Matius 3
3
Yohanes ima wusa ʼbiyasi lagike mende etnogo nen kagako lagike wene
(Markus 1:1-8; Lukas 3:1-9, 15-17; Yohanes 1:19-28)
1Esigit diluk kagakukasik oba nen, at Yohanes ima wusa ʼbiyasi lagike mende etnogo, o Yudea o limo akoni dekma etoma wagikesik wene yanggul isasi dogolik, yigit diluk yisi lagike,
2“At nggok mbogot oba mende apma ʼbinanigin etnogo yogondak arat ʼbinanigin. Eti paga, yi weyak ndi weyak kagako lagap mende togot diyalok kinobabut kwalatni o,” yiluk yogisasi lagike. 3Eti yisi lagike paga, at Yesaya Allah wene yogisasi lagike mende etnogo nen yogisasi dogolik,
“Ap omanggi o limo akoni dekma etoma ane wai yisi dogolik,
Iya. Ninewe Endaganggok wisiginmo, kolak panorogo yakik, nggorlo mende mot-mot yakik, yako dogoni o, yiluk waisiligogo,” (Yes. 40:3)
yiluk Yesaya nen yisi lagike etnogo, at Yohanes ebeat wagike. 4Wagikesik, o limo akoni dekma etoma dogolik, wam unta isi mende nggwarogo, iyom yikigik, owado mende nggwarogo, serlok kagarogo yikigik, yiko dogolik kimbiri nau kak, yibirla ninggik, simuk ambusu onggama mende ninggik, kagako lagike. 5Esigit diluk werekma, it akoni o kota Yerusalem nen, o propinsi Yudea nen, i Yordan aik obangge etoma taʼbokogonat nen, at oba nandorli waguka. 6Wagukasik nen, yi weyak ndi weyak kagako laguka mende ʼbukalogo togot diyasinem, i Yordan ima wusa ʼbiyasi lagike. 7Esigit diluk kagako werekma, it ap Farisi mende amberek inom, ap Saduki mende emberek inom, inebe dogalegat nen,
“Nit ninomat ima wusa ʼbinanuwak,” yiluk oba wagonem yigit diluk yogisasi lagike,
“Kit warlo mbelal nen endago mende yomarani! Kit nen Allah akla agaga ambik dagigin etnogo kinoba ʼbisinem lo erlok lugun yiluk ta nen kusumbi yokisekemo? Erlok dek o. 8Eti paga, kanakla ebet diluk, weyak kagako lagap mende togot diyalok, kinobabut eberogonat kwalaga yiluk enggagat asuwak nen mot-mot kagako dogoni o. 9Nen, kinakla nen,
Abraham eti nit ninombae, yiluk ambagup o. At Allah nen Abraham aʼburi negen nggit yi mende erlok kagasusak o. 10O erlo dombok enggen pano mende yikidek kalok, mukugo kindumo laʼbigiluk andugun o omanggen oba mbakmbaksek mondok werek o,” yiluk yogisasike. 11Esigit diluk yogisasikesik omanggi men yogisasike,
“Kit weyak kagako lagap mende togot diyalok kinobabut eberogonat kwalaga yiluk, an nebe elege nobatne dek mende nen ima wusa ʼbinagaligogo o. Mende, at nggok
obatneyak mende yabunggane wisigin o. At ebe nggok obatneyak eti paga, an nebe elege mende nen iyok agut yugu mende wolok lausak erlok dek o. At nen ima wusa ʼbinagu kak, Allah Agurengge inom, kindu inom, kinoba wusa ʼbi wisigin o. 12Gandum enggen abubulengge pulusak ake san oba pulogo laʼbigin mende, at indewerek mende inggimo werek o. Nggarelusak oba ndak-ndak asi wago kalok, pano mende kalok, nggarelogo ʼbiligogoma panoma ʼbigik, abubulengge kalok kindu nagulusak dekma etnogo paga laʼbiyigik, kagasigin o,” yiluk yogisasike.
Yohanes nen Yesus ima wusa ʼbisike wene
(Markus 1:9-11; Lukas 3:21-22)
13Yohanes nen wene etnogo yogisasi werekma, at Yesus ima wusa ʼbuwagaluk o Galilea nen Yohanes i Yordan aik oba werekma oba wagikemo, 14at Yohanes nen,
“An nen ima wusa ʼbagusak erlok dek o. Kat nen an ima wusa ʼbanusak mende, an noba wagan yoma re!” yiluk yogokike. 15Yogokikemo, at Yesus nen,
“An wusa ʼbanusagat o. At Allah nenat yi ake ndi ake esigit diluk kagasuwagaluk ambiligogo ndak-ndagat kagat nabusak o,” yiluk yisikemo,
“E o,” yiluk 16ima wusa ʼbisikemo ʼbukakogo dagi wagonem, mbogot nggagukogo Allah Agurengge sewe merpati yogik negen, at oba labi wusa wagonem ilenggen kasike. 17Oba denggek yi wagikemo, Allah ane mbogot oba nen,
“An naʼbut nendainggen kunik dogolik noba kondok yiligogo ebe etiat o,” yiluk ane wusa ʼbi wagike.
