Ɖúù 2
2
Jízɛ̀ wóɖó jè
(Máfíò 1:18-25)
1Ɓó tia ɓaɖaa, Síízɛ̀ Àgɔ́sɔ̀ɖɔ̀ tò ma wuɖu dà séín ɓɛ́ nyɔ séín ɓě nìà ɖé Wóɖóùn-ɓòɖòɔ̀ kɔ̃ɛɛ ké wa nyɛ́nɛ́ ɓíɖíi po. 2Ti ɓɛ́ nyɛ́nɛ́-ɓíɖíi-po-po kĩ́ín-kĩ́ín nìà kɛ jè kpá ma kɛɛ, Kɔ̀wíɖínìà mɔ̀ ma Síwíɖíà-ɓòɖòɔ̀ nàìn-nyɔ̀. 3Nyɔǔn séín mu ma wa mìɔùn ɓíɖí, ɓɛ́ wa ké ma wa nyɛ́nɛ́ ɓíɖíi po.
4Ɔ jèɛɛ, Jòsé sɔ̀ ma ɖé Názɛ̀ɖɛ̀-hwɔ̀ɖɔ̀ nìà ɖé Gáɖàɖíì-ɓòɖòɔ̀ kɔ̃ɛɛ mú, ké ɔ mu ma ɖé Júɖìà-ɓòɖòɔ̀ kɔ̃, ɖé hwɔɖɔ ɖò ɓɛ́ wa ɖáìn Bɛ́fèɖèhɛ̃́ɛ̀, ɓɛ́ ɔ mɔ̀à Dèɓé ɓíɖí-hwɔɖɔún wɛ̃ɛ mú, sepóɛɖé ɔ mɔ̀ ma Dèɓéɛ̀ nyúà-dyú ɓěɔ̀ ɖò. 5Ɔ kè Meɖé mɔ̀ nyɔ ɓɛ́ ɔ kpɔ̃ ma kà ɓéeín, ké ɔ ɖǎ ma kà zùù kɔ̃ nìɛɛ mu ma, ɓɛ́ wa ké ma wa nyɛ́nɛ́ ɓíɖíi po. 6Ti ɓɛ́ wa nì ma ɖéɛɛ, ɔ mɔ̀ǎ ma ti ɓɛ́ Meɖé ké ma ɓíɖíi dyi, 7ké ɔ wóɖóìn ma ɔ dyú-gàà kĩ́ín-kĩ́ínɔ̀. Ké ɔ bĩìn ma ɔ ɖɔ ɓě dyi, ké ɔ pɛ̃́ìn ma ɔ ɖé nyúà-ɖɛ̀-nyíìn-naínɔ̀ dyi, sepóɛɖé wa mɔ̀ùn se ma pá ɖò dyé ɖé ɖéè-gbòɔ̀ mú.
Ɓáɖáá-dyí-gmɔ̀-nyɔ̀ ɓěɔ̀ kè ínjà ɓěɔ̀ jè
8Ɓó tia ɓaɖaa, ɓáɖáá-dyí-gmɔ̀-nyɔ̀ ɓě xwɛ̃́ìn ma ɓó Bɛ́fèɖèhɛ̃́ɛ̀-hwɔ̀ɖɔ̀ɔ̀ bũ̌in, ké wa nì ma waà ɓáɖáá ɓěɔ̀ dyí gmɔ̀ǔn ɓó máaún-kà ɖé gbǎùn-fúɖúáɔ̀ kɔ̃. 9Ké Bounɓoɔ̀ ínjà ɖò wóɖóìn ma wa dyí, ké Bounɓoɔ̀ dĩ́ín-dĩ̀ìnɔ̀ fã̀ìn ma wa ɖei. Ké wa zi ma fɛ̃̀ǐn mìɔ, 10kɛɛ ínjàɔ̀ cɛ̃ɛ ma wa gbo, ké ɔ ɖá, “Ɓě ɓɔ́ fɛ̃̀ìn. Sepóɛɖé ḿ dyà ɓě bɔ̃̌ nɔ̀mɔ̀ dyíin ɓɛ́ ɔ mɔ̀ múà-bɔ̃̀ vɛ̀nɛ̀ ɓó nyɔǔn séín bììɛ. 11Ɓěɛ̀ Póìn-nyɔ̀ ɖò wóɖó ɖé Dèɓé ɓíɖí-hwɔɖɔún ɓó zɛ̃̌ɛ̀. Ɔ mɔ̀ Kɛ́ɖɛ́ì mɔ̀à Bounɓoɔ̀ kɛ. 12Ké ɔ ɖàɓàìn-ɖɛ̀ ɓɛ́ ɓě mu dyéìn nyɛɛ, ɔ kɛà kɛ̀. Ɓě muɛ dyéìn, ké dyú-pɛ̀ɖɛ̀ ɖò mu ɖɔ ɓě dyi bĩìn, ké ɔ mu ɖé nyúà-ɖɛ̀-nyíìn-naín ɖò dyi pɛ̃́ìn.”
13Wàɖà cá kɛɛ, ínjà kúɖúú ɓě sɔ̀ìn ɖé dyɔún wɛ̃ɛ wóɖó ma xwáɖáún, ké wa kè ínjàɔ̀ dyɛ mɔ̀ɔ̀ nì ma Gèɖèpɔ́ɔ̀ ɓàǐn, ké wa ɖá,
14“Ɓàìn-ɓàìn mɛ nì Gèɖèpɔ́ɔ̀ nìà ɖé dyɔún wɛ̃ɛ kɔ̃,
ké gìɖìǐ mɛ nì ɓóɖó-kpàɔ̀ kɔ̃ ɖé nyɔǔn ɓě ɓɛ́ ɔ hwòɖǒ dèìn múin nyɛɛ kɔ̃.”
15Ti ɓɛ́ ínjà ɓěɔ̀ sɔ̀ ma ɓó, ké wa mu ma ɖé dyɔún ɖeɛɛ, ɓáɖáá-dyí-gmɔ̀-nyɔ̀ ɓěɔ̀ cɛ̃ìn cɛ̃̀ìn ma gbo, ké wa ɖá, “Ɓěà mu ɖé Bɛ́fèɖèhɛ̃́ɛ̀-hwɔ̀ɖɔ̀ɔ̀ mú, ɓɛ́ ɓěà ké ɖɛ ɖǎà kpá, ké Bounɓoɔ̀ ɖǎà à gbo cɛ̃ɛ dyé.”
16Ké wa kpá ma hwìè xwíníín wàɖà, ké wa dyɛ̀ìn ma ɖé Meɖé kè Jòsé dyi, ké wa dyé ma dyú-pɛ̀ɖɛ̀ɔ̀ dyi pɛ̃́ɛ ɖé nyúà-ɖɛ̀-nyíìn-naínɔ̀. 17Ti ɓɛ́ ɓáɖáá-dyí-gmɔ̀-nyɔ̀ ɓěɔ̀ dyé ma dyú-pɛ̀ɖɛ̀ɔ̀ kɛɛ, wa cɛ̃ ma ɖɛ ínjàɔ̀ cɛ̃ ma kà wa gbo ɓá dyúɔ̀ jè dyíɛɛ Meɖé kè Jòsé gbo. 18Nyɔǔn séín ɓě ɓɛ́ wa wɔ̃́ɔ ma kɛɛ giniìn ma dyi ɓó ɖɛ ɓě ɓɛ́ ɓáɖáá-dyí-gmɔ̀-nyɔ̀ ɓěɔ̀ cɛ̃ ma kà wa gboɛɛ jè. 19Ké Meɖé pɛ̃́ìn ma ɖɛ ɓěa hwìɖǐi, ké ɔ poìn ma wa jè hwìɖǐi mìɔ. 20Ké ɓáɖáá-dyí-gmɔ̀-nyɔ̀ ɓěɔ̀ mu ma ɖe, ké wa kpa ma Gèɖèpɔ́ɔ̀ nyɛ́nɛ́ kɔ̃ wáɖáa, ké wa kpa ma ɔ ɓàìn ɓó ɖɛ séín ɓě ɓɛ́ wa ɖǎ ma wɔ̃́ kè ɓɛ́ wa ɖǎ ma dyéɛɛ jè. Ɖɛ séín ɓěɔ̀ kpá ma kà ínjàɔ̀ nyuɛ ma kà wa gbo cɛ̃ɛ kɛ.
Wa jǔìn Jízɛ̀ nyɛ́nɛ́
21Ti wé mɛ̀nɛ̌ìn-tã ɖǎ ma ziɛɛ, púɛɛ, ɔ mɔ̀ ma ti ɓɛ́ wa ké ma dyú-pɛ̀ɖɛ̀ɔ̀ sàà ɖáɓá, ké wa jǔìn ma ɔ Jízɛ̀-nyɛ̀nɛ̀. Ɔ mɔ̀ nyɛ́nɛ́ ɓɛ́ ínjàɔ̀ jǔìn ma ɔ kĩ́ín hwɛ̀ ké ɔ ɖe dyi ma kà ɔ zùù kɔ̃ nìɛ.
Wa zàìn Jízɛ̀ Gèɖèpɔ́ɔ̀ xwáɖáún ɖé Gèɖèpɔ́ɔ̀ gbǒɔ̀ mú
22Ti ɓɛ́ Jízɛ̀ ɖǎ ma sàà mɛ́ɛ, ɔ mɔ̀ ma ti ɓɛ́ Jòsé kè Meɖé ké ma ɖɛ Mózèɛ̀ gmaɔ̀ cɛ̃ ma kɛɛ nyu. Ɔ mɔ̀ ɖɛ ɓá wa mìɔùn mú hwɔ jè dyíɛ. Ɔ jèɛɛ, wa kpa ma dyúɔ̀ ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ɓɛ́ wa ké ma ɔ Bounɓoɔ̀ xwáɖáún zàìn. 23Ɖɛ céè ɖé Bounɓoɔ̀ gma-cèè-ɖɛ̀ɔ̀ múɛɛ kɛà kɛ̀. Ɔ ɖá, “Nyíɔ́-dyù-gàà séín ɓɛ́ wa wóɖó ɖé Éézùɖùɛ̀-nyɔ̀ ɓěɔ̀ xwíníín nyɛɛ, wa mɛ zàìn wa Bounɓoɔ̀ xwáɖáún.” 24Wa mu ma, ɓɛ́ wa ké ma Bounɓoɔ̀ gbo sáa zà ɖekè, kà ɓɛ́ ɔ gma-cèè-ɖɛ̀ɔ̀ nyuà cɛ̃ɛ kɛ. Ɔ ɖá, “Wa mɛ tò gbúɛ́-kpò sɔ̃́, mɔɔ póo-póo-kpò sɔ̃́.”
25Ɓó tia ɓaɖaa, gàa ɖò nì ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ké ɔ nyɛ́nɛ́ mɔ̀ ma Símìɔ̀. Ɔ mɔ̀ ma dyí-sɛ́ɖɛ́ìn-nyɔ̀, ké ɔ ku dúún ɓó Gèɖèpɔ́ɔ̀ ɓiè jè. Ɔ nì ma Éézùɖùɛ̀-nyɔ̀ ɓěɔ̀ pó-póɔ̀ fòèɛ̌n. Zùù Hwɛ̀ǐn-hwɛ̀ǐnɔ̀ nì ma ɔ kɔ̃. 26Zùù Hwɛ̀ǐn-hwɛ̀ǐnɔ̀ tɛ̀mɛ̀ìn ma ɔ dyí kà ɓɛ́ ɔ se ma mɛ́ɛ mu, ɓɛ́ ɔ ké ma Kɛ́ɖɛ́ì ɓɛ́ Bounɓoɔ̀ ɖá ɔ mu ma kà tòùn wɛ̃ɛ dyé hwɛ̀ kɛ. 27Ti ɓɛ́ dyú-pɛ̀ɖɛ̀ mɔ̀à Jízɛ̀ kɛɛ nyɔ ɓěɔ̀ kpa ma ɔ ɖé Gèɖèpɔ́ɔ̀ gbǒɔ̀ mú, ɓɛ́ wa ké ma ɖɛ ɓɛ́ gma-cèè-ɖɛ̀ɔ̀ ɖá wa mɛ nyu ma kɛ nyuɛɛ, Zùùɔ̀ nyuɛ ké Símìɔ̀ dyi ma ɖé. 28Ké Símìɔ̀ ɖú ma dyúɔ̀ dyí, ké ɔ po ma Gèɖèpɔ́ɔ̀ zùo, ké ɔ ɖá,
29“Bounɓo, m̀ ɖǎ nì nyɛ́nɛ́ín-ɖáìn-ɖɛ̀ɔ̀ nyu ɓó kàǔn.
M̀ mɛ wɔ̃́ ɓɛ́ mɔ̄ mɔ̀à nì gbo-nì-nyɔ̀ɔ̀ kɛɛ ké gìɖìǐ mú mùìn.
30-31Sepóɛɖé ḿ mìɔùn nììn dyéɖéɔ̀ ɖǎ nì pó-pó ɓɛ́ m̀ ɖǎà ti dyéìn ɖé ɓóɖó-dù kò-kò séín dyúa kɛɛ dyé.
32Ɔ mɔ̀ ce ɓɛ́ ɔ ké nì hwìèɔ̀ ɓóɖó-dù kà kò ɖò ɓěɛ̀ nyɔ ɓěɔ̀ da zàìn,
ɓɛ́ ɔ ké nì nyɔ ɓě mɔ̀à Éézùɖùɛ̀-nyɔ̀ ɓěɔ̀ kɛɛ dĩ́ín-dĩ̀ìn nyí.”
33Ti ɓɛ́ Símìɔ̀ cɛ̃ ma ɖɛ ɓě ɓá dyúɔ̀ jè dyíɛɛ, dyúɔ̀ ɖe kè ɔ ɓǎ giniìn ma dyi. 34Ké Símìɔ̀ po ma wa mana kɔ̃, ké ɔ cɛ̃ɛ ma Meɖé mɔ̀à dyúɔ̀ ɖe kɛɛ gbo, ké ɔ ɖá, “Gmɔ̀ nɔ̄, Gèɖèpɔ́ɔ̀ ɖǎ dyú nìà kɛ gã, ɓɛ́ ɔ kéɛ nyu ɓɛ́ Éézùɖùɛ̀-nyɔ̀ ɓáún-ɓáún ké ɓuɖu, ɓɛ́ ɓáún-ɓáún ké dyí sɔ̀. Ɔ mu ɖàɓàìn-ɖɛ̀ ɓɛ́ nyɔ ɓáún-ɓáún mu ɖei wùɖùìn nyɛɛ jǔùn. 35Ɖé hwìè nìà kɛ múɛɛ, nyɔ ɓěɔ̀ mu waà hwìɖǐi-poìn-ɖɛ̀ ɓɛ́ wa gàìn nyɛɛ nyɔǔn dyí tɛ̀mɛ̀ìn. Ké wìì ɓɛ́ ɔ nì kà gàsíà nìà kɛɛ mu m̀ mìɔùn nììn hwòɖǒ-dyùàɔ̀ fíèìn.”
36Ɓó tia ɓaɖaa, kpáá-ɖɛ̀-cɛ̃-màà ɖò nì ma ɓó. Ɔ nyɛ́nɛ́ mɔ̀ ma Aná. Ɔ mɔ̀ ma Fànúè ɓɛ́ ɔ mɔ̀ ma Ásàà xwéɖé-dùɔ̀ nyɔ ɖòɛɛ dyú-màà. Ɔ mɔ̀ǎ ma nyɔ sùà. Ɔ kpɔ̃ zɔ̃̌ɔ̀ dyú-ɓǎ dyi, ké ɔ kèɔ̀ kè cĩ́ ma ɓó zɔ̃ mɛ̀nɛ̌ìn-sɔ̃́ xwíníín, ké ɔ dyú-ɓǎɔ̀ mɛ́ ma. 37Ɔ mɔ̀ ma jɔ̌ɔ̀-màà, ké ɔ mɔ̀ǎ ma zɔ̃ kpáɖá-nyɔ hĩinyɛ sè hĩinyɛ. Ɔ ní hwɛ̀ ma Gèɖèpɔ́ɔ̀ gbǒɔ̀ múin. Ɔ ɓiè ma Gèɖèpɔ́ɔ̀ tee ɓó máaún kè dyóɖóaún. Ɔ hwèɖè ma wɔ̃ kɔ̃, ké ɔ ɓaà ma. 38Ɓó ti déínɔ̀ ɓaɖaa, ɔ dyi ma, ké ɔ po ma Gèɖèpɔ́ɔ̀ zùo. Ké ɔ cɛ̃ ma dyúɔ̀ jè nyɔ séín ɓě ɓɛ́ wa nì ma fòèɛ̌n ɓɛ́ Gèɖèpɔ́ɔ̀ ké ma Jùɖúsɛ̀ɖɛ̀ìn-hwɔ̀ɖɔ̀ɔ̀ gbǎà kɛɛ gbo.
Wa kɔ́ìn Názɛ̀ɖɛ̀-hwɔ̀ɖɔ̀ɔ̀ mú ɖe
39Ti ɓɛ́ Meɖé kè Jòsé ɖǎ ma ɖɛ séín ɓě ɓɛ́ Bounɓoɔ̀ gmaɔ̀ cɛ̃ maa nyuɛ hwɔɛɛ, wa kɔ́ìn ma ɖe ɖé wa mìɔùn ɓíɖí Názɛ̀ɖɛ̀-hwɔ̀ɖɔ̀ɔ̀ mú, ɖé Gáɖàɖíì-ɓòɖòɔ̀ kɔ̃. 40Ké dyúɔ̀ ɓúá ma, ké ɔ ku ma dyi. Ké ɔ zi ma hwòɖǒ fɔ̀nɔ̀ǔn mìɔ. Gèɖèpɔ́ɔ̀ mana nì ma ɔ kɔ̃.
Jízɛ̀ nì ɖé Gèɖèpɔ́ɔ̀ gbǒɔ̀ mú
41Ɓó tia ɓaɖaa, Jízɛ̀ɛ̀ wóɖóìn-nyɔ̀ ɓěɔ̀ mu ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú ɓó Zĩ̀ìn-Kɔ̃in-hwɔ̀ɔ̀ jè, ɓó zɔ̃ séín xwíníín. 42Ti ɓɛ́ Jízɛ̀ mɔ̀ ma zɔ̃ ɓaɖa-bùè sè sɔ̃́ɛɛ, wa mu ma ɖé hwɔɔ̀ kɔ̃ kà wa ní ɓɔ́à nyuɛ kɛ. 43Ti ɓɛ́ hwɔɔ̀ ɖǎ ma dyi ziɛɛ, wa mu ma ɖe. Kɛɛ Jízɛ̀ mɔ̀ ma kà gàa-dyù-gbɔ́ɔ́ kɛɛ sè ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú. Ɔ wóɖóìn-nyɔ̀ ɓěɔ̀ seɛ ma dyuò. 44Wa mɔ̀ùn ɖáìn ɔ nì ma nyɔ kúɖúú ɓěɔ̀ hwìɛ̀ pū. Wa nà ma tee ɓó wé dyúáɖò xwíníín, púɛɛ, wa ɖú ma ɔ dyi mɔ́ kpàǐ ɖé waà ɓǎto ɓěɔ̀ kè waà nyɔ ɓěɔ̀ hwìɛ̀. 45Kɛɛ wa se ma ɔ dyé. Ɔ jèɛɛ, wa kpa ma ɔ dyi mɔ́ɔ ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú ɖe. 46Ɓó wéɔ̀ tã nììnɔ̀ xwíníín nyɛɛ, wa dyé ma ɔ ɖé Gèɖèpɔ́ɔ̀ gbǒɔ̀ mú. Ɔ kò ma ɖé nyɔ-ɖɛ-tɛ̀mɛ̀ìn-nyɔ̀ ɓěɔ̀ hwìɛ̀ dyi. Ɔ nì ma waà wuɖu ɓěɔ̀ ɖùǔ gbo tòɛ̌n, ké ɔ nì ma wa dyi dièɛ̌n. 47Nyɔǔn séín ɓě wɔ̃́ ma ɔ wuɖuɔ̀ kɛɛ, wa giniìn ma dyi mìɔ, sepóɛɖé ɔ zà ma ɖé wuɖu nɔ̀mɔ̀ dyíin ɓó hwòɖǒ-fɔ̀nɔ̀-kà. 48Ti ɓɛ́ ɔ nyɔ ɓěɔ̀ dyé ma ɔ kɛɛ, wa giniìn ma dyi mìɔ. Ké ɔ ɖe diè ma ɔ dyi, ké ɔ ɖá, “Ní dyú, ɖɛ́ m̀ nyuà kà à bũ̌ɛ́? Gmɔ̀ nɔ̄, ḿ kè m̀ ɓǎ ɖǎ hwòɖǒ dyií gbǎìn ɓó nì jè, ké à ɖǎ m̀ dyi mɔ́ mìɔ.”
49Ké ɔ cɛ̃ɛ ma wa gbo, ké ɔ ɖá, “Ɖɛ́ kɔ̃̀ jè ɓě mɔ́à ḿ dyiɛ́? Ɓě seɛ dyuò kà ḿ ɓéɖé ɓɛ́ ḿ ké nɔ̄ ḿ Ɓǎ ɓíɖí-gbǒǔn nì kɛɛ̀?” 50Kɛɛ wa se ma ɖɛ ɓɛ́ ɔ cɛ̃ ma kà wa gboɛɛ múin wɔ̃́.
51Ké wa kè Jízɛ̀ mu ma ɖé Názɛ̀ɖɛ̀-hwɔ̀ɖɔ̀ɔ̀ mú ɖe, ké Jízɛ̀ nyu ma wa wuɖu. Ké ɔ ɖe pɛ̃́ìn ma ɖɛ séín ɓěa hwìɖǐi. 52Ké Jízɛ̀ ɓúá ma, ké ɔ fɔ̀nɔ̀-hwòɖǒɔ̀ kpá ma kɔ̃, ké Gèɖèpɔ́ɔ̀ kè nyɔǔn-dyùɛ̀ hwòɖǒ dèìn ma ɔ múin.
Bassa Bible © Bible Society Liberia, 2002.