Mâk 8
8
Yɛso fùghù kam tə aghì tə chìakò â fʉ̀ghàzə wo
(Mat 15:32-39)
1A m bùghò an tsùʼu n te mò ko, ghî à kôom bughò tsuŋ tsughu sugho, ki sugho yo fəgha kə̀ zəa ko, Yɛso n tɔŋɔ tsughu tsə̀təndə̄ghā tə wə̄n, dzɛ̀ â ghee enyəa, 2“Se e kwuu mùghò a zəŋò nɔ̀e kə aghì kən aŋ ghəa ghe doʼō ghàʼ à ghee alo n tsuʼu n təgha mo ghe ki yo fəgha kə̀ zəa ko. 3Abugho Ǹ zəghàa ndûw enyəa ghe kwəlānyə tədzəŋ, ghe sô vǔuŋ nù an dziī, mo ghee à li a lɔʼso bwìi wò sùghò də̀ghàa kə dziī.”
4Tsə̀təndə̄ghā tə wə̄n tə m bɛ̀lɛ̀ tsùghù enyəa, “Ghùw lò alezɔ̀ʼ ghì alo kəbɛ̄ fɛ aŋ ŋgwən mò ù kaʼ tsughu ênzə̂n?”
5Ù m bvʉ â ghee enyəa, “Ghɛ̀ ki sə a ugbɛ a shwǒʼ fì à?”
Ghe m bɛ̀lɛ̀ wò enyəa, “Sə̀ghàmbəgha.”
6Ù n daŋso dzɛ̀ enyəa ghî yi tsughuu doʼò tsughu a ghūu; daŋso nì kɔ̀ʼ sə a ugbɛ yì sə̀ghàmbəgha, a m bùghò ù fughu tsughu zɔ̀ɔŋ kò â Zə̀ kò, ù m boʼn fughu tsughu â tsə̀təndə̄ghā tə wə̄n to enyəa ghe dzughù ndûw â ghì yì; ghe n nì dzùghù fughu tsughu gbɛ u te wo â saʼ kə aghì chì. 7Ghe ŋ ki sugho sə̀ lò n tə̀tsəghaa n sòʼ ènyə; a m bùghò ù fughu tsughu sugho zɔ̀ɔŋ â Zə̀ kò, ù n dzɛ̀ enyəa ghe nîi dzughù ndûw sughò. 8Ghe n zə enyə, zə̀ kùw è tsughu; ghe ŋ kòom kǔum kaaŋ wò (bòʼò məlà n səa tsughu) à sugho to, wə n lue kɔʼ ù kʉ̌a sə̀ghàmbəgha. 9À fə̀ lo êzə̂ mo ghî a lo nû tò kam tì aghì tə chìakò. 10Ù n daŋso zə̀ghàa ndùw ghee. Dzə̂ tə̀n tə̀ bə̀ghà mò ghèe ghê tsə̀təndə̄ghā tə wə̄n tə n nǐ kwə̀n kò, nùghù ndùw am mbùʼ e Dàlmanutà.
Ghî a Falàsîi a dzɛ̂ â Yɛso enyəa ù dèe tsughu tsə̌a enyəa à fùghù Kəzə̀ wə̄n â daʼa ko
(Mat 12:38-42; 16:14)
11 #
Mat 12:38; Lûk 11:16 Ghî a Falàsîi à li ghə n ndùw è bugho, bùghò kàʼ wò dzughu à pfʉa gho ghèe ghê Yɛso, ghe m bvʉa tsə̌a è lì enyəa ù dèe wô enyəa à wə̄n â daʼa kə fughu Kəzə̀, mo ghe êzə bvʉa ghe bəlā an tɔ u wə̄n. 12#Mat 12:39; Lûk 11:29Ù n sɔ̀m mìasò ndùw enyəa am fə̂ŋ è wə̄n, dzɛ̀ tsùghù enyəa, “À lǒ kwò mweē e nɛ zən ləghaa alekòʼ tsə̌a è ùshʉ̀ghà lo a? Ǹ so Ŋ̀ kûu dzâa wô a ghɛ̀ enyəa mweē e nɛ zən yo to ghee e kôʼ tsə̌a è lì.”
13Ù n zə̀ghàa tsùghu ghee kòom nì kɔ̀ʼ kəkwə̀n, nùghù dàŋ ndùw a ŋgùŋ è lì èzə̂.
Mbvùŋ è tə̀ Falàsîi àsùghò è Hɛlɔ̀d
(Mat 16:5-12)
14À n lo ezə̀ mò tsə̀təndə̄ghā tə Yɛso tə̀ mâa zə̀ alemuʼū nîi kɔʼ kəbɛ; ghe ŋ ki ko sə e kəbɛ̄ e mɔ̀ʼ alo kəkwə̀n. 15#Lûk 12:1 Aŋ ghəa ghe daŋà nduw, ù n nùghù kʉ̀ɛɛn ndùw ghee enyəa, “Nì nlò nəgha zo am mbvùŋ è ghì a Falàsîi àsùghò am mbvùŋ è Hɛlɔ̀d.” 16Ghe n nyūuŋ kə̀a tsùghù aŋ ghùe e ghee enyəa, “Ù ghəa ghən fɛ kə̀a bòʼ a sô bɛ ko.” 17A m bùghò Yɛso kele tsughu ghəa yia ghe mô kəaa, ù n dzɛ̀ â ghee enyəa, “À lǒ kwò ghɛ̀ sô dzɛ̂ enyəa ghɛ̀ ki yo bɛ kōʼ a? Ghɛ̀ kaam kòʼò tɔ̌ɔ to yo ghəa gho, zuuwkɛ̄lɛ̄ sùghò yò à? Ghɛ̀ saa â fə̀ŋ tò à? 18#Dzl 5:21; Ɛ̀zi 12:2; Mâk 4:12Ghɛ̀ ki ko asə, kòʼò yò a te a? Ghɛ̀ ki utuŋlō zuuw yo a te a? Ghɛ̀ tsoo tàa mòʼn wò sùghò yò ghəa gho a? 19Ghɛ̀ moʼn n yò ghəa ghə̀là mùgho mò boʼn fughu tsughu sə a ugbɛ gho utwɛ̀ â kam tə aghì tò tə tɛ̀ à? Ghɛ̀ mò sugho tə kuum lueso kɔʼ ushwaʼnlō u shòʼ?” Ghe mo â enyəa, “Eghə̄m à ghèwò u bʉ̀ghà. 20A m bugho M̀ boʼn fughu tsughu sughò sə a ugbɛ ghən sə̀ghàmbəgha â ghɛ̀ enyəa ghɛ̀ dzughu fughu nduw â kam tə aghì tə̀ ti tə chìakò, ghɛ̀ mò sugho təla tə səā tsughu kuum lueso kɔʼ alo ushwaʼnlō u shòʼ?” Ghe mo â wən enyəa, “Sə̀ghàmbəgha.” 21Ù n daŋso bvʉ tsughu â ghee enyəa, “Ghɛ̌ yia kaām zuuwkɛlɛ yo a?”
Yɛso bǎaŋ ghùwfǒo am Bɛ̀dsǎedà
22Yɛso m bùghò am Bɛ̀dsǎedà ghèe ghê tsə̀təndə̄ghā tə wə̄n to. Ghî à li ghə n nì wò ghùwfǒo ù lì a vʉ̀a Yɛso, bùghò bùʼ kəghu â wə̄n enyəa ù mɔ̀ɔ tsughuu ghùwfǒo vʉ aŋ ghu tò ù tughū kɔʼ. 23Yɛso ŋ kwu tsughu ghùwfǒo vʉ aŋ kwē, tɛ̀ɛ nùghù sə̀ ndùw wə̄n alo enaʼ, a m bùghò ù ndùw fam tsughu sə a wə̄n gho, mɔ̀m tsùghu wə̄n, bvʉ tsughu â wə̄n enyəa, “Ghù kpàʼa kòʼò nù fəgha kə̀ li ko a?” 24Ghùw vʉ n nùghùsò kɔ̀ʼ kətuw, dzɛ̀ enyəa, “Ŋ̀ koʼò nù ghî ghò, mo ghe kuuwn lǒ ko tò ŋkâʼ m bwìi wo.” 25Yɛso n daŋso gaʼ kpeʼe ndùw ghu a wə̄n an sə a tûwbʉ̀ghà vʉ̀; tûw vʉ n tɔ̀ʼ zìso kɔʼ asə, sə ghə ŋ kòom tsʉ̀ è kɔʼ, ù ŋ kòʼ tɔ̀ ndùw tə̀luʼū. 26Yɛso n zə̀ghàa ndùw wə̄n enyəa ù ndùw alô wə̄n an ndughu, dzɛ̀ â wə̄n enyəa, “Kà tso bùʼ nyə̀ enaʼ.”
Pità tesò ghùw wəla Yɛso lǒ ghè wò
(Mat 16:13-20; Lûk 9:18-21)
27Yɛso n tsəghàa dzì ghèe ghê tsə̀təndə̄ghā tə wə̄n to ghe nduūw an nàʼà fə Sìsɛlìa Felèpǎe, ù m bvʉ â tsə̀təndə̄ghā tə wə̄n to an dziī enyəa, “Ghî à dzɛ̂ enyəa Ǹ lo ndughoo?”
28 #
Mâk 6:14, 15; Lûk 9:7, 8 Ghe n dzɛ̀ enyəa, “Ghî à li a dzɛ̂ enyəa ghù lǒ Dzɔ̌n Fùghùu mùghù ŋ Kə̀zə̀; à li yia dzɛ̂ enyəa ghù lǒ Èlaedzà, à li yia dzɛ̂ enyəa ghù lǒ ghùw aŋ ghǐishʉ̀ghà.”
29 #
Dzn 6:68, 69 Ù m bvʉ â ghee enyəa, “Ghɛ̀ kuuwn kwo enyəa Ǹ lo ndughoo a?”
Pìtà m bɛ̀lɛ̀ ndùw wə̄n enyəa, “Ghù lǒ Kə̀lestò.”
30Ù n tɔ̀ʼ kʉ̀ɛɛn tsùghu ghee enyəa e kwo ghe lô kə̂a ghəa a ghee gho â ghùw.
Yɛso dzɛ̀ enyəa e lo zuuw ŋgoʼ e kpuw
(Mat 16:21-28; Lûk 9:22-27)
31Yɛso n daŋso kàʼ ndùw tsə̀təndə̄ghā tə wən alezōʼnlō enyəa Wɛ ù Ghùw kì aleŋgeē zuw ŋgōʼ, tsoʼ tə lo tuū maʼà wə̄n ghèe ghê tuw u təfɔ̀e ghò, à ghê dèekə̀làŋ. Ghe lo wiī tsughu wə̄n, tsuʼu n tsəghàa tsughu n təgha, ù kòom kɔʼɔsəā kɔʼ alo evʉ̄. 32Ù fə̀ ghəa ghə̀n à dzə̀m tso kəaa an ndɛ. Pità n daŋso nì kɔ̌ʼ wə̄n ghèe wə̄n m bəŋso tee è nduw, ù n zùghù tsùghu wə̄n enyə. 33Ù m fə̀n lɛ̌ɛn ndùw tsə̀təndə̄ghā tə wə̄n, zùghù sùghò Pità, dzɛ̀ â wə̄n enyəa, “Nùghu a bǎà mùghò, Satàn wə̄n! Ghù kà tuw kə gaʼ aŋ ghəa e Kəzə̀, ghù tɔ wʉ̂a ù bɔɔm naŋa ndùw ko aŋ ghəa ghəla ghì à moʼn ghəa gho a te.”
Ghùw wəla ù lò alenì ghuw kə Yɛso
34 #
Mat 10:38; Lûk 14:27 Yɛso n tɔŋɔ tsughu saʼ kə aghì chi à tsə̀təndə̄ghā tə wən to dzɛ̀ â ghee enyəa, “Abugho ghùw ləghaa ale dòʼò tsə̀ndə̄ghā zaŋā, ù nìi tsughu enyəa e yo dzə̂ fəgha ko, ù boō tsughu alefala a bòʼ mùghò. 35#Mat 10:39; Lûk 17:33; Dzn 12:25 Tɔŋlo enyəa ghî ghəla ghe tsâʼ tsughu ko tuw kə ghee ko, ghe lo gùuŋ nù, ghəla ghe guŋù tsughu tuw kə ghee ko aŋ ghəa zaŋā àsùghò aŋ ghəa e tùm è dzùŋ zən, ghe lo kuūwn zə kətuw. 36Ghùw zə̌a kə̀ kwò abugho ù kele mɛʼɛ̀ fʉgha u mbī wo ù dzə̀m kè kuūwn zə kətuw à? 37Ghùw lò alefughu kə kwò alezuūsə tuw kə wə̀n à? 38Ghî ghəla ghe də̂nsò tuw ko aŋ ghəa zaŋa àsùghò aŋ tsʉ̀ zaŋā am mwěe e nɛ zəla e tsəŋo yò Zə̀ kò, ghəəŋ tsughuu sùghò ghəa à biigh gho enyə, Wɛ̀ ù Ghùw kè bɔ̌ɔm də̀nsò sùghò kə̀tuw êzə̀ a zəŋò ghee abugho ù kè bugho ebàm am Nsəghanyəgha n Tsele ghèe ghê tum tə Kə̀zə̀ tə̀ zɔlɔ to.”
