Lukasi 14
14
Yesu mopakaoha hadua tomahai
1Hambela tempo i Alo Pengkarooangaa, Yesu lao maande i souna hadua tadulakonda toParisi. Tangana i sou iti, bosa tauna mokamata lawi mohaokihe kamanawoNa. 2I tempo iti wori, hawemi hadua tauna au mahai mangkawae. 3Yesu mekune i guru agama hai toParisi au ara inditi, Nauli, “Moula atura agamanta, ba peisake mopakaoha tomahai i Alo Pengkarooangaa, ba bara?”
4Guru-guru agama hai toParisi iti, barahe mehana. Mewali, Yesu mokingkimi tomahai iti, Napakaoha hai Natudu mesule. 5Roo indo, Nauliangaahe, “Ane rapana ara anami ba japimi au manawo i tibubu i Alo Pengkarooangaa, ba nipogiangaa i lalu tibubu? Ba nihore, kehapiri i Alo Pengkarooangaa?” 6Agaiana bara ara hadua au bai mohanai pampekunena Yesu iti.
Hangangaa mengkaiwoike
7I souna toParisi iti, Yesu moita bahangkia torare au mampilei pohudaa au teadai. Ido hai Yesu mopaturohe hai ngkora pandiri ide, Nauli, 8“Ane rakakiokau lao i posusa petauna, ineeko mohuda i pohudaa au teadai. Mole ara pae tauna ntanina au melumbu karabilana hangko irio. 9Ane nodo, ampu sou ina mouliangaako node: ‘Pelimba! Ia mohuda inde.’ Ina maeako melimba lao mohuda i taleu. 10Mewali, ane rakakioko lao i posusa, agina mohudako hampai i taleu bona ampu sou ina mouliangaako: ‘Ene, maiko mohuda i pohudaa au maroa i lindo.’ Ane nodo, ina rabilako i lindonda tauna bosa. 11Hema au mampeindora ina rapaiwoi, hai hema au mengkaiwoi ina rapaiwongko.”
12Roo indo, Yesu mololita i toParisi iti, Nauli, “Ane mokakioko tauna mai i posusamu, maroa pualo ba kaindi, ineeko mokakio rangamu, halalumu, hai topebuku i lalu boeamu. Lawi ihira, batena ina mokakio woriko, hai apa au nubabehi iti ina tehurungi. 13Agaiana ane mopaarako susa, hangangaa nukakio tauna au meahi-ahi tuwonda, au bara masilolonga watanda, au palu hai au bilo. 14Ane nodo babehiamu, ina nawatiko Pue Ala, lawi bara rabuku tauna iti mohurungi babehiamu. Apa au nubabehi iti ina nahurungi Pue Ala i karapatuwonda hule ope-ope tauna au maroa babehianda.”
Ngkora pandiri kana i posusa mahile
(Mat. 22:1-10)
15Tanganda maande, hadua torare au mohadi lolitana Yesu inona, mololita i Yesu nauli, “Morasi mpuu tauna au ina maande hihimbela hai Pue Ala i lalu poparentaNa.”
16Agaiana nauli Yesu i tauna iti, “Hambela tempo ara hadua tauna au mobabehi posusa mahile, hai bosa tauna nakakio. 17Masilolongami ope-ope, ampu susa motudumi hawina lao mouliangaahe tauna au rakakio, ‘Laomoke maande, lawi masilolongami ope-ope.’ 18Agaiana ope-opehe au rakakio, ara penggolianda pane barahe peisa lao i posusana. Hadua au nguru-nguruna rakakio manguli, ‘Hangko meholona tampo, hai hangangaa lao hampai kupeita. Merapi ampuna, barana peisa lao.’ 19Ara mbuli hadua au manguli, ‘Hangko meholona lima bokona japi, hai hangangaa laohe hampai kupopopajeko. Merapi ampuna, barana peisa lao!’ 20Ara mbuli hadua au manguli, ‘Hangko rataunana! Mewali, barana peisa lao.’
21Pesulena hawi iti, napahawemi i ampuna pehananda tauna au rakakio. Rumihi mpuu karumpuna ampu susa iti, ido hai mouliangaa hawina, ‘Laomoko hoholiga i rara mahile hai i penga-penga rara i boea. Nukakio mai ope-ope tauna au meahi-ahi tuwonda, au bara masilolonga watanda, au bilo, hai au palu.’ Lao mpuumi hawi iti moula hawana ampuna.
22Pesulena, mololita mbuli i ampuna, nauli, ‘Ampu, hawamu kupopolumaomi, agaiana ara mani pohudaa au soa.’
23Ido hai nauliangaa ampu susa iti, ‘Lao mbuliko i raoa boea bona nubambari posusa ide iumba pea, maroa i rara au mahile maroa i rara au koi. Hangangaa nupasimbukuhe mai tauna bona soungku buke. 24Lawi tou mpuu kuuliangaakau: bara huba hadua tauna au kukakio nguru-nguruna ina mampemina paandeku!’ ”
Mapari meula i Yesu
25Roo indo, Yesu mopaliliu polumaona. Bosa wori tauna meula Iria, ido hai Napembalilingihe, Nauli, 26“Ikamu au mampeinao meula Iriko, nipehadingi! Hema au melumbu pampokakaiana inana ba umana, towawinena ba anana, halaluna ba watana haduduana hangko i ahina Iriko, ia bara peisa mewali topeulaNgku. 27Nipehadingi, ikamu au mampeinao meula Iriko: hema au bara mau mohalea kau mombehape hai meula Iriko, bara peisa mewali topeulaNgku.
28Ane ara hadua hangko i olomi au mampeinao moaro haogu sou au mahile, hangangaa naimba hampai doina ba handa napopoaro sou iti. 29Lawi ane hangko ariina napopeangka, hai opemi doina hangko damani roo, ina raele-ele tauna au moita. 30Ina rauli: ‘Ae! Tauna ide mampeinao moaro sou mahile, agaiana bara handa doina!’
31Nodo wori, ane ara hadua datu au moanti surodadona hampulo sabuna bona lao mombeala hai hadua datu au ara rompulo sabuna surodadona, agina datu iti mampepekiri hampai, ba nabuku moewa iwalina ba bara. 32Lawi ane naisa kadana nabuku moewahe, i tempona karao manihe, ia peisa motudu bahangkia surona lao modame hai iwalina.”
33Napaliliu Yesu lolitaNa, Nauli, “Nodo wori ikamu, agina nipepekiri hampai apa au hangangaa nibabehi bona mewalikau topeulaNgku. Lawi ane bara niunde mokabaha ope-ope au ara irikamu, barakau peisa mewali topeulaNgku.”
Pandiri kana i Bure
34“Bure, mobundu ntepuu. Agaiana ane matawaami, peisa pae rapakebure hule? 35Kehapiri rapopopakarudu pea tuda-tuda, barapi mobundu. Aginami ratende. Hema au mohadi lolitaNgku ide, nipehadingi maroa!”
@LAI 2016