Ɖúù 1
1
Ɖúù céè céè-ɖɛ̀ nìà kɛ Tìɔ́féɖɛ̀ gbo
1Ɓǎ Tìɔ́féɖɛ̀, nyɔ ɓáún-ɓáún ɖǎ vɔ̃ ɓɛ́ wa ké ɖɛ ɓě ɓɛ́ wa kpá ɖé à hwìɛ̀ kɛɛ ɓíɖíi céè kà wa nyu ma kpáa kɛ. 2Wa céè ma ɖɛ ɓě ɓɛ́ nyɔ ɓě ɓɛ́ wa dyé ma ɖɛ ɓě nìà kɛ ɖé ɖɛ dè gbɔ mú, ké wa nyùìn ma bɔ̃̌ɔ̀ kũ̀à múɛɛ cɛ̃ ma à gboɛ. 3Ɔ jèɛɛ, ɓǎ Tìɔ́féɖɛ̀, ḿ poɛ̀n ma hwìɖǐi kà ɓɛ́ ɔ nɔ̀mɔ̀ dyíin ɓɛ́ ḿ ké ɖɛ ɓě nìà kɛ kɔ̃in zaìn nɔ̀mɔ̀ dyíin ɖé m̀ gbo, sepóɛɖé ḿ ɖǎ ma ɖɛ ɓě nìà kɛ dyéɖé gboi kpaìn ɖé ɖɛ dè gbɔɔ̀ mú. 4Ḿ nyu ɖɛ nìà kɛ, ɓɛ́ m̀ ké jǎà ɓá ɖɛ ɓě ɓɛ́ wa ɖǎà m̀ tɛ̀mɛ̀ìn nyɛ dyíɛɛ dyí dyuò jɛ́ɛ́.
Wa cɛ̃ɛ kà Jɔ̃́ɔ́ nyɔ-níɔ-po-nyɔ̀ɔ̀ mu wóɖóùn wɛ̃
5Ɖé Júɖìà-ɓòɖòɔ̀ kã́á ɓɛ́ ɔ mɔ̀ ma Hɛ́wɔ̀ɖɔ̀ kɛɛ nììn tiín nyɛɛ, sáa-zà-nyɔ̀ ɖò kɔ̃̀ nyɛ́nɛ́ mɔ̀ ma Zɛ́kɔ̀wáɖádyà kɛɛ nì ma ɖé. Ɔ mɔ̀ ma sáa-zà-nyɔ̀ ɓěɔ̀ nyɔ ɓě ɓɛ́ wa ɖáìn Àbíjà-dù kɛɛ nyɔ ɖò. Ɔ gmàà ɓǎ nììn nyɔ ɓě mɔ̀ ma sáa-zà-nyɔ̀ ɖekè. Ɔ gmààɔ̀ nyɛ́nɛ́ mɔ̀ ma Ìɖésébɛ̀. 6Wa sɔ̃́ɔ̀ cĩ́ ma dyí-sɛ́ɖɛ́ìn-kà ɖé Gèɖèpɔ́ɔ̀ dyéɖéín. Wa nyu ma ɖɛ séín ɓɛ́ Bounɓoɔ̀ cɛ̃ ma kɛ, ké wa kpɔ̃ ma ɔ gma ɓěɔ̀ dyi nɔ̀mɔ̀ dyíin. 7Wa se ma dyú ɖò ɓéɖé, sepóɛɖé Ìɖésébɛ̀ mɔ̀ ma ɖàà-màà. Ké wa sɔ̃́ɔ̀ ɖǎ ma nyɛ.
8Ti ɖòɛ̀ ɓaɖaa, Zɛ́kɔ̀wáɖádyà nì ma ɔ sáa-zà-kũ̀à nyuɛń ɓó Gèɖèpɔ́ɔ̀ dyúa, ti ɓɛ́ ɔ mɔ̀ ma ɔ nììn kpooɔ̀ kũ̀à-tìɛ. 9Kpeɖe ɓɛ́ sáa-zà-nyɔ̀ ɓěɔ̀ mɔ̀ùn nyu ma kɛɛ mɔ̀ wa nyu ma gbo-ɖàɓàìn-ɖɛ̀, ɓɛ́ wa ké ma nyɔ ké ma nyɔ́ún-nɔ̀mɔ̀-ɖɛ̀ fɔ̃ɛɛ dyí dyuò. Ké gbo-ɖàɓàìn-ɖɛ̀ɔ̀ kpɔ̃ ma Zɛ́kɔ̀wáɖádyà. Ɔ jèɛɛ, ɔ mu ma ɖé Bounɓoɔ̀ gbǒɔ̀ mú. 10Ɓó ti gàná kɔ̃̀ mú ɓɛ́ ɔ nì ma kà nyɔ́ún-nɔ̀mɔ̀-ɖɛ̀ɔ̀ fɔ̃uń wɛ̃ múɛɛ, nyɔ kúɖúú ɓěɔ̀ nì ma ɖé píé, ké wa nì ma ɓaàǔn.
11Ɓó tia ɓaɖaa, Bounɓoɔ̀ ínjà ɖò wóɖóìn ma Zɛ́kɔ̀wáɖádyà dyí. Ínjàɔ̀ nyànà ma ɖé nyɔ́ún-nɔ̀mɔ̀-ɖɛ̀ kɔ̃-fɔ̃̀ìn-gbààɔ̀ ɖiaún dyi. 12Ti ɓɛ́ Zɛ́kɔ̀wáɖádyà dyé ma ɔ kɛɛ, fã̀à nyu ma ɔ, ké ɔ dyɔɔ̀ tɛɖɛ ma. 13Kɛɛ ínjàɔ̀ cɛ̃ɛ ma ɔ gbo, ké ɔ ɖá, “Mɔ̀ǔn ɖá ɓɛ́ m̀ ké fɛ̃̀ìno, Zɛ́kɔ̀wáɖádyà. Gèɖèpɔ́ɔ̀ ɖǎ nì ɓaà-wùɖùɔ̀ wɔ̃́, ké m̀ kè nì gmàà Ìɖésébɛ̀ mu dyú ɖò wóɖóìn. M̀ mɛ jǔìn ɔ Jɔ̃́ɔ́-nyɛ̀nɛ̀. 14Nì hwòɖǒ mu dyi dèìn, ké nì mu múàǔn kpáùn. Nyɔ ɓáún-ɓáún mu múàǔn kpáùn ti dyúɔ̀ mu wóɖóùn wɛ̃, 15sepóɛɖé ɔ mu kpé ɓéɖéìn ɓó Bounɓoɔ̀ dyúa. Ɔ ní ɖá ɓɛ́ ɔ ké wã́ìn mɔɔ kàmàà-ɖɛ̀ ɖò ná. Ɔ dyi wóɖó nyɛ̀nɛ̀ɛ̀ ní, Zùù Hwɛ̀ǐn-hwɛ̀ǐnɔ̀ mu ɔ múin dyíìn. 16Ɔ mu Éézùɖùɛ̀-nyɔ̀ ɓáún-ɓáún Bounɓo mɔ̀à waà Gèɖèpɔ́ɔ̀ kɛɛ gbo dyàùn ɖe. 17Ɔ mu Bounɓoɔ̀ dyúa muùn. Ɔ mu hwòɖǒ kuùn, ɓɛ́ ɔ ké kpé ɓéɖé kà Ìɖáájɔ̀ nìà kɛ. Ɔ muɛ nyuùn ɓɛ́ ɓǎ ɓěɛ̀ hwòɖǒ ké waà dyú ɓě gbo gmɔ̀ìn ɖe. Ɔ mu nyɔ ɓě ɓɛ́ wa seà Gèɖèpɔ́ɔ̀ wuɖu nyuɛń nìɛɛ xwa cɛ́ɛ̀ìn, ɓɛ́ wa kè dyí-sɛ́ɖɛ́ìn-nyɔ̀ ɓěɔ̀ ké fɔ̀nɔ̀-hwòɖǒ dyúáɖò ɓéɖé. Ɔ mu Bounɓoɔ̀ nyɔ ɓěɔ̀ ti dyéìn ɓó ɔ bìì.”
18Ké Zɛ́kɔ̀wáɖádyà diè ma ínjàɔ̀ dyi, ké ɔ ɖá, “Xwɛ̌ ní mu ɖɛ nìà kɛ dyí dyuòɛ̀ nyuùn wɛ̃́? Ḿ ɖǎ nyɛ, ké ní gmààɔ̀ mɔ̀ùn ɖǎ nyɛ ɖekè.”
19Ké ínjàɔ̀ zà ma ɖé wuɖu, ké ɔ ɖá, “Ḿ mɔ̀ Gééɓòɖò. Ḿ nyànà ɓó Gèɖèpɔ́ɔ̀ dyúa dyi. Ɔ ɖoɓo ḿ, ɓɛ́ ḿ ké m̀ gbo wùɖù, ɓɛ́ ḿ ké m̀ bɔ̃̌ nɔ̀mɔ̀ dyíin nìà kɛ gbo cɛ̃. 20Kɛɛ m̀ se ní wuɖuɔ̀ jǎà po jèɛɛ, m̀ se wùɖùɛ̀ ɓɛ́ǐn mu tee ké ɖɛ ɓɛ́ ḿ cɛ̃à kɛɛ kpá ná hwɛ̀. Ɖɛ ḿ cɛ̃à kɛɛ mu kpáùn ɓó ti ɓɛ̀ɖɛ̀ìn dyíɔ̀ mú.”
21Ti ɓɛ́ nyɔ ɓěɔ̀ nì ma Zɛ́kɔ̀wáɖádyà fòèɛ̌n nyɛɛ, wa nì ma hwìɖǐi poɛ̌n ɓó ɖɛ kɔ̃̀ jè ɔ kéà ɖé Gèɖèpɔ́ɔ̀ gbǒɔ̀ mú hwèɖèɛ̌n nì kɛ. 22Ti ɓɛ́ ɔ sí ma kɛɛ, ɔ se ma wa gbo wùɖùɛ̀ ɓɛ́ìn. Púɛɛ, wa dyuòɛ̀ ma dyí kà ɓɛ́ ɔ ɖǎ ma dyí-tɛ̀mɛ̀ìn-ɖɛ̀ ɖò ɖé Gèɖèpɔ́ɔ̀ gbǒɔ̀ mú dyéɛ. Ɔ se ma wùɖùɛ̀ ɓɛ́ìn jèɛɛ, ɔ toìn ma sɔ̃in pū.
23Ti ɓɛ́ Zɛ́kɔ̀wáɖádyà nììn kũ̀à-tìɔ̀ ɖǎ ma ɖé hwɛ̀ɛ, ɔ mu ma ɔ ɓíɖí ɖe. 24Sɔ̀ìn ɓóɛ gboɛɛ, ɔ gmàà Ìɖésébɛ̀ nì ma zùù kɔ̃. Ɔ gã̀ ma ɔ mìɔùn vǐèɛ̌n dyi tee ké ɔ nyu ma dɛ̀nɛ̀ hm̀m̌. Ɔ ɖá, 25“Ɖɛ nìà kɛ mɔ̀ kpeɖeɛ̀-dyíin-nɔ̀mɔ̀-ɖɛ̀, ké Bounɓoɔ̀ ɖǎa ḿ bìì nyu ɓó tiɛ̀ xwíníín. Ɔ ɖǎ dɛ̃-ɖɛ̀ ɓɛ́ ḿ ɓéɖé ma ɖé nyɔǔn ɓě hwìɛ̀ kɛɛ ḿ bũ̌ zà.”
Wa cɛ̃ Jízɛ̀ wóɖó jè
26Ti ɓɛ́ Ìɖésébɛ̀ ɖǎ ma zùù kɔ̃ nì, ké dɛ̀nɛ̀ mɛ̀nɛ̌ìn-ɖò ɖǎ ma ziɛɛ, Gèɖèpɔ́ɔ̀ ɖoɓo ma Gééɓòɖò mɔ̀à ínjàɔ̀ kɛɛ ɖé hwɔɖɔ ɖò nì ma ɖé Gáɖàɖíì-ɓòɖòɔ̀ kɔ̃, kɔ̃̀ nyɛ́nɛ́ mɔ̀ ma Názɛ̀ɖɛ̀ kɛɛ mú. 27Ɔ ɓéɖé ma bɔ̃̌ ɖò, ɓɛ́ ɔ kéɛ ma màa-dyù se toɖo kɔ̃ jè dyuò ɖò nì ɖéɛɛ gbo kpa. Ɔ nì ná kɛɛ, gàa ɖò kɔ̃̀ nyɛ́nɛ́ mɔ̀ ma Jòsé kɛɛ ɖǎ ma ɔ ɓéeín kpɔ̃, ɓɛ́ ɔ ké ma ɔ gmàà jǔ. Jòsé mɔ̀ ma Dèɓéɛ̀ nyúà-dyú ɖò. Màa-dyùɔ̀ nyɛ́nɛ́ mɔ̀ ma Meɖé. 28Ínjàɔ̀ dyi ma Meɖé gbo, ké ɔ ɖá, “M̀ mɔ́ìn ɖéé? Bounɓoɔ̀ nì m̀ gbo, ké ɔ ɖǎ m̀ mana kɔ̃ po.”
29Kɛɛ ɖɛ ɓɛ́ ínjàɔ̀ cɛ̃ ma kà kɛɛ nyùìn ma Meɖé fũ̀à-fṹá mìɔ. Ɔ poìn ma hwìɖǐi ɓó ɖɛ ké ma nyíɔún-zà-wùɖù nìà kɛ xwíníín jǔ kɛɛ jè. 30Ké ínjàɔ̀ cɛ̃ɛ ma ɔ gbo, ké ɔ ɖá, “Mɔ̀ǔn ɖá ɓɛ́ m̀ ké fɛ̃̀ìno, Meɖé, sepóɛɖé Gèɖèpɔ́ɔ̀ hwòɖǒ dèìn m̀ múin. 31Gmɔ̀ nɔ̄, nì mu zùù kɔ̃ nììn, ké nì mu gàa-dyù ɖò wóɖóìn, ké m̀ mɛ jǔìn ɔ Jízɛ̀-nyɛ̀nɛ̀. 32Ɔ mu nyɔ kpa ɖɛ jǔùn, ké wa mu ɔ Ɖɛɓíɔ́ Gèɖèpɔ́ɔ̀ Dyú-gàà ɖáìn. Bounɓo Gèɖèpɔ́ɔ̀ muɛ nyuùn ɓɛ́ ɔ ké nyɔ-wuɖuí-kɔ̃̀-nyɔ̀ jǔ, kà ɓɛ́ Dèɓé kɔ̃̀ nyúà-dyú ɔ jǔà kɛɛ mɔ̀ ma kà nyɔ-wuɖuí-kɔ̃̀-nyɔ̀ kɛ. 33Ké ɔ mu Jékɔ̀ɛ̀ xwíníín-dyù ɓěɔ̀ wuɖuí kɔ̃̀ùn kánáá pū. Ɔ kã́á-ɓòɖòɔ̀ se mánáín hwɛ̀ɛ̌ mu.”
34Hwɛ̀ ké Meɖé diè ma ínjàɔ̀ dyi, ké ɔ ɖá, “Ḿ seà toɖo kɔ̃ jè dyuò wɛɛ, nìí, xwɛ̌ ɖɛa ɓɛ́ìn ná kpáa kɛ́?”
35Ké ínjàɔ̀ cɛ̃ɛ ma ɔ gbo, ké ɔ ɖá, “Zùù Hwɛ̀ǐn-hwɛ̀ǐnɔ̀ mu m̀ kɔ̃ dyiìn, ké Ɖɛɓíɔ́ɔ̀ kpéɔ̀ mu m̀ kɔ̃in ɓáìn. Ɔ jèɛɛ, dyú hwɛ̀ǐn-hwɛ̀ǐn ɓɛ́ nì muà wóɖóìn nyɛɛ, wa mu ɔ Gèɖèpɔ́ɔ̀ Dyú-gàà ɖáìn. 36Gmɔ̀ nɔ̄, wa ɖá nì ɖíí-màà Ìɖésébɛ̀ mɔ̀ ma ɖàà-màà. Ɔ ɖǎ nyɛ dyɛo, kɛɛ ɔ mɔ̀ùn ɖǎ zùù kɔ̃ nì, ké ɔ nyuá dɛ̀nɛ̀ mɛ̀nɛ̌ìn-ɖò. 37Sepóɛɖé ɖɛ ɓɛ́ Gèɖèpɔ́ɔ̀ ké se nyuɛ ɓɛ́ìn nyɛɛ ɖò se nì.”
38Ké Meɖé ɖá, “Dyéɛ, ḿ mɔ̀ Bounɓoɔ̀ gbo-nì-màà-dyù. Kà m̀ nyuà cɛ̃ɛ kɛɛ, kǎà ɔ mɛ nyu ḿ gbo kpáa.” Ké ínjàɔ̀ sɔ̀ ma ɓó ɔ gbo, ké ɔ mu ma.
Meɖé té Ìɖésébɛ̀ gboi
39Sɔ̀ìn ɓóɛ gboɛɛ, Meɖé sɔ̀ ma dyí wàɖà, ké ɔ mu ma hwɔɖɔ ɖò nì ma ɖé Júɖìà Toɖo-ɓòɖòɔ̀ kɔ̃ɛɛ mú. 40Ɔ dyá ma ɖé Zɛ́kɔ̀wáɖádyà ɓíɖí-gbǒǔn, ké ɔ zà ma Ìɖésébɛ̀ nyíɔún. 41Ti Ìɖésébɛ̀ wɔ̃́ ma Meɖé nyíɔún-zà-wùɖùɔ̀ kɛɛ, dyú-pɛ̀ɖɛ̀ɔ̀ túò ma dyi cá ɖé ɔ xwíníín. Ké Zùù Hwɛ̀ǐn-hwɛ̀ǐnɔ̀ dyíìn ma Ìɖésébɛ̀ múin, 42ké ɔ páná ma mú, ké ɔ ɖá, “Mana nì m̀ kɔ̃ ɖé màa séín hwìɛ̀. Mana nì dyú ɓɛ́ nì muà wóɖóìn nyɛɛ kɔ̃. 43Ɖɛ́ kɔ̃̀ jè ɖɛ ɓɛ́ kà nìà kɛ kpáà ḿ gboɛ́, ɓɛ́ ní Bounɓoɔ̀ ɖe dyià ḿ gboi téɛń dyiɛ́? 44Sepóɛɖé ti ḿ wɔ̃́ɔ́ má nì nyíɔún-zà-wùɖùɔ̀ nyɛ̀nɛ̀ɛ̀ kɛɛ, dyú-pɛ̀ɖɛ̀ nìà ḿ xwíníín nyɛɛ kpá múàǔn, ké ɔ túò dyi cá. 45Ké mɔ̀ taɓaà Bounɓoɔ̀ hwìɖǐǐ kà ɓɛ́ ɖɛ ɔ ɖǎà m̀ gbo cɛ̃ɛ mu jǎà kpáùn wɛ̃ɛ, mana nì m̀ kɔ̃.”
Meɖéɛ̀ Gèɖèpɔ́ɔ̀ ɓàìn-wɛ̀ɖɛ̀
46Ké Meɖé ɖá,
“Ní hwòɖǒ-dyùàɔ̀ nyí Bounɓoɔ̀ ɓàìn-ɓàìn.
47Ní zùùɔ̀ kpá múàǔn ɓó Gèɖèpɔ́ɔ̀ mɔ̀à ní Póìn-nyɔ̀ɔ̀ kɛɛ jè,
48sepóɛɖé ɔ ɖǎ mɔ̄ mɔ̀à ɔ gbo-nì-màà-dyùɔ̀ kɛɛ dya gmɔ̀.
Sɔ̀ìn dà ké dyúa muɛɛ, nyɔǔn séín muá ḿ mana-nyɔ̀ ɖáìn,
49sepóɛɖé kpé-ɓéɖé-Gèɖèpɔ́ɔ̀ ɖǎ ḿ bìì ɖɛ vɛ̀nɛ̀-vɛ̀nɛ̀ ɓě nyu.
Ɔ nyɛ́nɛ́ɔ̀ hwɛ̀ mú,
50ké ɔ ɖɛ̀ɓɛ̀ǐn-ɖɛ̀ɓɛ̀ǐnɔ̀ nì nyɔ ɓě ɓɛ́ wa dyé ɔ kpéín nyɛɛ kɔ̃ ɖé xwéɖé-dù deìn dúún ɓěɔ̀ mú.
51Ɖɛ ɓɛ́ ɔ sɔ̃ɔ̀ nyuɛɛ tɛ̀mɛ̀ìn ɔ kpéɔ̀ nyɔǔn dyí.
Ɔ ɖǎ nyɔ ɓě ɓɛ́ wa ɓúáìn wa mìɔùn dyí ɖé waà hwòɖǒɛ̀-gbɔ-po-ɖɛ̀ ɓě múɛɛ dyi ɓeìn.
52Ɔ ɖǎ nyɔ-wuɖuí-kɔ̃̀-nyɔ̀ vɛ̀nɛ̀-vɛ̀nɛ̀ ɓě waà zèè ɓě xwa zà,
ké ɔ ɖǎ nyɔ se ɖɛ kpa ɓěɔ̀ dyií ɖú.
53Ɔ ɖǎa nyu ké nyɔ ɓě kɔ̃̀ wa ké ɖɛ dyéɛɛ ɖǎ ɖɛ nɔ̀mɔ̀ kɔ̃in pàɖǎ dyé,
ké ɔ nyuɛ ké bã-nyɔ̀ ɓěɔ̀ fɔ̀nɔ̀ xwa, ké wa mu.
54-55Ɔ ɖǎ ɔ gbo-nì-dyù Éézùɖùɛ̀ gbo kpá.
Ɔ cɛ̃ɛ ma à ɓǎ nììn ɓǎ ɓěɔ̀ gbo kà ɓɛ́ ɔ mu ma wa wìǐn dyéìn nyɛ, ké ɔ nì ɔ hwìɖǐi ke ɓó kàǔn.
Ɔ nì ɔ hwìɖǐi ɓɛ́ ɔ ké Ééɓòɖòhɛ̃́ɛ̀ kè ɔ xwíníín-dyù ɓěɔ̀ wìǐn dyé kánáá pū.”
56Púɛɛ, Meɖé nyu ma dɛ̀nɛ̀ tã ɖé Ìɖésébɛ̀ gbo, hwɛ̀ ké ɔ mu ma ɔ ɓíɖí ɖe.
Jɔ̃́ɔ́ nyɔ-níɔ-po-nyɔ̀ɔ̀ wóɖó jè
57Ti ɓɛ́ ɖɛ ɓěɛ̀ ɖǎ ma dyi ziɛɛ, púɛɛ, ɔ mɔ̀ǎ ma ti ɓɛ́ Ìɖésébɛ̀ kéá ma ɓíɖíi dyi, ké ɔ wóɖóìn ma gàa-dyù ɖò. 58Ké ɔ mǔè ɓěɔ̀ kè ɔ ɖíí ɓěɔ̀ wɔ̃́ɔ ma kà ɓɛ́ Bounɓoɔ̀ ɖǎ ma ɔ bìì ɖɛ zi dyíin nɔ̀mɔ̀ǔn ɖò nyuɛ, ké wa kèɔ̀ kè nyu ma múà.
59Ti ɓɛ́ dyú-pɛ̀ɖɛ̀ɔ̀ ɖǎ ma wé mɛ̀nɛ̌ìn-tã nyuɛɛ, wa dyi, ɓɛ́ wa ké ma ɔ sàà ɖáɓá. Wa nì ma ɔ Zɛ́kɔ̀wáɖádyà-nyɛ̀nɛ̀ jǔɛń, sepóɛɖé ɔ mɔ̀ ma ɔ ɓǎɔ̀ nyɛ́nɛ́. 60Kɛɛ ɔ ɖe ɖá, “Gbào, ɔ nyɛ́nɛ́ mu Jɔ̃́ɔ́ jǔùn.”
61Ké wa cɛ̃ɛ ma ɔ gbo, ké wa ɖá, “Nì nyɔ ɖò se nyɛ́nɛ́a jǔ.” 62Ké wa dièìn ma ɔ ɓǎɔ̀ sɔ̃ dyi ɓó nyɛ́nɛ́ɔ̀ nyɔ ɓɛ́ ɔ mɔ́ ɓɛ́ wa ké ma dyúɔ̀ jǔìn nyɛɛ jè.
63Ké Zɛ́kɔ̀wáɖádyà zɔ̀ ma ɖɛ-kɔ̃-céèìn-ɖɛ̀ ɖò, ké ɔ céè ma ɓó, ké céè-ɖɛ̀ɔ̀ wuɖu ɖá, “Ɔ nyɛ́nɛ́ mɔ̀ Jɔ̃́ɔ́.” Ké wa séín giniìn ma dyi. 64Ké wàɖà cá kɛɛ, Zɛ́kɔ̀wáɖádyà ɓɛ́ìn ma wùɖùɛ̀ ɖe, ké ɔ ɖú ma Gèɖèpɔ́ɔ̀ ɓàìn kpàǐ. 65Ké fã̀à nyu ma wa mǔè séín ɓěɔ̀ ní. Ké ɖɛ ɓě nìà kɛ bɔ̃̌ ɓeìn ma ɖé Júɖìà Toɖo-ɓòɖòɔ̀ kɔ̃in dà séín, 66ké nyɔǔn séín ɓě ɓɛ́ wa wɔ̃́ ma ɖɛ ɓěa kɛɛ poìn ma ɔ jè hwìɖǐi tee, ké wa ɖá, “Nyɛ́ dyú nìà kɛ mu jǔùn wɛ̃́?” Wa cɛ̃ɛ ma náa, sepóɛɖé Bounɓoɔ̀ kpéɔ̀ nì ma ɔ gbo.
Kpáá-ɖɛ̀ ɓɛ́ Zɛ́kɔ̀wáɖádyà cɛ̃ ma kɛ
67Ké Zùù Hwɛ̀ǐn-hwɛ̀ǐnɔ̀ dyíìn ma dyúɔ̀ ɓǎ Zɛ́kɔ̀wáɖádyà múin, ké ɔ cɛ̃ ma kpáá-ɖɛ̀, ké ɔ ɖá,
68“Ɓěà ɓàìn Bounɓo mɔ̀à Éézùɖùɛ̀ Gèɖèpɔ́ɔ̀ kɛ,
sepóɛɖé ɔ dyi ma ɓɛ́ ɔ ké ma ɔ nyɔ ɓěɔ̀ gbo kpá,
ké ɔ ɖǎ wa gbǎà.
69Ɔ ɖǎ à bìì Póìn-nyɔ̀ ɓéɖé kpé ɖò dyí ɖú,
ɖé ɔ gbo-nì-nyɔ̀ Dèɓéɛ̀ xwíníín-dyù ɓěɔ̀ hwìɛ̀.
70Ɖɛ ɓɛ́ ɔ cɛ̃ zɔ̃̌ɔ̀ dyììn ɖé ɔ kpáá-ɖɛ̀-cɛ̃-nyɔ̀ hwɛ̀ǐn-hwɛ̀ǐn ɓěɔ̀ mú ɖé ti sùà múɛɛ kɛà kɛ̀.
71Ɔ ɖǎa à nyɛ́nɛ́ín ɖáìn, ɓɛ́ ɔ ké à póìn sɔ̀ìn ɖé à mú-nyɛ́-nyɔ̀ séín ɓěɔ̀ xwaún.
72Ɔ ɖá ɔ mu à ɓǎ nììn ɓǎ ɓěɔ̀ wìǐn dyéìn,
ké ɔ dèè-wùɖù hwɛ̀ǐn-hwɛ̀ǐnɔ̀ jè mu ɔ hwìɖǐi nììn.
73Ɔ gboò ma ɔ wuɖuɔ̀ dyí ɖé Ééɓòɖòhɛ̃́ɛ̀ mɔ̀à à ɓǎ nììn ɓǎ ɓěɔ̀ ɖò kɛɛ gbo.
74Ɔ ɖá ɔ mu ma à póìn sɔ̀ìn ɖé à mú-nyɛ́-nyɔ̀ ɓěɔ̀ xwaún,
ké ɔ muɛ nyuùn ɓɛ́ à ké se fɛ̃̀ìn, ɓɛ́ à ké ɔ ɓiè.
75Ké ɔ muɛ nyuùn ɓɛ́ à fɛ̀ɛ̀ɔ̀ ké se kɛɛ ɖò ɓéɖé,
ɓɛ́ à ké dyí sɛ́ɖɛ́ìn ɖé ɔ dyúa, ɖé à fɛ̀ɛ̀-wè séín mú.
76“Ní dyú, wa mu m̀ Ɖɛɓíɔ́ɔ̀ kpáá-ɖɛ̀-cɛ̃-nyɔ̀ ɖò ɖáìn.
Nì mu Bounɓoɔ̀ dyúa muùn, ɓɛ́ m̀ ké ɔ bìì hwìè zà,
77ɓɛ́ m̀ kéɛ ɔ nyɔ ɓěɔ̀ gbo cɛ̃ kà Gèɖèpɔ́ɔ̀ mu waà nàmàǔn ɓěɔ̀ kɔ̃in zĩ̀ìn,
ké ɔ muɛ nyuùn ɓɛ́ wa ké póɛ.
78Sepóɛɖé à Gèɖèpɔ́ɔ̀ ɓéɖé wìì-hwòɖò,
ké ɔ dyé nyɔǔn wìǐn.
Ɔ muɛ nyuùn ɓɛ́ zɔ̃ ké à zɔ̃̀ìn sɔ̀ìn ɖé dyɔún,
79ɓɛ́ ɔ ké nyɔ séín ɓě ɓɛ́ wa cĩ́ ɖé tíe-kpòǔn, ké ɔ nì kà wa nìɔ̌ kà tíe-kpò kpɛ̃̀ múɛɛ ce nyí,
ɓɛ́ ɔ ké à gìɖìǐ-hwìèɔ̀ da zàìn, ɓɛ́ à kéɛ xwíníín nà.”
80Sɔ̀ìn ɓóɛ gboɛɛ, dyúɔ̀ ɓúá ma, ké ɔ nì ma ɓúáuń ɖé zùǔn kánáá pū. Ɔ cĩ́ ma ɖé gbǎùn-fúɖúáɔ̀ kɔ̃ tee ké ɔ nyu ma ti, ké ɔ dyi ma ɓó Éézùɖùɛ̀-nyɔ̀ ɓěɔ̀ dyúa.
Bassa Bible © Bible Society Liberia, 2002.