dzɛ̀ â ghee enyəa, “Ghùw wəla ù ləghaa aledòʼò kə̀sə, ù kì alefèe tsughu kəbam, ù è lo kɔ̂ɔ fò â ghì ghò a dzə̀m.” 36Ù n daŋso nì kɔ̀ʼ wɛfêtùghu, naŋa nyə tsughu am bvʉa e ghee, tsùghù bòʼò è kɔʼ, dzɛ̀ â ghee enyəa, 37#Mat 10:40; Lûk 10:16; Dzn 13:20 “Ghùw wəla ù kpenî wɛ fo tò fən bòʼ ghəa zāŋā, ù kpènì mùghò; mo e lo enyəa ghùw wəla ù kpenî mugho, u kà fi kpenì dzə̀ mugho, ù kpènì wən wəla ù fə̀ tum wô mugho.”
Ghùw wəla ù bwìi yo an tàaŋ tə efwē tə sɛ̀, ù tǎʼ sɛ̀
(Lûk 9:49-50)
38Dzɔ̌n n dzɛ̀ â Yɛso enyəa, “Wàdè, ghǎʼ mò koʼ ghùw ù lì dzùu səā zʉ̀ ù biigh wo an zən zəghà, ghǎʼ ŋ ke naŋa ndùw wən, tɔŋlo enyəa ù yò dzə̂ am fɔe kə sɛ̀.”
39Yɛso m fwə̀n kə̀a tsùghù enyəa, “Kǎ nlǒ wə̄n ke; tɔŋlo enyəa ghùw yò dzə̂ aleghəə̄ŋ tsughu kɔ kə eghəa an zən zaŋā ù kòom ghaām nughù kə̂a boōn tsughu ghəa ghaŋa. 40#Mat 12:30; Lûk 11:23Nu ghùw wəla ù bwìi yo an tàaŋ tə efwē tə sɛ̀, ù fi taʼ sɛ̀. 41#Mat 10:42 M̀ fɛ kùu dzàa wò nù â ghɛ̀, ghùw wəla ù tso bûʼ tuūw fughu ko ghùw wɛʼɛ â wùa è mmùghu enyəa ghɛ̀ bǒo fughu tsughu â Kə̀lestò, ù lo tsò gùŋù yò namso ko.”
Ghɛ ghəla a tsôom ghùw enyəa ù ghəŋlo èbo
(Mat 18:6-9; Lûk 17:12)
42“Abugho ghùw wɛʼɛ u mɔ̀ʼ nɔm tsughu wɛfêtùghu fo fə mɔ̀ʼ aŋ wɛghêtùghu ghəla ghe boō fughu â mùghò enyəa fə ghəə̄ŋ tsughu ebo, ghùw ù te kpe to a e bòʼò kalà tia è gwuūn zo am mwè, a ndûw màʼà nyəā tsughu an dzùghùntsòʼ. 43#Mat 5:30Abugho ghu kə̀a kə̀ tsoōm ghù enyəa ghù ghəəŋ bō zo, kə̌a màʼa fə̀; alenìi maʼà ghù am kpǎaghùw, aŋ wə̀n wəla u kê nyəə̄m koʼò yo, à kwe zo e bə̀ghà, dzɔ̀ lò enyəa ghù nyə am fɔ̀e ù Kəzə̀ à kə̀m kə kəkwe ko, 44#9:44 [a fi a nyuuŋ təla tə muʼū ghee kpuūw tsəghà yo, mo wən wəla u pfʉā sugho ghee ghe kê nyə̀m kòʼ sùghò yò.] 45Abugho ghuw kə̀a kə̀ tsoōm kɔʼ ghû, ghù vʉ̀a ghù ghəə̄ŋ tsughu bo zo, kə̌a màʼâ; alenìi maʼà ghù am kpǎaghùw à ghuw gho a bə̀ghà, dzɔ̀ lò enyəa ghù nyə am fɔ̀e ù Kəzə̀ à kə̀m kə kəghùw kò, 46#9:46 [a fi a nyuuŋ təla tə muʼū ghee kpuūw tsəghà yo, mo wən wəla u pfʉā sugho ghee ghe kê nyə̀m kòʼ sùghò yò.] 47#Mat 5:29Abugho sə zə̀ghà è nyəā kaŋlō am ufʉgha mo e lo aletsōm ghû ghù ghəəŋ bo zo, bùɛʼɛ màʼâ, nu alenìi maʼà ghù am kpǎaghùw à sə gho a bə̀ghà, dzɔ̀ lò enyəa ghù nyə am fɔ̀e ù Kəzə̀ à sə zo e mɔ̀ʼ, 48#Èzy 66:24 a fi a nyuuŋ təla tə muʼū ghee kpuūw tsəghà yo, mo wən wəla u pfʉā sugho ghee ghe kê nyə̀m kòʼ sùghò yò. 49Tɔŋlo enyəa ghe lô ghì ghə̀n à dzə̀m kpɛ̂nlò aŋ wə̀n to ghe lô tsoʼsō nyòm alo ntsòʼ. 50#Mat 5:13; Lûk 14:34, 35Tsòʼ n dzɔ̂ɔ nù; abugho tsòʼ ŋ kuūwn lɔ̂ʼ tsughu, ghù lò ênzə̂n alenìi wô kpə̀ŋ e te zo ebàm a? E kpəŋō tǒ ntsôʼ, ghù è səa dzɔɔ̄ ghɛ̀ à ghêe ghì ghò.”
