Mâk 7
7
Tsʉ̂ e ghì à wii gho
(Mat 15:19)
1Tsuʼ ù li wo, ghî a Falàsîi ghə̀ n zùuŋ wò a vʉ̀a Yɛso ghèe ghê dèekə̀làŋ à li gho, ghe nughù sə wo an Yɛ̀lusalɛ̀m. 2Ghe ŋ kòʼ tsùghù enyəa tsə̀təndə̄ghā tə Yɛso tə̀ li tə zəa â ghu à dzəa gho, tɔŋlo enyəa ghe ka mo sûw dzə̀ ghu a ghee gho aŋ ghəa ghəla bughōo kə enaʼ kə deē. 3(Nu ghî a Falàsîi ghèe ghê Dzûu tò tə dzə̀m zəa tsə̀ghà yò mo ghe kâ ghu a tɔ̂ʼ sùw an dziī zən, mo ghe êzə ghəŋlo, alenaŋâ làŋ kə enaʼ kəla ghî à wii a fə̀ naāŋ tsəgha. 4Ghe zəa sùghò yò fəgha ko abugho ghe nughù wo â ghè kò am bekewə̄n, à gɔ̀ʼɔ̀ ko mo ghe m fəgha kə te kə sûw aŋ ghəa ghəla lâŋ kə enaʼ kə deē; ghe tsoo naaŋ sùghò ndə̀m è ùlwàŋ ù li wo tǒ wùa tə̀ suūw to, ntôo, àsùghò kwaŋ wōs.) 5Ghî a Falàsîi yì ghèe ghê dèekə̀làŋ yi fi bvʉ nû â Yɛso enyəa, “À lò kə kwò tsə̀təndə̄ghā təghà tə̀ naāŋ yô lâŋ kə ghê bə̀ghàbəgha ko a, ghe sô zəā â ghu à dzəa gho a?”
6 #
Èzy 29:13
Yɛso n dzɛ̀ â ghee enyəa, “Èzayà mafə̄ kûum tɔm naŋa mɛ̀ʼɛ̀ ghəa ghɛʼɛ gho, ghê kə̀bàŋàdzə̀m am Mwàʼsò kə Kəzə̀ enyəa,
‘Ghî ghən mugho kɔʼso ko an dzughu a ghee,
fə̂ŋ tə ghee tə kuuwn lɔʼso lò nû;
7ghe mugho kɔʼso màʼn kə̀nughùghù,
zoʼnlo àghì aŋ ghəa a mbī gho enyəa à lò ghəa a Kəzə̀.’
8Ghɛ̀ zəghàa màʼà tsùghù lwâŋ u Kəzə̀, kwù nyə̀ ndùw ghəa ghə enaʼ gho aleghəŋlo.”
9Ù n nùghù dzɛ̀ tsùghù â ghee enyəa, “Ghɛ̀ tɔ̂ʼ kì tsughu dzì è dzùŋ ènyə aletuū maʼà tsughu lâŋ kə Kəzə̀ enyəa ghɛ̀ kuuwn naŋa lâŋ kə enaʼ kɛʼɛ̄ ko! 10#Ksm 20:12; Lwa 5:16; Ksm 21:17; Lɛv 20:9 Musî fə̀ dzɛ tsughu fɛ enyəa, ‘E kɔʼso tsughuu tsùghò ghèe zùghùʼ; àsùghò enyəa, ghùw wəla ù tso tsɔ̂ɔm tsughu tsele ŋkāa zə̂, ù kì alekpūw.’ 11Ghɛ̌ yia kuuwn zoʼn ghî ghò enyəa abugho ghùw mò kpaʼ ki fəgha kə̀ li ko kə mô lo aleyòsò zə̀ ŋkāa tsele, vʉ̀a ù dzɛ̀ tsughu enyəa fəgha kə te kə lo Kobàn (mo e moʼò enyəa à fəgha kə te kə ki Kəzə̀) 12à fì lo enyəa ù n daʼa kə kele enyəa e yo alefughu e yôsò â zə̀ ŋkāa tsele. 13Abugho ghɛ̀ ghəŋlo enyə, ghɛ̀ ŋ ghəŋlo shwaʼ u Kəzə̀ wə m fwəən yo fəgha ko, ghɛ̀ sô fughuu ndûŋ wô ko lâŋ kə enaʼ ko. Ghɛ̀ bɔɔm ghəəŋ sùghò ndə̀mà tə aghəa tò ghən.”
14Yɛso ŋ kòom tɔ̀ŋɔ wò saʼ kə aghì chì ko ebàm, dzɛ̀ â ghee enyəa, “Ghɛ̀ a dzə̀m naŋa wo nlò tuūŋ wɛʼɛ wo fɛ â mùghò, ghɛ̀ zuw tsughu fəgha kə̀là Ǹ so Ǹ dzâa wô; 15Fəgha kə̀ li kə yo ghùw zəa nyəā nduw kə dzəsō wə̄n, à ghùw lǎam dzəsô fəgha kəla kə səā wô an dzughu e wə̄n.” 16[Ghùw wəla ù ki tuw ko, ù zuw.] 17Ghəa ù zə̀ghàa tsughu saʼ kə aghì chì, nyə̀ ndùw an ndughu, tsə̀təndə̄ghā tə n dzɛ̀ enyəa ù teso dzâa wô fəgha kəla kwə̀ən kə ushwāʼ kən mòʼnlo. 18Ù n dzɛ̀ â ghee enyəa, “À fi lo enyəa ghɛ̀ kâa zuwkɛlɛ sùghò à? Ghɛ̀ koʼò sùghò yò enyəa fəgha kəla kə nughù tsughu fɛ a beē, nyə̀ ndùw a zəŋò ghùw, kə yo dzə̂ aledzəso wə̄n, 19bòʼ kə nyəa tsughuu ndùw dzə̀ yò am fə̂ŋ, kə ndûuw an nʉ̀ghà, ù m bvʉ̀ màʼà è nduw a?” (Ù mǒ fi dzɛ mgbaaŋ wo enyəa fə̀ghàa n zə̌a mən n dzə̀m zɔ̀lɔ nù.) 20Ù n dzɛ̀ kpèʼe tsughu enyəa, “À ghùw dzə̀sô fəgha kəla kə səā wô a zəŋò wə̄n. 21Tɔŋlo enyəa à lò a tèetè, am fə̂ŋ è ghùw, moʼnlò è biigh e səa kɔʼɔ̄ wo; aghəa tǒ alesəa nuuŋ kaŋlo, aletsɔ̄ŋ, alewī ghùw, 22alesəā ndzāŋ (sə à səa gho), alekī fə̀ŋ è bǐigh, aletsè ghùw, aleghə̂əŋ ghəa à kwu gho, alemʉʉn ghùw, alemàʼà tə̀nùʼ, alekɔʼsō ùghue, alelàʼsò. 23Ghəa à biigh ghən a dzə̀m sə̌a wò a tèetē, yia a dzəsō ghùw.”
Boo e wîzən
(Mat 15:21-28)
24Yɛso n zə̀ghàa tsùghu fughu nùghù ndùw am mbùʼ è Tayà ghèe Sidɔ̀n. Ù n ndùw nyə̀ doʼò ndùw an ndùghù è lǐ fughu, kuuwn ləghaa yo enyəa ghùw kele enyəa e lo a fughu, ǎ ŋ kuuwn būw ko dzì â wən alenàn ùghue. 25Wìzən ù lǐ ŋ ki wɛ̀ ù wən ù zən à zʉ̀ ù biigh wo a zəŋo ughùe, ù n daŋso zuw tsughu zwɔ̂ŋ u Yɛso, bùghò tə̀m wò tə̀ŋguʼ a tsəlà wə̄n. 26Nughò vʉ fə̀ lo Etoʼò â Dzûu tò, ghe fə̀ dzə am mbùʼ è Fònishìa an nāʼ e Silìa. Ù m buʼ nduw kə̀ghu â wə̄n enyəa ù dzùu səā wô zʉ̀ u te wo a zəŋò wɛ̀ ù wən. 27Yɛso n dzɛ̀ â wə̄n enyəa, “A buʼù niī tsughuu dzə̂ wɛghêtùghu, e dzɔ̂ɔ yò alenìi nyâan maʼà fʉ̀ghàzəa u wɛghêtùghu â bvʉ to.” 28Nughò vʉ ŋ kuuwn bɛ̀lɛ̀ ndùw Yɛso wən enyəa, “Òo mughùbè, bvʉ təla tə bûʼ lô ko a tsəla teblè, tə ŋgəəŋ kuum zəa nù sugho to am fʉ̀ghàzə u wɛghêtùghu.” 29Yɛso n daŋso dzɛ̀ â wən enyəa, “Ghù lò nû alenùghù zə̀ghà zò, ghəa ghù dzɛ̀ dzə êzə̀, zʉ̀ u te wə ŋ wɛ wʉ̂a zə̀ghàa.” 30Ù fi kwən nyə̀ ndùw nù, ndùw kòʼ ndùw wɛ̌ vʉ̀ mò vʉ̀a ù nyə̀ŋ a kə̀chʉ̀a, mo zə̀a fə te fə ŋ wə̄n zəghàa màʼà.
Yɛso bǎaŋ kùʼ kə kəmùʼ
31Yɛso n daŋso kòom nùghù sə̀ wò èbàm am mbùʼ è Tayà, tsə̀ghà nyə̀ ndùw dzì è Sidɔ̀n am bà kə Nyʉ̀ e Galèlîi, am mbùʼ è tə̀ Dèkapōlès. 32Ghe n nì wò kə̀kùʼ a vʉ̀a wə̄n, mo shwaʼ u zɔlɔ sùghò yǒ wə̄n lo edzughu; ghe m buʼ tsughu kəghu â wə̄n enyəa ù gaʼā tsughu kəghu zəŋò ghùw vʉ̀, ù baāŋ kɔʼ wə̄n. 33Yɛso n nì nùghù sə̀ wò ghùw vʉ̀ an sāʼ kə aghì chì, nya bəŋso tēe ndùw ghèe wə̄n, dzə̀n nyə nduw waaghū an tùŋlo u wə̄n, fàm è tsughu, mɔ̀m tsùghù nom kə wə̄n. 34Ù n lɛɛn kɔ̀ʼ ndùw kəwala dèmè tsùghù kədèmè, dzɛ̀ â ghùw vʉ enyəa, “Ɛ̀fatà.” E moʼò enyəa, “Tsʉ kɔ̀ʼɔ̀.” 35Tuŋlo u wə̄n wə n daŋso tsʉ̀ è kɔʼ, nom kə n tsə̀ghà è nduw, shwaʼ u wə̄n wə n daŋso zɔ̀n sə̀ è wo. 36Yɛso n daŋso kʉ̀ɛɛn tsùghu ghee enyəa e kwo ghe lô dzâa â ghùw; ghəa ù kuuwn kôom kʉ̂ɛɛn tsughu, ghe ŋ kuūwn kòom zùghòo tsùghù ghəa a te gho enyə̄. 37Tuw kə m kpùw ndùw ghee enyə, tsə̀ghà kə̀bəŋ, ghe mo enyəa, “Ù fwàʼ ghəa a te gho a dzə̀m kədzûŋ; bùʼ ghə̌əŋ daŋso sùghò enyəa kùʼ ù è zuuw wo tuūŋ wo, mùʼ ù è kəaa wo ghəa gho.”
